IITOPOLWA YI IKOLELELA KOSHIPALANYOLO SHOKOMBANDA
Jesus okwa sile ngaa shili?
Pethimbo lyokwenye momumvo 33 E.N., Jesus Omunasareti okwa li a dhipagwa. Okwa li a lundilwa kutya ota kondjitha epangelo. Okwa li a dhengwa nonyanya nokwa alelwa komuti gwomahepeko. Okwa si eso ta li uvitha omwenyo omutoye. Nonando ongaaka, Kalunga okwe mu yumudha, nokonima yomasiku 40 okwa londo e ta yi megulu.
Ehokololo ndika ekumithi otali adhika mOmavaangeli gane gomOmanyolo gopaKriste gOshigreka, ngoka hagi ithanwa Etestamendi Epe. Mbela iinima mbyoka oya ningwa ngaa shili? Epulo ndyoka olya simana nolya kwata miiti. Ngele inayi ningwa, etegameno lyomwenyo gwaaluhe ondjodhi yowala ndjoka itaayi ka tsa nando. (1 Aakorinto 15:14) Ngele oya ningwa shili, nena aantu oye na onakuyiwa ombwanawa, ndjoka nangoye to ka vula okukala wu na. Mbela Omavaangeli, omahokololo goshili nenge ogiifundja?
UUSHILI MBOKA WU LI PO
Omahokololo gOmavaangeli otagu ulike kutya oga nyolwa lela mondjila nuuyelele awuhe owa tulwa mo. Pashiholelwa, omu na oondumba dhomadhina gomahala golela, ngoka ogendji kunena haga vulu okutalelwa po. Otaga popi kombinga yaantu yoshili, oshinima shoka sha kolekwa kaanandjokonona.—Lukas 3:1, 2, 23.
Jesus okwa popiwa kaanyoli mboka ya li ko omimvo 2 000 nasha lwaampono dhaka pita.a Omukalo moka Jesus a li a dhipagwa, ngaashi gwa hokololwa mOmavaangeli, ogwa fa ngoka gwa li hagu longithwa muRoma pethimbo ndyoka. Shimwe ishewe, iiningwanima mbyoka ya li ya ningwa po oya hokololwa paushili, mwa kwatelwa nomapuko ngoka aalongwa yaJesus ya li ya ningi. (Mateus 26:56; Lukas 22:24-26; Johannes 18:10, 11) Iinima ayihe mbika otayi ulike kutya aanyoli yOmavaangeli oya nyola iinima yi li paushili noyolela kombinga yaJesus.
ONGIINI KOMBINGA YEYUMUKO LYAJESUS?
Nonando aantu oye shi zimina kutya Jesus oko a li e ta si, yamwe ohaya kala ya limbililwa kombinga yeyumuko lye. Nokuli naayapostoli ye kaya li ye shi itaale sho yu uvu tango kutya okwa yumuka. (Lukas 24:11) Oya ka za owala momalimbililo sho yo nosho wo aalongwa yalwe ya mono Jesus lwiikando. Oshikando shimwe okwa li a monika koonzapo dhi vulithe 500.—1 Aakorinto 15:6.
Pethimbo sho Jesus a kwatwa po nokudhipagwa, aalongwa Ye oya li taya uvithile ayehe nuulaadhi kombinga yeyumuko lye nokuli naamboka ya li ye mu dhipaga. (Iilonga 4:1-3, 10, 19, 20; 5:27-32) Mbela aalongwa oyendji oya li ngaa taye ku uvitha nuulaadhi ngele kaya li lelalela ye na uushili kutya Jesus okwa yumuka? Eeno. Eyumuko lyaJesus oli li oshinima shoka sha li sha humitha komeho Uukriste pethimbo lyonale nosho wo kunena.
Omahokololo gOmavaangeli ngoka taga popi kombinga yeso neyumuko lyaJesus, oge na uuyelele wondjokonona yi li paushili mboka wa pumbiwa. Ngele owe ga lesha nuukeka otage ku pe uushili kutya iiningwanima mbika oya ningwa shili. Eitaalo lyoye otali vulu okunkondopala ngele owa tseya kutya omolwashike iinima mbika ya ningwa. Oshitopolwa tashi landula otashi yelitha kombinga yaashoka.
a Tacitus, a valwa momumvo 55 E.N. Okwa nyola a ti: “Kristus, hoka kwa za edhina [Aakriste], okwa li a hepekwa noonkondo pethimbo lyepangelo lyaTiberius, kugumwe gwomaapanguli yetu, Pontius Pilatus.” Jesus okwa popiwa wo kuSuetonius gwomethelemumvo lyotango (okuza pomumvo 1-100); komunandjokonona Omujuda Josephus gwomethelemumvo lyotango (okuza pomumvo 1-100); nokuPliny the Younger, omupangeli gwaBitinia ngoka a li ko petameko lyethelemumvo etiyali (okuza pomumvo 101-200).