Ontopolwa 13
Aantu yamwe mboka ya li ya ningi aalongwa yaJesus
OLYE omupiya gwaKalunga a dhenga mbanda ngoka a li ko nale?— Ou li mondjila, oJesus Kristus. Mbela oto dhiladhila kutya otatu vulu okukala twe mu fa?— Eeno, Ombiimbeli otayi ti kutya okwe tu tulila po oshiholelwa tu shi landule. Ote tu hiya tu ninge aalongwaye.
Mbela owu shi kutya otashi ti shike okukala omulongwa gwaJesus?— Osha kwatela mo iinima oyindji. Shotango, otu na okwiilonga kuye. Ihe hasho owala shoka. Otu na wo okukala twi itaala lela shoka a popya. Ngele tatu shi ningi, nena otatu ka ninga shoka te tu lombwele.
Aantu oyendji ohaya ti kutya oyi itaala Jesus. Mbela oto dhiladhila kutya ayehe oye li shili aalongwa ye?— Aawe, oyendji yomuyo kaye shi aalongwa ye. Otashi vulika haya yi ngaa kongeleka, ihe oyendji yomuyo kaye na esiku ya kuthile ethimbo yi ilonge shono Jesus a longa aantu. Paushili, aalongwa yaJesus oomboka owala haya landula oshiholelwa she.
Natu kundathane kombinga yayamwe mboka ya li aalongwa yaJesus sho a li kombanda yevi e li omuntu. Gumwe gwomwaamboka ya li ya ningi aalongwa yaJesus yotango oye Filippus. Filippus okwa li a yi a ka konge kuume ke Natanael (ngoka a li hi ithanwa wo Bartolomeus), ngoka wu wete a kuutumba momuti. Sho Natanael e ya kuJesus, Jesus okwa ti: “Tala, Omwiisraeli gwashili, ngoka kee na nando iifundja!” Natanael okwa li a kumwa nokwa pula a ti: “Owa tseya ndje ngiini?”
Jesus okwa ti: “Onde ku mono, sho wa li momukwiyu, manga Filippus inee ku ithana.” Natanael okwa li a kumwa unene sho Jesus a li e shi lelalela mpoka a li, onkee ano, Natanael okwa ti: “Muhongi, ongoye Omuna gwaKalunga! Ongoye Omukwaniilwa gwAaisraeli!”—Johannes 1:49.
Yalwe oya li ya ningi aalongwa yaJesus manga Filippus naNatanael ya li inaaya ninga aalongwa ye. Mbaka oyo Andreas nomumwayina Petrus nosho wo Johannes nomumwayina Jakob. (Johannes 1:35-51) Ihe konima yethimbo mbaka yane oya shuna kongeshefa yawo yokuyula oohi. Sho Jesus a li te ende komukunkulo gwefuta lyaGalilea, okwa li a mono ko Petrus nAndreas tayu umbile iiyulitho yawo mefuta: Jesus okwa li e yi ithana a ti: “Landulii ndje.”
Jesus sho a humu ko, okwa mono Jakob naJohannes. Oya li mowato pamwe nahe taya andeke iiyulitho yawo. Jesus okwe yi ithana wo ye mu landule. Mbela ando ongoye wi ithanenwe kuJesus, ando owa ningi po shike? Mbela ando owe mu landula mbalambala?— Aalumentu mbano oye shi shi kutya Jesus oye lye. Oye shi wo kutya okwa li a tumwa kuKalunga. Mbalambala oya li ya thigi po oongeshefa dhawo dhokuyula oohi noya landula Jesus.—Mateus 4:18-22.
Sho aalumentu mbaka ya ningi aalanduli yaJesus, mbela shoka osha li tashi ti kutya oya kala nokuninga aluhe shoka shi li mondjila?— Aawe. Otashi vulika to dhimbulukwa aalumentu mbaka nokuli sho ya li taya tompathana kombinga yaangoka omunene e vule ooyakwawo. Ihe aalongwa oya li ya pulakene kuJesus noya li ye na ehalo okulundulula omikalo dhawo. Ngele otu na ehalo okulundulula omikalo dhetu, nena natse otatu vulu okukala aalongwa yaJesus.
Jesus okwa li a hiya aantu yomihoko adhihe ya ninge aalongwa ye. Oshikando shimwe, omupangeli gumwe omugundjuka omuyamba okwi ile kuJesus e te mu pula kutya oku na okuninga shike opo a mone omwenyo gwaaluhe. Sho omupangeli nguka omuyamba a lombwele Jesus kutya oha vulika kiipango yaKalunga okuza kuugundjuka we, Jesus okwe mu hiya a ti: “Ila ihe, u landule ndje.” Mbela owu shi kutya oshike sha li sha ningwa po?—
Ano omulumentu nguno sho a li a lombwelwa kutya okukala omulongwa gwaJesus oko ku na okukala oshinima sha simana shi vule okukala wu na omaliko, okwa li a yemata noonkondo. Ina ninga omulongwa gwaJesus molwaashoka okwa li e hole iimaliwa pehala lyokuhola Kalunga.—Lukas 18:18-25.
Konima sho Jesus a li u uvitha konyala omvula netata, okwa li a hogolola aalongwa 12 yomaalongwa ye ya ninge aayapostoli. Aayapostoli oya li aalumentu mboka Jesus a li a tumu ya ka longe iilonga yi ikalekelwa. Mbela owu shi omadhina gawo?— Natu tale ngele otatu vulu oku gi ilonga. Tala komathano gawo mpaka e to tala ngele oto vulu okutumbula omadhina gawo momutse.
Konima yethimbo, gumwe gwomaayapostoli mboka 12 okwa ningi omwiinayi. Omulongwa ngoka oJudas Iskariot. Konima yaashono, pehala lye opwa li pwa hogololelwa omulongwa gulwe a ninge omuyapostoli. Mbela wu shi edhina lye?— OMatias. Konima yethimbo, Paulus naBarnabas oya li wo ya ningi aayapostoli, ihe kaya li ya kwatelwa mwaamboka 12.—Iilonga 1:23-26; 14:14.
Ngaashi twi ilongo mOntopolwa 1 yembo ndika, Jesus okwa li u ulike kutya oku na ko nasha naanona aashona. Omolwashike a li a ningi ngawo?— Omolwaashoka okwa li e shi kutya nayo otaya vulu oku ka ninga aalongwa ye. Olundji aanona otaya vulu okupopya iinima momukalo ngoka tagu vulu nokuli okuningitha aakuluntu ya pulakene noya kale ya hala okwiilonga oshindji kombinga yOmulongi Omunene.
Aakiintu oyendji oya li wo ya ningi aalongwa yaJesus. Yamwe oya li haye ende pamwe naJesus ngele ta yi e ku uvithe kiilando yilwe. Aakiintu mboka oyo Maria Magdalena, Johanna naSusanna. Otashi vulika ya li wo haye mu kwathele oku mu telekela iikulya nokuyoga oonguwo dhe.—Lukas 8:1-3.
Mbela owa hala okuninga omulongwa gwaJesus?— Dhimbulukwa kutya okupopya owala kutya otu li yamwe yomaalongwa ye itashi ke tu ninga tu kale aalongwa ye. Otu na okwiihumbata ngaashi aalongwa ye shaampoka tu li, ihe hauna owala tu li pokugongala kwopaKriste. Mbela oto vulu okudhiladhila komahala galwe wo mpoka shi li sha simana kungoye okwiihumbata ngaashi omulongwa gwaJesus?—
Owu li mondjila, otu na oku shi ninga ngele tu li kegumbo. Ihe otu na oku shi ninga wo kosikola. Shoka ngame nangoye kaatu na nando okudhimbwa opo tu kale aalongwa yashili yaJesus, osho kutya otu na okwiihumbata ngaashi ye esiku kehe kashi na nduno mbudhi kutya otu li peni.
Ngashingeyi natu leshe pamwe shoka Ombiimbeli tayi ti kombinga yaalongwa yaJesus muMateus 28:19, 20; Lukas 6:13-16; Johannes 8:31, 32 nosho wo 1 Petrus 2:21.
[Ethano pepandja 72]
Omulumentu nguno oye lye nongiini a ningi omulongwa gwaJesus?
[Ethano pepandja 73]
Jesus oti ithana oolye ya ninge aalongwaye?
[Omathano pepandja 75]
Petrus
Andreas
Jakob (omumwayina gwaJohannes)
Johannes
Filippus
Natanael
Mateus
Tomas
Jakob (omwana gwaAlfeus)
Simon
Judas (ngoka hi ithanwa wo Taddeus)
Judas Iskariot
[Omathano pepandja 76]
Aakiintu mbano ya li haya kwathele Jesus momalweendo ge gokuuvitha oyo oolye?
[Ethano pepandja 76]
Openi wo shi li sha simana kutse okwiihumbata ngaashi aalongwa yaJesus?