3 Ilonga oshili kombinga yaJesus
“Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”—Johannes 3:16.
OPU NA ESHONGO LINI? Yamwe oyi itaala kutya Jesus ka li omuntu gwolela. Yalwe oya zimina kutya oko a li, ihe ohaya ti kutya okwa li omuntu gwowala ngoka a sa nale.
ONGIINI TO VULU OKUSINDA ESHONGO NDIKA? Omokulandula oshiholelwa shomulongwa Natanael.a Kuume ke Filippus okwa li e mu lombwele kutya okwa mona Messias “Jesus, omuna gwaJosef Omunasareti.” Ihe Natanael ini itaala owala oohapu dhaFilippus. Pehala lyaashoka okwe mu yamukula a ti: “MuNasaret otamu vulu tuu okuza uuwanawa washa?” Nonando okwa li i itaale shoka a lombwelwa kuFilippus okwa yi e ki ‘italele ko’ ye mwene. (Johannes 1:43-51) Nangoye oto vulu okumona uuwanawa paumwene ngele owa konakona uuyelele kombinga yaJesus. Ongiini to vulu oku shi ninga?
Aakonakoni yondjokonona oye shi mona kutya Jesus okwa li omuntu gwolela. Aanandjokonona yaali Josefus naTacitus mboka ya li ko methelemumvo lyotango oya li ya simanekwa nonando kaya li Aakriste. Oya popi kutya Jesus Kristus omuntu a li ko shili. Tacitus okwa nyola kombinga yomukeesali gwaRoma Nero ngoka a gandja uusama kAakriste omolwomulilo ngoka gwa li muRoma mo 64 E.N. a ti: “Nero okwa gandja uusama kongundu yaantu hayi ithanwa Aakriste, mboka ya li ye tondike nokuhepekwa nayi kAaroma molwaashoka ye li Aakriste. Kristus hoka edhina lyawo lya za okwa li a hepekwa unene kuPontius Pilatus pethimbo lyomupangeli Tiberius.”
Shi na ko nasha naashoka sha popiwa kaanandjokonona yomethelemumvo lyotango netiyali kombinga yaJesus nAakriste yopetameko, oEncyclopædia Britannica yo 2002 oya ti: ‘Omahokololo ngoka gi ithikamena po otagu ulike kutya pomathimbo gonale nokuli aapataneki yUukwakriste kaya li ya limbililwa kutya Jesus oko a li. Oshinima shika osha li sha patanekwa kaantu oshikando shotango nopwaahe na omatompelo golela pehulilo lyethelemumvo eti-18 sigo opetameko lyethelemumvo eti-20.’ Momumvo 2002 omunyanyangidhi gwoshifo The Wall Street Journal okwa nyola a ti: “Kakele kayamwe mboka inaayi itaala muKalunga, aalongwantu oyendji oya zimina kutya Jesus Omunasareti omuntu a li ko shili.”
Natu tale uunzapo kutya Jesus okwa li a yumudhwa. Sho Jesus a kwatwa kaapataneki ye, aalongwa ye oye mu thigi po nosho wo kuume ke Petrus okwe mu idhimbike omolwuumbanda. (Mateus 26:55, 56, 69-75) Konima sho Jesus a kwatwa, aalanduli ye oyi ihana. (Mateus 26:31) Opo ihe, konima yaashoka oya li ya tameke niilonga yawo. Petrus naJohannes oya tokola opo ya ka popye nuulaadhi naantu mboka ya dhipagitha Jesus miineya. Aalongwa yaJesus oya li ya tokola okutaandelitha elongo lye muRoma ashihe noya li yi ilongekidha okusa pehala lyokweetha po eitaalo lyawo.
Oshike sha li sha ningitha aalongwa ya lundulule iikala yawo? Omuyapostoli Paulus okwa fatulula kutya Jesus okwa yumudhwa kuusi, “okwi ihololele Petrus, nokonima aayapostoli ayehe omulongo nayaali.” Paulus okwa gwedha ko a ti: “Okwi ihololele ishewe aalanduli ye ye vule omathele gatano polumwe.” Oyendji yomuyo oya li ye na omwenyo pethimbo mpoka Paulus a nyola oohapu ndhoka. (1 Aakorinto 15:3-7) Otashi vulika waahi itaale owala oshinima shoka sha monika komuntu gumwe nenge kaantu yaali. (Lukas 24:1-11) Ihe Jesus okwa yumudhwa shili, molwaashoka okwa li a monika kaantu ye vulithe pomathele gatano.
OTATU KA MONA ONDJAMBI YASHIKE? Mboka ye na eitaalo muJesus nohaya vulika kuye otaya vulu okudhiminwa po oondjo dhawo notaya vulu okukala ye na eiyuvo lya yela. (Markus 2:5-12; 1 Timoteus 1:19; 1 Petrus 3:16-22) Ngele oya si, Jesus oku uvaneka oku ke ya yumudha “mesiku lyahugunina.”—Johannes 6:40.
Ngele owa hala okumona uuyelele wa gwedhwa po, tala ontopolwa 4, “Jesus Kristus oye lye?” nonti-5, “Ekulilo olyo omagano ge li dhingi ga za kuKalunga” membo Omalongo gashili gOmbiimbeli ogeni naanaa?b
[Omanyolo gopevi]
a MuMateus, Markus naLukas, Natanael oti ithanwa nedhina Bartolomeus.
b Lya nyanyangidhwa kOonzapo dhaJehova.
[Ethano pepandja 7]
Ngaashi Natanael, konakona uuyelele kombinga yaJesus