Aanongononi oya hedhitha Owili yEsiku lyEpangulo komeho — Ombiimbeli otayi ti ngiini?

Momasiku 24 Januali 2023, aanongononi oya hedhitha owili yesiku lyepanguloa popepi nopokati kuusiku, esiku ndyoka tali thaneke ehulilo lyuuyuni.

Oshikundaneki shedhina AFP International Text Wire, osha ti: “‘Owili yEsiku lyEpangulo’ sho ya hedhithwa popepi nopokati kuusiku mEtiyali, otayi ulike kiiponga mbyoka tayi vulu okwaadha aantu ngaashi iita yaUkraine, uumbanda wokutila iita yopalute nosho wo uupyakadhi wu nasha nonkalo yombepo.”
Oonkundana dho-ABC, odha ti: “Aanongononi oya holola mEtiyali kutya ‘Owili yEsiku lyEpangulo’ oya hedhithwa komeho noosekonde 90 okuuka pokati kuusiku, ano shoka tashi ulike kutya ehanagulo oli li popepyeelela.”
Oshifo The Guardian, osha ti: “Ongundu yaanongononi muuyuni awuhe, oya londodha kutya aantu otaya ka hanagulathana po shi vulithe nale.”

Mbela ehulilo lyaantu nosho wo lyopulanete yetu yevi oli li popepi? Mbela otwa pumbwa okutila shoka tashi ka ningwa monakuyiwa? Ombiimbeli otayi ti ngiini?

Shoka onakuyiwa yi tu nine

Shi ikolelela kOmbiimbeli, “evi otali kala sigo aluhe” notaku ka kala aantu mboka “taa kala mo sigo aluhe.” (Omuuvithi 1:4; Episalomi 37:29) Onkee ano, aantu itaya ka hanagula po evi nenge ye li yonagule, e taku kala itaaku vulu okukalwa.

Nonando ongawo, Ombiimbeli oya popya kombinga yehulilo. Pashiholelwa, oya popya kutya “uuyuni niinima ayihe yi li mo mbyoka aantu ye yi hokwa, otayi hulu po.” — 1 Johannes 2:17.

Opo wu mone kutya Ombiimbeli oya hala okutya ngiini, uuna tayi popi kombinga yehulilo lyuuyuni, lesha oshitopolwa “Is the World Coming to an End? What Is the Apocalypse?”
Opo wu ilonge shoka Ombiimbeli tayi ti kombinga yethimbo lyokuya kwiiningwanima yuuyuni, lesha oshitopolwa “When Will the World End?”

Tsikila okukala netaloko ewanawa

Ombiimbeli otayi vulu oku tu kwathela tu ka kale netaloko ewanawa, nonando muuyuni omu na omaupyakadhi. Ngiini mbela?

Ombiimbeli ohayi tu pe omayele taga longo. (2 Timoteus 3:16, 17) Pashiholelwa, lesha oshitopolwa “How to Control Worry” wu mone nkene Ombiimbeli tayi vulu oku ku kwathela wu kale wu na etaloko ewanawa, nonando ohatu piti momashongo monkalamwenyo.
Ombiimbeli oye tu pa etegameno li shi okwiinekelwa kombinga yonakuyiwa. (Aaroma 15:4) Oya yelitha nawa shoka tatu vulu okukala twa tegelela ngashingeyi nosho wo monakuyiwa, shoka tashi vulu oku tu kwathela tu kale tu na omukumo, nonando opu na iiningwanima mbyoka hayi holoka muuyuni.

Opo wu mone uuyelele owundji mOmbiimbeli, otatu ku hiya nesimaneko enene wu kambadhale oonkundathana dhopaMbiimbeli ndhoka hatu ningi naantu oshali.

a Oshikundaneki shedhina Bulletin of the Atomic Scientists, osha ti: “Owili yEsiku lyEpangulo oyi li po nelalakano lyokulondodha aantu kutya oye li lela pokuhanagula po uuyuni mbuka, taya longitha uuteknolohi wa nika oshiponga, mboka ya nduluka po yo yene. Owili ndjoka oyi li endhindhiliko nedhimbulukitho liiponga mbyoka tu na okukatukila onkatu, ngele otwa hala okuhupa nokukala kevi.”