Esra okwa longo aantu ompango yaKalunga

Opwa pita omimvo 70, okuza sho Aaisraeli oyendji ya shuna kuJerusalem, ihe yamwe oya li natango miitopolwa ya yoolokathana yepangelo lyaPersia. Gumwe gwomuyo okwa li omuyambi Esra, ngoka a li ha longo aantu Ompango yaJehova. Esra oku uvu kutya aantu yomuJerusalem itaya landula Ompango. Onkee ano, okwa yi ko e ke ya kwathele. Omukwaniilwa gwaPersia, Artakserkses, okwe mu lombwele a ti: ‘Kalunga okwe ku pe owino wu longe aantu Ompango ye. Inda pamwe naangoka a hala okuya nangoye.’ Esra okwa gongala pamwe naayehe mboka ya li ya hala okushuna kuJerusalem. Oya galikana Jehova e ya gamene molweendo lwawo olule, nokonima oya yi mulwo.

Konima yoomwedhi ne, oya thiki kuJerusalem. Aawiliki yAaisraeli oya lombwele Esra ya ti: ‘Aaisraeli inaya vulika kuJehova noya hokana aakulukadhi mboka haya longele iikalunga.’ Esra okwa ningi po shike? Okwa tsu oongolo komeho goshigwana nokwa galikana a ti: ‘Jehova, owe tu ningile iinima oyindji, ihe tse otwa yono kungoye.’ Oshigwana oshi iyele ombedhi, ihe natango osha li tashi ningi iinima inaayu uka. Esra okwa hogolola aawiliki naatokolihapu ya konakone oshinima shoka. Momukokomoko gwoomwedhi ndatu dha ka landula ko, mboka ya li ihaaya longele Jehova oya tidhwa mo.

Opwa pita omimvo omulongo nambali, okuza sho ya tidhwa mo. Muule womimvo ndhoka, omadhingililokuma gaJerusalem oga tungululwa. Onkee ano, Esra okwa gongaleke oshigwana mehalandjandja nokwe shi leshele Ompango yaKalunga. Sho Esra a yanuna embo lyOmpango, aantu oya thikama. Okwa hambelele Jehova, naantu oya yelutha omaako gawo mombanda, yu ulike kutya otaya tsu kumwe. Opo nduno Esra okwa lesha Ompango e te yi fatulula, naantu oya li ya pulakene neitulomo. Oya zimine kutya inaya vulika ishewe kuJehova, noya tameke okulila. Esiku lya landula ko, Esra okwe ya leshele ishewe mOmpango. Oya mono kutya masiku oye na okudhana Oshituthi shomatsali giihwa iitalala. Nziya oya tameke okwiilongekidhila oshituthi shoka.

Muule womasiku gaheyali goshituthi, aantu oya li ya nyanyukwa noya pandula Jehova, omolweteyo ewanawa. Inapu ningwa nando onale Oshituthi shomatsali sha fa shoka okuza komasiku gaJosua. Sho oshituthi sha pu, aantu oya gongala ishewe, e taya galikana taya ti: ‘Jehova, owe tu mangulula muupika, owe tu palutha mombuga nowe tu pe evi ewanawa. Ihe iikando niikando inatu vulika kungoye. Owa tumu aahunganeki ye tu londodhe, ihe inatu ya pulakena. Nonando ongaaka, owe tu idhidhimikile. Owa gwanitha shoka wu uvanekela Abraham. Ngashingeyi otatu uvaneke kutya otatu ka vulika kungoye.’ Aaisraeli oya nyola euvaneko lyawo, nokonima aawiliki, Aalevi naayambi yawo oye li shaina.