Otwa pewa oonkondo dhokukondjitha omamakelo nokwiidhidhimikila etekomukumo
“One otamu ka pewa oonkondo, uuna [ombepo ondjapuki tayi] ka tililwa mune.”—IIL. 1:8.
1, 2. Ekwatho lini Jesus a li u uvanekele aalongwa ye, nomolwashike ya li taye ke li pumbwa?
JESUS okwa li e shi shi kutya aalongwa ye kaya li taya vulu okudhiginina ayihe mbyoka e ya lombwela koonkondo dhawo yene. Mokutala koshilonga shoka ya li ya pewa, koonkondo dhaapataneki yawo nosho wo kuunkundi wopanyama, osha li sha yela kutya oya li ya pumbwa oonkondo dhi vule dhopantu. Onkee ano, konima owala manga inaa ya megulu, Jesus okwa li a shilipaleke aalongwa ye a ti: “One otamu ka pewa oonkondo, uuna [ombepo ondjapuki tayi] ka tililwa mune. Nena one otamu ka ninga oonzapo dhokuhokolola ndje paantu ayehe mboka ye li muJerusalem, muJudea alihe nomuSamaria sigo omiilongo ayihe yokombanda yevi.”—Iil. 1:8.
2 Euvaneko ndyoka olya li lya tameke okugwanithwa pOpentekoste yomo 33 E.N. sho ombepo ondjapuki ya li ya nkondopaleke aalanduli yaJesus Kristus yu udhithe Jerusalem nokuuvitha kwawo. Kapu na epataneko lya li tali vulu okukankeka iilonga yawo yokuuvitha. (Iil. 4:20) Aalanduli yaJesus aadhiginini natse twa kwatelwa mo, otatu ka kala twa pumbwa meendelelo oonkondo odho tuu ndhoka dha gandjwa kuKalunga “omasiku agehe sigo ehulilo lyuuyuni.”—Mat. 28:20.
3. (a) Yelitha eyooloko ndyoka li li pokati kombepo ondjapuki noonkondo. (b) Oonkondo dha za kuJehova otadhi vulu oku tu kwathela tu ninge shike?
3 Jesus okwa li u uvanekele aalongwa ye kutya ‘otaya ka pewa oonkondo uuna ombepo ondjapuki tayi ka tililwa muyo.’ Iitya “oonkondo” nosho wo “ombepo” oyi na omaityo ga yoolokathana. Ombepo yaKalunga, sha hala okutya, oonkondo dhe tadhi longo, oyo oonkondo ndhoka ha longitha okupitila maantu nenge miinima yontumba opo a gwanithe po ehalo lye. Ihe oonkondo ndhoka otadhi vulu okufatululwa dhi li “oonkondo dhokulonga sha nenge dhokweeta po sha.” Otashi vulika dhi kale momuntu gwontumba nenge moshinima shontumba sigo oompoka sha pumbiwa opo dhi ete po sha. Ombepo ondjapuki otayi vulu okufaathanithwa nolusheno ndoka halu tulwa mopatiliyi ngele tayi udhithwa, omanga oonkondo dha faathana naandhoka hadhi kala mopatiliyi konima ngele yu udha. Oonkondo ndhoka Jehova ha gandja kaapiya ye okupitila mombepo ye ondjapuki ohadhi pe kehe gumwe gwomutse oonkondo tu kale metsokumwe neigandjo lyetu lyopaKriste, nuuna sha pumbiwa, tu kondjithe oonkondo oombwinayi ndhoka dhi li mutse.—Lesha Mika 3:8; Aakolossa 1:29.
4. Oshike tashi ka konakonwa moshitopolwa shika, nomolwashike?
4 Ongiini oonkondo ndhoka twa pewa kombepo ondjapuki tadhi vulu okulongithwa? Ongiini ombepo ondjapuki tayi vulu oku tu inyengitha tu longe nenge tu katuke moonkalo dha yoolokathana? Sho tatu lalakanene okulongela Kalunga nuudhiginini, ohatu kala twa taalelwa komaupyakadhi ogendji ngoka hage etithwa kuSatana, kuuyuni we nenge kokwaahagwanenena kwetu. Osha simana tu sinde omaupyakadhi ga tya ngaaka opo tu kale Aakriste aadhiginini, hatu kutha ombinga pandjigilile muukalele nokukala tu na ekwatathano ewanawa naJehova. Natu konakoneni nkene ombepo ondjapuki hayi tu kwathele tu kondjithe omamakelo notu idhidhimikile omvulwe nosho wo etekomukumo.
Otwa pewa oonkondo dhokukondjitha omamakelo
5. Ongiini egalikano tali vulu oku tu nkondopaleka?
5 Jesus okwa longa aalanduli ye ya kale haya galikana taya ti: “Ino tu fala mehongololo, aawe, tu hupitha muuwinayi.” (Mat. 6:13) Jehova ita ke ekelahi aapiya ye aadhiginini ngele taye mu indile ekwatho ndyoka. Pompito yilwe Jesus okwa tile: ‘Tate yetu yomegulu ota ka gandja ombepo ondjapuki kumboka taye mu indile.’ (Luk. 11:13) Itashi tu shilipalekulula tuu sho Jehova u uvaneka oku tu pa ombepo ye yi tu kwathele tu longe shoka shu uka! Dhoshili, shika itashi ti kutya Jehova ote ke tu gamena kaatu makelwe. (1 Kor. 10:13) Ihe ngele twa taalela omamakelo, oli li ethimbo ndyoka tu na okugalikana twa mana mo shi vulithe shito.—Mat. 26:42.
6. Omayamukulo gaJesus oga li ga kankamena kushike sho a li ta makelwa kuSatana?
6 Sho Ondiaboli ya li tayi makele Jesus, okwa li e yi yamukula ta totha momanyolo. Jesus okwa li ta dhimbulukwa nawa Oohapu dhaKalunga sho a li a yamukula a ti: “Okwa nyolwa: . . . Okwa nyolwa natango: . . . Za po, Satana, oshoka okwa nyolwa: ‘Omuwa Kalunga koye oye awike u na oku mu galikana noye awike u na oku mu longela.’” Ohole yokuhola Jehova nosho wo Oohapu dhe oya li yi inyengitha Jesus a kale inaa pulakena Omumakeli ngoka a li e mu makele. (Mat. 4:1-10) Konima sho Jesus a li a kondjitha omamakelo lwiikando, Satana okwa li e mu thigi po.
7. Ongiini Ombiimbeli tayi vulu oku tu kwathela tu kondjithe omamakelo?
7 Ngele Jesus okwa li i inekela omanyolo opo a kondjithe omamakelo gOndiaboli, mbela tse katu na okukala hatu ga longitha unene shi vulithe mpoka? Dhoshili, opo tu vule okukondjitha Ondiaboli nosho wo aalongeli yayo, tango otu na okukala twa tokola toko tu tseye omithikampango dhaKalunga nokuvulika kudho pakuudha. Aantu oyendji sho ya konakona Omanyolo oshe yi inyengitha opo ya kale pamithikampango dhago noku uva ko uunongo waKalunga nuuyuuki we. Dhoshili, “oohapu dhaKalunga” ohadhi gandja oonkondo ndhoka tadhi vulu okuholola puuyelele “omahalo nomadhiladhilo gomomitima dhaantu.” (Heb. 4:12) Mpoka ngaa pu thike omuntu ta lesha nokutedhatedha kombinga yOmanyolo, opo ngaa pu thike okumona “oshili” yaJehova. (Dan. 9:13) Ngele osho shi li ngawo, otu na okutedhatedha komanyolo ngoka ge na ko nasha nuunkundi wetu.
8. Otatu vulu okumona ombepo ondjapuki okupitila mushike?
8 Kakele owala kokukala e shi Omanyolo, Jesus okwa li a vulu okukondjitha omamakelo molwaashoka okwa li wo “u udha Ombepo Ondjapuki.” (Luk. 4:1) Natse opo tu vule okukala tu na oonkondo dha tya ngaaka, otwa pumbwa okuhedha popepi naJehova mokulongitha pakuudha omasiloshimpwiyu agehe ngoka e tu pa opo tu vule okukala tu na ombepo ye ondjapuki. (Jak. 4:7, 8) Momasiloshimpwiyu ngaka omwa kwatelwa ekonakonombiimbeli, egalikano neendathano nooitaali ooyakwetu. Aakriste oyendji oya mona uuwanawa mokukutha ombinga pakuudha momaipyakidhilo gopaKriste ngoka hage ya kwathele ya gandje eitulomo kiinima yopambepo mbyoka tayi tungu.
9, 10. (a) Omamakelo geni haga tsakanekwa kaantu olundji moshitopolwa sheni? (b) Ongiini okutedhatedha nokugalikana taku vulu oku tu pa oonkondo tu kondjithe omamakelo nokuli nuuna tu uvite twa vulwa?
9 Omamakelo geni wu na okukondjitha? Mbela opu na esiku wa li wa makelwa wu dhane nomaiyuvo gagumwe ngoka kee shi kuume koye kopandjokana? Ngele ino hokana, mbela opu na esiku wa li wu na ehalo lyokweendelathana nagumwe ngoka kee shi omwiitaali? Uuna Aakriste taya tala o-TV nenge taya longitha o-Internet, otaya vulu okumakelwa ombaadhilila ya tale omathano inaaga yogoka. Ngele shoka osha li she ku ningilwa, owa li wi inyenge ngiini? Otashi ka kala pandunge okutedhatedha kombinga yankene okukatuka onkatu yimwe ya puka taku vulu okufala konkwawo nokonima omeyono lya kwata miiti. (Jak. 1:14, 15) Dhiladhila owala nkene to ke ehameka Jehova, egongalo nosho wo uukwanegumbo woye ngele owa yono sha kwata miiti. Kakele kaashono, omuntu oha kala e na eiyuvo lya yela ngele okwa kala omudhiginini komakotampango gopakalunga. (Lesha Episalomi 119:37; Omayeletumbulo 22:3.) Uuna wa taalelwa komamakelo ga tya ngaaka, kala wa tokola toko okugalikana opo wu pewe oonkondo dhoku ga kondjitha.
10 Opu na oshinima shilwe shoka tu na okudhimbulukwa kombinga yomamakelo gOndiaboli. Sho Jesus a li ti idhilike iikulya uule womasiku omilongo ne mombuga, Satana okwe ya kuye. Nopwaahe na omalimbililo, Ondiaboli oya li ya dhiladhila kutya ndika olya li “ethimbo lyo opala” (NW) yi makele uudhiginini waJesus. (Luk. 4:13) Satana oha kongo ethimbo lyo opala a makele wo uudhiginini wetu. Onkee ano, osha simanenena, tu kale twa kola pambepo. Olundji Satana oha ponokele iihakanwa ye naashoka yi hole. Onkee ano, uuna tu uvite twa vulwa nenge twa teka omukumo, otu na okukala twa tokola toko shi vulithe shito tu galikane kuJehova e tu gamene noku tu pe ombepo ondjapuki.—2 Kor. 12:8-10.
Otwa pewa oonkondo okwiidhidhimikila omvulwe netekomukumo
11, 12. (a) Omolwashike oyendji kunena haya kala ya teka omukumo? (b) Oshike tashi vulu oku tu pa oonkondo dhokukondjitha etekomukumo?
11 Tu li aantu inaatu gwanenena, ethimbo nethimbo ohatu kala twa teka omukumo. Shoka otashi vulika shi kale osho shi li nokunena, molwaashoka otu li methimbo lyi lulila noonkondo. Otashi vulika tu li momathimbo omadhigu noonkondo ngoka aantu inaaya mona nando onale. (2 Tim. 3:1-5) Sho Armagedon ta hedha popepi, iinima ngaashi omaupyakadhi gopamahupilo, gopamaiyuvo nosho wo omathiminiko galwe otagi indjipala. Kashi na oku tu kumitha sho yamwe taya ka mona oshidhigu noonkondo okugwanitha po iinakugwanithwa yawo nenge okusila oshimpwiyu omaukwanegumbo gawo. Ohaya kala ya vulwa noya gwililwa po nokuli nenge yu uvite itaaya vulu okuungaunga niinakugwanithwa yawo. Ngele shoka osho shi li ngawo kungoye, ongiini to vulu okuungaunga nethiminiko?
12 Dhimbulukwa kutya Jesus okwa li a shilipaleke aalongwa ye kutya okwa li te ke ya pa omukwathi, ombepo ondjapuki yaKalunga. (Lesha Johannes 14:16, 17.) Ndhika odho oonkondo dha shiga ko muuyuni auhe. Jehova okupitila mombepo ye ondjapuki, ota vulu oku tu pa ‘oonkondo odhindji’ nosho wo eidhidhimiko ndyoka twa pumbwa opo tu idhidhimikile emakelo kehe. (Ef. 3:20) Omuyapostoli Paulus okwa ti kutya mokwiinekela muyo, otatu ka pewa “oonkondo dhi vule ndhoka dhopaunshitwe” (NW) nokuli nonando otu kale twa “hatwa po.” (2 Kor. 4:7, 8) Jehova inu uvaneka okukutha po omaupyakadhi, ihe okwe tu shilipaleka kutya okupitila mombepo ye ondjapuki, ote ke tu pa oonkondo opo tu ungaunge nago.—Fil. 4:13.
13. (a) Ongiini omugundjuka gumwe a li a pewa oonkondo u ungaunge nonkalo ondhigu moka a li? (b) Mbela owu shi oshimonimwa shimwe sha fa shaStephanie?
13 Natu tale koshiholelwa shaStephanie, omukokolindjila gwondjigilile ngoka e na oomvula 19. Sho a li e na oomvula 12 okwa li a kwatwa kuuvu wombanda nokwa li a monika oshitumbuka kuuluyi. Okuza mpoka, okwa li a tandwa iikando iyali nokwa li ha ka fikwa noonteshina nokwa li a kwatwa lwaali kombanda, shoka sha li she mu lemaneke kombinga yokolumoho nokukala itaa mono ko nawa. Stephanie okwa li e na okulongitha oonkondo dhe miinima mbyoka a tala ko kutya oya simana noonkondo ngaashi okugongala kwopaKriste nosho wo uukalele. Nonando ongawo, ombepo yaJehova oya li ye mu kwathele i idhidhimike moonkalo odhindji. Iileshomwa ya kankamena kOmbiimbeli yi na iimoniwa yAakriste ooyakwawo oya li ye mu tsu omukumo sho a li a teka omukumo. Aamwatate naamwameme oya li ye mu kwathele moku mu tumina oontumwafo nenge moku mu tsa omukumo manga okugongala inaaku tameka nokonima ngele kwa piti mo. Aantu mboka ya li ye na ohokwe mwaashoka e ya longo oya li yu ulike kutya oye na olupandu mokuya kaandjawo a ka konakone nayo Ombiimbeli. Omolwiinima ayihe mbika, Stephanie okwa li e na olupandu olunene okupandula Jehova. Enyolo ndyoka e hole noonkondo olyo Episalomi 41:3, ndyoka e wete kutya olye mu gwanithilwa.
14. Oshike tu na okuyanda uuna twa teka omukumo, nomolwashike?
14 Uuna twa vulwa nenge tu li momathiminiko, katu na okudhiladhila kutya okweetha po omaipyakidhilo gamwe gopambepo oko omukalo omwaanawa tatu vulu okuungaunga nomaupyakadhi getu. Shoka otashi nayipaleke owala onkalo. Omolwashike? Omolwashoka omaipyakidhilo ngaashi ekonakonombiimbeli lyopaumwene nolyuukwanegumbo, uukalele nosho wo okugongala oyo omasiloshimpwiyu ngoka Jehova ha longitha opo e tu nkondopaleke nombepo ye ondjapuki. Omaipyakidhilo gopaKriste ohaga talaleke aluhe. (Lesha Mateus 11:28, 29.) Olundji aamwatate naamwameme ihaye ya ngaa kokugongala yu uvite ya vulwa, ihe ngele okugongala kwa piti mo, ohaya kala ishewe ye na oonkondo, sha hala okutya, molwaashono opatiliyi yawo yopambepo oyu udhithwa omulilo.
15. (a) Mbela Jehova oku uvaneka kutya Aakriste itaya ka pumbwa okulonga nuudhiginini? Shi yelitha to longitha omanyolo. (b) Kalunga okwe tu uvanekela shike, noshe etitha po omapulo geni?
15 Dhoshili, shika inashi hala okutya omutengi gwokukala omulongwa Omukriste kagu shi omudhigu. Ohashi pula oonkambadhala opo omuntu a kale Omukriste omudhiginini. (Mat. 16:24-26; Luk. 13:24) Kakele kaashono, Jehova ota vulu okunkondopaleka mboka ya vulwa okupitila mombepo ondjapuki. Omupolofeti Jesaja okwa nyola a ti: “Mboka taa inekele OMUWA, ohaa mono oonkondo oompe. Oya fa omakodhi taga yelutha omawawa pombanda; otaa matuka yo itaa vulwa; otaye ende noitaa loloka.” (Jes. 40:29-31) Molwaashoka osho shi li ngawo, otu na okwiipula kutya omolwashike tu uvite kutya omaipyakidhilo giinima yopambepo oge li omutengi?
16. Oshike tatu vulu okuninga opo tu shonpeke iinima mbyoka tayi vulu oku tu etela omvulwe nenge etekomukumo?
16 Oohapu dhaJehova otadhi tu ladhipike tu ‘kale tu na owino yokuyoolola iinima mbyoka yi na oshilonga.’ (Fil. 1:10) Mokufaathanitha onkalamwenyo yOmukriste nolweendo olule lwokolupadhi, omuyapostoli Paulus okwa li a nwethwa mo a popye ta ti: “Natse wo tu etheni kehe shoka sha hala oku tu kata, . . . Natu matukeni twa mana mo methigathano ndyoka li li komeho getu.” (Heb. 12:1) Okwa hala okutya otu na okuyanda okulalakanena iinima kaayi na oshilonga mbyoka tayi vulu oku tu lolodha. Otashi vulika yamwe yomutse tatu kambadhala okugwedha ko komaipyakidhilo ngoka tu na nale. Onkee ano, ngele oho kala olundji wa vulwa nowa gwililwa po komaupyakadhi, otashi vulika wu mone uuwanawa mokutala kutya iilonga yokwiikongela omboloto ohayi ku pula oonkondo dhi thike peni, oho yi momalweendo lungapi nosho wo kutya oho itula momaudhano shi thike peni nosho wo momainyanyudho galwe. Okukala nondjele neishonopeko oyi na oku tu inyengitha atuheni tu mone kutya oshike itaatu vulu okuninga nokushonopeka omaipyakidhilo ngoka kaage na oshilonga.
17. Omolwashike yamwe haya kala ya teka omukumo, ihe Jehova okwe tu pa eshilipaleko lini moshinima shika?
17 Otashi vulika wo yamwe yomutse tu kale twa teka omukumo molwaashoka ehulilo itaali ya mbala ngaashi twa li twe li tegelela. (Omayel. 13:12) Ihe kehe gumwe ngoka u uvite ngeyi, ota vulu okutsuwa omukumo koohapu ndhika tadhi adhika muHabakuk 2:3 tadhi ti: “Ethimbo lyokutsakanithwa kwemoniko inali thikana manga. Ihe ethimbo otali ya mbala, naashoka tandi shi ku ulukile, otashi ka tsakanithwa. Ngele sha fa tashi dhikala, shi tegelela ashike; otashi ka ningwa.” Jehova okwe tu shilipaleka kutya ehulilo otali ya peuthwathimbo lye.
18. (a) Omauvaneko geni hage ku nkondopaleke? (b) Otatu ka kudhathana kombinga yashike moshitopolwa tashi landula?
18 Dhoshili, aapiya yaJehova ayehe aadhiginini oya yuulukwa esiku ndyoka sho omvulwe netekomukumo tayi ka kala kaayi po we naasho aantu ayehe taya ka kala ye na omwenyo taya ka nyanyukilwa “oonkondo dhomuugundjuka.” (Job 33:25, KB) Nokuli nongashingeyi ombepo ondjapuki otayi vulu oku tu nkondopaleka sho tatu kutha ombinga momaipyakidhilo gopambepo. (2 Kor. 4:16; Ef. 3:16) Ino etha nando omvulwe yi ku ningithe kuu mone omayambeko. Emakelo kehe, kutya nduno olye etwa komvulwe nenge ketekomukumo, otali ka hula po, kutya nduno inashi ningwa ngashingeyi, otashi ka ningwa muuyuni uupe waKalunga. Moshitopolwa tashi landula, otatu ka konakona nkene ombepo ondjapuki hayi nkondopaleke Aakriste ya kondjithe omahepeko, ya kondjithe omanwethomo goomakula ga nika oshiponga nokwiidhidhimikila omaupyakadhi ga yoolokathana.
Oto yamukula ngiini?
• Ongiini okulesha Ombiimbeli taku tu pe oonkondo?
• Ongiini egalikano nokutedhatedha haku tu pe oonkondo?
• Ongiini to vulu okukutha po iiyetithi yetekomukumo?
[Ethano pepandja 26]
Okugongala kwopaKriste otaku vulu oku tu ndjangeka pambepo