Uutondwe otawu ka hula po sigo aluhe!
Nonando otu ethe po uutondwe, itatu vulu okuthiminika yalwe ye wu ethe po. Aantu mboka kaaye na shoka ya ninga, onkee ngaa taya tsikile nokukala ye tondike. Ihe olye nduno ta vulu okuhulitha po uutondwe sigo aluhe?
Jehova Kalunga oye owala ta vulu okuhulitha po uutondwe thiluthilu mboka tu wete kunena. Shoka osho naanaa Ombiimbeli yu uvaneka kutya osho ta ka ninga. — Omayeletumbulo 20:22.
KALUNGA OTA KA HULITHA PO SHOKA HASHI ETITHA UUTONDWE
1. SATANA ONDIYAPOLI. Satana, omuyengeli omunashipotha oye omweetithi guutondwe mboka tu wete kunena. Kalunga ota ka hanagula po Satana nosho wo ayehe mboka ye tonde yalwe ngaashi ye. — Episalomi 37:38; Aaroma 16:20.
2. UUYUNI WASATANA WA KOLOKOSHA OWU UDHA UUTONDWE. Kalunga ota ka hulitha po kehe shimwe shoka tashi humitha komeho uutondwe, mwa kwatelwa aanapolotika nosho wo aawiliki yomalongelokalunga. Ota ka hulitha po ishewe aanangeshefa mboka ye na olwiho, ye na uulingilingi nohaya kengelele yalwe. — 2 Petrus 3:13.
3. OKWAAGWANENENA KWAANTU. Ombiimbeli otayi yelitha kutya aantu ayehe oya thigulula okwaagwanenena, oshoka oye na egamo lyokudhiladhila shoka sha puka nokuninga shoka sha puka. (Aaroma 5:12) Egamo limwe ndyoka tu na, okukala tu tonde yalwe. Kalunga ote ke tu kwathela tu sinde egamo lyokwaagwanenena, opo pwaa kale we nando uutondwe. — Jesaja 54:13.
OMBIIMBELI OYU UVANEKA KUTYA MUUYUNI ITAMU KA KALA WE UUTONDWE
1. ITAMU KA KALA OMUNTU TA NINGILWA OKWAANUUYUUKI. Uukwaniilwa waKalunga owo tawu ka pangela ombanda yevi. Otawu ka pangela okuza megulu notawu ka e ta uuyuuki tawu kalelele. (Daniel 2:44) Uutondwe nokatongo, otawu ka hula po. Kalunga ota ka kutha po okwaanuuyuuki akuhe hoka aantu haya ningilwa kunena. — Lukas 18:7.
2. KEHE GUMWE OTA KA KALA NOMBILI. Kapu na gumwe ta ka mona iihuna omolwelongithonkondo nenge iita. (Episalomi 46:9) Evi otali ka kala ehala lyombili oshoka aantu ayehe mboka taya ka kala kombanda yevi, otaya ka kala aanambili. — Episalomi 72:7.
3. KEHE GUMWE OTA KA KALA MONKALO OMBWANAWA SIGO ALUHE. Aantu ayehe otaya ka kala ye holathane. (Mateus 22:39) Kapu na ngoka ta ka mona iihuna, nokuli niinima iiwinayi itaye ke yi dhimbulukwa we. (Jesaja 65:17) Pethimbo ndyoka, uutondwe wopamuhoko itawu ka kala po we, oshoka aantu ‘otaa ka mona uulinawa nombili.’ — Episalomi 37:11.
Mbela ino hala oku ka kala muuyuni wa tya ngawo? Nokuli nongashingeyi aantu oyendji oya kwathelwa komakotampango gOmbiimbeli ya ethe po uutondwe. (Episalomi 37:8) Shoka osho tashi ningwa kOonzapo dhaJehova omamiliyona muuyuni awuhe. Nonando odha za momihoko nomomaputuko ga yoolokathana, odhi holathane nodha hangana. — Jesaja 2:2-4.
Oonzapo dhaJehova otadhi ka kala dha nyanyukwa oku ku lombwela nkene hadhi idhidhimikile okwaanuuyuuki nokuningwa okatongo. Shoka to ilongo, otashi ku kwathele wu ethe po uutondwe nowu kale wu na ohole. Oto ki ilonga wo nkene wu na okuulukila ohole nokuli naamboka ihaaye ku pandula nenge ye ku tonde. Oshizemo, oto ka kala wa nyanyukwa ngashingeyi, nekwatathano lyoye ewanawa nayalwe otali ka ende tali hwepopala. Kakele kaashono, oto ki ilonga wo nkene to vulu okukala kohi yUukwaniilwa waKalunga hoka itaaku ka kala uutondwe. — Episalomi 37:29.