Inekela kutya Jehova ote ke ku kwathela muudhigu

1-2. (a) Omafaathano geni ge li pokati konkalo yetu naandjoka yAajuda mboka ya li ya shuna kuJerusalem? (b) Popya gamwe gomomashongo ngoka Aajuda ya li ya taalele. (Tala oshimpungu “Pethimbo lyaHaggai, Sakaria naEsra.”)

MBELA omathimbo gamwe oho kala to ipula kombinga yonakuyiwa? Pamwe otashi vulika wa kanitha iilonga, noho kala to ipula nkene to ka sila oshimpwiyu aanegumbo lyoye. Otashi vulika wu kale to ipula negameno lyaantu yaandjeni, omolwomakuyunguto gopapolotika, omahepeko, nenge omapataneko omolwiilonga yokuuvitha. Mbela nangoye owu li muupyakadhi wa fa mbuno? Ngele osho, oto ka mona mo uuwanawa mokutala nkene Jehova a kwathele oshigwana shaIsraeli shonale, sho sha li muupyakadhi wa fa mboka.

² Osha li sha pula eitaalo kAajuda, mboka ya kala onkalamwenyo yawo ayihe muupongekwa muBabilonia, ya thige po onkalo ombwanawa moka ye li noya shune koshilongo hoka oyendji yomuyo kaaya li ye shi ko naanaa. Sho ya thiki mo, osha li oshidhigu koyendji okusila oshimpwiyu yaandjawo. Opwa li wo omapiyagano muukwaniilwa gwaPersia, noya li wo taya patanekwa kiilongo mbyoka ye ya kundukidha. Osha li oshidhigu kAajuda yamwe ya kale taya gandja eitulomo kiilonga yokutungulula otempeli. Onkee ano lwomomumvo 520 K.E.N., Jehova okwa li a tumu aahunganeki ye yaali, Haggai naSakaria, ye ya kwathele ya kale ye na uulaadhi wokulongela Jehova. (Hag. 1:1; Sak. 1:1) Ngaashi tatu ke shi mona, iilonga yaahunganeki mbaka, oya li ya eta iizemo iiwanawa. Ihe konima yomimvo 50 lwaampono, mboka ya shuna kuJerusalem oya li ya pumbwa natango etsomukumo. Omunyolululi gwOmpango a pyokoka, Esra, okwa li a zi kuBabilon e te ya kuJerusalem, a ladhipike oshigwana shaKalunga shi pitithe komeho elongelokalunga lyashili. — Esra 7:1, 6.

3. Omapulo geni tatu ka tala? (Omayeletumbulo 22:19)

³ Ngaashi owala omahunganeko ngoka ge li membo lyaHaggai naSakaria ga li ga kwathele oshigwana shaKalunga shi tsikile okukala she mu inekela sho tashi patanekwa, natse otaga vulu oku tu kwathela tu kale twa inekela muJehova, uuna twa iyadha moonkalo oondhigu. (Lesha Omayeletumbulo 22:19.) Sho tatu konakona etumwalaka lyaKalunga ndyoka Haggai naSakaria ya gandja nosho wo oshiholelwa shaEsra, otatu ka vula okuyamukula omapulo taga landula: Aajuda mboka ya galuka muupongekwa oya li ya gumwa ngiini koonkalo oondhigu? Omolwashike twa pumbwa okutsikila okugandja eitulomo kokulonga ehalo lyaKalunga, uuna tu li muudhigu? Ongiini tatu vulu okukala twa inekela muJehova, uuna tu li moonkalo oondhigu?

NKENE OONKALO OONDHIGU DHA GUMU AAJUDA MBOKA YA ZI MUUPONGEKWA

4-5. Omolwashike Aajuda ya li ya kanitha uulaadhi wawo wokutungulula otempeli?

⁴ Sho Aajuda mboka ya galuka muupongekwa ya thiki muJerusalem, oya li ye na iilonga oyindji. Oya tungulula nziya oshiyambelo nosho wo ekankameno lyotempeli yaJehova. (Esra 3:1-3, 10) Ihe uulaadhi mboka ya li ye na petameko, owa ende tawu nkundipala. Omolwashike mbela? Kakele kokutungulula otempeli, oye na okutunga omagumbo gawo, okulonga omapya nokusila oshimpwiyu yaandjawo. (Esra 2:68, 70) Shimwe ishewe, oya li ya taalela omapataneko okuza kaatondi yawo mboka ya hala okuya moshipala iilonga yokutungulula otempeli. — Esra 4:1-5.

⁵ Mboka ya galuka muupongekwa oya li wo ya taalela omaupyakadhi ngaashi, uuhupilo tawu shongola nomakuyunguto gopapolotika. Pethimbo ndyono evi lyawo olya li lya ningwa po oshitopolwa shuukwaniilwa waPersia. Konima sho omukwaniilwa Kores gwaPersia a si mo 530 K.E.N., omukwaniilwa Cambyses, ngoka e mu landula, okwa hingi iita a kwate ko Egipiti. Sho ye li mondjila ya uka kuEgipiti, aakwiita ye oya thiminike Aaisraeli ye ya pe iikulya, omeya nosho wo ehala lyokukala, oshinima shoka she ya etele uudhigu wa gwedhwa po. Sho omukwaniilwa Darius I, ngoka a landula Cambyses, a tameke okupangela, opwa li natango omaupyakadhi ogendji, ngaashi omakuyunguto gopapolotika nomakanka muukwaniilwa waPersia. Oonkalo ndhoka odhi na okukala dha li dha ningitha Aajuda oyendji mboka ya galuka muupongekwa ya kale taya ipula nkene taya ka sila oshimpwiyu yaandjawo. Omolwomaupyakadhi agehe ngoka, Aajuda yamwe oya li ye uvite kutya kali shi nando ethimbo ewanawa lyokutungulula otempeli yaJehova. — Hag. 1:2.

6. Sha ikolelela kuSakaria 4:6, 7, omaupyakadhi gamwe geni Aajuda ya li ya taalele, neshilipaleko lini Sakaria a li e ya pe?

⁶ Lesha Sakaria 4:6, 7. Kakele kuuhupilo tawu shongola, nenge omakuyunguto gopapolotika, Aajuda oya li wo ye na okwiidhidhimikila omahepeko. Mo 522 K.E.N., aatondi yawo oya yi moshipala iilonga yokutungulula otempeli yaJehova. Ihe Sakaria okwa shilipaleke Aajuda kutya Jehova ote ke ya kwathela nombepo ye ondjapuki, ndjoka yi li oonkondo dhe oonene, ya tsikile niilonga yawo, nonando opu na omaupyakadhi. Mo 520 K.E.N., omukwaniilwa Darius okwa kutha po omangambeko ngoka Aajuda ya tulilwa po, ge na ko nasha nokutungulula otempeli, nokwa pe Aajuda iimaliwa e ta lombwele wo oongoloneya yomoshitopolwa ya kwathele miilonga mbyoka. — Esra 6:1, 6-10.

7. Kalunga okwa li a laleke ngiini nuuyamba Aajuda mboka ya shuna kuJerusalem sho ya pititha komeho iilonga yokutungulula otempeli?

⁷ Jehova okwa uvaneke okupitila muHaggai naSakaria kutya ota ka kwathela oshigwana she, ngele osha pititha komeho iilonga yokutungulula otempeli. (Hag. 1:8, 13, 14; Sak. 1:3, 16) Sho Aajuda ya tsuwa omukumo kaahunganeki, oya li ya tameke ishewe okutungulula otempeli mo 520 K.E.N., noye yi mana meni lyomimvo ntano. Molwaashoka oya li ya pititha komeho okulonga ehalo lyaJehova, nonando oya taalela omaupyakadhi ogendji, Jehova okwe ya yambidhidha moku ya pa shoka ya pumbwa, opo ya kale nomwenyo noya kale nekwatathano lyopothingo naye. Oshizemo, oya kala taya longele Jehova nenyanyu. — Esra 6:14-16, 22.

GANDJA EITULOMO KOKULONGA EHALO LYAKALUNGA

8. Oohapu ndhoka tadhi adhika muHaggai 2:4 otadhi tu kwathele ngiini tu gandje eitulomo kokulonga ehalo lyaJehova? (Tala wo enyolo lyopevi.)

⁸ Molwaashoka uudhigu uunene owu li popepi, osha simana noonkondo tu vulike kelombwelo li na ko nasha nokuuvitha. (Mark. 13:10) Ihe otashi vulika tu shi mone oshidhigu okugandja eitulomo kiilonga yokuuvitha ngele otu na uupyakadhi wopashimaliwa, nenge hatu patanekwa miilonga yokuuvitha. Oshike tashi vulu oku tu kwathela tu pitithe komeho iinima yUukwaniilwa? Okukala tu na einekelo kutya “Jehova gwomatangakwiita”b oku li pamwe natse. Ote ke tu kwathela ngele otwa tsikile okupititha komeho iinima yUukwaniilwa. Onkee katu na okutila sha. — Lesha Haggai 2:4.

9-10. Ongiini aaihokani yamwe ya li ya mono uushili woohapu ndhoka dha popiwa kuJesus muMateus 6:33?

⁹ Natu taleni koshiholelwa shaOleg naIrina,c aaihokani mboka ye li aakokolindjila. Konima sho ya tembuka ya ka kwathele kegongalo lilwe, oya kanitha iilonga omolwuuhupilo tawu shongola moshilongo shawo. Nonando oya kala omumvo aguhe kaaye na iilonga tayi kalelele, oya mono nkene Jehova te ya kwathele pahole, nomathimbo gamwe, oya li haya yambidhidhwa kaamwatate naamwameme. Oshike sha li she ya kwathele sho ye li momaupyakadhi ngoka? Oleg, ngoka petameko a li a polimana, okwa ti: “Okukala twa ipyakidhila niilonga yokuuvitha okwe tu kwathele tu gandje eitulomo kwaashoka sha simanenena monkalamwenyo.” Omanga ye nomukadhi taya kongo iilonga, oya kala ya ipyakidhila niilonga yokuuvitha.

¹⁰ Esiku limwe sho ya zi muukalele oya adha kuume kawo kopothingo, ngoka a enda ookilometa 160, e ya etela oondjato mbali dhiikulya. Oleg okwa ti: “Esiku ndyoka otwa li natango twe shi imonene kutya Jehova negongalo oye na ko nasha natse shili. Otwa tompwa kutya Jehova iha dhimbwa nando aapiya ye, nonando oya kale ya fa ye uvite kaaye na etegameno lyasha.” — Mat. 6:33.

11. Oshike shoka tatu vulu okukala twa tegelela, ngele otwa gandja eitulomo kokulonga ehalo lyaKalunga?

¹¹ Jehova okwa hala tu gandje eitulomo kiilonga yokuninga aantu aalongwa, mbyoka tayi hupitha oomwenyo. Ngaashi sha tumbulwa mokatendo 7, Haggai okwa li a ladhipike oshigwana shaJehova shi gandje ishewe eitulomo kiilonga iiyapuki, mokutameka okutunga, ya fa opo taya tameke ekankameno lyotempeli. Ngele oye shi ningi, Jehova okwa li e ya uvanekela kutya ‘ote ke ya yambeka.’ (Hag. 2:18, 19) Otatu vulu okukala nuushili kutya Jehova ota ka yambeka oonkambadhala dhetu ngele otwa pititha komeho iilonga mbyoka he tu pe.

NKENE TATU VULU OKUKALA TWA INEKELA LELA MUJEHOVA

12. Omolwashike Esra nosho wo mboka a li pamwe nayo, ya li ya pumbwa eitaalo lya kola?

¹² Momumvo 468 K.E.N., Esra okwa li a yi pamwe nongundu ontiyali kuJerusalem, okuza kuBabilon. Esra naamboka a li pamwe nayo oya li ya pumbwa eitaalo lya kola, opo ya vule okuya molweendo ndoka. Oya li ye na okweenda moondjila dha nika oshiponga ya humbata oshingoli noshisiliveli oshindji, shoka sha gandjwa omayambidhidho kaantu, gokukwathela iilonga yotempeli. Shoka osha li tashi vulu oku ya ningitha ya ponokelwe nuupu kaayugi. (Esra 7:12-16; 8:31) Shimwe ishewe, oya li ya mono kutya muJerusalem omwa nika oshiponga. Oshilando kasha li shi na aantu oyendji, omakuma gasho nomiyelo odha li dha pumbwa okwoopalekululwa. Oshike tatu vulu okwiilonga kuEsra kombinga yokukala tu na einekelo lya kola muJehova?

13. Esra okwa li a koleke ngiini einekelo lye muJehova? (Tala wo enyolo lyopevi.)

¹³ Esra okwa mono nkene Jehova ta yambidhidha oshigwana she, sho sha li momathimbo omadhigu. Momimvo ndhoka dha tetekela omumvo 484 K.E.N., Esra otashi vulika a adhika muBabilon sho omukwaniilwa Kserkses a gandja elombwelo kutya Aajuda muukwaniilwa waPersia ashihe naya dhipagwe. (Est. 3:7, 13-15) Onkalamwenyo yaEsra noyAajuda ayehe mboka ya li pamwe naye oya li moshiponga. Sho Aajuda ‘yokiitopolwa ayihe’ ye shi uvu, oya idhilike iikulya noya li ya nika oluhodhi noonkondo noya pula ekwatho kuJehova okupitila megalikano. (Est. 4:3) Dhiladhila kunkene Esra nAajuda ooyakwawo ya li ye uvite, sho mboka ya ningi ompangela ye ya dhipage oyo ya dhipagwa. (Est. 9:1, 2) Iiningwanima mbyoka ya li ya ningilwa Esra pethimbo ndyoka, otashi vulika ye mu kwathela a ilongekidhile omamakelo gomonakuyiwa, noya koleke einekelo lye muJehova kutya ota vulu okugamena oshigwana she.d

14. Oshiilongomwa shini omumwameme gumwe a li a ilongo sho a mono nkene Jehova e mu sile oshimpwiyu pethimbo lyomaupyakadhi?

¹⁴ Sho Jehova he tu gamene momathimbo omadhigu otatu vulu okukala nuushili kutya ote ke tu sila oshimpwiyu momathimbo ngoka monakuyiwa. Natu tale koshiholelwa shaAnastasia, ngoka a kala moEuropa lyokUuzilo. Okwa etha po iilonga ye, opo kaa kuthe ombinga miinima yopapolitika. Okwa ti: “Shika osho oshikando shotango monkalamwenyo yandje nda iyadha kaandi na iimaliwa.” Opo ihe okwa gwedha ko a ti: “Onda ethele iinima momake gaJehova nonda mono nkene ta sile ndje oshimpwiyu nolukeno. Nonando ondi iyadhe kaandi na iilonga siku limwe, itandi ka kala nda tila. Ngele Tate yetu gwomegulu ota sile ndje oshimpwiyu nena, ota ka sila ndje wo oshimpwiyu esiku lyangula.”

15. Oshike sha kwathele Esra a koleke einekelo lye muJehova? (Esra 7:27, 28)

¹⁵ Esra okwa li a mono nkene Jehova e mu kwathele. Sho Esra a dhiladhila kombinga yiikando oyindji mbyoka Jehova a ulike monakuziwa kutya oku na ko nasha naye osha li she mu kwathele a kokeke einekelo lye muye. Ndhindhilika uutumbulilo mboka tawu ti: “Omuwa, Kalunga kandje, okwa pe ndje omukumo.” (Lesha Esra 7:27, 28.) Esra okwa li a longitha uutumbulilo wa fa mboka iikando ya konda pwiihamano membo ndyoka lye mu lukilwa. — Esra 7:6, 9; 8:18, 22, 31.

16. Omoonkalo dhini hatu mono lela kutya Jehova ote tu kwathele? (Tala wo ethano.)

¹⁶ Jehova ota vulu oku tu kwathela, uuna tu li momashongo. Pashiholelwa, uuna tatu pula omugandji gwiilonga e tu pe efudho, tu ye koshigongi shoshitopolwa, nenge a ninge omalunduluko gontumba ge na ko nasha noowili dhetu dhokulonga, opo tu vule okukala hatu kala pokugongala akuhe, otatu ka mona lela nkene Jehova te tu kwathele. Oshizemo otashi vulika shi kale oshiwanawa shi vulithe pwaashoka twa li twa tegelela. Opo nduno einekelo lyetu muJehova otali kolo.

17. Esra okwa li a ulike ngiini eifupipiko sho a li momathimbo omadhigu? (Tala ethano lyokombanda.)

¹⁷ Esra okwa li a pula Jehova ekwatho neifupipiko okupitila megalikano. Oshikando kehe e uvite a gwililwa po kiinakugwanithwa, okwa li ha galikana kuJehova neifupipiko. (Esra 8:21-23; 9:3-5) Molwaashoka Esra okwa li a inekela muJehova, yalwe oya li ye na ehalo lyoku mu yambidhidha nokuholela eitaalo lye. (Esra 10:1-4) Uuna tu uvite twa gwililwa po kiimpwiyu yi na ko nasha noompumbwe dhetu, nenge negameno lyaanegumbo yaandjetu, otwa pumbwa okupula ekwatho kuJehova megalikano.

18. Oshike tashi vulu oku tu kwathela tu koleke einekelo lyetu muJehova?

¹⁸ Ngele otwa kongo ekwatho kuJehova neifupipiko nokutaamba ko ekwatho ndyoka tatu pewa kooitaali ooyakwetu, einekelo lyetu muJehova otali ka kola. Meme Erika, ngoka e na aanona yatatu, okwa kala aluhe e na einekelo muJehova kutya ote ke mu sila oshimpwiyu nokuli nuuna e li moonkalo oondhigu. Meni lyethimbo efupi, okanona ke oka pitilile po nokwa silwa omusamane gwe, ya si ya ilandulila po. Sha ikolelela kwaashihe shoka sha ningwa po, okwa ti: “Ito vulu okutseya komeho gethimbo kutya Jehova ote ke ku kwathela ngiini. Oto vulu okumona ekwatho momikalo moka inoo tegelela. Onda mona nkene Jehova a longitha ookuume kandje a yamukule omagalikano gandje ogendji, okupitila moohapu nomiilonga yawo. Shampa nda lombwele ookuume kandje shoka tashi inyenge monkalamwenyo yandje, ohaya vulu okukwathela ndje nuupu.”

INEKELA MUJEHOVA SIGO EHULILO

19-20. Oshike tatu vulu okwiilonga kAajuda mboka ya li inaaya vula okushuna kuJerusalem?

¹⁹ Otatu vulu wo okwiilonga oshiilongomwa sha simana kAajuda mboka ya li inaaya vula okushuna kuJerusalem. Yamwe oya li ya ngambekwa omolwuukokele, yamwe omolwuuvu wa kwata miiti, nenge iinakugwanithwa yomomagumbo. Ihe nando ongawo, oya li ya nyanyukwa okuyambidhidha mboka taya shuna, moku ya pa iinima mbyoka ya pumbwa sho taya tungulula otempeli. (Esra 1:5, 6) Osha fa shi li ngeyi kutya nokuli nokonima yomimvo 19 lwaampono, okuza sho ongundu yotango ya thiki muJerusalem, mboka ya thigala muBabilon, oya li ya tsikile okutuma omayambidhidho nehalo ewanawa kuJerusalem. — Sak. 6:10.

²⁰ Nonando otu uvite twa ngambekwa ngele tashi ya pwaashoka tatu vulu okuninga miilonga yaJehova, otu na einekelo kutya oha pandula oonkambadhala ndhoka hatu ningi, opo tu mu nyanyudhe. Shono otu shi shi ngiini? Pethimbo lyaSakaria, Jehova okwa li a pula omuhunganeki gwe a ninge oshishani shoshingoli noshisiliveli, shoka sha tumwa kwaamboka ya li muupongekwa muBabilon. (Sak. 6:11) “Oshishani” shoka osha li tashi ka kala shi li ‘edhimbulukitho’ kuyo li na ko nasha nomayambidhidho ngoka ya gandja nehalo ewanawa. (Sak. 6:14) Otatu vulu okukala neinekelo kutya Jehova ke na siku a dhimwe oonkambadhala dha mana mo ndhoka hatu ningi tu mu longele uuna tu li momathimbo omadhigu. — Heb. 6:10.

21. Oshike tashi vulu oku tu kwathela tu kale tu na einekelo muJehova, kutya nduno otu ki iyadhe moonkalo dha tya ngiini monakuyiwa?

²¹ Kapu na omalimbililo kutya otatu ka taalela omaupyakadhi momasiku ngaka gahugunina, noonkalo otashi vulika nokuli dhi ka nayipale. (2 Tim. 3:1, 13) Ihe nando ongawo, inatu pumbwa okukala twa gwililwa po kiimpwiyu. Dhimbulukwa oohapu dhaJehova sho a lombwele oshigwana she pethimbo lyaHaggai, a ti: “Ondi li pamwe nane. . . . Ano inamu tila.” (Hag. 2:4, 5) Natse otatu vulu okukala tu na uushili kutya Jehova ota ka kala pamwe natse, shampa owala tatu ningi ngaashi tatu vulu tu longe ehalo lye. Ngele otwa tula miilonga shoka twa ilonga komahunganeko gomembo lyaHaggai nolyaSakaria nosho wo koshiholelwa shaEsra, otatu ka kala twa inekela muJehova kutya nduno otwi iyadhe moonkalo dha fa peni monakuyiwa.