Epangelo lyUukwaniilwa waKalunga—olyo oshinima shoshili nena

“Ongiini mbela iilongo oyindji noonkondo noya yoolokathana momikalo nomomaputuko tayi vulu okutsa kumwe? Osha li sha popiwa kutya eponokelo owala okuza kopulanete yilwe tali ka hanganitha aantu ayehe.”—The Age, oshifokundaneki shaAustralia.

EPONOKELO okuza kopulanete yilwe? Kutya nduno shoka otashi ka hanganitha iigwana ayihe yokevi nenge hasho, ehunganeko lyOmbimbeli otali popi uupyakadhi uunene u li pokuningwa mboka tau ka ningitha iigwana yuuyuni yi hangane. Dhoshili, uupyakadhi uunene mboka otau ke etwa komatanga ga za pombanda.

Omukwaniilwa David gwaIsrael shonale okwa popi pahunganeko kombinga yonkalo yuuyuni mbuka. Okwa nwethwa mo kuKalunga a nyole ta ti: “Aakwaniilwa yevi ohaa thikama okukondjitha, [naapangeli oyi imanga kumwe okukondjitha, OB-1986] Omuwa nomugwaakwa gwe: Tu tokoleni oonkandja dhawo, tse tu ihuleni oongodhi dhawo.” (Epsalmi 2:2, 3; Iilonga 4:25, 26) Ndhindhilika kutya aapangeli yuuyuni otaye ki imanga kumwe okukondjitha Jehova, Omushiti gweshito alihe, nomugwayekwa gwe, sha hala okutya, Omukwaniilwa gwe a langekwa po, Jesus Kristus. Ongiini mbela shika tashi ka ningwa?

Payalulo lyOmbimbeli lyethimbo nosho wo omahunganeko ga gwanithwa, momumvo 1914 Uukwaniilwa waKalunga wa dhikwa po megulu u na Jesus Kristus e li Omukwaniilwa.a Pethimbo ndyoka iigwana yuuyuni oya li yi na edhiladhilo limwe alike. Pehala lyokwiigandja kuunamapangelo wUukwaniilwa waKalunga mboka opo wa valwa, oya li tayi kondjele oonkondopangelo mekondjo hali ithanwa Iita Iinene, nenge Iita yoTango yUuyuni.

Mbela Jehova Kalunga okwa tala ko ngiini einyengo lya tya ngaaka lyaapangeli yopantu? “Onakukala megulu te ya yolo; Omuwa te ya dhini. Nena note ya lombwele a si ondjahi, nomokugeya kwe te ya tilitha.” Opo nduno Jehova ota ka lombwela Omwana, Omukwaniilwa omugwayekwa gwUukwaniilwa, ta ti: “Indila ndje, ongame notandi ku pe aapagani uuthiga woye nooha dhuuyuni dhi ninge odhoye! Ongoye to ke ya dhengagula nondhimbo yosheela, to ke ya nyanyagula ngoshuma sheloya.”—Epsalmi 2:4, 5, 8, 9.

Okunyanyagulwa huka kwahugunina nondhimbo yooshela kwiigwana mbyoka tayi kondjo otaku ka ningwa puArmageddon nenge Harmagedon. Embo lyOmbimbeli lyahugunina, Ehololo, otali hokolola oshiningwanima shika sha adha oshitsa shopombanda shi li “iita mesiku enene lyaKalunga Omunankondoadhihe,” moka ‘aakwaniilwa yokombanda yevi alihe’ taya ka gongelwa. (Ehololo 16:14, 16, OB-1986) Molwokunwethwa mo koompwidhuli, iigwana yokevi lwahugunina otayi ka hangana yi na elalakano limwe alike—okuhingila Kalunga Omunankondoadhihe iita.

Ethimbo uuna aantu taye ki imanga kumwe okukondjitha uunamapangelo waKalunga otali hedha popepi neendelelo. Nonando ongaaka, shoka hayi ithana “uukumwe” wawo itashi ke ye etela omauwanawa. Pehala lyaashono, oku shi ninga kwawo otaku ka kala oshiningwanima shoka tashi tetekele ombili ndjoka ya kala ya tegelelwa ethimbo ele kaantu ayehe. Ngiini? Molugodhi ndoka lwahugunina, Uukwaniilwa waKalunga “otau ka nyanyagula notau ka teyagula omaukwaniilwa agehe [guuyuni] noku ga hulitha po, ihe wo wene tau ka kala sigo aluhe.” (Daniel 2:44, KB) Epangelo ndyoka tali ka gwanitha po ehalo lyaantu lyokukala ya hala ombili muuyuni auhe kali shi ehangano lyontumba lyopantu, ihe olyo Uukwaniilwa waKalunga.

Omuleli omukuluntu gwepangelo lyUukwaniilwa

Mboka owo Uukwaniilwa mboka aantu oyendji aanashili ya galikana kombinga yawo taya ti: “[Uukwaniilwa woye nau ye, KB]; ehalo lyoye nali gwanithwe nokombanda yevi wo ngashika megulu.” (Mateus 6:10) Pehala lyokukala u li onkalo yomomutima ihaayi monika, Uukwaniilwa waKalunga owo epangelo lyolela ndyoka lya longa iilonga iikumithi okuza sho wa dhikwa po megulu mo 1914. Natu taleni iinima yimwe ya simana mbyoka tayi ulike kutya Uukwaniilwa waKalunga ou li lela miilonga kunena.

Tango, ou na oshitopolwa shi na oonkondo notashi longo nawa shoka tashi wilikwa kOmukwaniilwa e li koshipangelapundi, Jesus Kristus. Mo 33 E.N., Jehova Kalunga okwa ningi Jesus Kristus Omutse gwegongalo lyopaKriste. (Aaefeso 1:22) Okuza ethimbo ndyono, Jesus okwa longitha uukwamutse we, nokungeyi otu ulike kutya ota vulu okukala omuleli. Pashiholelwa, sho ondjala onene ya li ya adha Judea methelemimvo lyotango, egongalo lyopaKriste olya katuka oonkatu nziyanziya opo li gandje ekwatho kiilyo yalyo. Iilonga yokugandja ekwatho oya li yu unganekwa, na Barnabas naSaulus oya li ya tumwa okuza kuAntiokia oku ka gandja iikwatha.—Iilonga 11:27-30.

Ngashingeyi otatu vulu nokuli okutegelela oshindji kuJesus Kristus sho epangelo lyUukwaniilwa li li miilonga. Uuna iiponga iinene, ngaashi omakakamo gevi, ondjala, omafundja, iikungulu nomandwafuko gomulilo moondundu, tayi holoka po, egongalo lyopaKriste lyOonzapo dhaJehova ohali inyenge meendelelo okukwathela ooitaali ooyakwawo nayalwe mboka ye li miitopolwa mbyoka ya gumwa. Pashiholelwa, sho omakakamo gevi omahanaguli ga ningwa muEl Salvador muJanuali naFebuluali mo 2001, iilonga yokugandja omakwatho oya li yu unganekwa miitopolwa ayihe yoshilongo, noongundu dhOonzapo dhaJehova okuza kuKanada, Guatemala nIilongohangano odha li dha gandja ekwatho. Gatatu gomomahala gadho moka hadhi gongalele okulongela Kalunga nosho wo omagumbo ge vulithe 500 oga li ga tungululwa meni lyethimbo efupi.

Aalelwa yepangelo lyUukwaniilwa waKalunga

Okuza sho wa dhikwa po mo 1914, Uukwaniilwa waKalunga womegulu owa gongele aalelwa yawo okuza maantu mboka ye li muuyuni noku yu unganeka. Shika otashi gwanitha ehunganeko endhindhilikwedhi lya nyolwa kuJesaja tali ti: “Pomahulilo gomasiku ondundu yongulu yOmuwa [sha hala okutya, elongelokalunga lye lyashili lya tumbalekwa] otayi thikama ya kolelela koondungu dhoondundu, . . . noko taku matukile aapagani ayehe.” Ehunganeko otali ulike kutya “iilongo oyindji” otayi ka londa kondundu ndjoka e tayi taamba ko omalombwelo noompango dhaJehova.—Jesaja 2:2, 3.

Omolwomaipyakidhilo ngaka opwa holoka ongundu ya simana noonkondo methimbo lyongashingeyi—uumwayinathana wopaigwana wAakriste ye vulithe 6 000 000 miilongo yi vulithe 230 muuyuni auhe. Piigongi yopaigwana yOonzapo dhaJehova, aatali olundji oya li ya kumwa okumona ohole, ombili nuukumwe mokati komangathithi omanene gaantu, ya taaguluka iiyimbi yuukwashigwana, eputuko nelaka. (Iilonga 10:34, 35) Ito zimine mbela kutya epangelo opo li kale tali vulu okuhanganitha omihoko dhaantu omathele mombili, oli na okukala hali shi pondola noihaali tengauka—noli na okukala lyoshili?

Uukwaniilwa waKalunga nelongo

Epangelo kehe oli na omithikampango ndhoka aakwashigwana yalyo ya tegelelwa okugwanitha po, nakehe ngoka a hala okukala kohi yepangelo ndyoka oku na okugwanitha po omithikampango ndhoka. Sha faathana, Uukwaniilwa waKalunga ou na omithikampango ndhoka ayehe mboka ya gwana okukala aalelwa yawo ye na okugwanitha po. Ihe okukwathela aantu oyendji mboka ye na omaputuko ga yoolokathana unene ya taambe ko noya tse kumwe nomithikampango odho tuu ndhoka, oshi li oshilonga oshinene lela. Opo nduno mpaka opu na oshinima shilwe shoka tashi koleke kutya Uukwaniilwa waKalunga owo oshinima shoshili—oprograma yawo yi na omupondo yelongo ndyoka ihaali thiki owala momadhiladhilo noku ga lundulula ihe ohali thiki wo nomomutima.

Ongiini mbela epangelo lyUukwaniilwa lya longo iilonga mbika yi li eshongo? Omokupitila momukalo ngoka gwa li hagu longithwa kaayapostoli gwokuuvitha ‘momagumbo’ nokulonga Oohapu dhaKalunga kehe gumwe polwe. (Iilonga 5:42; 20:20) Omukalo nguka gwokulonga aantu ohagu shi pondola ngiini? Jacques Johnson, omupristeri gwaKatoolika, okwa nyola moshifokundaneki shaKanada hashi piti koshiwike kombinga yoonkambadhala dhe okusitha uunye omukiintu gumwe kaa konakone we nOonzapo dhaJehova. Okwa ti: “Onda li nda nyengwa thiluthilu nonda tseya kutya ondi li molugodhi moka itaandi vulu okusindana. . . . Onda tameke okumona kutya oomwedhi odhindji dha piti aakiintu mboka ye li Oonzapo dhaJehova oya li ya ningi omakwatathano taga ti sha nomuvali nguka omugundjuka ha kala owala megumbo. Oya ningi ekwatathano naye moku mu kwathela noya panga uukuume naye wopothingo. Nziya okwa ningi oshilyo shi itula mo melongelokalunga lyadho nokanda li we tandi vulu okuninga sha oku mu keelela.” Ngaashi naanaa omutima gwaangoka a li nale Omukatoolika gwa li gwi inyengithwa ketumwalaka lyOmbimbeli ndyoka a longwa kOonzapo dhaJehova nokeihumbato lyadho lyopaKriste, osho omitima dhaantu omamiliyona muuyuni auhe tadhi inyengithwa.

Omukalo nguka gwokulonga aantu—elongo lyUukwaniilwa—olya kankamena kOmbimbeli noli li pamithikampango dhayo dhuuyogoki wopamikalo. Ohali longo aantu ya kale ye holathane noya simanekathane kutya nduno oyeputuko lini. (Johannes 13:34, 35) Ohali kwathele wo aantu yi inyenge kekumagidho ndika: “Ne inamu faathana nuuyuni mbuka, aawe, shitukeni kepepalo lyomadhiladhilo geni, opo mu konakone, ehalo lyaKalunga olini, naashoka oshiwanawa, sho opalela nosha gwana.” (Aaroma 12:2) Molwaashoka aantu omamiliyona oye etha po omikalo dhawo dhonale e taya tsu kumwe nenyanyu noompango nomakotampango gepangelo lyUukwaniilwa, oya mono ombili noye uvite elago ngashingeyi noye na etegameno lyonakuyiwa ombwanawa.—Aakolossa 3:9-11.

Ekwatho limwe lya tongomana okwaadha uukumwe mbuka wuuyuni auhe olyo oshifo shika, Oshungonangelo. Okupitila momikalo dhu unganekwa nawa dhokutoloka nosho wo iilongitho yokunyanyangidha momalaka ogendji, iitopolwa yontumba mOshungonangelo ohayi nyanyangidhwa oshita momalaka 135 naaleshi yayo ye vulithe poopersenda 95 muuyuni auhe ohaya vulu okukonakona uuyelele momalaka gawo pethimbo limwe alike.

Omunyoli gumwe gweitaalo hali ithanwa Mormon okwa ningi omusholondondo gwomatumo ngoka ga li ge shi enditha nawa lela kakele kongeleka yawo. Okwa nyola po Oshungonangelo noAwake!, ya nyanyangidhwa kOonzapo dhaJehova, yi li iifo dhingi yokuuvitha evaangeli nokwa ti: “Kapu na nando gumwe ta vulu okugandja uusama kutya Oshungonangelo nenge Awake! otayi popile okwaahenakonasha; mekondjithathano naashoka, otayi penduthile aantu edhiladhilo lyokukala ya tonata shoka inaandi mona miileshomwa yelongelokalunga lilwe. Oshungonangelo noAwake! oyo iifo iiwanawa molwashoka iikalimo yayo oyi na omauyelele goshili noga konakonwa nawa.”

Omauliko otagu ulike kutya Uukwaniilwa waKalunga ou li lela miilonga. Oonzapo dhaJehova otadhi tseyithile nenyanyu nonuulaadhi “evaangeli ndika lyuukwaniilwa” aantu ooyakwawo notadhi ya hiya ya ninge aalelwa yawo. (Mateus 24:14, KB) Ou na mbela etegameno lya tya ngaaka? Oto vulu okunyanyukilwa omalaleko nuuyamba ngoka taga zi mokweendathana naamboka taya longwa notaya lalakanene okukala pamithikampango dhUukwaniilwa. Naashono sha simana unene, osho kutya oto vulu okunyanyukilwa etegameno lyokukala to pangelwa kUukwaniilwa muuyuni uupe wu uvanekwa moka “tamu ka kala uuyuuki.”—2 Petrus 3:13.

[Enyolo lyopevi]

[Ethano pepandja 5, 6]

Mo 1914 iigwana oya li tayi kondjo iita yuuyuni

[Omathano pepandja 6]

Iilonga yokugandja ekwatho nehalo ewanawa otayi ulike kutya ohole yopaKriste oyi li miilonga

[Ethano pepandja 7]

Oonzapo dhaJehova muuyuni auhe otadhi mono uuwanawa moprograma yelongo ya faathana