Okugongala kwOonzapo dhaJehova otaku vulu ngiini oku ku kwathela?

Mbela owa gongalele ngaa nando onale esiku limwe nOonzapo dhaJehova? Ngele ino enda po nale pokugongala kwadho, otashi vulika wu kale wa tila kashona okuya ko. Otashi vulika to ipula to ti: ‘Oshike hashi ningwa pokugongala kwOonzapo? Omolwashike okugongala kwa simana? Omolwashike nda pumbwa okuya ko?’ Moshileshwa shika, oto ki ilonga nkene okugongala pamwe nOonzapo taku vulu oku ku kwathela wu hedhe popepi naKalunga. Oto ka mona wo nkene taku vulu oku ku kwathela paumwene.

1. Omolwashike Oonzapo dhaJehova hadhi gongala pamwe?

Tala shoka omunyoli gumwe gwOmbiimbeli a ti kombinga yesimano lyokugongala pamwe nayalwe. Okwa ti: “Omuwa otandi mu hambelele megongalo lyaantu ye.” (Episalomi 26:12) Oonzapo dhaJehova nadho ohadhi kala dha nyanyukwa uuna dha gongala pamwe. Ohadhi gongala muuyuni awuhe momagongalo gadho oshiwike kehe, opo dhi hambelele Kalunga, dhi imbe pamwe nodhi galikane. Omumvo kehe, ohadhi gongala miilongo nomiitopolwa moka dhi li piigongi iinene niishona, opo dhi longele Kalunga pamwe.

2. Oshike to ki ilonga pokugongala kwOonzapo?

Uuna twa gongala, elongo lyetu ohali kala li ikolelela kOohapu dhaKalunga, ‘tatu dhi fatulula, opo tu dhi uve ko.’ (Lesha Nehemia 8:8.) Pokugongala kwetu oto ki ilonga kombinga yaJehova nosho wo yomaukwatya ge omawanawa. Sho to ilongo oshindji kombinga yankene e ku hole, oto ka hedha popepi lela naye. Oto ki ilonga wo nkene to vulu okukala wu na ombili monkalamwenyo ngashingeyi. — Jesaja 48:17, 18.

3. Uuwanawa wuni to ka mona sho wu li pamwe naamboka to tsakanene nayo pokugongala?

Jehova okwe tu lombwela tu “silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi.” (Aahebeli 10:24, 25) Pokugongala kwetu oto ka tsakanena po naantu mboka ye holathane shili noya hala okwiilonga oshindji kombinga yaKalunga ngaashi ngoye. Oto ku uva sho taya tsaathana omukumo noohapu dha kankamena kOmbiimbeli. (Lesha Aaroma 1:11, 12.) Oto ka tseya wo aantu yalwe, mboka ya nyanyukwa, nonando oye na omaupyakadhi monkalamwenyo. Yamwe oye li mondjokana, yo yalwe kaye li mondjokana. Omolwashike Jehova a hala tu kale hatu gongala pamwe pandjigilile? Omatompelo gamwe ogo ngoka ga popiwa mokatendo haka.

ILONGA OSHINDJI

4. Okugongala kwOonzapo dhaJehova

Aakriste mboka ya li ko omimvo 2000 nasha dha ka pita, oya li haya gongala pamwe pandjigilile ya longele Jehova. (Aaroma 16:3-5) Lesha Aakolossa 3:16, e tamu kundathana epulo tali landula:

• Aakriste yopetameko oya li haya longele Jehova ngiini?

OKAVIDIO: Oshike hashi ningwa pokugongala kwOonzapo dhaJehova? (2:12)

• Oshike wa mona tashi ningwa pokugongala kwOonzapo dhaJehova sha faathana naashoka sha popiwa mAakolossa 3:16?

• Mokavidio nenge methano, owa mona mo ishewe shike tashi ningwa pokugongala shoka wa panda?

Lesha 2 Aakorinto 9:7, e tamu kundathana epulo tali landula:

• Omolwashike Oonzapo dhaJehova ihaadhi umbu ongalo?

Tala kutya oshike tashi ka kundathanwa pokugongala kwOonzapo dhaJehova oshiwike shika, pamwe naangoka ha konakona nangoye Ombiimbeli.

• Oshitopolwa shini tashi ka kundathanwa pokugongala, shoka wa hokwa nenge wu wete kutya otashi ke ku kwathela?

Owe shi tseya ngaa?

Omahala, omasiku nosho wo oowili ndhoka hatu gongala miitopolwa yi ili noyi ili muuyuni, uuyelele mboka oto wu adha kepandja lyetu lyokointaneta, jw.org/ng.

1. Pokugongala kwetu ohapu gandjwa iipopiwa, ohapu kala omauliko nohatu tala uuvidio. Ohatu tameke neimbilo negalikano, nopehulilo ohatu imbi wo e tatu galikana

2. Opu na iitopolwa yimwe moka aapulakeni haya pewa ompito ya ninge omatyokosha

3. Kehe gumwe okwa manguluka okugongala pamwe natse kutya nduno aanegumbo, oomboka kaaye li mondjokana, aakokele naanona

4. Ito ka futa sha uuna to ya pokugongala kwetu. Oonzapo dhaJehova ihadhi umbu ongalo nomehala lyadho lyokugongalela ohamu yi wa oshali

5. Ninga oonkambadhala wu kale pokugongala

Tala koshiholelwa shaJesus naantu yaandjawo. Omumvo kehe oya li haye ende ookilometa 100, mokati koondundu taya zi kuNasaret yu uka kotempeli kuJerusalem. Lesha Lukas 2:39-42, e tamu kundathana omapulo taga landula:

• Mbela sho to dhiladhila olweendo lwokuya kuJerusalem olwa li olupu?

• Omolwashike tashi vulika wa pumbwa okuninga oonkambadhala wu kale pokugongala?

• Mbela osha simana wu kale ho yi kokugongala, nonando kashi shi oshipu? Omolwashike to tile ngawo?

• Omolwashike tu na okukala hatu yi kokugongala pandjigilile?

OWI ILONGO SHIKE?

Okukala pokugongala otaku ku kwathele wu ilonge oshindji kombinga yaJehova, wu koleke ekwatathano lyoye naye nowu mu longele pamwe nayalwe.

Omapulo geendululo

• Omolwashike Jehova te tu ladhipike tu kale hatu gongala pamwe?

• Oshike to ki ilonga pokugongala kwOonzapo dhaJehova?

• Uuwanawa ishewe wuni to ka mona, ngele owa kala ho gongala pandjigilile?

UUYELELE WA GWEDHWA PO

Ongiini ngele oho kala wa tila okuya kokugongala? Tala kutya oshike sha kwathele omulumentu ngoka naye a li e na uumbanda, a kale e hole okuya kokugongala.

Katu na siku tu dhimbwe epopitho ndyoka (4:16)

Tala shoka omulumentu gumwe omugundjuka a li a panda pokugongala nosho wo kutya okwa ningi po shike, opo a tsikile okukala ha gongala.

Onda li ndi hole okugongala noonkondo! (4:33)

Tala nkene yalwe haya kala yu uvitile okuya kokugongala.

“Omolwashike wa pumbwa okukala ho gongala kOshinyanga shUukwaniilwa?” (Oshitopolwa shi li kepandja lyetu lyokointaneta)

Tala nkene onkalamwenyo yomulumentu gumwe ngoka a li e hole okukondja ya lunduluka, konima sho a gongala pamwe nOonzapo dhaJehova.

“Kandi na esiku nda topokele nondjembo yandje” (Oshungolangelo, 1 Septemba 2014)