“Mwaa pwile momamakelo”

“Tonateni, ne mu [tsikile okugalikana, NW], mwaa pwile momamakelo.”—MATEUS 26:41.

ETHININIKO olya li enene—inaali fa nando olimwe ndyoka a tsakanekele nale. Jesus Kristus, Omwana gwaKalunga, onkalamwenyo ye yokombanda yevi oya li pokuhula po. Jesus okwa mono kutya masiku ota ka kwatwa, ota ka pangulilwa eso nota ka alelwa koshiti shomahepeko. Okwa li a tseya kutya etokolo lye noonkatu dhe kehe otayi ka guma edhina lyaHe. Jesus okwa li wo e shi kutya etegameno lyomwenyo gwomonakuyiwa lyaantu olya li li ikolelela kwaashoka ta ningi. Sho a li a taalelwa komathininiko agehe ngono, oshike mbela a li a ningi po?

² Jesus okwa yi koshikunino shaGetsemane pamwe naalongwa ye. Osha li ehala ndyoka Jesus e hole. Hoka, okwa zi po paalongwa ye uule woshikako oshifupi. Manga e li oye awike, okwa pula oonkondo kuHe gwomegulu, nokwe mu mbumbulile omutima gwe megalikano a mana mo, ihe ine shi ninga owala oshikando shimwe ashike ihe iikando itatu. Nonando Jesus okwa gwanenena, ina kala e uvite kutya oku na uulaadhi wokusinda ethininiko ndyoka kuye mwene.—Mateus 26:36-44.

³ Nena, natse wo otu li kohi yethininiko. Ketameko lyoshileshomwa shika, otwa kundathana euliko kutya otu li momasiku gahugunina gonkalelo ndjika yuukolokoshi. Omamakelo nomaudhigu guuyuni waSatana omadhigu noonkondo. Omatokolo noonkatu dhakehe gumwe gwomutse ngoka ta ti kutya ota longele Kalunga kashili otayi gumu edhina lye noyi na oshizemo oshinene ketegameno lyetu paumwene lyomwenyo muuyuni we uupe. Otu hole Jehova. Otwa hala ‘okwiidhidhimika sigo ehulilo’—ehulilo lyonkalamwenyo yetu nenge ehulilo lyonkalelo ndjika, kutya nduno oshike tashi ya tango. (Mateus 24:13) Ihe ongiini tatu vulu okukala tu shi kutya ethimbo ndyoka tu li mulyo olye endelela e tatu kala twa tonata?

⁴ Molwashoka Jesus okwa li a tseya kutya aalongwa ye yonale noyongashingeyi otaya ka adhika wo komathininiko, okwe ya ladhipike a ti: “Tonateni, ne mu [tsikile okugalikana, NW], mwaa pwile momamakelo.” (Mateus 26:41) Oohapu ndhoka otadhi ti shike kutse nena? Omamakelo geni ho tsakaneke? Ongiini to vulu ‘okukala wa tonata’?

Omamakelo gokuninga shike?

⁵ Atuheni ohatu tsakaneke omamakelo esiku kehe tu ye “momwigo gwaSatana.” (2 Timoteus 2:26) Ombimbeli otayi tu londodha kutya Satana okwa ninga unene aalongeli yaJehova oyo iihakanwa ye. (1 Petrus 5:8; Ehololo 12:12, 17) Onelalakano lyashike mbela? Ita lalakanene lelalela oku tu dhipaga. KuSatana kashi shi esindano ngele otwa si tu li aadhiginini kuKalunga. Satana okwa tseya kutya Jehova, pethimbo Lye lyo opala, ota ka kutha po eso okupitila meyumuko.—Lukas 20:37, 38.

⁶ Satana okwa hala okuhanagula po shoka sha simana nokuli unene shi vulike komwenyo gwetu gwongashingeyi—uudhiginini wetu kuKalunga. Satana okwa halelela okuulika kutya ota vulu oku tu ethitha po okulongela Jehova. Onkee ano, ngele otatu vulu okunwethwa mo tu kale kaatu shi aadhiginini—tu ethe po okuuvitha onkundana ombwanawa nenge tu ethe po omithikampango dhopaKriste—shoka otashi ka kala esindano kuSatana. (Aaefeso 6:11-13) Onkee ano, “omuhindadhi” ota tula omamakelo komeho getu.—Mateus 4:3.

⁷ “Omakotokelo” gaSatana oge li momikalo odhindji. (Aaefeso 6:11) Ota vulu oku tu makela nohole yokuhola omaliko, uumbanda, omalimbililo nenge okulalakanena omainyanyudho. Ihe gumwe gwomomikalo dhe hadhi shi pondola ogwa kwatela mo etekomukumo. E li omunamakoto, okwa tseya kutya okwaanetegameno otaku vulu oku tu nkundipaleka noku tu ninga iihakanwa. (Omayeletumbulo 24:10) Unene tuu ngele tatu “dhengagulwa” pamaiyuvo, ohe tu makele tu ethe po okulongela Jehova.—Epsalmi 38:9.

⁸ Sho tatu hedha lela momasiku gahugunina, iiyetithi yetekomukumo otayi monika ya fa tayi indjipala, nokatu li ihaatu nwethwa mo kuyo. (Tala oshimpungu “Iinima yimwe mbyoka hayi etitha okuteka omukumo.”) Kutya nduno oshike hashi ku eta, okuteka omukumo otaku vulu okunkundipaleka oonkondo dhetu. ‘Okulongitha nawa ethimbo’ miinakugwanithwa yopambepo mbyoka ya kwatela mo okukonakona Ombimbeli, okukala pokugongala kwopaKriste, nokukutha ombinga muukalele, otayi vulu okukala eshongo ngele owa vulwa palutu, pamadhiladhilo nopamaiyuvo. (Aaefeso 5:15, 16, KB) Dhimbulukwa kutya Omuhindadhi okwa hala u ethe po okulongela Jehova. Ihe ndika halyo ethimbo lyokutyololoka nenge lyokudhimbwa kutya ethimbo ndyoka tu li mulyo olye endelela! (Lukas 21:34-36) Ongiini to vulu okukondjitha omamakelo e to kala wa tonata? Konakona omaetopo gane ngoka taga vulu oku ku kwathela.

‘Tsikila okugalikana’

⁹ Inekela Jehova okupitila megalikano. Dhimbulukwa oshiholelwa shaJesus moshikunino shaGetsemane. Sho a li muudhigu uunene wopamaiyuvo, okwa ningile shike? Okwa galikana Jehova e mu kwathele, a galikana a mana mo ihe ‘omazigudhe ge ga ndondele pevi oga li ga fa omata gombinzi.’ (Lukas 22:44) Dhiladhila kombinga yaashoka. Jesus okwa li a tseya nawa Satana. Jesus okwa li a tala okuza megulu omamakelo agehe ngoka Satana a longitha moonkambadhala dhe dhokuyula aapiya yaKalunga. Ihe Jesus ka li e uvite kutya ota vulu okusinda nuupu shaa shoka Omuhindadhi te mu makele nasho. Ngele Omwana gwaKalunga a gwanenena okwa li e uvite kutya osha pumbiwa okugalikana Kalunga e mu kwathe noku mu pe oonkondo, tse inatu shi pumbwa tuu unene!—1 Petrus 2:21.

¹⁰ Dhimbulukwa wo kutya konima yokuladhipika aalongwa ye ya “tsikile okugalikana,” Jesus okwa ti: “Ombepo oya hala, ihe onyama onkundi.” (Mateus 26:41, yelekanitha NW.) Jesus kwa li ta popi onyama yalye? Osha yela kutya kaya li ye mwene, oshoka monyama ye yopantu ya gwanenena kamwa li sha shoka sha nkundipala. (1 Petrus 2:22) Ihe opwa li eyooloko shi na ko nasha naalongwa ye. Molwuuthigululwalunde negamo lyuulunde, oya li ya pumbwa unene ekwatho ya kondjithe omamakelo. (Aaroma 7:21-24) Omolwaashono e ya ladhipike nosho wo Aakriste ayehe yashili yonena ya pule ekwatho megalikano mokukondjitha omamakelo. (Mateus 6:13) Jehova oha yamukula omagalikano ga tya ngaaka. (Epsalmi 65:3) Ngiini? Omomikalo mbali.

¹¹ Gwotango, Kalunga ote tu kwatha tu dhimbulule omamakelo. Omamakelo gaSatana oga fa oomwigo dha tegwa mondjila mwa luudha. Ngele ino dhi mona, oto vulu okuyulwa kudho. Okupitila mOmbimbeli nosho wo miileshomwa ya kankamena kOmbimbeli, Jehova oha tula pomutenya oomwigo dhaSatana, nokungeyi otashi tu vulitha okuyanda okwiigandja komamakelo. Uule woomvula, iinyolomwa nosho wo ooprograma dhiigongi iinene niishona odhe tu londodha olundji kombinga yiiponga ngaashi okutila aantu, oluhondelo, ohole yokuhola omaliko nosho wo omamakelo galwe gaSatana. (Omayeletumbulo 29:25; 1 Aakorinto 10:8-11; 1 Timoteus 6:9, 10) Ino pandula mbela sho Jehova e tu londodha shi na ko nasha nomakoto gaSatana? (2 Aakorinto 2:11) Omalondodho agehe ngoka oge li eyamukulo komagalikano goye gokupula ekwatho lyokukondjitha omamakelo.

¹² Omutiyali, Jehova oha yamukula omagalikano getu moku tu pa oonkondo tu idhidhimikile omamakelo. Oohapu dhe otadhi ti: “Kalunga . . . ite mú ethele omamakelo ge vule oonkondo dheni, ihe mumwe nemakelo ota longele wo ondjila yokuya ontuku.” (1 Aakorinto 10:13) Kalunga ite ke etha nando omamakelo ge tu ningile omadhigu noonkondo e tatu kala kaatu na oonkondo dhopambepo oku ga kondjitha—ngele otatu tsikile okukala twe mu inekela. Ongiini mbela he tu ‘longele ondjila yokuya ontuku’? Oha “gandja Ombepo Ondjapuki kwaamboka taye mu indile.” (Lukas 11:13) Ombepo ndjoka otayi vulu oku tu kwathela tu dhimbulukwe omakotampango gOmbimbeli ngoka taga vulu okukoleka etokolotoko lyetu lyokulonga shoka shu uka nohayi tu kwathele tu ninge omatokolo goondunge. (Johannes 14:26; Jakob 1:5, 6) Otayi vulu oku tu kwathela tu ulike omaukwatya ngoka twa pumbwa opo tu sinde iikala ya puka. (Aagalati 5:22) Ombepo yaKalunga otayi vulu nokuli okwiinyengitha ooitaali ooyakwetu ‘ya kale ekwatho tali koleke kutse.’ (Aakolossa 4:11, NW) Mbela ino pandula sho Jehova i inyenge momikalo dhopahole dha tya ngaaka komagalikano goye taga pula ekwatho?

Kala u na ondjele shi na ko nasha naashoka wa tegamena

¹³ Opo tu kale twa tonata, otwa pumbwa okukala tu na ondjele shi na ko nasha naashoka twa tegamena. Omolwomathininiko gonkalamwenyo, atuheni ohatu kala twa vulwa omathimbo gamwe. Ihe otu na okudhimbulukwa kutya Kalunga inu uvaneka nando kutya otatu ka kala nonkalamwenyo kaayi na omaupyakadhi monkalelo ndjika onkulu. Nokuli nomomathimbo gOmbimbeli, aapiya yaKalunga oya li ya adhika komaudhigu, ga kwatela mo omahepeko, oluhepo, epolimano nomikithi.—Iilonga 8:1; 2 Aakorinto 8:1, 2; 1 Aatessalonika 5:14; 1 Timoteus 5:23.

¹⁴ Nena, tse wo otu na omaupyakadhi. Ohatu vulu okwaadhika komahepeko, okukala tu na uudhigu wopaimaliwa, okukondja nepolimano, okweehama nokumona iihuna momikalo dhilwe. Ando Jehova okwa li he tu gamenene komaupyakadhi agehe pashikumithalonga, mbela ando shoka itashi ka ningitha Satana a lundile Jehova? (Omayeletumbulo 27:11, NW) Jehova ohe etha aapiya ye ya makelwe, poompito dhilwe nokuli sigo omeso lyompiya mokudhipagwa kaapataneki.—Johannes 16:2.

¹⁵ Ihe mbela Jehova oku uvaneka shike? Ngaashi twe shi popya nale, oku uvaneka kutya ote ke tu vulitha okukondjitha emakelo kehe ndyoka tashi vulika li tu adhe, shampa owala twe mu inekela thiluthilu. (Omayeletumbulo 3:5, 6) Okupitila mOohapu dhe, mombepo ye nomehangano lye, ohe tu gamene pambepo, moku tu kwatha tu gamene ekwatathano lyetu naye. Ngele otu na ekwatathano naye ewanawa, nokuli nonando otwa si, otwa sindana. Kapu na sha—nokuli neso—tashi vulu okukelela Kalunga kaa pe aapiya ye aadhiginini ondjambi. (Aaheberi 11:6) Nomuuyuni uupe mboka u li popepi, Jehova ita ka nyengwa okugwanitha omauvaneko ge agehe galwe omakumithi ge na ko nasha nomalaleko nuuyamba gaamboka ye mu hole.—Epsalmi 145:16.

Dhimbulukwa oompata

¹⁶ Opo tu idhidhimike sigo ehulilo, otu na okudhimbulukwa oompata dha simanenena ndhoka dha kwatela mo kutya omolwashike Kalunga e etha uukolokoshi u kale po. Ngele omathimbo gamwe omaupyakadhi getu taga monika ga fa omadhigu unene notatu makelwa tu ethe po okulongela Jehova, oshi li nawa ngele tatu idhimbulukitha kutya Satana okwa shongo uuthemba waJehova wokukala omunamapangelo. Omupukithi ngoka okwa tulile wo momalimbililo eigandjo nuudhiginini waalongeli yaKalunga. (Job 1:8-11; 2:3, 4) Oompata ndhoka nomukalo moka Jehova a hogolola oku dhi kandula po oya simana noonkondo yi vule omwenyo gwetu. Ngiini?

¹⁷ Sho Kalunga e etha uudhigu wu kale po pakathimbo osha gandja ethimbo kuyalwe ya taambe ko oshili. Dhiladhila kwaashika: Jesus okwa mono iihuna opo tu kale tu na omwenyo. (Johannes 3:16) Mbela otwe shi pandula tuu? Ihe mbela otu na tuu ehalo okwiidhidhimikila omaudhigu uule wokathimbo opo yalwe ya mone wo omwenyo? Opo tu idhidhimike sigo ehulilo, otu na okuzimina kutya uunongo waJehova ou vule wetu kokule. (Jesaja 55:9) Ota ka hulitha po uukolokoshi pethimbo ndyoka ewanawa okukandula po oompata sigo aluhe omolwuuwanawa wetu waaluhe. Dhoshili, mbela opu na omukalo gulwe natango gwokukandula po oompata ndhoka? Kalunga ke na nando okwaahenuuyuuki!—Aaroma 9:14-24.

“Hedheni kuKalunga”

¹⁸ Opo tu kale tu shi kutya ethimbo ndyoka tu li mulyo olye endelela, otwa pumbwa okukala popepi naJehova. Inatu dhimbwa nando kutya Satana ota ningi ashihe shoka ta vulu opo a hanagule po ekwatathano lyetu ewanawa naJehova. Satana okwa hala tu itaale kutya ehulilo itali ke ya nando nosho wo kutya itashi kwatha sha okuuvitha onkundana ombwanawa nenge okukala metsokumwe nomithikampango dhOmbimbeli. Ihe oye “omufundja nahe yayo.” (Johannes 8:44) Otu na okukala twa tokola toko ‘okukondjitha ondeveli.’ Ekwatathano lyetu naJehova olyo oshinima shoka kaatu na nando oku shi tala ko kaashi na oshilonga. Ombimbeli otayi tu ladhipike pahole tayi ti: “Hedheni kuKalunga, oye nota hedha kune.” (Jakob 4:7, 8) Ongiini mbela tatu vulu okuhedha popepi lela naJehova?

¹⁹ Okutedhatedha pamwe negalikano okwa simanenena. Ngele omathininiko gonkalamwenyo taga monika ga fa omadhigu noonkondo, mbumbulila omutima gwoye kuJehova. Ngele oto popi kondandalunde, otashi ka kala oshipu okumona eyamukulo lye kombinga yomaindilo goye. Eyamukulo otashi vulika kaali kale aluhe naanaa ngaashi wa tegelela li kale, ihe ngele owa hala oku mu simaneka nokukakatela uudhiginini woye, ote ke ku pa ekwatho ndyoka wa pumbwa opo u vule okwiidhidhimika nomupondo. (1 Johannes 5:14) Sho to mono ewiliko lye monkalamwenyo yoye, oto ka hedha popepi lela naye. Okulesha nokutedhatedha kombinga yomaukwatya noondjila dhaJehova, ngaashi ya hololwa mOmbimbeli, nako okwa simanenena. Okutedhatedha kwa tya ngaaka otaku ku kwathele u mu tseye nawa; otaku inyengitha omutima gwoye notaku indjipaleke ohole yoye yoku mu hola. (Epsalmi 19:15) Komeho gaayihe, ohole ya tya ngaaka, otayi ke ku kwathela u kondjithe omamakelo nou kale wa tonata.—1 Johannes 5:3.

²⁰ Opo tu kale popepi naJehova, osha simana wo tu kale popepi nooitaali ooyakwetu. Shoka otashi ka kundathanwa moshitopolwa shahugunina shoshileshomwa shika.

OMAPULO GEKONAKONO

• Jesus okwa ningi shike sho a li kohi yomathininiko omadhigu, sho a li e li pokusa, nokwa ladhipike aalongwa ye ya ninge shike? (Okatendo 1-4)

• Omolwashike Satana a ninga aalongeli yaJehova iihakanwa ye, nomomikalo dhini ha kambadhala oku tu makela? (Okatendo 5-8)

• Opo tu kondjithe omamakelo, omolwashike tu na okutsikila okugalikana (okatendo 9-12), okukala tu na ondjele shi na ko nasha naashoka twa tegamena (okatendo 13-15), okudhimbulukwa oompata (okatendo 16-17) nosho wo ‘okuhedha kuKalunga’ (okatendo 18-20)?

[Oshimpungu pepandja 25]

Iinima yimwe mbyoka hayi etitha okuteka omukumo

Uukolele nenge uukulupe. Ngele otatu hepekwa kuuvu woshinamenena nenge ngele uukulupe otau tu ngambeke, otashi vulika tu kwatwe kepolimano molwaashoka itaatu vulu okulonga oshindji mokulongela Kalunga.—Aaheberi 6:10.

Eyeme. Otashi vulika tu teke omukumo ngele aantu aashona yowala tayi inyenge koonkambadhala dhetu dhokuuvitha Oohapu dhaKalunga.—Omayeletumbulo 13:12.

Okukala u wete kuu na oshilonga. Omolwokuningwa nayi uule womimvo, omuntu ota vulu okwiitaalithwa kutya ke holike, nokuJehova nokuli.—1 Johannes 3:19, 20.

Okweehamekwa pamaiyuvo. Ngele omuntu okwa yematekwa noonkondo komwiitaali omukwawo, otashi vulika a kale a geya e ta makelwa e ethe okukala pokugongala kwopaKriste nenge okukutha ombinga miilonga yomomapya.—Lukas 17:1.

Omahepeko. Yalwe mboka kaaye shi yomeitaalo limwe nangoye otashi vulika ye ku pataneke, ye ku hepeke, nenge ye ku sheke.—2 Timoteus 3:12; 2 Petrus 3:3, 4.

[Ethano pepandja 26]

Jesus okwe tu ladhipike tu “tsikile okugalikana” omolwekwatho tu kondjithe omamakelo