Jesus Ta Longo kOndundu

TALA kuJesus ngoka a kuutumba mpaka. Ye ota longo aantu ayehe mbaka kondundu muGalilea. Mboka ya kuutumba popepi naye oyo aalongwa ye. Ye okwa hogolola 12 yomuyo ya kale aayapostoli ye. Aayapostoli oyo aalongwa yaJesus yi ikalekelwa. Owa tseya omadhina gawo?

Opu na Simon Petrus nomumwayina Andreas. Opo nduno opu na Jakob naJohannes, mboka wo aamwayinathana. Opu na wo omuyapostoli gwedhina Jakob, nagumwe natango gwedhina Simon. Aayapostoli yaali oye na edhina Judas. Gumwe oJudas Iskariot, na Judas gulwe oti ithanwa wo Taddeus. Opo nduno opu na Filippus naNatanael (ngoka i ithanwa wo Bartolomeus), naMateus naTomas.

Sho ye a shuna okuza muSamaria, Jesus okwa tameke tu uvitha oshikando shotango: ‘Uukwaniilwa womegulu ou li popepi.’ Owa tseya kutya uukwaniilwa mboka oshike? Owo epangelo lyaKalunga lyolela. Jesus oye omukwaniilwa gwalyo. Ye ota ka pangela okuza megulu note ke eta ombili kombanda yevi. Uukwaniilwa waKalunga otau ka lundululila evi alihe moparadisa ombwanawa.

Jesus ota longo aantu mpaka kombinga yUukwaniilwa. ‘Ne omu na okugalikana ngeyi,’ ye ta yelitha. ‘Tate yetu megulu, edhina lyoye nali yapulwe. Uukwaniilwa woye nau ye. Ehalo lyoye nali gwanithwe kombanda yevi, ngaashika naanaa megulu.’ Aantu oyendji ohaye li ithana ‘Egalikano lyOmuwa Gwetu.’ Yamwe otaye li ithana ‘Tate Yetu Ngu U Li mEgulu.’ Ngoye oto vulu mbela okuhokolola egalikano alihe?

Jesus ota longo wo aantu nkene ye na okukalathana. ‘Ningila yalwe shoka ngoye wa hala ye shi ku ningile,’ ye ta ti. Ndishi ngoye ou shi hole ngele yalwe taye ku ningile uuwanawa? Ano Jesus ota ti kutya tse otu na okuningila yalwe uuwanawa. Otashi ka kala oshikumithi meviparadisa uuna ayehe taye ke shi ninga, hasho mbela?