Oshileshwa 9

Ookuume kaKalunga oyo oolye?

Jesus Kristus oye Omwana gwaJehova noku li wo kuume ke kopothingo omuholike. Manga Jesus inee ya kombanda yevi e li omuntu, okwa li a kala megulu e li oshishitwa shopambepo oshinankondo. (Johannes 17:5) Opo nduno okwe ya kombanda yevi okulonga aantu oshili kombinga yaKalunga. (Johannes 18:37) Okwa gandja wo omwenyo gwe gwopantu okuhupitha aantu muulunde neso. (Aaroma 6:23) Jesus ngashingeyi oye Omukwaniilwa gwUukwaniilwa waKalunga, epangelo lyomegulu ndyoka tali ke eta Oparadisa kombanda yevi ndika.—Ehololo 19:16.

Aayengeli nayo wo ookuume kaKalunga. Aayengeli kaya li ya tameke onkalamwenyo yawo kombanda yevi ye li aantu. Yo oya shitilwa megulu manga Kalunga inaa shita evi. (Job 38:4-7) Opu na aayengeli omamiliyona. (Daniel 7:10) Ookuume kaKalunga mbaka yomegulu oya hala aantu yi ilonge oshili kombinga yaJehova.—Ehololo 14:6, 7.

Kalunga oku na wo ookuume kombanda yevi; ohe yi ithana oonzapo dhe. Onzapo mompangu ohayi hokolola shoka yi shi kombinga yagumwe nenge yasha. Oonzapo dhaJehova ohadhi hokololele yalwe shoka dhi shi kombinga yaJehova nelalakano lye. (Jesaja 43:10, KB) Ngaashi aayengeli, Oonzapo odha hala oku ku kwathela wi ilonge oshili kombinga yaJehova. Dho odha hala u kale wo kuume kaKalunga.