‘Mboka ya halelela oku ka mona omwenyo,’ otaya ka pulakena konkundana ombwanawa

1. Aantu ohayi inyenge momikalo dhini dha yoolokathana ngele tashi ya ponkundana ombwanawa? (Iilonga 13:47, 48; 16:14, 15)

METHELEMUMVO lyotango, aantu oyendji oya li ya taamba ko oshili nziya konima sho yu uvu etumwalaka lyUukwaniilwa. (Lesha Iilonga 13:47, 48; 16:14, 15.) Sha faathana nokunena, aantu yamwe ohaya kala ya nyanyukwa, uuna ya uvu kombinga yonkundana ombwanawa oshikando shotango. Nokuli naamboka ya li inaaya ulika ohokwe oshikando shotango sho ya uvithilwa etumwalaka lyUukwaniilwa, lwanima otashi vulika ya ka patulule omitima dhawo noku li taamba ko. Oshike tu na okuninga po, ngele otwa tsakanene ‘naamboka ya halelela oku ka mona omwenyo,’ miilonga yokuuvitha?

2. Iilonga yetu yokuninga aantu aalongwa oya faathana ngiini naambyoka yomunashikunino?

² Natu taleni kethaneko tali landula. Iilonga yetu yokuninga aantu aalongwa otayi vulu okuyelekanithwa naambyoka yomunashikunino. Ngele iiyimati yomuti gumwe oya pya, omunashikunino otashi vulika e yi likole ko, nonando otashi vulika natango ta longekidha evi nenge ta kunu omiti dhilwe moshikunino she. Momukalo gwa faathana, uuna twa tsakanene nagumwe ngoka i ilongekidha okutaamba ko etumwalaka lyetu, otwa hala oku mu kwathela a ninge omulongwa gwaKristus nziya ngaashi tashi vulika. Pethimbo opo tuu mpoka, ohatu tsikile nokukokeka ohokwe yaamboka ya pumbwa natango ethimbo, opo ya mone ongushu yaashoka tayi ilongo. (Joh. 4:35, 36) Oondunge dhokuyoolola otadhi ke tu kwathela tu longithe omukalo dhingi ngoka tagu opalele aapulakeni yetu. Ngashingeyi natu ka kundathaneni shoka tatu vulu okuninga oshikando shotango tatu uvithile aantu, opo tu kwathele mboka yi ilongekidha okutaamba ko onkundana ombwanawa. Otatu ka kundathana wo nkene tatu vulu okukwathela aantu mboka, opo ya tsikile okuninga ehumokomeho.

UUNA AANTU YI ILONGEKIDHA OKUTAAMBA KO ONKUNDANA OMBWANAWA

3. Omukalo guni tatu ka longitha, ngele otwa tsakanene naamboka ye na ohokwe sho tatu uvitha? (1 Aakorinto 9:26)

³ Ngele otwa tsakanene naantu mboka ye na ohokwe miilonga yetu yokuuvitha, otwa hala oku ya kwathela nziya, opo ya kale mondjila ndjoka tayi fala komwenyo. Poompito dha tya ngawo, katu na okukakadhala oku ya lombwela kombinga yekonakonombiimbeli noku ya hiya kokugongala oshikando shotango tatu tsakanene nayo. — Lesha 1 Aakorinto 9:26.

4. Gandja oshiholelwa shagumwe ngoka a li i ilongekidha okutaamba ko ekonakonombiimbeli nziya.

⁴ Okulombwela gumwe kombinga yekonakonombiimbeli. Aantu yamwe mboka hatu popi nayo, ohaya kala yi ilongekidha okutaamba ko ekonakonombiimbeli nziya. Pashiholelwa, esiku limwe mEtine, omukiintu gumwe omugundjuka gwomoKanada, okwa li e ya pokatemba kiileshomwa e ta kutha po okambo Kala nonkalamwenyo ombwanawa sigo aluhe. Omumwameme ngoka a li pokatemba, okwe mu yelithile kutya ohatu longitha okambo hoka tu konakone Ombiimbeli naantu oshali. Omukiintu ngoka omugundjuka okwa li e na ohokwe nokwa li a gandja onomola ye yongodhi komumwameme. Lwanima esiku olyo tuu ndyoka, omukiintu ngoka omugundjuka okwa li a nyolele omumwameme okatumwalaka kombinga yekonakonombiimbeli. Sho omumwameme e mu lombwele kutya ote ya mehuliloshiwike, omukiintu omugundjuka okwe mu pula a ti: “Ongiini ngele owe ya ongula? Ongula onda manguluka.” Oya li ya konakona etitano ndyoka. Omukiintu omugundjuka okwa li a yi kokugongala oshikando she shotango mehuliloshiwike ndyoka nokwa tsikile okuninga ehumokomeho meendelelo.

5. Ongiini tatu vulu okulongitha oondunge dhokuyoolola, uuna tatu lombwele gumwe kombinga yekonakonombiimbeli? (Tala wo omathano.)

⁵ Odhoshili kutya inatu tegelela ayehe mboka haya pulakene ketumwalaka lyetu, ya kale ya halelela okukonakona Ombiimbeli nziya ngaashi omukiintu ngoka omugundjuka. Yamwe mboka ye na ohokwe otashi vulika ya pumbwa ethimbo yi ilonge kombinga yetumwalaka lyetu. Tango, otashi vulika twa pumbwa okutameka oonkundathana noshipalanyolo shoka gumwe e na ohokwe musho. Ihe ngele otwa kala tu na etaloko ewanawa nokutsikila okuulika kutya otu na ko nasha nomuntu gwontumba, methimbo owala efupi, otashi vulika tu tameke ekonakonombiimbeli. Oshike tatu vulu okupopya uuna tatu lombwele gumwe kombinga yekonakonombiimbeli? Aamwatate naamwameme oyendji mboka haye shi pondola mokutameka omakonakonombiimbeli, oya li ya pulwa epulo ndyoka.

6. Oshike tatu vulu okuninga, opo tu tsikile oonkundathana dhetu nomuntu ngoka e na ohokwe?

⁶ Aauvithi nosho wo aakokolindjila yamwe mboka ya li ya pulwa kombinga yokutameka omakonakonombiimbeli, oya yelitha kutya miilongo yimwe oshi li pandunge okuyanda okulongitha uutumbulilo ngaashi “okukonakona,” “ekonakonombiimbeli,” nenge “oku ku longa,” uuna taya popi kombinga yokugandja ekonakonombiimbeli. Oye shi ndhindhilika kutya oshi li hwepo ngele otwa longitha uutumbulilo ngaashi “oonkundathana” nenge “okutseya kombinga yOmbiimbeli.” Opo wu kwathele omuntu a kale a hala okupopya nangoye ishewe, oto vulu okutya “oshihokithi sho Ombiimbeli ya yamukula omapulo ga simanenena monkalamwenyo,” nenge “Ombiimbeli kayi shi owala embo lyopalongelokalunga, ihe ohayi tu kwathele momikalo tadhi longo.” Oto vulu okugwedhwa ko to ti: “Ihashi pula ethimbo ele, ominute 10 sigo 15 odha gwana okwiilonga sha sha simana.” Ino pumbwa okulongitha iitya ngaashi “oshilage” nenge “oshiwike kehe,” oshoka shono otashi vulu okuningitha aantu ya kale yu uvite ye na oshinakugwanithwa.

7. Uunake aantu yamwe haya ndhindhilike kutya oya mona oshili yOmbiimbeli? (1 Aakorinto 14:23-25)

⁷ Ya hiya kokugongala. Osha fa shi li ngeyi kutya pethimbo lyomuyapostoli Paulus, yamwe oya li ya ndhindhilike kutya oya mona oshili yOmbiimbeli oshikando shotango sho ya li pokugongala kwopaKriste. (Lesha 1 Aakorinto 14:23-25.) Olundji shoka osha faathana nokunena. Oyendji mboka aape ohaya ningi ehumokomeho nziya, shampa ya tameke okuya kokugongala. Uunake tu na oku ya hiya? Oshileshwa 10 shembo Kala nonkalamwenyo ombwanawa sigo aluhe, oshi na ehiyo lyokuya kokugongala, ihe ino tegelela wu thike poshileshwa shoka opo wu ya hiye. Oto vulu okuhiya omuntu kokugongala kwomokati koshiwike oshikando shotango sho mwa tsakanena naye, oto vulu oku mu lombwela oshipalanyolo shoshipopiwa shomontaneho shoshiwike shoka nenge wu mu lombwele kombinga yaashoka tashi ka kundathanwa mOshungolangelo yokukonakonwa.

8. Uuna tatu hiya omuntu kokugongala, otu na oku mu lombwela shike kombinga yokugongala kwetu? (Jesaja 54:13)

⁸ Uuna to hiya omuntu ngoka e na ohokwe kokugongala, mu yelithila nkene okugongala kwetu kwa yooloka ko kwaahoka komalongelokalunga ngoka tashi vulika i igilila. Sho omukonakoni gumwe a li pekonakono lyOshungolangelo yokukonakonwa oshikando shotango, okwa pula ngoka ha konakona naye Ombiimbeli a ti, “Ano omuntu ngoka ta kwatele komeho oku shi edhina lya kehe gumwe?” Omumwameme okwe mu yelithile kutya atuhe ohatu kambadhala okutseya omadhina gaamboka ye li megongalo lyetu, ngaashi owala hatu kala tu shi omadhina gaantu yaandjetu. Omukonakoni ngoka okwa li a mono kutya shoka osha yooloka ko kwaashoka hashi ningwa kongeleka yawo. Otatu vulu wo okuyelithila gumwe nkene okugongala kwetu kwa yooloka ko momukalo gumwe ishewe. (Lesha Jesaja 54:13.) Ohatu gongala tu longele Jehova, tu longwe kuye nokutsaathana omukumo. (Heb. 2:12; 10:24, 25) Oshizemo, okugongala kwetu okuunganekwa nawa ku tu kwathele twi ilonge, noinaku kwatela mo omithigululwakalo ndhoka hadhi longithwa koongeleka. (1 Kor. 14:40) Omahala getu gokugongalela oga tungwa nawa, opo ge shi ningithe oshipu kutse twi ilonge kombinga yaJehova. Shimwe ishewe, ihatu popile ongundu yimwe yopolitika kutya oyi li hwepo yi vule onkwawo, molwaashoka ihatu kutha ombinga mopolotika tse ihatu kala tatu tompathana nenge tu nyenyetelathane. Otashi ka kala shi li nawa ngele owu ulukile omukonakoni okavidio Oshike hashi ningwa pokugongala kwOonzapo dhaJehova? komeho yethimbo. Kungawo, otashi ke mu kwathela a mone kutya oshike hashi ningwa pokugongala kwOombangi dhaJehova.

9-10. Uuna tatu hiya gumwe kokugongala, oshike tatu vulu okuninga opo tu mu shilipaleke kutya ita ka thiminikwa e tu wayimine nenge a kuthe ombinga? (Tala wo ethano.)

⁹ Yamwe ohaya kakadhala okuya kokugongala, molwaashoka ya tila kutya pamwe otaya ka pulwa ya ninge iilyo yegongalo. Onkee ano otwa pumbwa oku ya shilipaleka kutya ohatu nyanyukilwa okukala tu na aayenda nosho wo kutya ihatu ya thiminike ya ninge iilyo nenge ya kuthe ombinga pokugongala. Aanegumbo otaya vulu okuya kokugongala, mwa kwatelwa naamboka ye na aanona aashona. Pokugongala kwetu, uunona ihawu ilongelwa wu li kokule naavali yawo. Pehala lyaashono, aavali naanona yawo ohaya kuutumba pamwe nokulongwa pamwe. Momukalo gwa tya ngawo, aavali ohaya kala ye shi kutya aanona yawo oye li noolye nonokutya otaya longwa shike. (Deut. 31:12) Ihatu pula iimaliwa nenge tu umbe ongalo pokugongala. Pehala lyaashono, ohatu landula oshipango shaJesus sho a ti: “Omwa pewa omagano, gandjeni wo omagano.” (Mat. 10:8) Oto vulu wo okulombwela omuntu ngoka to hiya kutya ina pumbwa okukala e na oonguwo dhondilo opo e ye kokugongala. Kalunga oha tala momutima ihe hakeholokopo lyomuntu. — 1 Sam. 16:7.

¹⁰ Ngele omuntu okwe ya kokugongala, ninga ngaashi to vulu opo a kale e uvite a taambiwa ko. Mu kwathela a tseye aakuluntugongalo nosho wo aauvithi yalwe. Ngele okwa kala e uvite uugumbo, otashi vulika a kale ishewe a hala okugaluka. Pethimbo lyokugongala, ngele ke na Ombiimbeli, longitheni yoye, e to mu kwathele nkene e na okuuva ko oshipopiwa shoka tashi gandjwa nosho wo nkene hatu konakona pamwe.

SHOKA WU NA OKUNINGA UUNA WA TAMEKE EKONAKONOMBIIMBELI

11. Ongiini to vulu okuulika kutya owa simaneka ethimbo lyaapulakeni yoye?

¹¹ Oshike tu na okukaleka momadhiladhilo, uuna tatu konakona Ombiimbeli nomuntu pegumbo lye? Ulika kutya owu shi kutya omuntu ngoka to konakona naye okwiipyakidhila noku na owala okathimbo okashona kokukonakona. Pashiholelwa, ngele owa ningi oshilage, thika pethimbo, nonando aantu yomoshitopolwa sheni inaya simaneka ethimbo. Shimwe ishewe, oshi li nawa ngele owa kaleke ekonakonombiimbeli lyeni lyotango efupi. Aauvithi yamwe mboka ya konakona naantu oyendji, otaya ti oshi li pandunge okumana ekonakonombiimbeli nziya, nonando omuntu okwa hala okuuva oshindji. Osha simana wo kuu popye iinima oyindji. Pa omunegumbo ompito a holole omaiyuvo nomadhiladhilo ge. — Omayel. 10:19.

12. Elalakano lyetu oli na okukala lini, uuna twa tameke ekonakonombiimbeli nomuntu pegumbo lye?

¹² Uuna wa tameke okukonakona nagumwe, elalakano lyoye nali kale oku mu kwathele a tseye kombinga yaJehova naJesus nosho wo okukokeka ohole yoku ya hola. Oto vulu okuninga ngawo, mokugandja eitulomo kwaashoka Oohapu dhaKalunga tadhi ti, pehala lyo ku mu lombwela shoka tu shi nenge lyokugandja eitulomo kontseyo yOmbiimbeli ndjoka tu na. (Iil. 10:25, 26) Sho omuyapostoli Paulus a li ha longo aantu, okwa li ha gandja eitulomo kuJesus Kristus, ngoka Jehova a tuma e tu kwathele twi ilonge kombinga ye nokukala tu Mu hole. (1 Kor. 2:1, 2) Paulus okwa li wo a yelitha nkene sha simana okukwathela aalongwa aape ya kokeke omaukwatya omawanawa, ngoka taga vulu okuyelekanithwa noshingoli, oshisiliveli nosho wo nomamanya gondilo. (1 Kor. 3:11-15) Omaukwatya ngoka ga simana ongaashi, eitaalo, uunongo, oondunge dhokuyoolola nosho wo okutila Jehova. (Eps. 19:9, 10; Omayel. 3:13-15; 1 Pet. 1:7) Holela omukalo gwaPaulus gwokulonga, mokukwathela aakonakoni yoye ya kale ye na eitaalo lya kola nosho wo ekwatathano lyopothingo naHe omunahole gwomegulu. — 2 Kor. 1:24.

13. Ongiini tatu vulu okuulika eidhidhimiko nosho yo ondjele, uuna tatu kwathele mboka ye na ohokwe? (2 Aakorinto 10:4, 5) (Tala wo ethano.)

¹³ Holela omukalo gwaJesus gwokulonga mokuulika eidhidhimiko nosho wo ondjele. Yanda okupula omapulo ngoka taga vulu okusitha omuntu ohoni. Ngele omukonakoni ota nyengwa okuuva ko iinima yimwe, puleni komeho e tamu ke yi galukila nale. Pehala lyoku mu thiminika a taambe ko elongo lyontumba manga ini ilongekidha oku li taamba ko, mu pa ethimbo opo oshili yi mene omidhi momutima gwe. (Joh. 16:12; Kol. 2:6, 7) Ombiimbeli otayi ti kutya omalongo giifundja oga fa iinima mbyoka yi na omakankameno ga kola, mbyoka twa pumbwa okuhanagula po. (Lesha 2 Aakorinto 10:4, 5.) Melaka lyopetameko, Ombiimbeli oya longitha ethaneko lyoshungo ndjoka ya pumbwa okuhanagulwa po. Pehala lyokuhanagula po oshungo yomukonakoni gwoye kombanda yomutse gwe, mu kwathela a ninge Jehova Epopilongulu lye. — Eps. 91:9.

UUNA MBOKA AAPE YE YA KOKUGONGALA

14. Otu na okuungaunga ngiini naamboka aape, uuna ye ya pokugongala kwetu?

¹⁴ Jehova okwa hala tu ungaunge nombili naantu mboka aape haye ya kokugongala kutya nduno oya za meputuko lini, oye na iimaliwa yi thike peni, nenge oya za momuhoko guni. (Jak. 2:1-4, 9) Ongiini nduno tatu vulu okuulukila ohole mboka haye ya kokugongala?

15-16. Ongiini tatu vulu okukwathela mboka aape ya kale ye uvite ya taambiwa ko pokugongala kwetu?

¹⁵ Aantu yamwe otashi vulika ye ye kokugongala, molwaashoka otashi vulika ya hala okutseya kutya oshike hashi ningwa po pokugongala, nenge ya lombwelwa ya ye ko kugumwe ngoka e li kehala lilwe. Onkene inatu kakadhala okupopya naantu mboka shampa ye ya kokugongala kwetu. Ya taamba ko nomaako agehe, ihe ino ya ningitha ya kale ye uvite inaaya manguluka. Oto vulu oku kuutumba pamwe nayo. Otamu vulu okulongitha Ombiimbeli yoye nosho wo iifo yokukonakonwa, nenge wu mu pe oshifo she mwene. Shimwe ishewe, konga omikalo dhilwe moka to vulu oku ya ningitha ya kale ye uvite ya manguluka. Omulumentu gumwe ngoka a li e ya pOshinyanga shetu shUukwaniilwa, okwa lombwele omumwatate gumwe ngoka e mu taamba ko kutya ka li a manguluka molwaashoka okwa li e uvite kutya ina zala nawa ngaashi aantu yalwe. Omumwatate okwa li e mu ningitha a kale e uvite a manguluka nokwe mu yelithile kutya Oombangi dhaJehova odha fa owala aantu ooyakwawo. Lwanima, omulumentu ngoka okwa ninginithwa noina dhimbwa nando nkene omumwatate ngoka a li e mu ningitha a kale e uvite a manguluka. Kaleka shika momadhiladhilo: Uuna to popi naayenda manga okugongala inaaku tameka nokonima yokugongala, ulika kutya owu na ko nasha nayo nopwaa na okwiidhopa miinima yawo yopaumwene. — 1 Pet. 4:15.

¹⁶ Otatu vulu wo okuningitha aayenda yetu ya kale ye uvite ya taambiwa ko, mokuulika esimaneko moonkundathana dhetu, momatyokosha getu nosho wo miitopolwa yetu yokugongala kombinga yaamboka kaaye shi Oombangi nenge kombinga yeitaalo lyawo. Yanda okupopya iinima mbyoka tayi vulu oku ya pundukitha nenge mbyoka ya talika ko yi li omatukano. (Tit. 2:8; 3:2) Pashiholelwa, inatu hala okusheka eitaalo lyaamboka inaaya itaala shoka twi itaala. (2 Kor. 6:3) Aamwatate mboka haya gandja iipopiwa yomontaneho oyo unene ye na okukala ya kotokela oshinima shoka. Ohaya ulike wo kutya oye na ko nasha naantu mboka kaaye shi Oombangi, mboka ye ya kokugongala mokulongitha iitya nenge uutumbulilo mboka taya vulu okuuva ko.

17. Elalakano lyetu olini, uuna twa tsakanene muukalele ‘naamboka ya halelela oku ka mona omwenyo’?

¹⁷ Iilonga yetu yokuninga aantu aalongwa otayi endelele esiku nesiku, notatu tsikile okukonga aantu ‘mboka ya halelela oku ka mona omwenyo gwaaluhe.’ (Iil. 13:48) Ngele otwe ya mono, inatu kakadhala oku ya lombwela kombinga yekonakonombiimbeli nenge oku ya hiya kokugongala. Ngele otwa ningi ngawo, otatu ke ya kwathela ya katuke onkatu yawo yotango yokuya ‘mondjila ndjoka, tayi fala komwenyo.’ — Mat. 7:14.