Omapulo ga za kaaleshi
Sho omunyoli gwOmayeletumbulo 30:18, 19 a ti, “oshinkoti shomulumentu komukadhona” shoka ‘kaandi uvite ko.’ Mbela okwa li a hala okutya ngiini?
Aantu oyendji ohayi ipula kutya oovelise ndhoka odha hala lela okutya ngiini, mwa kwatelwa nokuli nayamwe mboka ye shi oshindji kombinga yOmbiimbeli. Oovelise ndhoka mOmbiimbeli yoNew World Translation otadhi lesha ngeyi pakuudha: “Oku na iinima itatu mbyoka tayi kumitha ndje, eeno, ine mbyoka kaandi yi uvite ko: oshinkoti shekodhi mewangandjo, omusinda gweyoka kemanya, oshitauwa shosikepa mokati kefuta noshinkoti shomulumentu komukadhona.” — Omayel. 30:18, 19.
Nale, otwa li tu uvite ko uutumbulilo mbuka “oshinkoti shomulumentu komukadhona” kutya owu ukitha koshinima oshiwinayi. Omolwashike mbela? Oovelise dhilwe montopolwa ndjoka, otadhi hokolola kombinga yiinima iiwinayi mbyoka ihaayi ti “sha gwana.” (Omayel. 30:15, 16) Ovelise 20 otayi popi kombinga “yomukulukadhi omuhondeli,” ngoka ti ipopile kutya ina ninga oshinima sha puka. Onkee ano otwa li hatu dhiladhila kutya ngaashi owala ekodhi hali tuka mombanda muule, eyoka kemanya, nenge osikepa yonale mokati kefuta, omulumentu otashi vulika a ninge oshinima shontumba nopwaa na ngoka ta tseya shoka a ninga. Shi ikolelela kwaashoka twa li hatu dhiladhila, otwa li tu uvite ko uutumbulilo “oshinkoti shomulumentu komukadhona,” wu ukithwa koshinima oshiwinayi, ano komulumentu omugundjuka omunamakoto ngoka tashi vulika a kengelele omukiintu omugundjuka ngoka kee na owino, a ye momilalo naye inee shi nongela.
Ihe opu na etompelo ewanawa kutya omolwashike twa pumbwa okutala ko oovelise ndhoka momukalo omwaanawa. Omunyoli okwa li ta hokolola kombinga yiinima mbyoka ya li ye mu kumitha.
Elaka lyOshihebeli lyopetameko otali ambidhidha etaloko ewanawa li nasha naashoka ovelise ya hala okutya. Shi ikolelela koTheological Lexicon of the Old Testament, oshitya shOshihebeli shoka sha tolokwa “kaandi yi uvite ko” mOmayeletumbulo 30:18 “oshu ukithwa koshiningwanima shoka omuntu . . . e wete oshikumithi nenge nokuli tashi monika itaashi vulu okuningwa.”
Omuprofesoli Crawford H. Toy, gwokOuniveesiti yedhina Harvard, mo Amerika, okwa popi wo kutya oovelise ndhoka itadhi popi kombinga yoshinima oshiwinayi. Okwa ti: “Pehala lyaashono, otadhi popi iinima iiwanawa kombinga yiinima mbyoka ya tumbulwa mo.”
Onkene oshi li pandunge okupopya kutya oohapu ndhoka dha nyolwa mOmayeletumbulo 30:18, 19, otadhi popi kombinga yiinima iiwanawa, mbyoka nokuli kaatu yi uvite ko. Ngaashi omunyoli gwOmbiimbeli a ti, ohatu kala twa kumwa kunkene ekodhi hali tuka mombanda muule, nkene eyoka ndyoka kaali na omagulu hali ipwedha kemanya, nkene osikepa onene hayi ende mokati kefuta nosho wo nkene omulumentu omugundjuka nomukiintu omugundjuka haya vulu okukala ye holathane nokukala ya nyanyukwa monkalamwenyo.