Shoka aanona ya pumbwa kaavali yawo

OMUSAMANE nomukulukadhi ayehe oye na ombinga mokuvalwa kwokanona kawo. Oshiningwanima shika oshi li ihaashi uviwa ko naanaa kaantu. Onkee ano, itashi kumitha sho aantu haya tala ko okuvala aanona ku li oshikumithalonga.

Odhoshili kutya okumona aanona oku li owala etameko lyoshinakugwanithwa shaavali. Petameko, onkalamwenyo yaanona ayihe konyala ohayi kala yi ikolelela kaavali yawo, ihe sho taye ende taya koko, ohaya kala ya pumbwa unene okupewa eitulomo kaavali yawo kaali shi owala lyopalutu. Ohaya kala ya pumbwa ekwatho opo ya koke pamadhiladhilo, pamaiyuvo, pamikalo nopambepo.

Opo aanona ya koke nawa, oya pumbwa unene tuu okuulukilwa ohole kaavali yawo. Nonando osha simana okulombwelwa kaavali yawo kutya oye ya hole, osha pumbwa okuulikwa niilonga. Ano aanona oya pumbwa okutulilwa po oshiholelwa oshiwanawa kaavali. Oya pumbwa omakotampango ngoka tage ya wilike pamikalo monkalamwenyo. Iinima mbika oye yi pumbwa okuza manga ye li aashona lela. Ngele aanona inaya kwathelwa manga aashona, ohashi vulika pu ka holoke iinima yiyemateka.

Omakotampango ga dhenga mbanda ngoka itaaga vulu okwaadhika kehe pamwe, otaga adhika mOmbiimbeli. Elongo lya kankamena kOmbiimbeli oli na uuwanawa kaawu shi okuyelekwa nasha. Okupitila melongo ndyoka, aanona otaya mono kutya shoka taya lombwelwa, inashi popiwa kaantu yalwe, ihe okOmushiti gwawo, He gwomegulu. Shika ohashi ningi omayele ngoka aanona taya pewa kaavali yawo ga kale taga ti sha.

Ombiimbeli otayi ladhipike aavali ya longe nuudhiginini mokuthindila omakotampango ngoka ge li mondjila momadhiladhilo gaanona yawo. Ihe sho aanona taye ende taya koko, aavali olundji ohaya mono oshidhigu okupopya nayo kombinga yiinima mbyoka ya simana noonkondo. Embo ndika Ilonga kOmulongi Omunene, olya nuninwa okukwathela aavali opo kaapu holoke onkalo ya tya ngaaka. Otali pe aavali naanona yawo uuyelele wu na ko nasha niinima yopambepo mbyoka taya vulu okulesha pamwe. Kakele kaashono, otali pendutha wo ohokwe maanona ya kale taya kundathana naavali yawo moku li lesha.

Oto ka mona kutya membo ndika omu na omapulo ogendji ngoka tago opalele okuyamukulwa kaanona. Ngele mwa thiki pugo sho to konakona nokanona koye, oto ka mona okandhindhiliko haka (—). Otake ku dhimbulukitha wu mwene po nowu ladhipike okanona ka yamukule epulo ndyoka we ka pula. Aanona oye hole okukutha ombinga miinima mbyoka tayi ningwa. Ngele ino ka pa ompito ka yamukule, otaka ka kanitha nziya ohokwe mokukonakona.

Shoka sha simanenena osho kutya omapulo ngoka otage ke ku kwathela wu tseye shoka okanona taka dhiladhila. Odhoshili kutya okanona otashi vulika ka gandje omayamukulo ga puka, ihe uuyelele mboka wa landula epulo kehe owa nuninwa okukwathela okanona ka kale haka dhiladhila nawa.

Shoka shi ikalekelwa membo ndika, osho omathano ge vulithe 230. Pomathano ogendji opu na omapulo ngoka okanona ka tegelelwa ka yamukule, shi ikolelela kwaashoka ke wete mugo nokwaashoka ka lesha. Onkee ano, kundathana omathano ngoka nako. Omathano ngoka oge li oshilongitho oshiwanawa shoku ka longa shoka tashi tsu omuthindo iinima mbyoka ya simana mbyoka taka longwa.

Ngele okanona oka tseya okulesha, ka ladhipika ke ku leshele embo ndika noke li ileshele ko kene. Shi thike mpoka take li lesha iikando oyindji, opo pu thike tashi ka thindila momadhiladhilo gako nomomutima gwako omayele omawanawa ngoka ge li mo. Ihe opo wu koleke ekwatathano pokati koye nokanona koye nokukala hamu simanekathana, omu na okukala hamu lesha embo ndika pamwe nopandjigilile.

Aanona ohashi vulika ya nwethwe mo kiinima yopamilalo, yuumpulile nosho wo iinima yilwe inaayi yogoka mbyoka ya li ya pumba oomvula dhontumba dha piti. Onkee ano, oya pumbwa egameno ndyoka tali popiwa membo ndika momukalo gwokondandalunde notagu ya simanekitha. Ihe nando ongaaka, aanona oya pumbwa unene okulongwa kombinga yOnzo yuunongo auhe, Tate yetu gwomegulu, Jehova Kalunga. Shika osho Jesus Omulongi Omunene, a li a ningi aluhe. Otu na lela einekelo kutya embo ndika otali ke ku kwathela nuukwanegumbo woye mu zule onkalamwenyo yeni yi kale tayi nyanyudha Jehova, notamu ka mona omalaleko nuuyamba taga kalelele.