Owa pumbwa oonkondo dhombepo ondjapuki monkalamwenyo yoye
“INO kutha ndje po koshipala shoye; ngoye ino kutha ndje Ombepo yoye ondjapuki.” (Episalomi 51:11) Omukwaniilwa David osho a li a galikana a mana mo ngaaka sho a ningi epuko lya kwata miiti.
David okwa li a mono oonkondo dhombepo ondjapuki iikando oyindji monkalamwenyo ye. Sho a li e na omimvo omulongo nasha oya li ye mu kwathele mokudhipaga omukwiita omutongolume Goliat. (1 Samuel 17:45-50) Oya li wo ye mu nwetha mo a nyole omapisalomi gamwe ngoka omawanawa kamana. David okwa fatulula a ti: “Ombepo yaKalunga otayi popi mungame; etumwalaka lye oli li komilungu dhandje.”—2 Samuel 23:2.
Jesus Kristus okwa li e shi koleke kutya ombepo ondjapuki oya dhana onkandangala monkalamwenyo yaDavid. Oshikando shimwe Jesus okwa li a lombwele aapulakeni ye a ti: “Ombepo Ondjapuki oyo ya wilike David, a tye: ‘Omuwa okwa lombwele Omuwa gwandje: Kala omutumba kolulyo lwandje, sigo tandi tula aatondi yoye kohi yoompadhi dhoye.’” (Markus 12:36; Episalomi 110:1) Jesus okwe shi tseya nokutya sho David a nyola omapisalomi ge, okwa li a wilikwa kombepo ondjapuki. Mbela ombepo ondjapuki ndjoka ohayi tu kwathele nokunena?
“Indileni, e tamu pewa”
Ngoye otashi vulika ito ka nyola nando episalomi. Ihe otashi vulika wu taalelwe komandangalati omanene ga fa omutongolume Goliat. Pashiholelwa, tala oshiholelwa shaIsabel.a Omusamane gwe okwe mu thigi po molwaashoka a mono po omukiintu gumwe omugundjuka. Okwa li e mu thigi e na oondjo odhindji noka li e mu pe ekwatho lyasha lyoshimaliwa opo i kwathele noyanakadhona yawo yaali. Isabel okwa ti: “Onda li ndi uvite nda kengelelwa nokuungaungwa nangame nda fa oshiyagaya. Ihe sho a thigi ndje po, onda li ndi uvite kutya ombepo ondjapuki yaKalunga oya kala nokunkondopaleka ndje.”
Mbela Isabel okwa li a tegelela a pewe ombepo ondjapuki nopwaahe na oku yi pula? Aawe, okwa li i indile Kalunga esiku kehe e mu pe ombepo ye ondjapuki. Okwa li e shi kutya okwa pumbwa oonkondo dhaKalunga dhi mu kwathele opo a vule okusila oyana oshimpwiyu nokukala ishewe e uvite e na oshilonga. Okwa tula miilonga oohapu dhaJesus ndhoka tadhi ti: “Indileni, e tamu pewa; kongeni, e tamu mono; konkoleni, e tamu egululwa.”—Mateus 7:7.
Roberto naye wo okwa li e uvite kutya okwa pumbwa ombepo ondjapuki yaKalunga yi mu kwathele omolwomatompelo gwi ili. Okwa li a pikwa komakaya nepangwe mbyoka a li ha hili olundji. Okwa li a kondjitha oshinima shoka uule womimvo mbali, ihe ohi ihaluka ta tsikile nokuhila ishewe. Roberto okwa yelitha a ti: “Oho kala wu na iimpwiyu oyindji ngele ito hili we iingangamithi. Olutu ohalu kala talu ku thiminike esiku kehe lwa hala iingangamithi.”
Okwa tsikile ko ta ti: “Ihe onda li nda tokola toko okulundulula onkalamwenyo yandje opo ndi longele Kalunga momukalo ngoka a hokwa. Onda li nda kambadhala okuudhitha omadhiladhilo gandje niinima mbyoka tayi tungu okuza mOmbiimbeli. Onda li nda galikana nda mana mo esiku kehe, tandi pula Kalunga a pe ndje oonkondo ndi opaleke onkalamwenyo yandje. Onda li ndi shi kutya itandi ke shi pondola ongame awike. Onda li nda mono nkene Jehova a yamukula omagalikano gandje, unene tuu ngele ndi wete nda gwililwa po konima ngele nda hili ishewe. Ondi itaala kutya ombepo ondjapuki yaKalunga oya pa ndje oonkondo oompe, molwaashoka andola hayo, nena inandi vula okusinda uupika mboka.”—Aafilippi 4:6-8.
Kala wa fa “omakodhi taga yelutha omawawa pombanda”
Oonzapo dhaJehova omamiliyona odha mona nkene oonkondo dhombepo ondjapuki dhe ya kwathela monkalamwenyo yadho, ngaashi Isabel naRoberto. Ngele owa hala, Jehova ota vulu oku ku pa oonkondo dhe tadhi longo, oonkondo ndhoka a longitha okushita eshito alihe. Kalunga okwa hala e ku pe ombepo ye ngele oto yi pula wa mana mo. Ihe opo e tu pe ombepo ndjoka, otwa pumbwa okwiilonga oshili kombinga ye nokukambadhala ngaashi tatu vulu tu longe ehalo lye.—Jesaja 55:6; Aahebeli 11:6.
Ombepo ondjapuki otayi vulu oku ku pa oonkondo wu vule okulongela Kalunga nomupondo nokutaalela omashongo kehe ngoka tage ya monkalamwenyo yoye. Ombiimbeli otayi tu shilipalekele tayi ti: “[Jehova ota] tsu omukumo oonakuvulwa naamboka yaa na oonkondo, oonkondo dhawo ote dhi indjipaleke odhindji. . . . Mboka taa inekele OMUWA, ohaa mono oonkondo oompe. Oya fa omakodhi taga yelutha omawawa pombanda; otaa matuka yo itaa vulwa; otaye ende noitaa loloka.”—Jesaja 40:28-31.
[Enyolo lyopevi]
a Omadhina gamwe oga lundululwa.
[Oohapu dha simana pepandja 8]
‘Onda li nda galikana nda mana mo esiku kehe, tandi pula Kalunga a pe ndje oonkondo. Ondi shi kutya itandi ke shi pondola ongame awike. Onda mono nkene a yamukula omagalikano gandje’
[Oshimpungu/Omathano pepandja 7]
IILONGANKONDO YOMBEPO ONDJAPUKI
Kalunga okwa li a longitha ombepo ondjapuki okushita evi nosho wo ewangandjo alihe. Omupisalomi okwa ti: “Iilonga yoye oyindji ngiini, Omuwa! We yi opaleke ayihe kuunkulungu woye; evi olyu udha pombanda iishitwa yoye. Ongoye to tumu ombepo yoye, noya shitwa.”—Episalomi 104:24, 30, OB-1954; Genesis 1:2; Job 33:4.
Ombepo ondjapuki oya li ya nwetha mo aalumentu aatilikalunga ya nyole Ombiimbeli. “Enyolo kehe olya nyolithwa kOmbepo yaKalunga noli na oshilonga.” (2 Timoteus 3:16) Oshitya shOshigreka shoka sha tolokwa ‘okunyolithwa kuKalunga’ otashi ti lelalela “okufudhilwa mo kuKalunga.” Omufudho gwaJehova nenge ombepo ye oyo ya li ya wilike omadhiladhilo gaanyoli yOmbiimbeli opo ya vule okutaandelitha “oohapu dhaKalunga.”—1 Aatessalonika 2:13.
Ombepo ondjapuki oya li ya nwetha mo aapiya yaKalunga ya hunganeke onakuyiwa. Omuyapostoli Petrus okwa yelitha a ti: “Kaku na nando omuntu ta vulu okufatulula koonkondo dhe mwene ehunganeko limwe lyomOmanyolo. Oshoka kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.”—2 Petrus 1:20, 21; Joel 2:28.
Ombepo ondjapuki oya li ya kwathele Jesus naalumentu yalwe mboka ye na eitaalo yu uvithe onkundana ombwanawa yUukwaniilwa waKalunga nokulonga iikumithalonga. Jesus okwa ti: “Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate.”—Lukas 4:18; Mateus 12:28.
[Oshimpungu/Omathano pepandja 9]
NKENE OMBEPO ONDJAPUKI TAYI VULU OKU TU KWATHELA
Ombepo ondjapuki otayi vulu oku tu nkondopaleka tu kondjithe omamakelo nokusinda omagamo omawinayi. Omuyapostoli Paulus okwa ti: “Kalunga oku shi kwiinekelwa. Onkee ite mú ethele memakelo li vule oonkondo dheni. Ihe ngele ta pitika, mu makelwe, ote mú pe ompito okuza mo mulyo noonkondo dhoku li humbata.”—1 Aakorinto 10:13.
Ombepo ondjapuki otayi vulu oku ku kwathela wi imike omaukwatya gopakalunga. “Iiyimati yOmbepo oyo mbika: ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko neikwato nawa.”—Aagalati 5:22, 23.
Ombepo ondjapuki otayi vulu oku ku nkondopaleka wu idhidhimikile omamakelo. “Ayihe otandi yi vulu munguka ta koleke ndje.”—Aafilippi 4:13, OB-1954.