‘Ithaneni aakuluntu yegongalo’

1. Jehova oku ulike ngiini kutya oonzi dhe odhi na ondilo kuye?

OONZI dhaJehova odhi na ondilo kuye. Okwe dhi landa nombinzi yaJesus, nokwa langeka po aakuluntugongalo ya tonatele oshigunda She. (Iil. 20:28) Kalunga okwa hala oonzi dhe dhi ungaungiwe nadho nohenda. Aakuluntugongalo ohaya landula ewiliko lyaJesus, sho haya talaleke nokugamena oonzi dhaJehova kiiponga yopambepo. — Jes. 32:1, 2.

2. Shi ikolelela kuHesekiel 34:15, 16, Jehova oha kwathele oolye?

² Jehova oku na ko nasha lela noonzi dhe adhihe, ihe oha sile unene oshimpwiyu mboka taya mono iihuna. Yamwe otashi vulika taya mono iihuna molwaashoka ya ninga omapuko, ihe Jehova oha longitha aakuluntugongalo ye ya kwathele. (Lesha Hesekiel 34:15, 16.) Nonando ongawo, Jehova okwa hala tu konge ekwatho, uuna twe li pumbwa. Uuna twa pumbwa ekwatho, otu na okugalikana kuKalunga e tu kwathele, ihe otwa pumbwa wo okupula ekwatho ‘kaasita naalongi megongalo.’ — Ef. 4:11, 12.

3. Ongiini atuheni tatu vulu okumona mo uuwanawa mokutala konkandangala ndjoka aakuluntugongalo taya dhana?

³ Moshitopolwa shika, otatu ka kundathana kombinga yelongekidho lyaJehova lyaakuluntugongalo ndyoka a tula po, e tu kwathele to mone ekwatho lyopambepo. Otatu ka yamukula omapulo ngaka: Uunake tu na okupula aakuluntugongalo ekwatho? Omolwashike twa pumbwa oku shi ninga? Ongiini haye tu kwathele? Nonando ngashingeyi katu na omaudhigu, omayamukulo gomapulo ngoka otaga ka gwedha ko kolupandu lwetu lwelongekidho lyaKalunga lyaakuluntugongalo, notashi vulika shi ka hupithe oomwenyo dhetu limwe lyomomasiku.

UUNAKE TU NA ‘OKWIITHANA AAKULUNTUGONGALO’

4. Omolwashike tatu vulu okuthika pehulithodhiladhilo kutya Jakob 5:14-16, 19, 20, otayi popi kombinga yuuwehame wopambepo? (Tala wo omathano.)

⁴ Omulongwa Jakob okwa yelitha nkene Jehova ha longitha aakuluntugongalo ye tu kwathele. Okwa nyola a ti: “Oku na gumwe ta alukwa? Ni ithane aakuluntu yegongalo.” (Lesha Jakob 5:14-16, 19, 20.) Oovelise ndhoka otadhi ulike kutya Jakob ota popi kombinga yuuwehame wopambepo. Pashiholelwa, omuntu ngoka ta ehama ita lombwelwa i ithane ndohotola, ihe aakuluntugongalo. Jakob ota yelitha wo kutya omuntu ngoka ta ehama pambepo, oha aluka uuna omayono ge ga dhimwa po. Poompito dhimwe, oonkatu ndhoka omuntu a pumbwa okukatuka opo a aludhwe pambepo, odha faathana naandhoka dha pumbiwa opo omuntu a aludhwe palutu. Uuna tatu ehama palutu, ohatu yi kundohotola, e tatu mu lombwele shoka tatu ehama nokulandula omalombwelo ge. Sha faathana, uuna tatu ehama pambepo, otwa pumbwa okuya komukuluntugongalo, e tatu mu lombwele onkalo yetu, nokulandula omayele gopamanyolo ngoka te tu pe.

5. Ohatu shi mono mo ngiini kutya otu li moshiponga shokukwatwa kuuwehame wopambepo?

⁵ Elongekidho ndyoka tali popiwa muJakob ontopolwa 5, otali tu ladhipike tu ye kaakuluntugongalo, uuna tu wete kutya uupambepo wetu owu li moshiponga. Kashi li tuu pandunge tu konge ekwatho kaakuluntugongalo, manga inaatu tula ekwatathano lyetu naJehova moshiponga? Otwa pumbwa okukala aanashili. Omanyolo otage tu londodha kutya otashi vulika twi okwiifundjaleke kombinga yonkalo yuupambepo wetu. (Jak. 1:22) Aakriste yamwe yopetameko yomuSarde, oya li ya ningi epuko ndyoka, na Jesus okwa li e ya londodha kombinga yonkalo yuupambepo wawo. (Eh. 3:1, 2) Omukalo gumwe tatu vulu okutala ngele uupambepo wetu owu li nawa, omokuyelekanitha ngele otu na ngaa natango ohamu yokulongela Jehova ngaashi owala tango sho twa ninginithwa. (Eh. 2:4, 5) Otatu vulu okwiipula ngeyi: Mbela ohandi nyanyukilwa ngaa okulesha Ombiimbeli nosho wo okutedhatedha kwaashoka nda lesha? Mbela ohandi ilongekidhile ngaa okugongalo, nokuya kokugongala? Mbela ondi na ngaa natango uulaadhi miilonga yokuuvitha? Mbela omainyanyudho nosho wo iinima yopamaliko ohayi kutha po unene ethimbo lyandje, nohandi kala unene tandi dhiladhila kuyo? Ngele eyamukulo kulimwe lyomomapulo ngoka o eeno, otashi ulike kutya otashi vulika wu na uunkundi wontumba mboka tashi vulika wu nayipale ngele ino ninga po sha. Ngele itatu vulu okukandula po uunkundi wetu kutse yene, nenge we tu ningitha nale tu yone omithikampango dhaJehova, otwa pumbwa okupula ekwatho kaakuluntugongalo.

6. Mboka ya yona eyono lya kwata miiti oya pumbwa okuninga shike?

⁶ Mboka ya yona eyono lya kwata miiti, ndyoka tashi vulika li kuthithe mo gumwe megongalo, oya pumbwa okupula ekwatho kaakuluntugongalo. (1 Kor. 5:11-13) Kehe ngoka a yona eyono lya kwata miiti okwa pumbwa ekwatho, opo a kale ishewe e na ekwatathano naJehova. Opo Jehova e tu dhimine po okupitila mekuliloyambo, otwa pumbwa okulonga ‘iilonga mbyoka tayi ulike kutya otwi itedhulula.’ (Iil. 26:20) Iilonga mbyoka oya kwatela mo okuya kaakuluntugongalo, ngele otwa yona eyono lya kwata miiti.

7. Oolye ishewe ya pumbwa ekwatho lyaakuluntugongalo?

⁷ Aakuluntugongalo ihaya kwathele owala mboka ya yona eyono lya kwata miiti, ihe ohaya kwathele wo mboka ya nkundipala pambepo. (Iil. 20:35) Pashiholelwa, otashi vulika wa tila kutya ito vulu okukondjitha omahalo ga puka. Otashi vulika shi kale oshidhigu oku ga kondjitha, unene tuu ngele manga inoo tseya oshili owa li wa pikwa kiingangamithi, wa li ho tala omathano giipala nenge wa li ho yi momilalo dha nyata. Ino pumbwa okukala wu uvite kutya owu na okukondjitha omashongo ngoka kungoye mwene. Oto vulu okupopya nomukuluntugongalo gwontumba ngoka ta ka pulakena komaiyuvo goye, te eke ku pa omayele taga longo, noku ku shilipaleka kutya oto vulu okunyanyudha Jehova mokutinda okwiigandja komahalo ga puka. (Omuuv. 4:12) Ngele owa teka omukumo sho to kondjitha omashongo, aakuluntugongalo otaya vulu oku ku dhimbulukitha kutya shoka otashi vulika tashi ulike kutya owa lenga ekwatathano lyoye naJehova, noinwiinekela moonkondo dhoye mwene. — 1 Kor. 10:12.

8. Mbela otwa pumbwa okupopya naakuluntugongalo kombinga yepuko kehe tatu ningi?

⁸ Inatu pumbwa okulombwela aakuluntugongalo kombinga yepuko kehe tatu ningi. Pashiholelwa, natu tye andola owa popi oshinima shoka sha uvitha nayi omumwatate nenge omumwameme gwontumba, tashi vulika nokuli we mu geela noonkondo. Pehala lyokuya kaakuluntugongalo, oto vulu okutula miilonga omayele gaJesus ngoka taga popi kombinga yokupanga ombili naamwaho. (Mat. 5:23, 24) Oto vulu okuninga omapekapeko kombinga yokukala wu na omwenyo omwaanawa, eidhidhimiko nosho wo eipangelo, opo wu vule okuulika omaukwatya ngoka omawanawa pakuudha monakuyiwa. Ihe ngele ino vula okukandula po uupyakadhi woye, oto vulu okupula ekwatho komukuluntugongalo gwontumba. Montumwafo ye ndjoka a nyolele Aafilippi, omuyapostoli Paulus okwa li a pula omumwatate gwontumba a kwathele Euodia naSintike, ya pongolole po uupyakadhi mboka wa li pokati kawo. Momukalo gwa faathana, omukuluntugongalo gwontumba megongalo lyeni ota vulu wo oku ku kwathela. — Fil. 4:2, 3.

OMOLWASHIKE TU NA OKWIITHANA AAKULUNTUGONGALO?

9. Omolwashike kaatu na okweetha ohoni yi tu imbe tu konge ekwatho kaakuluntugongalo? (Omayeletumbulo 28:13)

⁹ Otwa pumbwa eitaalo nuulaadhi, opo tu vule okupula ekwatho kaakuluntugongalo, uuna twa yona eyono lya kwata miiti, nenge uuna tu uvite kutya itatu vulu okukondjitha omahalo getu ga puka. Katu na okweetha ohoni yi tu imbe tu konge ekwatho kaakuluntugongalo. Omolwashike mbela? Omolwaashoka, ngele otwa landula elongekidho ndyoka Jehova a tula po, otatu ka ulika kutya otwe mu inekela nosho wo omalombwelo ge ngoka a tula po, opo tu kale twa kola pambepo notu na eitaalo lya kola. Otwa pumbwa oku shi taamba ko kutya otwa pumbwa ekwatho lyaJehova, ngele otu li pokuninga epuko. (Eps. 94:18) Nuuna twa yona, Kalunga ote ke tu sila ohenda, ngele otwa hempulula omayono getu noku ga etha po. — Lesha Omayeletumbulo 28:13.

10. Oshike tashi vulu okuningwa po, ngele otwa kambadhala okuholeka omayono getu?

¹⁰ Ngele otwa kongo ekwatho kaakuluntugongalo uuna twe li pumbwa, ohatu mono omayambeko, ihe ngele otwa holeke omayono getu, otashi vulika shi ke tu etele iizemo iiwinayi. Sho Omukwaniilwa David a kambadhala okuholeka omayono ge, okwa li a mono iihuna pambepo, pamaiyuvo nosho wo palutu. (Eps. 32:3-5) Ngaashi owala uuvu nenge uulema wopalutu hawu nayipala ngele inatu mona epango, uupyakadhi wopambepo nawo ohawu nayipala ngele inatu mona ekwatho. Jehova oku uvite ko oshinima shoka, note tu hiya tu ‘tamanane’ naye okupitila melongekidho ndyoka a tula po, opo tu aludhwe pambepo. — Jes. 1:5, 6, 18.

11. Ohashi gumu ngiini yalwe, ngele otwa holeke omayono ngoka ga kwata miiti?

¹¹ Ngele otwa holeke omayono ngoka ga kwata miiti, otashi vulika shi gume yalwe. Otashi vulika shi imbe ombepo yaKalunga kaayi kale megongalo alihe, notashi vulu wo okupiyaganeka ombili yaamwatate naamwameme. (Ef. 4:30) Sha faathana, ngele otwa mono kutya gumwe megongalo okwa yona eyono lya kwata miiti, otwa pumbwa oku mu ladhipika a ka popye naakuluntugongalo kombinga yeyono lye.a Ngele otwa holeke eyono lyagumwe, otashi vulika shi ke tu ningithe wo tu kale tu uvite tu na ondjo. (Lev. 5:1) Ohole yetu yokuhola Jehova oyi na oku tu inyengitha tu ka lombwele aakuluntugongalo oshili kombinga yeyono ndyoka. Ngele otwa ningi ngawo, ohashi kwathele egongalo li kale lya yogoka nohashi kwathele wo mboka ya yona ya kale ishewe nekwatathano ewanawa naJehova.

AAKULUNTUGONGALO OHAYE TU KWATHELE NGIINI?

12. Aakuluntugongalo ohaya kwathele ngiini mboka ya nkundipala pambepo?

¹² Ombiimbeli otayi lombwele aakuluntugongalo ya kwathele mboka ya nkundipala pambepo. (1 Tes. 5:14) Ngele owa yona, otashi vulika ye ku pule omapulo noondunge, ngoka taga ka ‘teka mo’ omadhiladhilo nomaiyuvo goye gomuule. (Omayel. 20:5) Oto vulu oku shi ningitha oshipu kuyo opo ye ku kwathele, mokuholola omaiyuvo goye wa manguluka, nokuli nonando oho mono oshidhigu oku shi ninga omolweputuko lyoye, uukwatya woye nenge wa sa ohoni okupopya kombinga yeshongo ndyoka wa taalela. Ino kala wa tila kutya pamwe oto ka popya ‘oohapu inaadhi dhiladhilwa nawa.’ (Job 6:3) Pehala lyokuthika pehulithodhiladhilo nziya, aakuluntugongalo otaya ka kambadhala okupulakena kungoye nawa, opo ya kale ye na uuyelele awuhe manga inaaye ku pa omayele. (Omayel. 18:13) Oye shi kutya ohashi pula ethimbo okutonatela oshigunda shoonzi dhaJehova, onkene opo ya kwathele gumwe ngoka a yona, ihaye mu kwathele owala lumwe, ihe ohaya ningi oonkambadhala lwiikando ye mu kwathele.

13. Aakuluntugongalo ohaye tu kwathele ngiini okupitila megalikano nosho wo mewiliko ndyoka lya kankamena kOmanyolo? (Tala wo omathano.)

¹³ Uuna wa popi naakuluntugongalo, otaya ka ninga ngaashi taya vulu, opo kaaye ku ningithe wu kale wu uvite unene ondjo omolwoshinima shoka wa ninga. Otaya ka galikana pehala lyoye. Jehova ota ka pulakena komagalikano gawo, ngoka ge na ‘oonkondo dhokuninga sha,’ noto ka kala wu uvite wa nkondopalekwa nowa hekelekwa unene. Ekwatho lyawo olya kwatela mo wo “’oku ku gwayeka omagadhi medhina lyOmuwa.’ (Jak. 5:14-16) “Omagadhi” ngoka oga ukithwa koshili yOohapu dhaKalunga. Onkee aakuluntugongalo otaya ka longitha Ombiimbeli ye ku hekeleke noku ku kwathela wu kale ishewe wu na ekwatathano ewanawa naJehova. (Jes. 57:18) Ewiliko lyOpamanyolo ndyoka haya gandja, otali vulu okunkondopaleka etokolo toko lyoye lyokuninga shoka shi li mondjila. Jehova okwa fa ta popi nangoye okupitila maakuluntugongalo ta ti: ‘Ondjila oyo ndjika. Yi landula.’ — Jes. 30:21.

14. Shi ikolelela kAagalati 6:1, aakuluntugongalo ohaya kwathele ngiini mboka ya “katuka kaashi li pandunge”? (Tala wo omathano.)

¹⁴ Lesha Aagalati 6:1. Omukriste ngoka a katuka “kaashi li pandunge,” ita ende metsokumwe nomithikampango dhaKalunga dhi li pauyuuki. Otashi vulika a ninga etokolo kaali li pandunge nenge a yona eyono lya kwata miiti. Aakuluntugongalo Aakriste, ohayi inyengithwa kohole, ye ya ‘pukulule nombili.’ Oshitya shOshigreka shoka sha tolokwa ‘pukulula,’ otashi vulu wo okuukithwa kokuukililitha esipa ndyoka lya za pehala, opo omuntu kaa kwatwe kuulema. Ngaashi owala omundohotola ngoka e na owino ha kambadhala okuukililitha esipa lyomuntu nopwaa na oku mu ehameka unene, aakuluntugongalo nayo ohaya gandja eitulomo kokwaaludha uuwehame wetu wopambepo nopwaa na oku tu ehameka unene. Ombiimbeli otayi lombwele wo aakuluntugongalo nayo yi ‘itonateleni yo yene.’ Sho taye tu kwathele tu ukililithe oondjila dhetu, aakuluntugongalo nayo ohaye shi ndhindhilike kutya inaya gwanenena nohaya ningi wo omapuko. Aakuluntugongalo ihayi itula pombanda kutya ando oye vule yalwe, aayuuki, yo ihaya pangula yalwe, pehala lyaashono, ohaya kambadhala okuulikila ohenda mboka ya yona. — 1 Pet. 3:8.

15. Oshike tatu vulu okuninga uuna tu na uupyakadhi?

¹⁵ Otatu vulu okwiinekelwa aakuluntugongalo yomegongalo lyetu. Oya dheulwa ya kaleke shoka tatu ya lombwele oshiholekwa, ya gandje omayele gi ikolelela kOmbiimbeli pehala lyokugandja omayele ngoka gi ikolelela koondunge dhawo yene, nokutsikila oku tu kwathela tu humbate omitenge dhetu. (Omayel. 11:13; Gal. 6:2) Oye na omaukwatya nontseyo ya yoolokathana, ihe otatu vulu okukala twa manguluka okuya komukuluntugongalo kehe, noku mu lombwela uupyakadhi wetu. Ihe inatu pumbwa okuya komukuluntugongalo kehe, tatu pula omayele, tu na einekelo kutya pamwe gumwe gwomuyo ote ke tu lombwela shoka twa hala okuuva. Ngele otwa ningi ngawo, otatu ka kala twa fa aantu mboka ya hala owala okulombwelwa oohapu ndhoka tadhi “nywitha omakutsi gawo,” pehala lyokwiilonga ‘elongo lya uka,’ lyOohapu dhaKalunga. (2 Tim. 4:3) Uuna twa lombwele omukuluntugongalo gumwe kombinga yuupyakadhi wetu, otashi vulika e tu pule ngele otwa lombwela aakuluntugongalo yamwe kombinga yuupyakadhi mboka nosho wo kutya omayele geni ye tu pa. Molwaashoka omukuluntugongalo ngoka wa lombwela omwiishonopeki, otashi vulika a pule omayele komukuluntugongalo omukwawo. — Omayel. 13:10.

OSHINAKUGWANITHWA SHETU YENE

16. Otu na oshinakugwanithwa shini shopaumwene?

¹⁶ Nonando aakuluntugongalo ohaye tu tonatele tu li oonzi dhaKalunga, ihaye tu lombwele shoka tu na okuninga. Otu na oshinakugwanithwa shopaumwene shokukala tu na esimanekokalunga. Otatu ki ihokolola kuKalunga omolwoohapu noonkatu dhetu. Kekwatho lye, otatu ka vula okukala aadhiginini kuye. (Rom. 14:12) Onkee ano pehala lyoku tu lombwela shoka tu na okuninga, aakuluntugongalo ohaye tu kwathele nOohapu dhaKalunga tu mone nkene ha dhiladhila, notatu ka vula okuninga omatokolo ku tse yene. Ngele otwa landula omayele ngoka haye tu pe ga kankamena kOmbiimbeli, otatu ka vula okudheula ‘oondunge dhetu dhokuyoolola,’ opo tu vule okuninga omatokolo gopandunge. — Heb. 5:14.

17. Otwa pumbwa okukala twa tokola toko okuninga shike?

¹⁷ Oshi li uuthembahenda okukala tu li oonzi dhaJehova. Jehova okwa tumu “omusita omwaanawa,” Jesus, a gandje omwenyo gwe gu li iikulila omolwetu, opo tu vule oku ka mona omwenyo gwaaluhe. (Joh. 10:11) Nokupitila maakuluntugongalo, Jehova okwa gwanitha po euvaneko lye ndyoka tali ti: “Otandi ke mu pa aaleli haa vulika kungame, notaye mu lele nuunongo noondunge.” (Jer. 3:15) Uuna twa nkundipala nenge tatu ehama pambepo, inatu kakadhala okupula ekwatho kaakuluntugongalo. Natu kaleni twa tokola toko okumona mo uuwanawa mekwatho ndyoka Jehova e tu pa, lyaakuluntugongalo.