Shoka sha pumbiwa lela opo tu kale nenyanyu

JEHOVA, ‘Kalunga omunelago,’ naJesus Kristus, “omupangeli awike,” oye shi nawa ashihe shoka sha pumbiwa opo tu kale nenyanyu. (1 Timoteus 1:11; 6:15) Onkee ano, itashi kumitha sho oshipatululo shokumona enyanyu tashi adhika mOohapu dhaKalunga, Ombimbeli.—Ehololo 1:3; 22:7.

Jesus mEuvitho lye lyokOndundu lya tseyika nawa, ota hokolola shoka sha pumbiwa okukala nenyanyu. Ota ti: “Aanelago oyo” mboka (1) ya tseya ompumbwe yawo yopambepo, (2) ya nika uuthigwa, (3) aatalanteni, (4) ya sa ondjala noya sa enota kuuyuuki, (5) aanamutimahenda, (6) ye na oomwenyo dha yogoka, (7) aanambili, (8) taa hepekelwa uuyuuki, na (9) taa shekwa notaa tidhaganwa molwe.—Mateus 5:3-11, yelekanitha NW.a

Oohapu dhaJesus mbela odhoshili?

Uushili woohapu dhimwe dhaJesus inau pumbwa okufatululwa. Olye te ke shi pataneka kutya omuntu ngoka omutalanteni, omunamutimahenda nomunambili ngoka a nwethwa mo komwenyo gwa yogoka ota ka kala a nyanyukwa e vule omuntu ngoka omugeentu, omuundalali nokee na ohenda?

Ihe otashi vulika tatu ipula kutya aantu mboka ya sa ondjala nenota lyuuyuuki nenge mboka ya nika uuthiga otaya vulu ngiini okwiithanwa aanelago. Aantu ya tya ngaaka oye na etaloko li li pandjele lyokutala ko onkalo yuuyuni. Ohaya “fudhaganene nohaa takumine iihuna ayihe hayi hunwa” methimbo lyetu. (Hesekiel 9:4) Iinima mbika kuyo yene hayo tayi ye etele enyanyu. Ihe sho tayi ilongo elalakano lyaKalunga lyokweeta oonkalo dhi li pauyuuki kombanda yevi nokwaamboka ya thininikwa, enyanyu lyawo otali ka kala lyaa shi okuyelekwa nasha.—Jesaja 11:4.

Ohole yokuhola uuyuuki ohayi ningitha wo aantu ya nikile uuthigwa okunyengwa kwawo sho olundji haya nyengwa okuninga shoka shi li mondjila. Onkee ano yo oya tseya ompumbwe yawo yopambepo. Aantu ya tya ngaaka oye na ehalo okukonga ewiliko kuKalunga molwaashoka oya mona kutya oye awike ta vulu okukwathela aantu ya sinde uunkundi wawo.—Omayeletumbulo 16:3, 9; 20:24.

Aantu mboka ya nika uuthigwa, ya sa ondjala nenota lyuuyuuki, naamboka ya tseya ompumbwe yawo yopambepo oya tseya kutya okukala nekwatathano ewanawa nOmushiti okwa simana. Ekwatathano ewanawa naantu otali tu kwathele tu kale nenyanyu, ihe okukala tu na ekwatathano ewanawa naKalunga otashi tu kwathele noonkondo. Eeno, mboka ye hole lela shoka shi li mondjila noye na ehalo okutaamba ko ewiliko lyopakalunga, otaya vulu okwiithanwa shili aanelago.

Otashi vulika u wete oshidhigu okwiitaala kutya ngoka ta hepekwa nota shekwa ota vulu okukala a nyanyukwa. Ihe shika oshoshili, molwaashoka Jesus osho a ti. Onkee ano, oohapu dhe otu na oku dhi uva ko ngiini?

Ya nyanyukwa nonando taya hepekwa—ongiini shika tashi vulika?

Ndhindhilika kutya Jesus ina tya kutya okushekwa nokuhepekwa kwo kwene oko taku eta enyanyu. Okwa ti: “Aanelago oomboka taa hepekelwa uuyuuki . . . ngele taye mu shekele ndje notaye mu tidhagana.” (Mateus 5:10, 11) Onkee ano enyanyu ohali ya po owala ngele omuntu ta shekwa molwaashoka e li omulanduli gwaKristus nomolwaashoka onkalamwenyo ye yi li pamithikampango dhuuyuuki ndhoka Jesus a longo aantu.

Shoka otashi ulikwa kwaashoka sha ningilwa Aakriste yonale. Iilyo yOsanhedrin, ompangu yopombanda yOshijuda, oyi “ithanene mo aayapostoli e taye ya dhenge noye ya indike, yaa tumbule we edhina lyaJesus, noye ya etha.” Mbela aayapostoli oya li yi inyenge ngiini? ‘Oyo sho ya zi mo moshigongi shaakuluntu, oya nyanyukwa, sho ya talwa oyo opala okushekelwa edhina lyaJesus. Noyo inaa etha okulonga omasiku agehe motempeli nomomagumbo noya hokolola evaangeli lyaKristus Jesus.’—Iilonga 5:40-42; 13:50-52.

Omuyapostoli Petrus okwe tu pe uuyelele wa gwedhwa po u na ko nasha nekwatathano pokati kokushekwa nokukala nenyanyu. Okwa nyola a ti: “One ngele tamu shekelwa edhina lyaKristus, one aanelago, oshoka Ombepo yeadhimo noyaKalunga otayi mú lambele.” (1 Petrus 4:14) Eeno, okumona iihuna kwa tya ngaaka u li Omukriste molwaashoka to longo shoka shi li mondjila, nokuli nonando kaku shi oshinima oshiwanawa, ohaku eta enyanyu ndyoka hali zi mokukala u shi kutya oto pewa ombepo ondjapuki yaKalunga. Mbela ombepo yaKalunga oyi na ngiini ekwatathano nokukala nenyanyu?

Mbela iilonga yonyama nenge iiyimati yombepo?

Ombepo ondjapuki yaKalunga ohayi lambele kwaamboka haya vulika kuKalunga e li omupangeli. (Iilonga 5:32) Jehova iha gandja ombepo ye kwaamboka haya longo “iilonga yonyama.” Iilonga mbyoka oyo “oluhondelo, ehulathano, epumpagano, esimaneko lyiimenka, uunganga, etondathano, oontamanana, uukodhi, ondjahi, omakotokelo, omakuthathanopo, iimpaga, efupa, uunkolwi, iituthi yuusiku niikwawo ya fa mbika.” (Aagalati 5:19-21) Oshoshili kutya “iilonga yonyama” oyi igalala noonkondo muuyuni wonena. Niishewe mboka haye yi longo kaye na enyanyu lyashili tali kalelele. Pehala lyaashoka, okulonga iilonga mbyoka ohaku yonagula ekwatathano lyomuntu ewanawa naakwanezimo, ookuume naatseyikile. Kakele kaashono, Oohapu dhaKalunga otadhi ti kutya mboka haya “longo iilonga ya tya ngaaka, itaa ka thigulula oshilongo shaKalunga.”

Mekondjithathano naashoka, Kalunga ombepo ye ohe yi pe mboka hayi imike “iiyimati yombepo.” Iiyimati mbyoka oya kwatela mo omaukwatya ngaka “ohole, enyanyu, ombili, ontalanteni, uukuume [“olukeno”], uuwanawa, uudhiginini [“eitaalo”], engungumano, eidhidhimiko [“eipangelo”].” (Aagalati 5:22, 23, yelekanitha NW.) Ngele tatu ulike omaukwatya ngoka, otatu tungu po onkalo yokukala tu na ekwatathano lyombili nayalwe nosho wo naKalunga, shoka tashi ke tu etela enyanyu lyashili. (Tala oshimpungu.) Sha simana noonkondo osho kutya ngele tatu ulike ohole, olukeno, uuwanawa nomaukwatya galwe gopakalunga, otatu nyanyudha Jehova notatu kala tu na etegameno tali nyanyudha lyomwenyo gwaaluhe muuyuni uupe waKalunga wuuyuuki.

Enyanyu oshinima tashi vulu okuhogololwa

Sho Wolfgang naBrigitte, aaihokani ya kala muNdowishi, ya tameke okukonakona Ombimbeli ya mana mo, oya li ye na iinima oyindji yopamaliko mbyoka aantu haya dhiladhila kutya oyo ya pumbiwa opo omuntu a kale nenyanyu. Oya li aagundjuka natango noye na uukolele. Oya li haya zala oonguwo dhondilo, ya kala megumbo lyo opalekwa nawa niinima yondilo, noya li nongeshefa tayi ende nawa. Oya li ya longitha ethimbo lyawo olindji mokwiikongela iinima oyindji yopamaliko, ihe shoka inashi ye etela enyanyu lyashili. Ihe konima yethimbo, Wolfgang naBrigitte oya ningi ehogololo lya simanenena. Oya tameke okulongitha ethimbo olindji nokuninga oonkambadhala odhindji okulalakanena iinima yopambepo noya kongo omikalo nkene taa hedha popepi naJehova. Ehogololo lyawo olye ya ningitha nziya ya lundulule iikala yawo, shoka she yi inyengitha ya ninge onkalamwenyo yawo yanathangwa nokuninga aakokolindjila nenge aauvithi yevaangeli lyUukwaniilwa yethimbo lyu udha. Monena otaya longo ye li aaiyambi koshitayimbelewa shOonzapo dhaJehova muNdowishi. Kakele kaashono, otayi ilongo elaka lyOshiasia opo ya vule okukwathela aakwiilongo yi ilonge oshili ndjoka tayi adhika mOohapu dhaKalunga, Ombimbeli.

Mbela aaihokani mboka oya li ya mono enyanyu lyashili? Wolfgang ota ti: “Okuza sho twa tameke okulalakanena iinima yopambepo, otwa kala unene twa nyanyukwa notwa li tu uvite twa gwanenwa. Okulongela Jehova nomutima aguhe okwa koleke wo ondjokana yetu. Nonando twa li tu na ondjokana yi na enyanyu nale, otwa li tu na iinakugwanithwa niinima mbyoka ya li ye tu nwetha mo tu kale tu na omalalakano ga yoolokathana. Ngashingeyi otwa hangana sho tatu lalakanene elalakano limwe.”

Oshike sha pumbiwa opo tu kale nenyanyu?

Oku shi ngonga: Yanda “iilonga yonyama” e to kokeke “iiyimati yombepo” yaKalunga. Opo omuntu u kale nenyanyu, owa pumbwa okukala nehalo u kale nekwatathano lyopothingo naKalunga. Omuntu ngoka ta kambadhala okukala e li na, ota ka kala omunelago ngaashi Jesus a ti.

Onkee ano, ino ya pehulithodhiladhilo lya puka kutya ito vulu okukala nenyanyu. Dhoshili, ngashingeyi otashi vulika kuu na uukolele nenge tashi vulika nokuli u na omaupyakadhi mondjokana yoye. Otashi vulika itoo wapa we okumona aanona nenge tashi vulika to kondjo nokumona eithano li na omupondo. Otashi vulika kuu na we iimaliwa oyindji ngaashi nale. Nonando ongaaka, kala u na omukumo. Kapu na nando etompelo okukala waa na etegameno. Epangelo lyUukwaniilwa waKalunga otali ka kandula po omaupyakadhi ngoka nagalwe omathele ogendji. Dhoshili, masiku Jehova Kalunga ota ka gwanitha euvaneko lye ndyoka lya popiwa komupsalmi, tali ti: “Epangelo lyoye otali kala aluhe . . . Oto kamununa eke lyoye e to kutitha [oshishitwa kehe, NW].” (Epsalmi 145:13, 16, OB-1986) Ngaashi aapiya yaJehova omamiliyona muuyuni auhe taya vulu oku shi ulika, okukaleka momadhiladhilo euvaneko ndika lyaJehova tali tsu omukumo otaku ku kwathele unene u kale nenyanyu monena.—Ehololo 21:3.

[Enyolo lyopevi]

[Oshimpungu/Ethano pepandja 6]

Iinima mbyoka tayi eta enyanyu

Ohole ohayi inyengitha yalwe ya kale ye ku hole wo.

Ombili otayi ku kwathele u kaleke ekwatathano lyoye nayalwe kaali na oontamanana.

Ontalanteni otayi ku kwathele okukala wa nyanyukwa nokuli nuuna u li muudhigu.

Olukeno otalu nanene yalwe kungoye.

Uuwanawa mboka to ulikile yalwe otau ke yi inyengitha ye ku kwathele uuna wa pumbwa ekwatho.

Eitaalo otali ku shilipaleke kutya Kalunga ote ku wilike pahole.

Engungumano otali ku etele ombili yopamutima, yopamadhiladhilo noyopalutu.

Eipangelo otali ku kwatha u kale ho ningi omapuko omashona.

[Omathano pepandja 7]

Opo u mone enyanyu, owa pumbwa okupalutha oompumbwe dhoye dhopambepo