Jesus ta hogolola aayapostoli 12

Konima sho Jesus a kala tu uvitha uule womumvo gumwe netata lwaampono, okwa li e na okuninga etokolo lya simana. Okwa li ta ka hogolola oolye ya longe pamwe naye? Oolye a li ta ka dheula ya kale taya kwatele komeho megongalo lyopaKriste? Jesus okwa li a hala Jehova e mu wilike, opo a ninge omatokolo ngoka. Onkee ano, okwa yi kondundu hoka a li ta vulu okukala oye awike, nokwa galikana uusiku awuhe. Ongula sho kwa shi, okwi ithana yamwe yomaalongwa ye nokwa hogolola mo aayapostoli 12. Mbela oto dhimbulukwa omadhina gawo? Ogo Petrus, Andreas, Jakob, Johannes, Filippus, Bartolomeus, Tomas, Mateus, Jakob yaAlfeus, Taddeus, Simon naJudas Iskariot.

Aayapostoli 12 oya li taye ke enda pamwe naye. Konima sho e ya dheula, okwe ya tumu ye ku uvithe oyo ayeke. Jehova okwa li e ya pe oonkondo dhokutidha mo oompwidhuli nodhokwaaludha aantu.

Jesus okwi ithana aayapostoli ye 12 ookuume ke, nokwa li e yi inekela. Aafarisayi oya li taya dhiladhila kutya aayapostoli inaya longwa sha noye li aantu yanathangwa. Ihe Jesus okwa li e ya dheulila iilonga mbyoka taya longo. Oya li taya ka kala pamwe naJesus pomathimbo ngoka ga simanenena monkalamwenyo ye, ngaashi manga inaa sa nokonima sho a yumudhwa. Oyendji yomuyo oya li ya za kuGalilea hoka kwa za Jesus. Yamwe yomuyo oya li ya hokana.

Aayapostoli oya li haya ningi omapuko, molwaashoka oya li inaaya gwanenena. Omathimbo gamwe oya li haya popi inaaya dhiladhila nohaya ningi omatokolo omawinayi. Poompito dhimwe oya li kaaye na eidhidhimiko. Oya li nokuli haya patana kutya olye a simana e vule yakwawo. Ihe nando ongawo, oya li aantu ye li nawa noye hole Jehova. Oya li taya ka kala iilyo yotango yegongalo lyopaKriste, tayi longo iilonga ya simanenena mulyo ngele Jesus a shuna megulu.