Tava hepekwa ndele ove li ovanelao
“Ovanelao onye, ovanhu ngenge tave mu sheke ndee tave mu taata ndee tave mu popile mowii aushe nokufufya molwange.”—MATEUS 5:11.
1. Eshilipaleko lilipi Jesus a pa ovashikuli vaye shi na sha nokukala ovanelao nokuhepekwa?
ESHI Jesus a tuma ovayapostoli vaye lwotete va ka udife Ouhamba, okwe va londwela kutya otava ka shakeneka omapataneko. Okwe va lombwela a ti: “Edina lange otamu ke li tondelwa kuaveshe.” (Mateus 10:5-18, 22) Ndelenee nale mEudifo laye lokOmhunda, okwa li a pa ovayapostoli vaye nosho yo vamwe eshilipaleko kutya okupatanekwa kwa tya ngaho itaku ka nyona po okukala kwavo ve udite elao momitima. Doshili, Jesus okwa kwatakanifa nokuli okukala omunelao nokuhepekwa tu li Ovakriste! Ongahelipi omahepeko taa dulu okuninga omunhu omunelao?
Tava hepekelwa ouyuki
2. Paendjovo daJesus nosho yo domuyapostoli Petrus, okumona oixuna kulipi haku eta elao?
2 Etomheno etihetatu li na sha nokukala ovanelao olo Jesus a tumbula olo: ‘Ovanelao ovava, tava hepekelwa ouyuki, osheshi ouhamba weulu owavo.’ (Mateus 5:10) Okuhepekwa kwo vene kaku fi oshinima shihafifa. Omuyapostoli Petrus okwa shanga a ti: “Ope na efimano lashike, ngenge tamu lididimike eshi hamu dengelwa omanyonauno? Ndele ngenge tamu lididimike eshi tamu hepekelwa oilonga yeni iwa, osho onghenda koshipala shaKalunga.” Natango okwa ti: “Ndele mu ha kale nande umwe mokati keni ta hepekwa shaashi ye omudipai ile omulunga ile omukolokoshi ile omunukili meendjovo dovanhu; ndelenee ngenge pe na ou ta hepekwa shaashi oye omukriste, ina fya ohoni, ndelenee na fimaneke Kalunga omolwedina olo.” (1 Petrus 2:20; 4:15, 16) Paendjovo daJesus, okuhepekwa otaku ningi omunhu omunelao ngeenge taku lididimikilwa omolwouyuki.
3. (a) Okuhepekelwa ouyuki otashi ti ngahelipi? (b) Omahepeko okwa li a kuma ngahelipi Ovakriste vonale?
3 Ouyuki washili owe likolelela kokudulika kehalo laKalunga noipango yaye. Onghee hano, okuhepekelwa ouyuki otashi ti okuhepekwa molwaashi omunhu ta kondjifa omafininiko oo tae mu fininike a nyone omafinamhango noiteelelwa yaKalunga. Ovayapostoli ova li va hepekwa kovawiliki Ovajuda molwaashi ova anya okweefa okuudifa medina laJesus. (Oilonga 4:18-20; 5:27-29, 40) Mbela osho osha nyona po ehafo lavo ile she va ningifa va efe po okuudifa kwavo? Hasho nandenande! “Eshi va dja mo moshiongalele shovakulunhu, ova hafa eshi va talwa va wana okushekelwa edina laJesus. Ndele vo inava efa okulonga omafiku nomotembeli nomomaumbo nova udifa evangeli laKristus Jesus.” (Oilonga 5:41, 42) Omahepeko oo okwe va etela ehafo nokwa pepaleka ouladi wavo moilonga yokuudifa. Konima yefimbo, Ovakriste vonale ova li va hepekwa kOvaroma molwaashi va anya okwiilikana omukesari.
4. Omatomheno amwe elipi e na sha nokuhepekwa kwOvakriste?
4 Kunena, Eendombwedi daJehova oda kala tadi hepekwa okudja nale omolwokwaanya okweefa po okuudifa “evangeli eli louhamba.” (Mateus 24:14) Ngeenge okwoongala kwado kwopaKriste kwa shilikwa, ohadi kala di na ehalo okuhepekwa ponhele yokweefa po okwoongala oko Ombibeli ye di lombwela di he ku efe po. (Ovaheberi 10:24, 25) Oda kala tadi hepekwa okudja nale omolwokuhenombinga kwado kwopaKriste nosho yo okwaanya okulongifa ohonde. (Johannes 17:14; Oilonga 15:28, 29) Ndele nande ongaho, okudiinina kwavo onghatu youyuki otaku etele oshiwana shaKalunga kunena ombili nelao lokomutima.—1 Petrus 3:14.
Tava shekwa omolwaKristus
5. Omolwetomheno la fimana lilipi oshiwana shaJehova tashi hepekwa kunena?
5 Etomheno etimuwoi li na sha nokukala ovanelao olo Jesus a kundafana mEudifo laye lokOmhunda oli na sha yo nokuhepekwa. Okwa ti: ‘Ovanelao onye, ovanhu ngenge tave mu sheke ndee tave mu taata ndee tave mu popile mowii aushe nokufufya molwange.’ (Mateus 5:11) Etomheno la fimana kutya omolwashike oshiwana shaJehova tashi hepekwa, omolwaashi kashi fi oshitukulwa shonghalelo ei yoinima youkolokoshi. Jesus okwa lombwela ovahongwa vaye a ti: “Ngeno onye vomounyuni, ngeno ounyuni u hole ovakwao, ndelenee eshi mu he fi vomounyuni, Ame eshi nde mu hoolola mo mounyuni, onghee ounyuni tau mu tondo.” (Johannes 15:19) Sha faafana, omuyapostoli Petrus okwa ti: “Osho tashi va kumifa, eshi ihamu tondokele vali mumwe [navo] monhata youmbwada ndee hava sheke.”—1 Petrus 4:4.
6. (a) Omolwashike oshixupe nosho yo oovakwao hava shekwa nohava hepekwa? (b) Mbela omasheko oo otaa ninipike okukala kwetu ovanelao?
6 Otwa mona nale kutya Ovakriste vonale ova li va hepekwa molwaashi va anya okweefa okuudifa medina laJesus. Kristus okwa pa ovashikuli vaye oshilonga a ti: “Tamu ka ninga eendombwedi dange . . . fiyo okominghulo dounyuni.” (Oilonga 1:8) Oshixupe oshidiinini shovamwaxe vaKristus ovavaekwa nosho yo oovakwao ovadiinini ‘vongudu inene’ ovo tave va kwafele, ova wanifa po oshilonga osho nouladi. (Ehololo 7:9) Onghee hano, Satana ota lwifa ‘oshixupe sholudalo [“lomwalikadi,” oo e lile po oshitukulwa shehangano laKalunga lomeulu], osho hashi diinine oipango yaKalunga ndee shi na ehepaululo laJesus.’ (Ehololo 12:9, 17, yelekanifa NW.) Tu li Eendombwedi daJehova, ohatu hepaulula Jesus, oo e li Ohamba yepangelo lOuhamba tai pangele paife, olo tali ka hanauna po omapangelo opanhu oo e li omhinge nounyuni mupe wouyuki waKalunga. (Daniel 2:44; 2 Petrus 3:13) Omolwaasho hatu shekwa nohatu hepekwa, ndele otwa hafa eshi hatu hepekwa omolwedina laKristus.—1 Petrus 4:14.
7, 8. Ovapataneki ova popya oipupulu ilipi shi na sha nOvakriste vonale?
7 Jesus okwa ti kutya ovashikuli vaye ove na okulitala ko ve li ovanelao ngeenge ovanhu ‘tave va popile mowii aushe nokufufya’ omolwaye. (Mateus 5:11) Osho osha ningilwa shili Ovakriste vonale. Eshi omuyapostoli Paulus kwa li a idililwa modolongo muRoma, lwomo 59-61 O.P., ovawiliki Ovajuda oko ova li va ula Ovakriste va ti: “Fye otwa uda oshimhanga eshi hashi tuwa eemhata akushe.” (Oilonga 28:22) Paulus naSilas ova li va lundilwa kutya ove li ‘ovapiyaaneki vounyuni aushe,’ tava “nyono omhango yomukesari.”—Oilonga 17:6, 7.
8 Mokushanga shi na sha nOvakriste vopefimbo lOuhamba waRoma, omunandjokonona K. S. Latourette okwa ti: “Opa li omalundilo e lili noku lili. Omolwokulidilika okukufa ombinga moivilo yoshipaani, Ovakriste ova li va lundilwa kutya ova itavela kutya Kalunga ke ko. Omolwokulidilika kwavo okukufa ombinga moinima yopanghalafano—oivilo yoshipaani, omalihafifo aapeshe . . .—ova li hava ulwa kutya ove tonde ovanhu. . . . Okwa li kwa tiwa kutya aveshe ovalumenhu novakainhu ova li hava shakene konguloshi . . . ndele tava i momilele da nyata. . . . Oushili oo kutya [Edimbuluko lefyo laKristus] ola li ashike hali danwa moipafi yovaitaveli owa etifa omahokololo oipupulu kutya Ovakriste ova li hava yambe ondjikilile okahanana nokunwa ohonde nokulya ombelela yako.” Natango, molwaashi Ovakriste vonale ova anya okukufa ombinga mokwiilikana omukesari, ova li va lundilwa kutya ove li ovatondi vEpangelo.
9. Ovakriste vomefelemudo lotete ove linyenga ngahelipi komalundilo oo va lundilwa, nonghalo oi li ngahelipi kunena?
9 Omapopyo oo oipupulu inaa imba Ovakriste vonale va wanife po oshilonga shavo shokuudifa onghundana iwa yOuhamba. Mo 60-61 O.P., Paulus okwa li a dula okupopya shi na sha ‘nevangeli’ olo la li “mounyuni aushe ndee tali imi oiimati” nola li la “udifilwa ovashitwa aveshe vokoshi yeulu.” (Ovakolossi 1:5, 6, 23) Oshinima sha faafana otashi ningwa kunena. Eendombwedi daJehova otadi lundilwa, ngaashi ashike Ovakriste vomefelemudo lotete va li va lundilwa. Ndele kunena oilonga yokuudifa etumwalaka lOuhamba otai xumu komesho notai etele ovo tava kufa ombinga muyo elao linene.
Va hafa okuhepekwa ngaashi ovaprofeti
10, 11. (a) Ongahelipi Jesus a xulifa eenghundafana daye di na sha netomheno etimuwoi lokukala ovanelao? (b) Omolwashike ovaprofeti va li va hepekwa? Yandja oihopaenenwa.
10 Jesus okwa xulifa eenghundafana daye di na sha netomheno etimuwoi lokukala ovanelao a ti: ‘Hafeni, osho ngaha va li va taata ovaprofeti ve mu tetekela.’ (Mateus 5:12) Ovaprofeti ovo Jehova kwa li a tuma va londwele Israel shi he fi oshidiinini kava li va tambulwa ko nawa naluhapu ova li va hepekwa. (Jeremia 7:25, 26) Omuyapostoli Paulus okwa yandja oumbangi u na sha noushili oo, eshi a shanga a ti: ‘Ohandi ti shike vali? Osheshi efimbo otali ka pwila nge po, ngenge handi hepaulula ovaprofeti ava okeitavelo va li va dengwa nova shekwa, ndele va mangwa nomalyenge nova idililwa modolongo.’—Ovaheberi 11:32-38.
11 Pefimbo lepangelo lohamba ikolokoshi Ahab nomukainhu wayo Isabel, ovaprofeti vaJehova vahapu ova li va dipawa neongamukonda. (1 Eehamba 18:4, 13; 19:10) Omuprofeti Jeremia okwa li a tulwa meti nokonima yefimbo okwa li a kupulwa mondungu i na onhata. (Jeremia 20:1, 2; 38:6) Omuprofeti Daniel okwa li a kupulwa mekololo leenghoshi. (Daniel 6:17, 18) Ovaprofeti aveshe ovo va tetekela efimbo lOukriste ova li va hepekwa molwaashi ova popila elongelokalunga la koshoka laJehova. Ovaprofeti vahapu ova li va hepekwa kovawiliki vomalongelokalunga Ovajuda. Jesus okwa ula ovanongo vomishangwa nOvafarisai “ovana vovadipai vovaprofeti.”—Mateus 23:31.
12. Omolwashike fye tu li Eendombwedi daJehova hatu shi tale ko shi li oufembanghenda okuhepekwa ngaashi ovaprofeti vonale?
12 Kunena, tu li Eendombwedi daJehova luhapu ohatu hepekwa molwaashi otu li ovaladi mokuudifa onghundana iwa yOuhamba. Ovatondi vetu ohave tu lundile kutya ohatu “lidilululifa ovanhu kefininiko,” ndele otu shi shii kutya ovalongeli vaJehova ovadiinini ve tu tetekela ova li va shakeneka omasheko a faafana. (Jeremia 11:21; 20:8, 11) Ohatu shi tale ko shi li oufembanghenda okuhepekelwa etomheno la faafana naalo ovaprofeti ovadiinini vonale va hepekelwa. Omuhongwa Jakob okwa shanga a ti: “Ovamwatate, hopaeleleni ovaprofeti ovo va popya medina lOmwene mokuhumbata oudjuu nomokulididimika. Taleni, ovo ve lididimika, ohatu va tale ovanelao.”—Jakob 5:10, 11.
Omatomheno a tongomana okukala ovanelao
13. (a) Omolwashike ihatu teywa omukumo komahepeko? (b) Oshike tashi tu dulifa tu kale twa pama, naasho otashi ulike shike?
13 Ponhele yokuteywa omukumo komahepeko, ohatu hekelekwa kediladilo olo kutya ohatu landula oshikoti shovaprofeti, shOvakriste vonale nosho yo shaKristus Jesus ye mwene. (1 Petrus 2:21) Ohatu mono ehafo linene okudja mOmishangwa, ngaashi eendjovo domuyapostoli Petrus tadi landula tadi ti: “Ovaholike, inamu kuminwa oupyu ou mu li mo woku mu [yeleka], wa foshinima inashi monika nale, Onye ngenge tamu shekelwa edina laKristus, onye ovanelao, osheshi Omhepo yoshinge noyaKalunga otai kala kombada yeni.” (1 Petrus 4:12, 14) Otu shi shii okudja moimoniwa kutya ohatu dulu ashike okukala twa pama momahepeko molwaashi omhepo yaJehova oi li kombada yetu notai tu pameke. Eyambidido lomhepo iyapuki oli li euliko kutya otu na omanangeko noupuna aJehova, naasho otashi tu etele ehafo linenenene.—Epsalme 5:13; Ovafilippi 1:27-29.
14. Omatomheno elipi tu na okukala twa hafa omolwokuhepekelwa ouyuki?
14 Etomheno limwe kutya omolwashike omapataneko nomahepeko omolwouyuki hae tu ningi ovanelao ololo kutya otashi ulike kutya otu li Ovakriste vashili tu li meliyandjo lometilokalunga. Omuyapostoli Paulus okwa shanga a ti: “Ovo va hala okukala metilokalunga muKristus Jesus, otava ka hepekwa.” (2 Timoteus 3:12) Otwa hafela neenghono ediladilo olo kutya okukanyatela oudiinini kwetu koshi yomayeleko otaku yandje enyamukulo natango kepopyo laSatana kutya oishitwa yaJehova aishe otai mu longele omolwokulihola mwene. (Job 1:9-11; 2:3, 4) Otwa hafa eshi tu na ombinga nande oinini mokuyukipalifa ounamapangelo waJehova u li pauyuki.—Omayeletumbulo 27:11.
Nyakukweni pombada omolwondjabi
15, 16. (a) Jesus okwe tu pa etomheno lilipi ‘lokuhafa nokunyakukwa pombada’? (b) Ondjabi ilipi ya tuvikililwa Ovakriste ovavaekwa meulu, nongahelipi oovakwao ‘veedi dimwe’ tava ka pewa yo ondjabi?
15 Jesus okwa yandja etomheno la wedwa po omolwokuhafela okulundilwa nokuhepekwa ngaashi ovaprofeti vonale. Pexulilo letomheno etimuwoi li na sha nokukala ovanelao, okwa ti: ‘Hafeni nye mu nyakukwe pombada, osheshi ondjabi yeni oinene meulu.’ (Mateus 5:12) Omuyapostoli Paulus okwa shanga a ti: “Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” (Ovaroma 6:23) Heeno, ‘ondjabi inene’ oyo omwenyo, nokai fi ondjabi oyo hatu dulu okulongela. Otai yandjwa oshali. Jesus okwa ti kutya ondjabi oi li “meulu” molwaashi otai di kuJehova.
16 Ovavaekwa otava mono “oshishani shomwenyo,” osho tashi ti omwenyo ihau fi pamwe naKristus meulu. (Jakob 1:12, 17) Ovo ve na eteelelo lokombada yedu, “eedi dimwe,” ova teelela oku ka fyuulula omwenyo waalushe moparadisa yokedu. (Johannes 10:16, OB-1954; Ehololo 21:3-5) Kape na imwe yomeengudu odo ye lilongela “ondjabi.” Ovavaekwa nosho yo “eedi dimwe” otava mono ondjabi yavo ‘omolwefilonghenda linene’ laJehova olo le linyengifa omuyapostoli Paulus a tye: “Kalunga na pandulilwe oshali yaye i he fi kutumbulwa.”—2 Ovakorinto 9:14, 15.
17. Omolwashike hatu dulu okukala ovanelao ‘nokunyakukwa pombada’ ngeenge hatu hepekwa?
17 Paulus okwa shangela Ovakriste ovo vamwe vomuvo konima yokafimbo va ka hepekwa komukesari Nero, a ti: “Ohatu lifimanekele [omaudjuu] yo, shaashi tu shi shii [omaudjuu] otaa dala elididimiko, nelididimiko oudiinini, noudiinini eteelelo; ndele eteelelo itali fifa ohoni.” Okwa ti yo: “Hafeleni [meteelelo], lididimikeni moudjuu.” (Ovaroma 5:3-5; 12:12) Kutya nee eteelelo letu olomeulu ile olokombada yedu, ondjabi yetu omolwoudiinini momayeleko oinene i dule kokule keshe osho twa wana okumona. Ehafo letu omolwetimaumbwile lokukala fiyo alushe hatu longele nokutanga Tate yetu omunahole, Jehova, koshi yOhamba yetu Jesus Kristus kali fi kuyelekwa. Doshili, otwa ‘nyakukwa pombada.’
18. Oshike tashi dulu okuteelelwa shi ningwe koiwana eshi exulilo tali ehene popepi, na Jehova ota ka ninga shike?
18 Moilongo imwe, Eendombwedi daJehova oda kala tadi hepekwa notadi hepekwa natango. Mexunganeko laye li na sha nonghalelo ei yoinima, Jesus okwa londwela Ovakriste vashili a ti: ‘Tamu tondelwa edina lange koiwana aishe.’ (Mateus 24:9) Eshi tu li popepi nexulilo, Satana ota ka ningifa oiwana i ulike outondwe wayo wokutonda oshiwana shaJehova. (Hesekiel 38:10-12, 14-16) Osho otashi ka ulika kutya efimbo laJehova lokukatuka onghatu ola fika, ngaashi a ti: “Ame ohandi ke liholola ngaashi Omwene nOmuyapuki moipafi yoiwana ihapu. Ndee vo otava ka shiiva nokutya Aame Omwene.” (Hesekiel 38:23) Kungaha, Jehova ota ka yapulifa edina laye linene nota ka xupifa oshiwana shaye momahepeko. Onghee hano, “omulumenhu omunelao oye ou te lididimikile eshindo.”—Jakob 1:12.
19. Ofimbo twa teelela ‘efiku laKalunga’ linene, otu na okuninga shike?
19 Eshi ‘efiku laKalunga’ linene tali ehene popepi elela, natu hafeni molwaashi otwa ‘talwa twa wana okushekelwa’ edina laJesus. (2 Petrus 3:10-13; Oilonga 5:41) Ngaashi Ovakriste vonale, natu twikileni nope he na ‘okweefa okuudifa evangeli laKristus’ nosho yo epangelo laye lOuhamba fimbo twa teelela ondjabi yetu mounyuni mupe wouyuki waJehova.—Oilonga 5:42; Jakob 5:11.
Okweendulula
• Otashi ti ngahelipi okuhepekelwa ouyuki?
• Omahepeko okwa li a kuma ngahelipi Ovakriste vonale?
• Omolwashike taku dulu okutiwa kutya Eendombwedi daJehova otadi hepekwa ngaashi ovaprofeti vonale?
• Omolwashike hatu dulu ‘okuhafa nokunyakukwa pombada’ omolwokuhepekwa?
[Efano pepandja 28]
“Ovanelao onye, ovanhu ngenge tave mu sheke ndee tave mu taata”
[Efano pepandja 29]
Group in prison: Chicago Herald-American