Onkundana ombwanawa ndjoka dha hala u yi uve
SHO Jesus a li kombanda yevi, aalongwa ye oyi ile kuye e taye mu pula taya ti: “Oshike tashi ka kala endhindhiliko lyokukala po kwoye nolyehulilo lyonkalelo yiinima?” (NW) Okwa yamukula kutya otapu ka kala iita moka iigwana oyindji tayi ka kala yi na ombinga, oondjala, omalega golukayu, omakakamo gevi, eindjipalo lyokwaanompango, aawiliki yelongelokalunga aafundja mboka taya pukitha oyendji, aalanduli ye yashili otaya ka kala ye tondike nokuhepekwa, nosho wo ohole yaantu oyendji yokuhola uuyuuki otayi talala. Uuna iinima mbino tayi tameke okuningwa, otayi ku ulika kutya Kristus oku li po mokwaamonika nonokutya Uukwaniilwa womegulu ou li pokuya. Ndjika itayi ka kala tuu onkundana—sha hala okutya, onkundana ombwanawa! Onkee ano Jesus a gwedha ko oohapu ndhino dhi li oshitopolwa shendhindhiliko ta ti: “Nonkundana ndjika ombwanawa yuukwaniilwa otayi ku uvithwa mevi alihe ekaliwa yi ningile iigwana ayihe uunzapo; nopo nduno ehulilo otali ke ya.”—Mateus 24:3-14, NW.
Iinima mbyono opo ya ningwa muuyuni yo yene oyo iiwinayi, ihe shoka tayi ti, osho ekalopo lyaKristus, oshiwanawa. Oonkalo ndhoka dha tumbulwa metetekelo odha tameke okukala dhi wetike sha yela shaampono momumvo ngono gwa tseyithwa apuhe, 1914! Odha li dhi li euliko kutya Omathimbo gAapagani oga hula po nokutya ethimbo lyokulunduluka okuza mepangelo lyopantu okuya mElelo lyOomvula Eyuvi (Eyuvimumvo) lyaKristus olya tameka.
Epsalmi eti-110, ovelise 1 no 2 nEhololo 12:7-12 odhu ulike kutya otapu ka kala ethimbo lyelunduluko. Moka otamu ulikwa kutya Kristus ota ka kuutumba kolulyo lwaKalunga megulu sigo ethimbo lye lyokuninga Omukwaniilwa tali thiki. Opo nduno molwiita yomegulu Satana ote ku umbilwa kombanda yevi, notashi ke eta ooyaye kombanda yevi, na Kristus ota ka pangela mokati kaanita naye. Okuhula po thiluthilu kwuukolokoshi otaku ke ya okupitila ‘muudhigu uunene,’ mboka tau ka adha oshitsa shawo shopombanda piita yaHarmagedon notau ka landulwa kElelo lyOomvula Eyuvi lyombili lyaKristus.—Mateus 24:21, 33, 34; Ehololo 16:14-16.
Ombimbeli otayi ti: “Ihe kala u shi shi, omasiku omahugunina otaku ya omathimbo omadhigu [okukaliwa mugo, NW]. Oshoka aantu taa ka kala nokwiihola noye na uuhalu weliko, oonakwiitanga, aaholuuntsa, aasheki, ihaa vulika kaakuluntu, kaa shi kuhambelela, aakaanuuyuuki, aakaanohole, aayoni yeuvaneno, aanakatsila, aakaaneidhiliko, omaligi, aatondi yuuwanawa, aagwaaleki, aadhudhu, aatuwalali, aaholiihulo komeho gaKalunga; oyo ye na emoniko lyowala lyetilokalunga, ihe oonkondo dhalyo ye dhi idhimbike. Yanda mboka.”—2 Timoteus 3:1-5.
Otashi vulika yamwe taya ti kutya iinima mbika oya ningwa nale mondjokonona yaantu, ihe oshili oyo kutya inayi ningwa nando onale shi thike mpono. Ngaashi aanandjokonona naafatululi taya ti, kombanda yevi kakwa li nando onale ethimbo lya fa ndyoka lya li ko okuza mo 1914 wu uka komeho. (Tala epandja 7.) Ooyaye odha li shaampono inaashi monika nando onale. Ihe shi na ko nasha nomaukwatya galwe gendhindhiliko lyaKristus lyomasiku gahugunina, otu na okutala kooshili ndhoka tadhi landula: Euvitho li na ko nasha nokukala po kwaKristus nosho wo Uukwaniilwa we olyu uvithwa muuyuni auhe inaashi monika nando onale mondjokonona. Kapwa li nando onale aantu ya hepekwa shi thike mpono omolwokuuvitha kwawo ngaashi Oonzapo dhaJehova dhe shi ningilwa. Omathele ogendji gomudho oga li ga dhipagelwa mookamba dhoonkwatwa dhaNazi. Sigo onena Oonzapo dhaJehova odhi indikwa momahala gamwe, nomugalwe otadhi kwatwa, otadhi tulwa mondholongo, otadhi hepekwa notadhi dhipagwa. Shika ashihe osho oshitopolwa shendhindhiliko lya gandjwa kuJesus.
Ngaashi sha hunganekwa mEhololo 11:18 (KB), ‘iigwana oya geele’ Oonzapo oondhiginini dhaJehova, naashika otashi ulike kutya iigwana mbika otayi ka ‘geelwa’ kuJehova. Enyolo olyo tuu ndyoka otali popi kutya Kalunga ota ka ‘yona po mboka haa yono evi.’ Mondjokonona yaantu kamwa li nando onale ethimbo sho okuvula kwevi okukaleka po onkalamwenyo kwa li kwa tulwa moshiponga. Ihe ngashingeyi oshi ili! Aanongononi oyendji oya londodha kutya ngele omuntu ota tsikile okunyateka evi, otali ka kala ombuga. Ihe Jehova ‘okwe li shitile okukala mo,’ nota ka hanagula po aayoni yalyo manga inaaya yona po evi thiluthilu.—Jesaja 45:18.
OMALALEKO NUUYAMBA GOKOMBANDA YEVI KOHI YEPANGELO LYUUKWANIILWA
Otashi vulika kaantu oyendji mboka yi itaala Ombimbeli mboka haya dhiladhila kutya ayehe mboka ya hupithwa oye li megulu, edhiladhilo kutya aantu kombanda yevi otaya ka kala ko ye li aalelwa yUukwaniilwa waKalunga, kaali shiwike. Ombimbeli otayi ulike kutya omwaalu owala gwa ngambekwa tagu yi megulu nonokutya mboka taya ka kala nomwenyo sigo aluhe kombanda yevi otaya ka kala ongundu onene yomwaalu inaagu ngambekwa. (Epsalmi 37:11, 29, OB-1986; Ehololo 7:9; 14:1-5) Ehunganeko membo lyOmbimbeli lyaDaniel otali ulike kutya Uukwaniilwa waKalunga moshikaha shaKristus otau ka siikila evi notau ke li pangela.
Uukwaniilwa waKristus mpoka otau thanekwa u li emanya lya pambuka kuunamapangelo waJehova mboka wa fa ondundu. Otali dhenge notali hanagula po oshiyelekela shoka shi lile po iigwana iinankondo yokombanda yevi, ‘nemanya ndyoka lya dhenge oshiyelekela, . . . lya shituka ondundu onene, noyo yu udha uuyuni auhe.’ Ehunganeko otali tsikile tali ti: “Pomasiku gaakwaniilwa mbeyaka Kalunga nguka komegulu ota ka dhika uukwaniilwa itaau teka po sigo aluhe, nelelo lyawo itali ka gandjwa koshigwana shilwe. Ihe owo otau ka nyanyagula notau ka teyagula omaukwaniilwa agehe noku ga hulitha po, ihe owo wene tau ka kala sigo aluhe.”—Daniel 2:34, 35, 44, yelekanitha KB.
Mbuka owo Uukwaniilwa nosho wo etegameno lyopamanyolo lyomwenyo gwaaluhe kombanda yevi lyo opalekwa notali monika nawa mboka Oonzapo dhaJehova dha hala oku ku lombwela kombinga yawo. Aantu omamiliyona mboka ye na omwenyo ngashingeyi nomamiliyona ogendjigendji mboka ye li ngashingeyi moombila otaya ka mona ompito okukala kulyo sigo aluhe. Opo nduno kohi yElelo lyOomvula Eyuvi lyaKristus Jesus, elalakano lyaJehova lyopetameko li na ko nasha nevi ndyoka a shita noli na ko nasha naantu yaali yotango mboka a tula ko, otali ka gwanithwa. MEviparadisa muka itamu ka kala nando mu na ezaza. Ngaashi naanaa Adam a li a pewa iilonga moshikunino shaEden, osho aantu taya ka kala ye na ooproyeka dhituntula mokutonatela evi niimeno nosho wo iinamwenyo mbyoka yi li kulyo. Otaya “ka kala ko olule nokunyanyukilwa iilonga yiikaha yawo yene.”—Jesaja 65:22, OB-1986; Genesis 2:15.
Opu na omanyolo ogendji ngoka taga vulu okugandjwa okuulika kutya oonkalo dhini tadhi ka kala po sho egalikano ndyoka Jesus e tu longa tali yamukulwa: “[Uukwaniilwa woye nau, KB] ye; ehalo lyoye nali gwanithwe nokombanda yevi wo ngashika megulu.” (Mateus 6:10) Ihe ovelise ndjika oya gwana manga: “Nondu uvu ewi enenenene moshipangelapundi lya ti: Tala ko, egumbo lyaKalunga li li paantu, noye ta kala nayo, oyo notaa kala oshigwana she, Kalunga mwene ota kala pamwe nayo, Kalunga kawo; nota theta po omahodhi momeho gawo, neso kali kala po we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po. Nguka kwa kuutumba koshipangelapundi a ti: Tala, ayihe otandi yi shitukitha iipe. Nokwa lombwele ndje: Shanga, oshoka oohapu ndhika odha kola nodhoshili.”—Ehololo 21:3-5.
[Ethano pepandja 15]
“Omathimbo omadhigu okukaliwa mugo,”
IHE ‘opo nduno ehulilo otali ke ya’
[Ethano pepandja 18]
Holanda
[Ethano pepandja 18]
Nigeria