Twa loloka ndele ihatu sholola
“Kalunga . . . Omushiti wominghulo dedu . . . ota pe ava va loloka ouladi, ndee ta hapupalifa eenghono daau e he na eenghono.”—JESAJA 40:28, 29.
1, 2. (a) Eshivo lihafifa lilipi la pewa aveshe ovo va hala okukala melongelokalunga la koshoka? (b) Oshike tashi dulu okutula oupamhepo wetu moshiponga shinene?
TU LI ovahongwa vaJesus, otwa shiiva nawa eshivo laye lihafifa olo tali ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. . . . Osheshi ondjoko yange iwa nomutengi wange omupu.” (Mateus 11:28-30) Ovakriste ova pewa yo ‘omafimbo omahekeleko okudja koshipala shOmwene.’ (Oilonga 3:20) Doshili, owa mona kwoove mwene nghee okulihonga oshili yOmbibeli, okukala neteelelo lihafifa li na sha nonakwiiwa nosho yo okutula moilonga omafinamhango aJehova monghalamwenyo yoye haku tulumukifa.
2 Ndele nande ongaho, ovalongeli vaJehova vamwe ohava kwatwa keloloko lopamaliudo. Peemhito dimwe, omafimbo etekomukumo ohaa kala maxupi. Ndele omafimbo amwe okukala wa loloka ohaku twikile oule wefimbo. Mokweendela ko kwefimbo, vamwe otashi dulika va kale ve udite kutya oinakuwanifwa yavo yopaKriste oya ninga omutengi mudjuu ponhele yokukala omutengi tau tulumukifa, ngaashi Jesus a udaneka. Omaliudo a tya ngaho mai otaa dulu okutula moshiponga shinene ekwatafano lOmukriste naJehova.
3. Omolwashike Jesus a yandja omayele oo e li muJohannes 14:1?
3 Okafimbo kaxupi fimbo Jesus ina kwatwa nokudipawa, okwa lombwela ovahongwa vaye a ti: “Omitima deni inadi nyika oluhodi. Itaveleni Kalunga nye mu itavele nge yo.” (Johannes 14:1) Jesus okwa popya eendjovo odo eshi ovayapostoli va li pokushakeneka oiningwanima inyikifa oluhodi. Osho osha li tashi ka landulwa komahepeko mahapu. Jesus okwa li e shi shii kutya ovayapostoli vaye otava dulu okupunduka omolwetekomukumo lo venevene. (Johannes 16:1) Ngeenge okunyemata inaku pangelwa, otaku dulu okunyona po oupamhepo wavo ndele taku va kanififa okulineekela kwavo Jehova. Osho osho yo shi li ngaho kOvakriste kunena. Etekomukumo tali twikile otali dulu okweeta ouyahame munene, nomitima detu otadi dulu okulolokifwa. (Jeremia 8:18) Omunhu wetu womeni ota dulu okunghundipala. Koshi yomafininiko oo, ohatu dulu okukala tu he na eenghono pamaliudo nopamhepo, ndele hatu kanifa nokuli ehalo letu lokulongela Jehova.
4. Oshike tashi dulu oku tu kwafela tu amene omutima wetu wopafaneko u ha sholole?
4 Omayele Ombibeli okwa yeleka shili, oo taa ti: “Omutima woye [u] amena komesho yoinima aishe oyo i nokwaamenwa, osheshi muo tamu di omwenyo.” (Omayeletumbulo 4:23) Ombibeli otai yandje omayele taa longo oo tae tu kwafele tu amene omutima wetu wopafaneko u ha teke omukumo nokuloloka pamhepo. Ndele shotete otwa pumbwa okumona mo lela osho tashi tu lolokifa.
Okukala Omukriste kaku fi omutengi mudjuu
5. Ekondjifafano lilipi la fa li li po shi na sha nokukala omuhongwa kwopaKriste?
5 Oshoshili kutya okukala Omukriste otaku pula okukondja neenghono. (Lukas 13:24) Jesus okwa ti: “Ndele ou ita humbata [omuti waye womahepeko, NW] ndee ta shikula nge, ye ita dulu okukala omulongwa wange.” (Lukas 14:27) Okutala ko ashike eendjovo odo ngahenya, otadi dulu okumonika da fa tadi kondjifafana nelombwelo laJesus li na sha nomutengi waye mupu notau tulumukifa, ndele doshili, kape na ekondjifafano.
6, 7. Omolwashike taku dulu okutiwa kutya onghedi yetu yokulongela Kalunga itai tu lolokifa?
6 Okukondja neenghono nokulonga noudiinini nonande omunhu okwa loloka palutu, otaku dulu okukala taku mbilipaleke notaku tulumukifa ngeenge okwa ningwa omolwouwa. (Omuudifi 3:13, 22) Ouwa ulipi hatu dulu okuningila ovanhu vakwetu u dule oku va lombwela oshili yOmbibeli ikumwifi? Natango, okukondja kwetu tu kale metwokumwe nomifikamhango dopombada dopaenghedi daKalunga itaku dulu okuyelekanifwa nomauwa oo hatu mono. (Omayeletumbulo 2:10-20) Nokuli nongeenge hatu hepekwa, otwe shi tala ko shi li oufembanghenda okumona oixuna omolwOuhamba waKalunga.—1 Petrus 4:14.
7 Omutengi waJesus otau tulumukifa shili, unene tuu ngeenge tau yelekanifwa nomilaulu dopamhepo daavo va humbata natango ondjoko yomalongelokalunga oipupulu. Kalunga oku tu hole nohole yokomutima noihe tu pula shihapu osho itatu dulu. ‘Oipango yaJehova ka idjuu.’ (1 Johannes 5:3) Oukriste washili ngaashi wa popiwa mOmishangwa, kau fi omutengi mudjuu. Osha yela kutya, onghedi yetu yokulongela Kalunga itai tu lolokifa noitai tu teya omukumo.
“Tu liduleni keshe eshi tashi tu findile poshi”
8. Oshike luhapu hashi eta eloloko lopamhepo?
8 Eloloko keshe lopamhepo olo tali tu kwata luhapu ohali etwa komutengi wa wedwa po konghalelo ei yoinima ya nyonauka. Molwaashi ‘ounyuni aushe ou li mepangelo lomunawii,’ otwa dingililwa koinima oyo tai teya omukumo, oyo tai dulu oku tu lolokifa noku tu kanififa ondjele yetu yopaKriste. (1 Johannes 5:19) Okulalakanena oinima oyo inai pumbiwa otaku dulu okudjuupaleka nokupiyaaneka oilonga yetu yopaKriste. Omitengi odo da wedwa po otadi dulu oku tu findila poshi noku tu fininika. Hano osha yuka eshi Ombibeli tai tu kumaida ‘tu lidule keshe eshi tashi tu findile poshi.’—Ovaheberi 12:1-3.
9. Ongahelipi okulalakanena omaliko taku dulu oku tu findila poshi?
9 Pashihopaenenwa, okulipula unene kwounyuni ku na sha netumbalo, noimaliwa, nomalihafifo, nokweendaenda nosho yo okulalakanena oinima ikwao yopamaliko otaku dulu okunwefa mo omadiladilo etu. (1 Johannes 2:15-17) Ovakriste vamwe vomefelemudo lotete ovo va li va lalakanena omaliko ova li va djuupaleka onghalamwenyo yavo neenghono. Omuyapostoli Paulus okwa yelifa a ti: “Ava va hala okupunapala, otava wile momahongaulo nomomwiyo nomouhalu uhapu woulai nowoiponga, tau ninginifa ovanhu menyonauko nomekano. Osheshi olwisho loimaliwa olo efina lowii aushe, nomoku li haluka vamwe va puka mo meitavelo, ve lityuulifa [nomaudjuu] mahapu.”—1 Timoteus 6:9, 10.
10. Oshike hatu dulu okulihonga shi na sha nomaliko meyele laJesus li na sha nomukuni?
10 Ngeenge tu udite twa loloka notwa teka omukumo moilonga yetu yokulongela Kalunga, mbela osheshi okulalakanena omaliko taku fininike oupamhepo wetu? Osho otashi dulu okuningwa shili, ngaashi sha ulikwa meyele laJesus li na sha nomukuni. Jesus okwa faafanifa “oshisho shounyuni ou nepukifo loupuna, nakeshe tuu okahalu” neeshosholo odo hadi ‘uya momitima detu ndele tadi fininike’ eembuto deendjovo daKalunga. (Markus 4:18, 19) Onghee hano, Ombibeli otai tu pe omayele taa ti: “Mokukala kweni kaleni mu he nolwisho. Eshi mu shi kwete nashi mu wanene, osheshi Ye okwa tya: Ame ihandi ku efa noitandi ku fii po nande.”—Ovaheberi 13:5.
11. Ongahelipi hatu dulu okweefa po oinima oyo tai dulu oku tu findila poshi?
11 Omafimbo amwe, osho hashi djuupaleke onghalamwenyo yetu kashi fi okulalakanena oinima ihapu, ndele oshosho hatu ningi shi na sha noinima oyo tu na nale. Vamwe otashi dulika va kwatwe keloloko lopamaliudo, tashi etifwa komaupyakadi oukolele, okufilwa ovaholike vavo ile omaupyakadi makwao manene. Ova li va mona omhumbwe yokuninga omalunduluko omafimbo nomafimbo. Ovalihomboli vonhumba ova tokola okweefa po oinima imwe oyo ve hole nosho yo oilonga yopaumwene oyo inai fimanenena. Ova tala nawa moinima yavo ndele tava longele oinima aishe oyo i na sha noilonga oyo ndele tave i tuvikile. Efimbo nefimbo, atusheni ohatu dulu okumona ouwa mokutalulula eenghedi detu nosho yo oiniwe yetu, hatu likufa omutengi keshe oo inau pumbiwa opo tu ha loloke neemwenyo detu di ha fye ounye.
Ondjele nelininipiko oya fimanenena
12. Oshike tu na okudimina shi na sha nomapuko etu?
12 Omapuko etu, nokuli nomoinima inini, otaa dulu okudjuupaleka onghalamwenyo yetu kanini nakanini. Eendjovo daDavid kadi fi tuu doshili odo tadi ti: “Owii wange [owa] ninginifa omutwe wange, wa fa omutengi mudjuu, wa dula nge eenghono.” (Epsalme 38:5) Luhapu, okuninga omalunduluko onhumba taa longo otae ke tu kufa omitengi didjuu.
13. Ongahelipi ondjele tai dulu oku tu kwafela tu kale tu na etaleko li li pandjele li na sha noukalele wetu?
13 Ombibeli otai tu ladipikile tu kulike “ounongo tau longo nosho yo oukeka wokudiladila.” (Omayeletumbulo 3:21, 22, NW) Ombibeli otai ti: “Ounongo ou hau di kombada [ou na ondjele, NW].” (Jakob 3:17) Vamwe ova kala ve udite va fininikwa va longe shi fike pamwe naasho vamwe tava ningi moukalele wopaKriste. Ndele Ombibeli otai tu kumaida tai ti: “Omunhu keshe na konakone oilonga yaye mwene [nhumbi] i li, opo a kale e nelitango molwaye mwene, hamolwomukwao, osheshi keshe tuu oku nokuhumbata omutengi waye mwene.” (Ovagalati 6:4, 5) Oshoshili kutya oihopaenenwa iwa yOvakriste vakwetu otai dulu oku tu ladipika tu longele Jehova nomutima aushe, ndele ounongo tau longo nosho yo ondjele otai ke tu kwafela tu litulile po omalalakano oo hatu dulu okuwanifa po she likolelela keenghalo detu.
14, 15. Ongahelipi hatu dulu okuulika ounongo tau longo mokufiloshisho eemhumbwe detu dopalutu nodopamaliudo?
14 Ondjele yetu nomoinima nokuli oyo tai monika ya fa inai fimana unene otai dulu oku tu kwafela tu ha loloke. Pashihopaenenwa, mbela ohatu kulike eenghedi di li pandjele odo tadi xumifa komesho oukolele muwa wopalutu? Diladila koshihopaenenwa shovalihomboli vonhumba ovo tava longo mushimwe shomoitaimbelewa yEendombwedi daJehova. Ova mona ongushu younongo tau longo mokukelela eloloko. Omukainhu okwa ti: “Kashi na nee mbudi kutya otu na oilonga i fike peni, ohatu kendabala oku ka nangala pefimbo la faafana konguloshi keshe. Ohatu lideula yo pandjikilile. Osho oshe tu kwafela shili. Otwe lihonga omangabeko etu, nohatu ningi oinima pandjele. Ihatu kendabala nande okulifaafanifa naavo tava monika ve na eenghono dihapu.” Mbela ohatu li ngoo oikulya iwa pandjikilile nokukofa sha wana? Okuyandja elitulemo li li pandjele koukolele wetu otaku dulu okuninipika eloloko lopamaliudo nolopamhepo.
15 Vamwe vomufye otu na eemhumbwe de likalekelwa. Pashihopaenenwa, omumwameme umwe Omukriste okwa kala e na oinakuwanifwa ihapu idjuu moukalele wefimbo liyadi. Okwa li e na omaupyakadi oukolele a kwata moiti, mwa kwatelwa okankela. Oshike she mu kwafela a ungaunge neenghalo didjuu? Okwa ti: “Osha fimana kwaame okukala ndi na efimbo olo handi dulu okukala ndi lilile ndele handi kala nda mwena filufilu. Ngeenge ndi udite handi wililwa po koudjuu oo hau etwa koisho nokeloloko, ohandi kongo diva eemhito delimweneneno ndi kale ndi lilile, opo ndi dule okulesha nokufuda po.” Ounongo tau longo nosho yo oukeka wokudiladila otau tu kwafele tu shiive notu wanife po eemhumbwe detu dopaumwene, nokungaha ohatu henuka eloloko lopamhepo.
Jehova Kalunga ohe tu pe eenghono
16, 17. (a) Omolwashike okufiloshisho oukolele wetu wopamhepo sha fimanenena? (b) Oshike tu na okukwatela melandulafano letu lakeshe efiku?
16 Doshili, okufiloshisho oukolele wetu wopamhepo osha fimanenena. Ngeenge otu na ekwatafano lopofingo naJehova Kalunga, ohatu dulu okuloloka palutu, ndele itatu ka sholola nandenande oku mu longela. Jehova oye ta “pe ava va loloka ouladi, ndee ta hapupalifa eenghono daau e he na eenghono.” (Jesaja 40:28, 29) Omuyapostoli Paulus, oo a mona oushili weendjovo odo, okwa shanga a ti: “Itatu kanifa ouladi, osheshi nande omunhu wetu wokombada ta nyonauka po, ou womeni ota shituka mupe efiku [nefiku].”—2 Ovakorinto 4:16.
17 Didilika outumbulilo “efiku nefiku.” Osho otashi ulike kokulongifa omafiloshisho aJehova efiku keshe. Omutumwa umwe oo a longa noudiinini oule womido 43, okwa li omafimbo amwe a loloka palutu nokwa teka omukumo. Ndele ina sholola nande. Okwa ti: “Onde shi ninga ondjikilile okupenduka ongula inene opo fimbo inandi hovela noilonga imwe, ohandi dulu okulongifa efimbo ndi ilikane kuJehova nokulesha Eendjovo daye. Elandulafano la tya ngaho lakeshe efiku ola kwafela nge ndi lididimike fiyo opaife.” Ohatu dulu shili okulineekela eenghono daJehova odo hadi pameke ngeenge ohatu ilikana kuye nokudilonga komaukwatya aye a denga mbada nokomaudaneko aye “efiku nefiku.”
18. Ombibeli otai yandje ehekeleko lilipi kovadiinini ovo va kulupa ile ovo tava ehama?
18 Osho otashi kwafa unene tuu kwaavo ve udite va teka omukumo omolwoukulupe ile oukolele u he li nawa. Ovanhu va tya ngaho otava dulu okuteka omukumo, ndele hamolwaashi tave liyelekanifa navamwe, ndele osheshi tave liyelekanifa naasho va li tava dulu okuninga nale. Itashi hekeleke tuu okushiiva kutya Jehova oha fimaneke ovakulupe! Ombibeli otai ti: “Eenghwakutoka odo oshikoroni shefimano. [Ngeenge, NW] otashi monika mondjila youyuki.” (Omayeletumbulo 16:31) Jehova oku shii omangabeko etu noha pandula neenghono oilonga yetu oyo hatu mu longele nomutima aushe nonande otu na omaunghundi. Noilonga iwa oyo twa longa nale kai na fiku nai ka dimbuwe kuKalunga. Omishangwa otadi tu shilipaleke tadi ti: “Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye, eshi mwa yakulile ovayapuki ndee hamu shi ningi natango.” (Ovaheberi 6:10) Inatu hafa tuu atushe okukala tu na ovo va ulika oudiinini wavo kuJehova oule womido omilongo dihapu!
Inatu shololeni
19. Ongahelipi hatu mono ouwa mokukala twe lipyakidila nokulonga ouwa?
19 Ovanhu vahapu ova itavela kutya oilonga yeenghono yopalutu hai longwa ondjikilile otai dulu okuninipika eloloko. Sha faafana, oilonga yopamhepo yondjikilile otai dulu okukwafela okuninipika eloloko keshe lopamaliudo nolopamhepo. Ombibeli otai ti: “Ndele mokulonga ouwa inatu lolokeni, osheshi efimbo ngenge la fika, hatu ka teya yo, ngenge itatu loloka. Onghee hano fimbo tu nomhito, tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:9, 10) Didilika omautumbulilo “mokulonga ouwa” nosho yo ‘ningileni ouwa.’ Osho otashi ulike kokukatuka eenghatu. Okuningila vamwe ouwa otaku dulu oku tu kwafela shili tu ha sholole mokulongela kwetu Jehova.
20. Opo tu kondjife etekomukumo, otu na okuhenuka okweendafana noolyelye?
20 Mekondjifafano naasho, eendafano nosho yo oilonga yovanhu ovo ihava dulika keemhango daKalunga otai dulu okukala omutengi tau shololifa. Ombibeli otai tu londwele tai ti: “Emanya olo lidjuu neheke lidjuu, ndelenee ehandu lelai lidjuu li dule oyo aishe ivali.” (Omayeletumbulo 27:3) Opo tu kondjife etekomukumo neloloko, otu na okuhenuka okweendafana naavo ve na omadiladilo taa teya omukumo nove na eamo lokukonga omapuko nokukembaula vamwe.
21. Ongahelipi hatu dulu okukala etwomukumo kuvamwe pokwoongala kwopaKriste?
21 Okwoongala kwopaKriste oku li efiloshisho la dja kuJehova olo tali dulu oku tu pa eenghono dopamhepo. Pokwoongala otu na omhito ya denga mbada yokutwaafana omukumo nomahongo taa tulumukifa nosho yo eendafano. (Ovaheberi 10:25) Aveshe meongalo ove na okukendabala va kale tava tungu ngeenge tava yandje omilombo pokwoongala ile ngeenge ve na oitukulwa moprograma komutune. Ovo tava kwatele komesho ve li ovahongi ovo unene ve na oshinakuwanifwa shokupameka vamwe. (Jesaja 32:1, 2) Nokuli nongeenge pe na omhumbwe yokukumaida ile yokuhanyena, onghedi omo omayele taa yandjwa oi na okukala tai tulumukifa. (Ovagalati 6:1, 2) Ohole yetu yokuhola vamwe otai ke tu kwafela shili tu longele Jehova nope he na okusholola.—Epsalme 133:1; Johannes 13:35.
22. Nonande inatu wanenena, omolwashike hatu dulu okukala tu na elineekelo?
22 Okulongela Jehova momafiku aa axuuninwa okwa kwatela mo oilonga. Ovakriste inava lya olusha lokuhaloloka pamadiladilo, lokuhauda ouyahame pamaliudo nosho yo lokuhakumwa keenghalo didjuu. Tu li ovanhu inava wanenena inatu kola, otwa fa oshiyuma shedu. Ndele Ombibeli otai ti: “Emona tuu eli hatu li kwatele moitoo yedu, opo ouyadi weenghono u kale waKalunga, ndele u ha monike tau di mufye vene.” (2 Ovakorinto 4:7) Heeno, ohatu ka loloka, ndele inatu sholola nandenande. Ponhele yaasho, natu kale ‘nelineekelo nokutya: Omwene Oye omukwafi wange.’—Ovaheberi 13:6.
Okweendulula pauxupi
• Oinima imwe ilipi oyo tai tu findile pedu hatu dulu okulidula?
• Ongahelipi hatu dulu okukufa ombinga mokuningila Ovakriste vakwetu “ouwa”?
• Ongahelipi Jehova he tu pameke ngeenge tu udite twa loloka ile twa teka omukumo?
[Efano pepandja 19]
Jesus okwa li e shi shii kutya okuteka omukumo efimbo lile otaku dulu okunyikifa oluhodi ovayapostoli
[Efano pepandja 20]
Vamwe ova efa po oinima yonhumba oyo ve hole nosho yo oilonga imwe yopaumwene oyo inai fimanenena
[Efano pepandja 22]
Nonande otu na omangabeko, Jehova oha pandula neenghono oilonga yetu oyo hatu mu longele nomutima aushe