Jehova okwa li e tu kwathele twi igilile nokukala twa nyanyukwa kehe mpoka tu li

Omumwatate nomumwameme Kassholms, oya li ya hiti Osikola yaGilead, mo 1979, nomomukokomoko gwomimvo oya li ya tuminwa ya ka longe kiilongo ngaashi Iran, Mauritius, Myanmar,Tanzania, Uganda nokoZaire. Kosikola yaGilead, okwa li omunongeki gwedhina Jack Redford, ngoka e ya pe omayele, ngoka ga li ge ya kwathele oshikando kehe ya pewa oshinakugwanithwa oshipe, oshoka oya li haya pewa iinakugwanithwa olundji. Natu ya pe ompito ye tu kuthile ko.

Omumwatate Mats, alikana tu kuthila ko kutya oshe ende ngiini wu ye moshili.

Mats: Tate okwa li ha zi moPoland, pethimbo lyIita Iitiyali yUuyuni, nokwa mona kutya ongeleka yaKatoolika oyu udha iihelele. Ihe olundji okwa li ha ti: “Ondi shi kutya oku na elongelokalunga lyashili.” Mokweendela ko kwethimbo, onda li nda mono kutya shoka a popi oshoshili. Onda li handi landa omambo ogendji omakulu. Limwe lyomugo olya li embo embulau li na oshipalanyolo Oshili ndjoka tayi fala kOmwenyo Gwaaluhe. Oshipalanyolo shoka osha li lela oshihokithi nonda li nda lesha embo alihe uusiku mboka. Sho nda mana oku li lesha, onda li nda mono kutya onda mona elongelokalunga lyashili.

Okuza muApilili 1972, oku uka komeho, onda lesha iileshomwa oyindji yOombangi dhaJehova nonda li nda mono omayamukulo komapulo gandje ngoka nda li ndi na kombinga yOmbiimbeli. Onda li ndi uvite nda fa omuhalithi ngoka a popiwa methaneko lyaJesus, ngoka konima sho a mono okawe ke na ondilo, a landitha po iinima ye ayihe opo e ka lande. Onda li nda “landitha po,” elalakano lyandje lyokuya kOuniveesiti lyoku ka ninga omupangi, opo ndi lande “okawe,” ano oshili ndjoka nda mona, oku shi popya pathaneko. (Mat. 13:45, 46) Onda ninginithwa mo 10 Desemba 1972.

Momumvo omo tuu moka, aavali yandje nomumwamememati nayo oya taamba ko oshili nokuninginithwa. MuJuli 1973, onda yi miilonga yethimbo lyuudha. Megongalo lyetu omwa li omumwameme omukokolindjila omwaanawa gwedhina Ann-Catrin, ngoka e hole Jehova noonkondo. Otwa li twa hokwathana notwa hokana mo 1975, notwa kala uule womimvo ne mondoolopa ombwanawa yedhina Strömsund, moSweden, moka mu na aantu haya pulakene nawa.

Ann-Catrin: Tate okwiilongo oshili lwopehulilo lyomimvo dhe dhahugunina kOuniveesiti, moStockholm. Onda li owala ndi na oomwedhi ndatu pethimbo ndyoka, ihe okwa li hayi nangame kokugongala nosho wo miilonga yokuuvitha. Meme ka li e hole oshinima shoka, nokwa li a kambadhala okuulika kutya Oombangi dhaJehova odha puka. Ihe ina pondola, onkee mokweendela ko kwethimbo naye okwa ninginithwa. Onda ninginithwa sho ndi na omimvo 13, naasho ndi na omimvo 16 onda tameke okukokola ondjila. Konima sho nda kala tandi longele moUmeå, koshitopolwa hoka ku na ompumbwe onene yaauvithi, onda ningi omukokolindjila i ikalekelwa.

Konima sho ngame naMats twa hokana, otwa li twa mono enyanyu olindji mokukwathela aantu oyendji yi ilonge oshili. Mokati kaantu mboka omwa li omukadhona gwomimvo omulongo nasha gwedhina Maivor, ngoka a li a etha po eithano lye lyomaudhano nokwa tameke okukokola ondjila. Oya yi kosikola yaGilead mo 1984, noya ka longa ye li aatumwa moEcuador.

Oshike she mu kwathela mwi igilile nomu kale mwa nyanyukwa miilonga yeni yuutumwa?

Mats: Otwa li twa tuminwa koshitopolwa shimwe hoka twa li tu na iinakugwanithwa iipe. Ihe oshinima shimwe shoka hashi tu kwathele tu ninge omalunduluko, okukambadhala okuholela Jesus, unene tuu eifupipiko lye. (Kol. 2:6, 7) Pashiholelwa, pehala lyoku tegelela aamwatate naamwameme yomoshitopolwa ya ninge iinima momukalo moka twi igilila, otwa kambadhala okwiilonga kutya omolwashike haya ningi iinima momukalo gwontumba. Otwa li tu na okwiilonga nkene haya dhiladhila nosho wo eputuko lyawo. Sho twa kala nokuholela Jesus, oshe shi ningitha oshipu twi igilile nokukala twa nyanyukwa moshinakugwanithwa shetu. — Eps. 1:2, 3.

Ann-Catrin: Opo omuti gu koke uuna gwa tsikwa, ogwa pumbwa wo etango. Jehova oku ulike aluhe kutya oku li “uuyelele” wetu. (Eps. 84:11) Okwe tu pa aamwatate naamwameme aanahole. Pashiholelwa, moTehran, shaIran, aamwatate naamwameme oya li haya yakula nawa aayenda noya li haya gandja ngaashi owala aantu yamwe mboka ya popiwa mOmbiimbeli ya li haya ningi. Otwa li twa hala okutsikila okukala moIran, ihe muJuli 1980, iilonga yokuuvitha yOombangi dhaJehova oya li yi indikwa moshilongo shoka notwa li twa lombwelwa kutya natu kale twa za mo meni lyoowili 48. Otwa li twa pewa oshinakugwanithwa oshipe koZaire (shoka hashi ithanwa ngashingeyi Congo) koAfrika.

Sho ndu uvu kutya otatu tumwa tu ka longele koAfrika onda lili. Shimwe ishewe, osha li sha tilitha ndje sho ndu uvu kutya koAfrika oku na omayoka nomikithi. Ihe ookuume yandje yaali mboka ya kala nokulonga ethimbo ele koAfrika oye tu lombwele ya ti: “Inamu tila. KoAfrika inamu enda ko nando onale, ihe otu shi kutya otamu ka kala mu hole ko. Oya li ye li mondjila. Aamwatate naamwameme aanahole. Sho iilonga yetu yokuuvitha ya li yi indikwa moZaire notwa li tu na okuza mo konima sho twa kala mo omimvo hamano, onda li ndi imemeha molwaashoka onda li tandi galikana kuJehova tandi ti: “Alikana natu kale muAfrika.”

Omalalekonuuyamba geni mwa mono sho mwa kala tamu longele Jehova?

Mats: Omolwoshinakugwanithwa shetu, otu na uukuume wopothingo naamwatate naamwameme mboka nayo ye li aatumwa ya za komahala ga yoolokathana. Omathimbo gamwe, kehe gumwe okwa li ha kala e na aakonakonimbiimbeli 20, oshinima shoka hashi tu etele enyanyu. Ihandi dhimbwa ohole ndjoka tu ulukilwa nankene aamwatate naamwameme ya li ye tu yakula moAfrika. Sho twa li hatu talele po omagongalo moTanzania, aamwatate naamwameme oyendji oya li ye tu yakula nawa, nonando kaya li ye na iiniwe oyindji, notwa li hatu lala mokambesa ketu hoka twa li hatu thikameke pomagumbo gawo. (2 Kor. 8:3) Okuhokolelathana omahokololo osha li oshinima shi ikalekelwa kutse. Pehulilo lyesiku kehe, ngame naAnn-Catrin otwa li hatu kuutumba nokupopya kombinga yiiningwanima mbyoka ya ningwa momukokomoko gwesiku, nokupandula Jehova sho a kala pamwe natse.

Ann-Catrin: Shoka sha li sha etele ndje enyanyu olindji, oosho nda li mokati kaamwatate naamwameme ya za miigwana ya yoolokathana. Otwi ilonga omalaka omape mwa kwatelwa Oshifarsi, oshifrench, oshiluganda nosho wo oshiswahili. Otwa li wo twi ilongo kombinga yomaputuko ogendji. Otwa li twa dheula aamwatate naamwameme mboka aape, twa panga uukuume nayo nokulongela Jehova pamwe. — Sef. 3:9.

Otwa li wo twa mono iinima oyindji ya yoolokathana meshito ewanawa lyaJehova. Ethimbo kehe twa li twa taamba ko oshinakugwanithwa oshipe miilonga yaJehova, otwa li hatu kala tu uvite twa fa tu li molweendo tatu wilikwa kuJehova. Okwe tu longa iinima mbyoka twa li itatu vulu okulonga kutse yene.

Omashongo geni mwa li mwa taalele nomu ungaunga nago ngiini?

Mats: Olundji otwa li twa kwatwa komikithi odhindji ngaashi malaria. Ann-Catrin okwa li a tandwa iikando yi vulithe pushimwe, inaatu shi tegelela. Otwa li wo hatu ipula naavali yetu mboka aakokele, onkee ano otatu pandula aamwayina yetu sho ya kala taye ya sile oshimpwiyu, omanga twi ipyakidhila niilonga yetu yuutumwa. Oya li ye ya sile oshimpwiyu neidhidhimiko, nenyanyu nosho wo nohole. (1 Tim. 5:4) Nonando ongawo, omathimbo gamwe, otwa li hatu ningi ngaashi tatu vulu tu kwathele aavali yetu, ihe otwa li hatu kala tu uvite nayi sho itaatu vulu oku ya ningila oshindji, molwaashoka otwa li kokule.

Ann-Catrin: Mo 1983, sho tatu longele koZaire, onda li nda kwatwa kokolera. Ndohotola okwa lombwele Mats a ti: “Zi mo moshilongo shino nena.” Esiku lya landula ko, otwa yi nondhila ndjoka hayi humbata iinima, molwaashoka oyo owala ya li yu uka koSweden.

Mats: Otwa li tatu dhiladhila kutya itatu ka tsikila we niilonga yetu yuutumwa, onkee otwa li twa lili noonkondo. Nonando ndohotola okwa ti kutya onkalo yaAnn-Catrin itayi ka hwepopala, osho a ka aluka. Konima yomumvo gumwe, otwa li twa vulu okushuna koZaire, noshikando shika otwa li megongalo lyOshiswahili, moshitopolwa shaLubumbashi.

Ann-Catrin: Sho tu li moLubumbashi, etegelelo lyandje olya gu mo. Nonando ka twa li twa hala aanona, onda li nda yemata noonkondo sho okanona ketu ka si. Ihe sho ta twi idhidhimikile ethimbo ndyoka edhigu, Jehova okwe tu pe omagano ngoka twa li inaatu tegelela. Otwa li twa tameke omakonakonombiimbeli ogendji shi vulithe nale. Muule owala womumvo gumwe, omwaalu gwaauvithi ogwi indjipala okuza paauvithi 35 gu uka paauvithi 70, omanga gwaamboka haye ya kokugongala ogwi indjipala okuza 40 gu uka po 220. Otwa kala twi ipyakidhila niilonga yokuuvitha, na Jehova okwa li a yambeke oonkambadhala dhetu, naashoka osha hekeleke ndje. Natango, ohatu dhiladhila nokupopya kombinga yokanona ketu okaholike. Otwa halelela oku ka mona sho Jehova ta ka aludha omitima dhetu thiluthilu moparadisa.

Mats: Pompito yimwe, Ann-Catrin okwa tameke okukala kee na we oonkondo noha kala a loloka. Onda li nda monika okankela nonda li nda pumbwa etando lya kwata miiti. Ihe kunena ondi li hwepo, naAnn-Catrin ota ningi ngaashi ta vulu a longele Jehova.

Otwa li twa mono kutya hatse atuke tatu ungaunga nomashongo. Konima yedhipago lyopamihoko moRwanda, mo 1994, otwa li twa talele po ookuume ketu oyendji mookamba dhoontauki. Eitaalo lyawo, eidhidhimiko nokuyakula yalwe, oshe tu longa kutya Jehova oku na oonkondo dhokukwathela aapiya ye, uuna yi iyadha meshongo kehe. — Eps. 55:22.

Ann-Catrin: Otwa li ishewe twi iyadha meshongo limwe, sho twa yi keyapulo lyoshitayimbelewa shaUganda, mo 2007. Konima yopolohalama, otwa li tatu ende nongundu yaatumwa ye li 25 lwaampono nosho wo Aabetele, tu uka koNairobi, shaKenya. Manga inaatu adha oongamba dhaKenya, eloli oli idhenge mumwe nombesa yetu. Omuhingi nookuume ketu yatano oya sile poshiponga mpoka, nolwanima omumwameme gumwe okwa ka sila koshipangelo. Otwa halelela oku ka mona ishewe ookuume ketu. — Job 14:13-15.

Mokweendela ko kwethimbo, osho nda aluka omolwoshiponga shoka nda li nda mona. Ihe ngame naMats nosho wo aafaalelwa yamwe, otwa li twa gwililwa po kiimpwiyu oyindji omolwoshiponga shoka. Onda li handi kwatwa komahaluhalu uusiku, nonda li handi penduka nomandhindhiliko nda fa ando ndi na uuvu womutima. Shoka osha li oshitilithi. Ihe sho twa mbumbulile Jehova omitima dhetu megalikano nokudhiladhila kombinga yomanyolo ngoka tu hole, oshe tu kwathele tu kale twa ngungumana. Otwa li wo twa yi koondohotola ndhoka dhi shi okupanga aantu mboka ya gwililwa po kiimpwiyu oyindji, naashoka osha li wo she tu kwathele. Ihe ngashingeyi otu uvite tu li hwepo, inatu gwililwa po we unene pamaiyuvo, notatu pula Jehova e tu kwathele tu hekeleke yalwe mboka ya gwililwa po kiimpwiyu oyindji.

Sho wa hokolola nkene mwa li mwa vulu okwiidhidhimikila oonkalo ndhoka oondhigu, owa ti kutya Jehova okwa li e mu humbata “ngaashi omayi inaaga pya.” Owa li wa hala okutya ngiini?

Mats: Uutumbulilo mboka owa za melaka lyOshiswahili tawu ti “Tumebebwa kama mayai mabichi,” nenge “Otwa li twa humbatwa twa fa omayi inaaga pya.” Ngaashi owala omuntu ha humbata nawa omayi inaaga pya opo kaaga tatuke, Jehova okwa li e tu yambidhidha pahole moshinakugwanithwa shetu kehe. Otwa li aluhe tu na ashihe shoka twa pumbwa, shi vulithe nokuli pwaashoka twa pumbwa. Omukalo gumwe twa li twa mono nkene Jehova e tu yambidhidha noku tu ulukila ohole, oosho Olutuwiliki lwa li lwe tu ulukile olukeno.

Ann-Catrin: Onda hala okupopya kombinga yoshiholelwa shimwe, sho Jehova a li e tu ulukile ohole noku tu yambidhidha. Esiku limwe onda li nda dhengelwa ongodhi, tandi lombwelwa kutya Tate gwandje koSweden, oku li moshipangelo ta ehamenene. Mats okwa adhika owala opo a ti po hwepo kuuvu wamalaria. Ka twa li tu na oshimaliwa shokulanda uutekete wondhila tu ye kegumbo, onkene otwa tokola tu landithe po ohauto yetu. Opo ihe otwa dhengelwa ishewe ongodhi lwaali, yimwe okaaihokani mboka ya li yu uvu kombinga yonkalo yetu noya li ya hala oku tu futila okatekete kamwe. Nongodhi onkwawo oyomumwameme omukokele, ngoka a li a pungula oshimaliwa shontumba mokapakete hoka a nyola ko “Osha gumwe ngoka e li mompumbwe.” Konima yominute omishona, Jehova okwe tu kwathele tu mone uutekete mboka twa li twa pumbwa. — Heb. 13:6.

Okutala konakuziwa, oshike mwi ilonga sho mwa kala miilonga yethimbo lyuudha uule womimvo 50?

Ann-Catrin: Ondi ilonga kutya otatu vulu okukala tu na oonkondo ngele otwi ‘inekele Jehova meimweneneno.’ Uuna twi inekela muJehova, ohe tu kwathele uuna tu li momaupyakadhi. (Jes. 30:15; 2 Ondjal. 20:15, 17) Molwaashoka otwa kala noku longela Jehova nomutima gwetu aguhe moshinakugwanithwa kehe, otwa mona omalalekonuuyamba ngoka twa li itaatu vulu okumona ando otwa ningile sha shimwe shi ili.

Mats: Oshiilongomwa sha simana shoka ndi ilonga, okwiinekela muJehova monkalo kehe nokutala nkene ta katuka pehala lyandje. (Eps. 37:5) Okwa kala aluhe nokukwathela ndje ngaashi owala u uvaneka. Natango ohatu mono nkene Jehova te tu kwathele sho ngashingeyi tatu longo koBetel yaMyanmar.

Otu na einekelo kutya aagundjuka oyendji mboka ya hala okutamununa mo uukalele wawo, nayo otaya ka ulukilwa ohole yi na uudhiginini kuJehova, ndjoka natse e tu ulukila. Otu na einekelo kutya otaya ka pitika Jehova e ya kwathele yi igilile nokunyanyukilwa oshinakugwanithwa shawo.