Kala wu shi kutya Jehova oku ku hole

1. Omolwashike wa tokola okulongela Jehova monkalamwenyo yoye ayihe? (Tala wo ethano.)

MBELA oto dhimbulukwa esiku ndyoka wa li wi iyapulile Jehova megalikano? Owa li wa ningi etokolo ndyoka molwaashoka owi ilongo kombinga ye, nokukala wu mu hole. Owa uvanekele Jehova kutya oto ka pititha komeho ehalo lye monkalamwenyo yoye noto ka tsikila okukala wu mu hole nomutima goye aguhe, nomwenyo goye aguhe, nomadhiladhilo goye agehe nosho wo noonkondo dhoye adhihe. (Mark. 12:30) Okuza tuu kesiku ndyoka, ohole yoye yoku mu hola oya kala nokukoka. Ihe mbela oto ka yamukula ngiini, ngele gumwe okwe ku pula kutya, “Owu hole ngaa shili Jehova?” Nokaapu na okukwatakwata, oto ka yamukula to ti: “Ondi mu hole unene shi vulithe kehe gumwe.”

2-3. Jehova okwa hala tu kale tu na uushili wuni, noshike tatu ka kundathana moshitopolwa shika? (Jeremia 31:3)

² Mbela oto ka yamukula ngiini, ngele gumwe okwe ku pula ta ti: “Owu shi shi ngiini kutya Jehova oku ku hole?” Mbela oto ka kakadhala okuyamukula, molwaashoka to dhiladhila kutya ku na oshilonga nosho wo kutya Jehova ke ku hole? Omumwameme ngoka a putudhwa kaavali aakwanyanya okwa ti: “Ondi shi kutya ondi hole Jehova, nokandi na omalimbililo kombinga yaashoka. Olundji shoka handi kala ndi na omalimbililo musho, osho kutya mbela Jehova oku hole ndje ngaa?” Ihe mbela Jehova oku ku uvitile lela ngiini?

³ Jehova okwa hala wu kale wa tompwa kutya oku ku hole. (Lesha Jeremia 31:3.) Uushili owo kutya Jehova oye e ku nanena kuye. Sho we mu iyapulile nokuninginithwa, okwe ku pe oshinima shi na ongushu lela, ano e ku ulukile ohole ihaayi lunduluka. Shoka osha hala kutya oku ku hole nohole yomuule noke na esiku e ku thige po. Ohole ndjono ohayi mu inyengitha a tale ko aalongeli ye aadhiginini ye li ‘ye mwene,’ nangoye wa kwatelwa mo. (Mal. 3:17) Jehova okwa hala wu kale wu shi kutya oku ku hole, ngaashi naanaa a li e hole omuyapostoli Paulus, ngoka a li a popi nomukumo a ti: “Oshoka onda tompwa kutya nduno eso, omwenyo, aayengeli, omapangelo, iinima, mbyoka yi li ko ngashingeyi naambyoka tayi ke ya, oonkondo, uule wopombanda, nenge uule womevi, nenge sha shilwe shomeshito, itayi vulu oku tu topola ko kohole yaKalunga.” (Rom. 8:38, 39) Moshitopolwa shika, otatu ka kundathana kutya omolwashike tu na okukala twa tompwa kutya Jehova oku tu hole nosho wo shoka tashi vulu oku tu kwathela tu ninge ngaaka.

OMOLWASHIKE TWA PUMBWA OKUKALA TU NA UUSHILI KUTYA JEHOVA OKU TU HOLE?

4. Ongiini tatu vulu okukondjitha limwe lyomomakotokelo gaSatana?

⁴ Ngele otwa taamba ko uushili mboka kutya Jehova oku tu hole, otatu ka vula okukondjitha limwe ‘lyomomakotokelo’ gaSatana. (Ef. 6:11) Satana ota ka ninga kehe shoka ta vulu, opo e tu ningithe kaatu longele Jehova. Omukalo gumwe moka Satana he tu kotokele omokuhumitha komeho iifundja kutya Jehova ke tu hole. Ino dhimbwa kutya Satana oha kongo oompito tadhi opalele opo e tu ponokele. Olundji ohe tu ponokele ngele twa nkundipala, tashi vulika uuna twa gwililwa po pamaiyuvo omolwoonkalo dhomonakuziwa, omashongo ngoka tatu piti mugo ngashingeyi nenge uuna tatu ipula kombinga yonakuyiwa. (Omayel. 24:10) Satana okwa fa onime ndjoka tayi kongo oshihakanwa shoka itaashi vulu okwiigamena. Onkene oha kambadhala okulongitha oompito ndhoka sho twa gwililwa po pamaiyuvo, e tu shololithe. Ngele otwa kala twa tompwa kutya Jehova oku tu hole, otatu ka kala twi ilongekidha ‘okukondjitha’ Satana, molwaashoka otu shi omakoto ge. — 1 Pet. 5:8, 9; Jak. 4:7.

5. Omolwashike sha simana kutse okukala tu uvite kutya Jehova oku tu hole nokwe tu lenga?

⁵ Ngele otwa kala tu shi kutya Jehova oku tu hole, otatu ka hedha popepi naye. Tala kutya omolwashike tatu tile ngaaka. Jehova okwe tu shita hatu vulu okuulukila yalwe ohole nokukala tu holike wo kuyalwe. Uuna gumwe e tu ulukile kutya oku tu hole, ohashi tu inyengitha wo tu kale tu mu hole. Onkee uuna tu uvite kutya Jehova oku tu hole nokwe tu lenga, ohashi tu inyengitha natse tu kale tu mu hole unene. (1 Joh. 4:19) Ngele ohole yetu yoku mu hola oya koko, nohole ye yoku tu hola otayi ka koka. Ombiimbeli otayi tu lombwele sha yela kutya: “Hedheni kuKalunga, ye nota hedha kune.” (Jak. 4:8) Ongiini nduno tatu vulu okukala twa tompwa kutya Jehova oku tu hole?

OSHIKE TASHI VULU OKU TU KWATHELA TU TAAMBE KO UUSHILI KUTYA JEHOVA OKU TU HOLE?

6. Opo wu kale nuushili kutya Jehova oku ku hole, oto vulu okugalikana kombinga yashike?

⁶ Popya iinima kondandalunde nokugalikana pandjigilile. (Luk. 18:1; Rom. 12:12) Pula Jehova lwiikando esiku kehe, uuna sha pumbiwa, e ku kwathele wu itale ko ngaashi he ku tala ko. Omathimbo gamwe otashi vulika wu kale wu iyuvitile nayi lela, nokukala wu wete oshidhigu okwiitaala kutya Jehova oku ku hole. Ihe dhimbulukwa kutya Jehova omunene e vule omutima gwoye. (1 Joh. 3:19, 20) Oku ku shi nawa e ku vule, noha mono shoka ihoo vulu okumona. (1 Sam. 16:7; 2 Ondjal. 6:30) Onkee ano ino kakadhala ‘oku mu mbumbulila’ omaiyuvo goye, moku mu pula e ku kwathele wu itaale kutya oku ku hole. (Eps. 62:8) Opo nduno kala metsokumwe nomagalikano goye, mokutula miilonga omaetopo taga landula.

7-8. Omapisalomi otage tu shilipaleke ngiini kutya Jehova oku tu hole?

⁷ Kala wi inekela shoka Jehova ta ti. Okwa nwetha mo aanyoli yOmbiimbeli ya popye oshili kombinga ye. Tala komukalo gumwe nkene David a li a hokolola kombinga yaJehova momukalo omwaanawa, sho a ti: “Omuwa oku li popepi naamboka ya dhengwa pevi; ota hupitha mbo ya kanitha etegameno.” (Eps. 34:18) Uuna wa gwililwa po, otashi vulika wu kale wu uvite wu li ongoye awike. Ihe Jehova okwa uvaneka kutya momathimbo ga tya ngawo, oku li popepi nangoye, molwaashoka oku shi kutya owa pumbwa ekwatho lye shi vulithe nale. David okwa nyola ishewe mepisalomi limwe a ti: “Omahodhi gandje owe ga pungula.” (Eps. 56:8) Jehova oha kala e ku wete uuna wa yemata nowu li muuwehame. Oku na ko nasha lela nangoye noku uvite uuwehame mboka to piti muwo. Oha pungula omahodhi goye, oku shi popya pathaneko, nokwe ga lenga ngaashi naanaa omweendanandjila ha kala e wete omeya ngoka ge li mokandini ke ga simana. Episalomi 139:3 otali ti: “Ashihe shoka te ningi, ou shi wete.” Jehova oku wete ashihe shoka to ningi, ihe oha gandja eitulomo kuuwanawa mboka to longo. (Heb. 6:10) Omolwashike mbela? Omolwaashoka okwa lenga oonkambadhala kehe to ningi wu mu nyanyudhe.a

⁸ Okupitila mOohapu dhe dha nwethwa mo, ndhoka hadhi tu hekeleke, Jehova okwa fa ta ti: “Onda hala wu kale wu shi kutya ondi ku hole unene nondi na ko nasha nangoye.” Ihe ngaashi twi ilongo metetekelo, Satana ota humitha komeho iifundja mbyoka kutya Jehova ke ku hole. Onkee uuna wa limbililwa ngele Jehova oku ku hole ngaa, mwena po kashona, e to ipula ngeyi, “Mbela otandi ki itaala ‘he yiifundja’ nenge ‘oKalunga koshili’?” — Joh. 8:44; Eps. 31:5.

9. Eshilipaleko lini Jehova ta gandja kwaamboka ye mu hole? (Eksodus 20:5, 6)

⁹ Dhiladhila kunkene Jehova u uvitile mboka ye mu hole. Natu ka taleni kwaashoka Jehova a li a lombwele Moses nosho wo Aaisraeli. (Lesha Eksodus 20:5, 6.) Jehova okwa uvaneka kutya ota ka tsikila okuulukila mboka ye mu hole ohole ihaayi lunduluka. Molwaashoka Jehova omudhiginini, otatu vulu okukala tu na uushili kutya oku na okushunithila aapiya ye ohole ndjoka haye mu ulukile. (Neh. 1:5) Onkee ano, ngele omathimbo gamwe owa pumbwa eshilipaleko kutya Jehova oku ku hole, kankama po, e to ipula ngeyi, ‘Mbela ondi hole ngaa Jehova?’ Dhiladhila kombinga yaashika: Ngele owu mu hole noto kambadhala okuninga ngaashi to vulu wu mu nyanyudhe, kala wa shilipalekwa kutya oku ku hole noonkondo. (Dan. 9:4; 1 Kor. 8:3) Niitya yimwe, ngele ku na omalimbililo kutya owu hole Jehova, omolwashike wa limbililwa ngele oku ku hole? Kapu na omalimbililo kutya ota kala aluhe e ku hole noke na esiku e ku ethe po.

10-11. Jehova okwa hala wu kale wa tala ko ngiini ekulilo? (Aagalati 2:20)

¹⁰ Tedhatedha kombinga yekulilo. Ekuliloyambo lyaJesus Kristus omagano ga dhenga mbanda ngoka Jehova e tu pa. (Joh. 3:16) Ihe mbela owe ga ninga ngaa omagano goye paumwene? Eeno! Natu ka taleni koshimoniwa shomuyapostoli Paulus. Dhimbulukwa kutya okwa li a yono omayono ga kwata miiti manga inaa ninga Omukriste, nokwa li a pumbwa okutsikila nokukondja nokwaagwanenena kwe. (Rom. 7:24, 25; 1 Tim. 1:12-14) Ihe okwa li a tala ko ekulilo li li omagano gopaumwene ga za kuJehova. (Lesha Aagalati 2:20.) Dhimbulukwa kutya Jehova okwa li a nwetha mo Paulus a nyole oohapu ndhoka. Iinima ayihe mbyoka ya nyolwa mOmbiimbeli oya nyolwa nelalakano lyoku tu longa. (Rom. 15:4) Oohapu dhaPaulus otadhi ulike nkene Jehova a hala wu kale wa tala ko ekulilo, ano li li omagano gopaumwene ngoka Jehova e ku pa. Ngele owa kala wa tala ko ekulilo momukalo ngono, oto ka kala wa tompwa kutya Jehova oku ku hole pauhandimwe.

¹¹ Otatu pandula Jehova, sho a tumu Jesus kombanda yevi e tu sile. Ihe etompelo lilwe kutya omolwashike Jesus i ile kombanda yevi, olyo okulombwela yalwe oshili kombinga yaKalunga. (Joh. 18:37) Oshili ndjoka oya kwatela mo omukalo moka Jehova e hole oyana.

NKENE JESUS HE TU KWATHELE TU TAAMBE KO UUSHILI KUTYA JEHOVA OKU TU HOLE

12. Omolwashike tatu vulu okwiitala shoka Jesus a popi kombinga yaJehova?

¹² Sho Jesus a li kombanda yevi, okwa li ha kala a nyanyukwa okulombwela yalwe oshili kombinga yaJehova. (Luk. 10:22) Otatu vulu okwiitaala shoka Jesus a popi kombinga yaJehova, molwaashoka okwa kala pamwe naJehova megulu uule womimvo omabiliyona, manga inee ya kombanda yevi. (Kol. 1:15) Molwaashoka Jesus okwa kala pamwe naHe ethimbo ele, oku shi kutya Jehova oku hole noonkondo oyanamati noyanakadhona aadhiginini. Jesus oha kwathele ngiini yalwe ya taambe ko uushili kutya Kalunga oku ya hole?

13. Oshike shoka Jesus a hala tu kale tu shi kombinga yaJehova?

¹³ Jesus okwa hala tu tseye kutya Jehova oha kala lela e tu uvitile ngiini. MOmavaangeli, Jesus okwa popi Jehova e li “Tate” lwiikando yi vulithe 160. Uuna ta popi naalanduli ye, okwa li ha longitha omautumbulilo ngaashi: “Ho yeni,” nenge “Ho yeni gwomegulu.” (Mat. 5:16; 6:26) Manga Jesus inee ya kombanda yevi, aapiya yaKalunga aadhiginini oya li haye mu ithana ‘Omunankondoawike,’ ‘Omukombandambanda,’ ‘Omushiti Omunenenene’ nosho wo omadhinasimaneko galwe ga fela ko. Ihe olundji Jesus okwa li hi ithana Jehova ‘Tate.’ Uutumbulilo mboka otawu ulike kutya Jehova okwa hala aapiya ye ya kale yu uvite ya hedha popepi naye, ngaashi owala okanona haka kala ku uvite ka hedha popepi nahe omunahole. Natu ka konakoneni iiholelwa iyali moka Jesus a longitha oshitya “Tate.”

14. Jesus okwa ulike ngiini kutya kehe gumwe gwomutse oku na ongushu momeho gaTate yetu gwomegulu? (Mateus 10:29-31) (Tala wo ethano.)

¹⁴ Tango, natu ka taleni koohapu dhaJesus ndhoka tadhi adhika muMateus 10:29-31. (Lesha.) Omanza uudhila uushona mboka kaawu na esiku wu longele Jehova nokukala wu mu hole. Ihe Tate yetu okwa lenga enza kehe nohe shi ndhindhilike nokuli uuna lya gwile pevi. Onkee ano osha yela kutya okwa lenga lela noku na ko nasha nomulongeli gwe kehe omudhiginini, ngoka te mu longele ti inyengithwa kohole! Jesus okwa ti wo kutya Tate yetu oku shi kutya kehe gumwe gwomutse oku na omafufu ga ngapi komutse. Ngele Jehova oku shi niinima iishona kombinga yetu, otatu vulu okukala nuushili kutya oku na ko nasha lela natse. Osha yela kutya Jesus okwa hala kehe gumwe gwomutse a taambe ko uushili mboka kutya otu na ongushu momeho gaTate yetu gwomegulu.

15. Oohapu dhaJesus ndhoka tadhi adhika muJohannes 6:44, otadhi ku lombwele shike kombinga yaHo gwomegulu?

¹⁵ Natu taleni koshiholelwa oshitiyali moka Jesus a longitha oshitya “Tate.” (Lesha Johannes 6:44.) Ho gwomegulu oye mwene e ku nanena koshili. Omolwashike e ku nanene koshili? Omolwaashoka okwa mona kutya owu na omaukwatya omawanawa. (Iil. 13:48) Sho Jesus a popi oohapu ndhoka dhi li muJohannes 6:44, otashi vulika a li a ukitha koohapu ndhoka Jehova a popi muJeremia 31:3. Jehova okwa li a lombwele oshigwana she a ti: ‘Otandi mu hilile kungame nohole yaaluhe.’ (Jer. 31:3; yelekanitha naHosea 11:4.) Dhiladhila kutya shoka osha hala okutya shike. Tate yetu gwomegulu ota tsikile okukala e wete omaukwatya goye omawanawa ngoka wu na.

16. (a) Oshike shoka Jesus te tu lombwele, nomolwashike twa pumbwa oku shi itaala? (b) Ongiini to vulu okukala wa tompwa kutya Jehova oku li Tate ngoka wa pumbwa? (Tala oshimpungu “Tate ngoka atuheni twa pumbwa.”)

¹⁶ Sho Jesus a popi Jehova e li Tate yetu, okwa li a fa te tu lombwele ta ti: “Jehova ke shi owala Tate gwandje, ihe oTate gweni wo. Otandi ku shilipaleke kutya oku ku hole noku na ko nasha nangoye lela pauhandimwe.” Onkee uuna omathimbo gamwe, wu uvite ku na uushili ngele Jehova oku ku hole ngaa, oto vulu okumwena po nokwiipula kutya, ‘Mbela ondi na okwiinekela oohapu dhOmwana ngoka e shi nawa Tate yetu noha popi aluhe oshili?’ — 1 Pet. 2:22.

TSIKILA OKUKALA WA TOMPWA KUTYA JEHOVA OKU KU HOLE

17. Omolwashike twa pumbwa okukala twa tompwa kutya Jehova oku tu hole?

¹⁷ Otwa pumbwa okukala twa tompwa kutya Jehova oku tu hole. Ngaashi twi ilonga metetekelo, omutondi gwetu Satana omunamakoto ota ningi ngaashi ta vulu e tu ningithe tu ethe po okulongela Jehova. Opo e tu teye omukumo, Satana ota ka tsikila nokuninga oonkambadhala e tu ningithe tu dhiladhile kutya Kalunga ke tu hole. Inatu etha nando Satana a pondole. — Job 27:5.

18. Ongiini to vulu okukala wu na einekelo kutya Jehova oku ku hole?

¹⁸ Opo wu kale wu na einekelo kutya Jehova oku ku hole, tsikila okugalikana e ku kwathele wu kale ho itala ko ngaashi he ku tala ko. Dhiladhila kunkene aanyoli yOmbiimbeli ya nwethwa mo, ya nyola kombinga yohole yaJehova. Dhimbulukwa kutya Jehova oku hole ngoka e mu hole. Tedhatedha kutya omolwashike to vulu okutala ko ekulilo li li omagano gopaumwene kungoye. Kala wi inekela eshilipaleko lyaJesus ndyoka kutya Jehova oku li Ho gwomegulu. Opo nduno ngele gumwe okwe ku pula a ti: “Mbela owu na uushili kutya Jehova oku ku hole?” oto ka yamukula nomukumo to ti: “Eeno oku hole ndje! Ohandi ningi kehe shoka tandi vulu esiku kehe opo ndi mu ulukile kutya ondi mu hole!”