Omukalo dhingi gwokuungaunga nokwaanuuyuuki

1-2. Aantu oyendji ohayi inyenge ngiini kokwaanuuyuuki, notatu ka kundathana shike?

OTU li muuyuni moka mu na okwaanuuyuuki. Aantu oyendji ohaya ungaungiwa nayo kaashi li pauyuuki omolwomatompelo ogendji, ngaashi oondondo dhawo dhopamahupilo, uukashikekookantu wawo nenge omolwomuhoko gwayo. Aantu oyendji ohaya mono iihuna, molwaashoka aanangeshefa yamwe mboka aayamba nenge aakwanepangelo, ohaya kala owala ye na ko nasha nokuninga oshimaliwa oshindji. Iinima mbyono nosho wo okwaanuuyuuki kulwe, oha ku tu gumu atuhe kutya nduno omeukililo nenge omomukalo gulwe gwi ili.

² Itashi kumitha sho aantu oyendji haya kala ya geya omolwokwaanuuyuuki hoka haya mono muuyuni kunena. Atuheni otwa hala okukala muuyuni moka tu uvite twa gamenwa, nohatu ungaungiwa natse pauyuuki. Yamwe ohaya kambadhala okukandula po uupyakadhi mboka haya mono muuyuni nenge moshilongo shawo. Ohaya holola omadhiladhilo gawo, mokukala ye li ompinge nomapangelo nosho wo noompango, nenge ya hogolole aawiliki yopolitika mboka haya uvaneke kutya otaya ka kutha po omaupyakadhi. Ihe tse tu li Aakriste, ohatu longwa kaatu kale “oshitopolwa shuuyuni,” notu tegelele Uukwaniilwa waKalunga mboka tawu ka hulitha po okwaanuuyuuki akuhe. (Joh. 17:16) Nonando ongawo, oha shi tu uvitha nayi nohatu kala twa geya, uuna tu wete gumwe ta ungaungiwa naye kaashi li pauyuuki. Otashi vulika tu ipule kutya: ‘Otandi ki inyenga ngiini? Mbela opu na sha shoka tandi vulu okuninga po ngashingeyi kombinga yokwaanuuyuuki?’ Opo tu yamukule omapulo ngoka, natu ka taleni nkene Jehova naJesus haya kala ye uvitile okwaanuuyuuki.

JEHOVA NAJESUS OYE TONDE OKWAANUUYUUKI

3. Omolwashike shi shi okuuviwa ko, sho hatu kala twa geya omolwokwaanuuyuuki? (Jesaja 5:7)

³ Ombiimbeli otayi tu pe etompelo kutya omolwashike shi shi okuuviwa ko, sho hatu kala tu uvite nayi omolwokwaanuuyuuki. Otayi yelitha kutya Jehova okwe tu shita oshifetha she nonokutya ‘oku hole uuyuuki nuunashili.’ (Eps. 33:5; Gen. 1:26) Ke na esiku a longe okwaanuuyuuki, noina hala nando ogumwe a longe okwaanuuyuuki. (Deut. 32:3, 4; Mika 6:8; Sak. 7:9) Pashiholelwa, pethimbo lyomuhunganeki Jesaja, Jehova okwa li a uvu “elilagano lyopombanda” lyAaisraeli oyendji, mboka ya li haya ungaungiwa nayo kaalumentu yomoshilongo shawo. (Lesha Jesaja 5:7.) Jehova okwa li a katuka onkatu mokugeela mboka ya li yi idhimbike Ompango ye lwiikando, nokuungaunga nayalwe kaashi li pauyuuki. — Jes. 5:5, 13.

4. Oshiningwanima shoka tashi adhika mOmavaangeli, otashi holola shike kombinga yankene Jesus ha kala e uvitile okwaanuuyuuki? (Tala wo ethano.)

⁴ Ngaashi Jehova, Jesus naye oku hole uuyuuki noku tonde okwaanuuyuuki. Pompito yimwe, pethimbo lyiilonga ye yokuuvitha kombanda yevi, Jesus okwa li a mono omulumentu e na uulema, ano oshikaha sha sa. Shoka osha li shi inyengitha Jesus e mu kwathele, ihe aawiliki yomalongeloKalunga mboka kaaye na ohenda oya li ya geya. Oya ti kutya Jesus ota teya ompango yEsabati. Kaya li ye na ko nasha sho omulumentu ngoka itaa mono we iihuna. Jesus okwa li e uvite ngiini omolwoshinima shono? Okwa li a “nika oluhodhi noonkondo omolwuukukutu womitima dhawo.” — Mark. 3:1-6.

5. Oshike tu na okudhimbulukwa, uuna twa geya omolwokwaanuuyuuki kwontumba?

⁵ Jehova naJesus ohaya kala ya geya omolwokwaanuuyuuki, onkene inashi puka sho natse hatu kala tu uvite ngaaka. (Ef. 4:26) Nonando ongawo, otwa pumbwa okupangela ongeyo yetu nokudhimbulukwa kutya itatu vulu okukutha po okumona iihuna. Uushili owo kutya, ngele inatu pangela ongeyo yetu, otashi vulu oku tu ehameka pamaiyuvo nosho wo palutu. (Eps. 37:1, 8; Jak. 1:20) Ongiini nduno tatu vulu okuungaunga nokwaanuuyuuki? Otatu vulu okwiilonga oshindji koshiholelwa shaJesus.

NKENE JESUS A LI A UNGAUNGA NOKWAANUUYUUKI

6. Okwaanuuyuuki kuni kwa li kwa ha pethimbo Jesus a li kombanda yevi?

⁶ Sho Jesus a li kombanda yevi, okwa li ha mono okwaanuuyuuki okundji. Okwa li ha mono nkene aantu oyendji taya hepekwa kaawiliki yomalongelokalunga. (Mat. 23:2-4) Okwa li e shi nkene epangelo lyaRoma hali ungaunga nayi naantu. Aajuda oyendji oya li ya hala okumanguluka ko kAaroma. Aajuda yamwe, ngaashi Aanashipotha, oya li yi ilongekidha okukondjela emanguluko ndyoka. Ihe Jesus ka li a toto po, nenge a yambidhidhe oongundu dhokweeta po elunduluko lyopausosiale. Sho e shi tseya kutya aantu oya li ya hala oku mu ninga omukwaniilwa, Jesus okwa zi po puyo. — Joh. 6:15.

7-8. Omolwashike Jesus inaa kambadhala okuhulitha po okwaanuuyuuki, sho a li kombanda yevi? (Johannes 18:36)

⁷ Sho Jesus a li kombanda yevi, ina kambadhala okulongela kumwe nomapangelo gopapolotika, opo a hulithe po okwaanuuyuuki. Omolwashike mbela? Oshoka okwa li e shi kutya aantu kaye na uuthemba noonkondo dhokwiipangela yoyene. (Eps. 146:3; Jer. 10:23) Kaye na wo oonkondo dhokuhulitha po iinima mbyoka hayi etitha okwaanuuyuuki. Uuyuni otawu pangelwa kuSatana Ondiyapoli, oshishitwa shopambepo oshidhipagi, shoka hashi longitha oonkondopangelo dhasho, shi etithe okwaanuuyuuki. (Joh. 8:44; Ef. 2:2) Okwaagwanenena nako ohaku shi ningitha oshidhigu nokuli nokaantu mboka aanambili naawanawa, ya longe uuyuuki ethimbo alihe. — Omuuv. 7:20.

⁸ Jesus okwa li e shi kutya Uukwaniilwa waKalunga owo owala tawu ka hulitha po iinima ayihe mbyoka hayi etitha okwaanuuyuuki. Omolwetompelo ndyono, okwa li a longitha ethimbo noonkondo dhe ‘mokuuvitha nokutseyitha onkundana ombwanawa yUukwaniilwa waKalunga.’ (Luk. 8:1) Okwa li a shilipaleke “mboka ya sa ondjala nenota lyuuyuuki” kutya uulingilingi nokwaanuuyuuki otaku ka hula po. (Mat. 5:6; Luk. 18:7, 8) Ihe shoka itashi ka gwanithwa po komapangelo gopantu, ihe okupitila melelo lyUukwaniilwa waKalunga womegulu, mboka ‘kaawu shi oshitopolwa shuuyuni mbuka.’ — Lesha Johannes 18:36.

HOLELA JESUS UUNA TO UNGAUNGA NOKWAANUUYUUKI

9. Oshike she ku tompa kutya Uukwaniilwa waKalunga owo owala tawu ka hulitha po okwaanuuyuuki akuhe?

⁹ Kunena ohatu mono okwaanuuyuuki okundji ku vule hoka Jesus a li a mono sho a li kombanda yevi. Ihe onzo yokwaanuuyuuki ‘momasiku ngaka gahugunina,’ oSatana nosho wo aantu inaaya gwanenena mboka ha nwetha mo. (2 Tim. 3:1-5, 13; Eh. 12:12) Ngaashi Jesus, otu shi kutya Uukwaniilwa waKalunga owo owala tawu ka hulitha po iinima mbyoka hayi etitha okwaanuuyuuki. Molwaashoka ohatu yambidhidha Uukwaniilwa waKalunga pakuudha, ohatu tindi okuyambidhidha omapangelo gopantu mokwaakutha ombinga momakanka, momahololodhiladhilo nosho wo moonkambadhala dhilwe dhokuhulitha po okwaanuuyuuki. Natu taleni koshimoniwa shomumwameme gwedhina Stacy.a Manga inii ilonga oshili, Stacy okwa li ha kutha ombinga mokuninga omakanka momapandaanda nelalakano lyokuhulitha po okwaanuuyuuki. Ihe okwa tameke okukala e na omalimbililo kombinga yaashoka a li ta ningi. Okwa ti: “Sho nda li handi kala pomakanka, onda li handi kala tandi ipula ngele ondi li ngaa kombinga yi li mondjila. Ngashingeyi sho handi yambidhidha Uukwaniilwa waKalunga, ondi shi kutya ondi li kombinga yi li mondjila. Ondi shi kutya Jehova ota ka kwathela kehe gumwe ngoka ta hepekwa, oshinima shoka itaandi vulu okuninga.” — Eps. 72:1, 4.

10. Shi ikolelela kuMateus 5:43-48, omolwashike ihaatu kambadhala okulundulula oompango nomapangelo? (Tala wo ethano.)

¹⁰ Aantu oyendji kunena ohaya wayimine oongundu ndhoka hadhi kambadhala okulundulula omapangelo. Nonando ongawo, oyendji yomuyo ohaya kwatwa kongeyo, ihaaya vulika koompango nohaya ehameke yalwe. Shoka hasho Jesus e tu longa tu ninge. (Ef. 4:31) Omumwatate gwedhina Jeffrey okwa ti: “Nonando omakanka ngoka oga kale ga fa gombili, moosekonde owala oonshona otaga vulu okulundulukila melongithonkondo, mokuhanagula nokuyaka po iinima.” Ihe Jesus okwe tu longa tu ungaunge naantu ayehe nohole, nokuli naamboka ihaaya tsu kumwe natse nenge haye tu hepeke. (Lesha Mateus 5:43-48.) Tu li Aakriste, ohatu ningi ngaashi tatu vulu tu yande kehe shimwe shoka kaashi li metsokumwe noshiholelwa shoka Jesus e tu tulila po.

11. Omolwashike tashi vulika shi kale oshidhigu omathimbo gamwe okuholela Jesus?

¹¹ Nonando otu shi kutya Uukwaniilwa waKalunga otawu ka hulitha po thiluthilu okwaanuuyuuki, otashi vulika tu shi mone oshidhigu okuholela Jesus, uuna tatu ungaungiwa natse kaashi li pauyuuki. Natu taleni kwaashoka sha li sha ningilwa Janiya, ngoka a li a ungaungiwa naye nokatongo nenge nontondo. Ote shi zimine sho a ti: “Onda li nda geya noonkondo. Onda li ndi uvite nayi nonda Ii nda hala aantu mboka haya ningi ndje nayi ya geelwe. Opo nduno onda dhiladhila okwaambidhidha ongundu ndjoka hayi ningi omakanka, opo yi hulithe po uukwamuhoko nosho wo okatongo. Onda li ndi uvite kutya okuninga ngawo otashi ka ulika nkene nda geya. Ihe mokweendela ko kwethimbo, Janiya okwa li a ndhindhilike kutya okwa pumbwa okuninga omalunduluko. Okwa ti: “Onda li nda pitike yalwe ya pangele omadhiladhilo gandje, nokuningitha ndje ndi kale ndi inekela maantu pehala lyokwiinekela muJehova. Onda li nda etha po okweendathana nongundu ndjoka nokanda li we ndi na ekwatathano nayo. Otwa pumbwa okukala twa kotoka kaatu ethe ongeyo yi tu ningithe tu teye po etokolo toko lyetu lyokwaakutha ombinga miinima yopapolotika yomuuyuni mbuka nosho wo yopausosiale. — Joh. 15:19.

12. Omolwashike shi li pandunge okuhogolola nuukeka uuyelele mboka hatu lesha, hatu tala nohatu pulakene kuwo?

¹² Oshike tashi vulu oku tu kwathela tu pangele omaiyuvo getu gokukala twa geya omolwokwaanuuyuuki kwontumba? Oyendji, ohaya hogolola nuukeka shoka ye na okulesha, okupulakena nokutala. Omakwatathano gamwe gopaintaneta oga udhilila iinima mbyoka tayi humitha komeho okwaanuuyuuki notayi popile oongundu ndhoka hadhi kambadhala okweeta elunduluko momapangelo. Olundji, omahangano giikundaneki ohaga gandja uuyelele momukalo gokayoya. Nonando otwa uvu uuyelele wu li paushili kombinga yokwaanuuyuuki kwontumba, mbela okukala tatu gandja eitulomo kuwo, otashi ke tu kwathela ngaa shili? Ngele otwa longitha ethimbo olindji mokukala tatu dhiladhila kombinga yuuyelele mbono, otashi vulika shi tu ningithe tu kale twa geya nokukala twa teka omukumo. (Omayel. 24:10) Naashoka shi yemateka, otashi vulika tu kanithe einekelo lyetu mUukwaniilwa waKalunga, mboka owo owala tawu ka hulitha po okwaanuuyuuki akuhe.

13. Ongiini okulesha Ombiimbeli pandjigilile taku vulu oku tu kwathela tu kale tu na etaloko ewanawa kombinga yokwaanuuyuuki?

¹³ Okukala hatu lesha Ombiimbeli pandjigilile nokutedhatedha kuyo, otashi vulu oku tu kwathela tu ungaunge nokwaanuuyuuki. Omumwameme gwedhina Alia, okwa li a uva nayi noonkondo omolwomukalo omwiinayi moka aantu yomoshitopolwa she ya li haya ungaungiwa nayo. Mboka ya li haya ungaunga nayo nayi kaya li haya pewa egeelo lyasha. Okwa ti: “Onda li ndi ipula ngeyi, ‘Mbela ondi itaala ngaa kutya Jehova ota ka hulitha po omaupyakadhi ngoka?’ Opo ihe onda lesha Job 34:22-29. Oovelise ndhoka odha li dha dhimbulukitha ndje kutya kapu na ngoka ta vulu okuholama Jehova. Oye owala e shi kondandalunde shoka shu uka, na oye owala ta ka hulitha po omaupyakadhi agehe thiluthilu.” Ihe manga twa tegelela Uukwaniilwa waKalunga wu ete uuyuuki washili, ongiini tatu vulu okuungaunga nokwaanuuyuuki ngashingeyi?

SHOKA TATU VULU OKUNINGA PO NGASHINGEYI KOMBINGA YOKWAANUUYUUKI

14. Oshike tatu vulu okuninga, opo tu yande okukutha ombinga mokwaanuuyuuki komuuyuni mbuka? (Aakolossa 3:10, 11)

¹⁴ Itatu vulu okupangela nkene yamwe haya ungaunga nayalwe kaashi li pauyuuki, ihe otatu vulu okupangela nkene hatu ungaunga nayalwe. Ngaashi twe shi kundathana metetekelo, ohatu holele Jesus mokuulika ohole. Ohole ndjoka ohayi tu inyengitha tu ungaunge nayalwe nesimaneko, nokuli naamboka haye tu ningile okwaanuuyuuki. (Mat. 7:12; Rom. 12:17) Jehova oha kala a nyanyukwa uuna tatu ungaunga naantu ayehe nohenda nosho wo pauyuuki. — Lesha Aakolossa 3:10, 11.

15. Ohatu kwathele ngiini aantu moku ya lombwela kombinga yaashoka Ombiimbeli tayi longo?

¹⁵ Omukalo gwa simana moka tatu vulu okuungaunga nokwaanuuyuuki omokulombwela yalwe oshili yOmbiimbeli. Omolwashike tatu tile ngawo? Oshoka “okutseya Omuwa,” ota ku vulu okulundulula omuntu ngoka a li omugeyentu noku na elongithonkondo, nokuninga omuntu omunahenda, omunambili nomunahole. (Jes 11:6, 7, 9) Manga inaa tseya oshili, omulumentu gwedhina Jemal, okwa li a wayimine ongundu yoolebele a kondjithe epangelo lyopapolotika, oshoka okwa li e uvite kutya ekwanyanya. Okwa ti: “Ito vulu okuthiminika aantu ya lundulule eihumbato lyawo. Nangame kanda li nda thiminikwa ndi lundulule, ihe oshili yOmbiimbeli ndjoka nda li tandi ilongo oyo ya kwathela ndje ndi lundulule. Shoka Jemal i ilongo, osha li she mu inyengitha a ethe po okukondja. Ngele opu na aantu oyendji mboka tayi ilongo oshili yOmbiimbeli nokuninga omalunduluko, ota pu ka kala owala aantu aashona mboka haya longo okwaanuuyuuki.

16. Omolwashike wu na ohokwe yokuuvitha kombinga yetegameno yUukwaniilwa?

¹⁶ Ngaashi Jesus, natse otu na ehalo lyokulombwela aantu kombinga yUukwaniilwa waKalunga kutya owo owala tawu ka hulitha po thiluthilu okwaanuuyuuki. Etegameno ndyoka otali vulu okutsa omukumo mboka ya ungaungiwa nayo kaashi li pauyuuki. (Jer 29:11) Stacy ngoka a popiwa metetekelo ota ti: “Okwiilonga oshili okwa kwathela ndje ndi ungaunge nokwaanuuyuuki hoka nda li nda ningilwa. Jehova oha longitha etumwalaka lyOmbiimbeli e tu kwathele.” Opo wu uvithe etumwalaka lyOmbiimbeli ndyoka tali hekeleke, kombinga yokulitha po okwaanuuyuuki, owa pumbwa okukala wi ilongekidha nawa. Ngele owa kala wa tompwa koshili yOmanyolo ngoka ge etwa mo moshitopolwa shika, oto ka kala wi ilongekidha okukundathana oshitopolwa shika nondjaalela, ngele oshe ya po sho wu li kosikola nenge kiilonga.b

17. Jehova ohe tu kwathele ngiini tu ungaunge nokwaanuuyuuki ngashingeyi?

¹⁷ Shi yemateka, molwaashoka Satana oye ‘omupangeli guuyuni mbuka,’ otatu kala nokuningilwa okwaanuuyuuki. Ihe otu na ekwatho netegameno sho twa tegelela a ‘umbwe mo’ muuyuni mbuka. (Joh 12:31) Okupitila mOmanyolo, Jehova ina holola owala kutya omolwashike ku na okwaanuuyuuki okundji, ihe okwa holola wo nkene e uvitile uuwehame mboka hatu etelwa kokwaanuuyuuki. (Eps 34:17-19) Okupitila mOmwana, Jehova ohe tu longo nkene tu na okwiinyenga kokwaanuuyuuki kunena nankene masiku Uukwaniilwa we tawu ka hulitha po okwaanuuyuuki sigo aluhe. (2 Pet 3:13) Natu tsikileni okuuvitha onkundana ombwanawa yUukwaniilwa mboka nuulaadhi, nokutsikila okutegelela ethimbo ndyoka sho kombanda yevi taku ka kala ‘eutho nuuyuuki.’ — Jes 9:7.