Mbela oho tambula ko ekwafo laJehova?

“Omwene Oye omukwafi wange, ame ihandi tila.”—OVAHEBERI 13:6.

1, 2. Omolwashike sha fimana okutambula ko ekwafo newiliko laJehova mokukalamwenyo?

DILADILA ngeno to ende mokandjila ka enda kondudu. Ndele ku li ove auke, molwaashi ope na omuulikili oo ta ende naave, noye te ku pe ewiliko la denga mbada. Oku na owino muhapu nosho yo eenghono dihapu e ku dule, ndele ota ende nelidiiniko e li popepi naave. Okwa didilika kutya oto punduka oikando noikando. Omolweameno loye, ohe ku kwata mokwooko e ku kwafele peenhele odo da nyika oshiponga unene. Mbela oto ka anya okutambula ko ekwafo laye? Hasho nandenande! Eameno loye oli li moshiponga.

² Tu li Ovakriste ohatu ende mondjila idjuu nokweenda nayo. Mbela otu na okweenda ashike ofye atuke mondjila oyo ya finana? (Mateus 7:14) Ahowe, Ombibeli otai tu ulikile kutya Omuwiliki a shiya ko, Jehova Kalunga, oha efa ovanhu va ende naye. (Genesis 5:24; 6:9) Mbela Jehova oha kwafele ovapiya vaye eshi tava ende? Ota ti: “Ame Omwene Kalunga koye handi kwata eke loye lokolulyo, Ame ou handi ku lombwele: Ino kala wa tila Ame ohandi ku kwafa.” (Jesaja 41:13) Ngaashi omuulikili womefaneko letu, Jehova oha kwafele nonghenda ovo va hala okweenda naye noha pange oukaume navo. Doshili, kape na nande oumwe womufye a hala okwaanya ekwafo laye!

3. Ohatu ka kundafaneni omapulo elipi moshitukulwa eshi?

³ Moshitukulwa sha tetekela, okwa li twa kundafana eenghedi nhee omo Jehova a li ha kwafele ovapiya vaye momafimbo onale. Mbela oha kwafele ovapiya vaye meenghedi da faafana kunena? Nongahelipi hatu dulu okushilipaleka kutya ohatu tambula ko ekwafo laye olo te tu pe meenghedi da tya ngaho? Natu kundafaneni omapulo oo. Mokuninga ngaho, ohatu dulu okukala nelineekelo linene kutya Jehova oku li shili Omukwafi wetu.—Ovaheberi 13:6.

Ekwafo lovaengeli

4. Omolwashike ovapiya vaKalunga kunena tava dulu okukala ve na elineekelo kutya ovaengeli otave va yambidida?

⁴ Mbela ovaengeli ohava kwafele ovapiya vaJehova vokunena? Heeno, ohave shi ningi. Doshili, kunena ovaengeli ihava holoka monghedi oyo tava dulu okumonika, opo va xupife ovalongelikalunga vashili moiponga. Nokuli nomomafimbo Ombibeli, omafimbo manini lela ovaengeli va holoka monghedi ya tya ngaho. Luhapu osho va ninga kasha li sha monika nomesho ovanhu, ngaashi ashike shi li kunena. Ndele nande ongaho, ovapiya vaKalunga ova li va tuwa omukumo shili omolwokushiiva kutya ovaengeli ova li ve lilongekida oku va yambidida. (2 Eehamba 6:14-17) Nafye otu na etomheno liwa lokukala tu udite sha faafana.

5. Ombibeli otai ulike ngahelipi kutya ovaengeli ova kwatelwa mo moilonga yokuudifa kunena?

⁵ Ovaengeli vaJehova ove na ko nasha unene noilonga yelikalekelwa oyo nafye twa kwatelwa mo. Oilonga ilipi mbela? Ohatu hange enyamukulo mEhololo 14:6, olo tali ti: “Nda mona omwengeli umwe a tuka pokati keulu ou e kwete evangeli laalushe li nokuudifilwa kombada yedu novapaani aveshe nomapata aeshe nomalaka aeshe noiwana aishe.” “Evangeli laalushe” olo ola pambafana filufilu ‘nevangeli louhamba,’ olo Jesus a xunganeka kutya “otali udifilwa ounyuni aushe li ningile oiwana aishe ondombwedi” fimbo exulilo longhalelo ei yoinima inali uya. (Mateus 24:14) Doshili, ovaengeli ihava udifile ovanhu sha yukilila. Oshilonga osho shinene, Jesus okwe shi pa ovanhu. (Mateus 28:19, 20) Mbela itashi hekeleke okushiiva kutya ohatu wanifa po oshilonga osho nekwafo lovaengeli ovayapuki, oishitwa yopamhepo oinaendunge noi na eenghono?

6, 7. (a) Oshike tashi ulike kutya ovaengeli otava yambidida oilonga yetu yokuudifa? (b) Oshike hatu dulu okuninga opo tu shilipaleke kutya ohatu mono ekwafo lovaengeli vaJehova?

⁶ Ope na oumbangi ukonekwedi kutya ovaengeli otava yambidida oilonga yetu. Pashihopaenenwa, ohatu udu luhapu kutya ofimbo Eendombwedi daJehova di li moukalele ohadi shakeneke oohandimwe ovo va li opo ashike tava ilikana kuKalunga e va kwafele va mone oshili. Oimoniwa ya tya ngaho ohai holoka luhapu neenghono, nomolwaasho itai dulu okutalika ko i li oinima oyo hai ningwa ashike ombadilila. Omolwekwafo lovaengeli la tya ngaho, ovanhu vahapu neenghono otave lihongo okuninga osho ‘omwengeli oo ta tuka pokati keulu’ a ingida a ti: “Tileni Kalunga, nye mu mu fimaneke.”—Ehololo 14:7.

⁷ Mbela owa halelela ekwafo lovaengeli vaJehova ovanaenghono? Ngeenge osho, longa noudiinini moukalele woye. (1 Ovakorinto 15:58) Eshi hatu kufa ombinga nehalo liwa moshilonga osho she likalekelwa osho twa pewa kuJehova, ohatu dulu okukala nelineekelo kutya ovaengeli vaye otave tu kwafele.

Ekwafo okudja komweengeli omukulunhu

8. Jesus oku na ondodo yopombada meulu ilipi, nomolwashike osho tashi tu shilipaleke?

⁸ Jehova okwe tu pa yo oludi limwe lekwafo lomweengeli. Ehololo 10:1 otali hokolola ‘omweengeli omunaenghono’ mukumwifi, oo ‘oshipala shaye sha li sha fa etango.’ Osha yela kutya omweengeli oo womemoniko ota faneke Jesus Kristus a fimanekwa eshi a pewa eenghono meulu. (Ehololo 1:13, 16) Mbela Jesus omweengeli ngoo shili? Heeno, otaku dulu okutiwa ngaho, molwaashi oye omweengeli omukulunhu. (1 Ovatessaloniki 4:16) Jesus oye e na eenghono dinene e dule ovana vaJehova aveshe vakwao vopamhepo. Jehova okwe mu nangeka po a wilike omatanga aYe aeshe ovaengeli. Omweengeli oo omukulunhu oku li shili odjo inene yekwafo. Omeenghedi dilipi mbela?

9, 10. (a) Ongahelipi Jesus ta longo e li “omukwafi” ngeenge twa nyona? (b) Ekwafo lilipi hatu dulu okumona moshihopaenenwa shaJesus?

⁹ Omuyapostoli omunamido Johannes okwa shanga a ti: “Ngenge pe na ou ta nyono, tu nomupopili [“omukwafi,” NW] puTate, Jesus Kristus omuyuki.” (1 Johannes 2:1) Omolwashike Johannes a popya kutya Jesus “omukwafi” wetu unene tuu ngeenge otwa “nyono”? Ohatu nyono keshe efiku, noulunde ohau twala mefyo. (Omuudifi 7:20; Ovaroma 6:23) Ndele Jesus okwa yandja omwenyo waye u li eyambo omolwomatimba etu. Noku li puTate yetu omunanghenda opo a kale te tu popile. Keshe umwe womufye okwa pumbwa ekwafo la tya ngaho. Ongahelipi hatu dulu oku li tambula ko? Otwa pumbwa okulivela ombedi omolwomanyono etu nokupula ediminepo sha kanghamena keyambo laJesus. Otwa pumbwa yo okuhenuka okweendulula omanyono etu.

¹⁰ Kakele koku tu fila, Jesus okwe tu tulila po oshihopaenenwa sha wanenena. (1 Petrus 2:21) Oshihopaenenwa shaye otashi tu wilike, tashi tu kwafele tu ende nondjila oyo tai tu dulifa tu henuke omanyono a kwata moiti notu dule okuhafifa Jehova Kalunga. Mbela inatu hafa eshi tu na ekwafo la tya ngaho? Jesus okwa li a udanekela ovashikuli vaye kutya ote ke va pa omukwafi umwe natango.

Ekwafo lomhepo iyapuki

11, 12. Omhepo yaJehova oshike, oi na eenghono di fike peni, nomolwashike twe i pumbwa kunena?

¹¹ Jesus okwa udaneka a ti: “Ohandi indile Tate, ndele Oye te mu pe Omupopili [“omukwafi,” NW] umwe, a kale punye alushelushe, Oye Omhepo yoshili, ei ounyuni itau dulu oku i tambula.” (Johannes 14:16, 17) “Omhepo yoshili” ile omhepo iyapuki oyo, kai fi omunhu, ndele oyo eenghono—eenghono daJehova mwene tadi longo. Oyo eenghono da shiya ko. Oyo eenghono odo Jehova a longifa mokushita eshito alishe, mokulonga oikumwifilonga inene nosho yo mokuyandja okupitila momamoniko omahololo e na sha nehalo laye. Molwaashi Jehova ita longifa omhepo yaye meenghedi odo dokondadalunde kunena, mbela osho osha hala okutya inatu i pumbwa?

¹² Hasho nandenande! ‘Momafimbo aa madjuu,’ otwa pumbwa omhepo yaJehova shi dulife nale. (2 Timoteus 3:1) Ohai tu pameke tu lididimikile omayeleko. Ohai tu kwafele tu kulike omaukwatya mawa oo tae tu ehenifa popepi elela naJehova nosho yo popepi novamwatate novamwameme vopamhepo. (Ovagalati 5:22) Ndele mbela, ongahelipi hatu dulu okumona ouwa mekwafo olo laJehova likumwifi?

13, 14. (a) Omolwashike hatu dulu okukala noushili kutya Jehova oha yandje nehalo liwa omhepo yaye iyapuki koshiwana shaye? (b) Onghatu ilipi tai dulu okuulika kutya itatu tambula ko shili oshipewa shomhepo iyapuki?

¹³ Shotete, otwa pumbwa okwiilikana tu pewe omhepo iyapuki. Jesus okwa ti: “Nye [ovai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” (Lukas 11:13) Heeno, Jehova oye Tate a denga mbada. Ngeenge otwe mu indile shili meitavelo e tu pe omhepo iyapuki, ita dulu nandenande oku tu anyena oshipewa osho. Hano, epulo ololo kutya: Mbela ohatu i indile tuu? Otu na etomheno liwa okuninga eindilo la tya ngaho momailikano etu akeshe efiku.

¹⁴ Oshitivali, ohatu tambula ko oshipewa osho mokulonga metwokumwe nasho. Oku shi faneka: Natu tye nee Omukriste wonhumba ota kondjifa eamo lokutala omafano oipala. Okwa ilikana opo omhepo iyapuki i mu kwafele a kondjife onghedindjikilile oyo ya nyata. Okwa pula omayele ovakulunhuongalo Ovakriste, nove mu kumaida a katuke eenghatu da kwata moiti, a ha ye nokuli popepi noinima ii ya tya ngaho. (Mateus 5:29) Ongahelipi ngeenge okwe lipwililikile omayele oo ndele ta twikile okukala ha tale oinima ya tya ngaho ngeenge ta yelekwa? Mbela ota longo ngoo metwokumwe nomailikano aye eshi a ilikana opo omhepo iyapuki i mu kwafele? Ile mbela ponhele yaasho, oku li moshiponga shokunyikifa oluhodi omhepo yaKalunga nokukanifa oshipewa osho? (Ovaefeso 4:30) Doshili, atusheni otwa pumbwa okuninga ngaashi hatu dulu opo tu shilipaleke kutya ohatu twikile okumona ekwafo olo laJehova likumwifi.

Ekwafo lEendjovo daKalunga

15. Ongahelipi hatu dulu okuulika kutya inatu tala ko Ombibeli i li oshinima shongaho?

¹⁵ Ombibeli oya kala odjo yekwafo kovapiya vaJehova ovadiinini oule womafelemido. Ponhele yokutala ko Omishangwa Diyapuki di li dongaho, otwa pumbwa okukaleka momadiladilo kutya odi li odjo yekwafo i na eenghono. Okutambula ko ekwafo olo otaku pula eenghendabala. Otwa pumbwa okukala hatu lesha Ombibeli pandjikilile.

16, 17. (a) Ongahelipi Epsalme 1:2, 3 tali hokolola ouwa wokulesha omhango yaKalunga? (b) Ongahelipi Epsalme 1:3 la hokolola efano olo li na eityo loilonga youdiinini?

¹⁶ Epsalme 1:2, 3 otali popi shi na sha nomulumenhu omutilikalunga, tali ti: “Ha hokwa omhango yOmwene noku i diladila omutenya noufiku. Ndele ye ota ka kala ngaashi omuti, ou wa twikwa pomatondokelo omeva ndee tau imifa oiimati yao pefimbo lao, nomafo ao ihaa lembe, naashishe eshi ta ningi, osha fewa.” Mbela ou udite ko eityo leendjovo odo? Oshipu okulesha eendjovo odo ndele hatu uya pexulifodiladilo kutya otadi hokolola efano lihokwifa li na sha nonhele iwa—omuti womudile wa mena popepi nomulonga. Itashi hafifa tuu ngeno okufefeleka po omutenya momuti wa tya ngaho! Ndele epsalme olo itali tu ningifa tu diladile shi na sha nokutulumukwa. Ponhele yaasho, otali hokolola efano olo li na eityo li lili olo tali ladipike oilonga youdiinini. Ngahelipi mbela?

¹⁷ Didilika kutya omuti oo kau fi ashike omuti womudile oo wa mena kuo vene popepi nomulonga. Ou li omuti hau imi oiimati, oo wa “twikwa” owina ponhele ya hoololekeka—“pomatondokelo omeva.” Ongahelipi omuti umwe tau dulu okumena pomatondokelo omeva mahapu? Mwene woshikunino shomiti doiimati otashi dulika a fe omikangha dokutekela opo omidi domiti daye dongushu di mone omeva. Mmh, paife oshitwa otu shi wete nee! Ngeenge meityo lopamhepo ohatu kulu ngaashi omuti oo, oshi li ngaho molwaashi ope na oo e tu kwafela neenghono. Ohatu endafana nehangano olo hali tu etele omeva oshili, ndele otu na okuninga po sha. Otwa pumbwa okunwa omeva oo e na ondilo mokudilonga nokukonga ouyelele wa wedwa po ngaashi tashi pumbiwa, opo tu findile oshili yEendjovo daKalunga momadiladilo nomomitima detu. Monghedi ya tya ngaho, nafye ohatu ka imika oiimati iwa.

18. Oshike sha pumbiwa opo tu mone omanyamukulo okudja mOmbibeli komapulo etu?

¹⁸ Ombibeli itai tu etele ouwa washa ngeenge oya kala i li moshikopa ihai leshwa. Nokai fi oshinima shopaumhulile—osho hatu dulu okufifikina nokupandja pepandja keshe, fye hatu teelele kutya ohatu mona enyamukulo komapulo etu pepandja olo. Ngeenge hatu ningi omatokolo, otwa pumbwa okukonga “eshiivo lokushiiva Kalunga,” twa fa hatu kongo omamona a holekwa. (Omayeletumbulo 2:1-5) Luhapu, okukonga ouyelele, hatu shi ningi nouladi nonoukeka, ohaku kala kwa pumbiwa opo tu mone omayele opamishangwa oo a pamba eemhumbwe detu dokondadalunde. Otu na oishangomwa ihapu ye likolelela kOmbibeli omo hatu dulu okukonga ouyelele. Eshi hatu kongo ounongo oo u li mEendjovo daKalunga twa mana mo, ohatu ka mona shili ouwa mekwafo olo ta yandje.

Ekwafo okupitila movaitaveli vakwetu

19. (a) Omolwashike oitukulwa yomOshungonangelo noyomoAwake! tai dulu okutalika ko i li ekwafo olo la yandjwa okupitila movaitaveli vakwetu? (b) Ongahelipi wa kwafelwa koshitukulwa shonhumba shomoifo yetu?

¹⁹ Ovapiya vopanhu vaJehova ova kala alushe odjo yekwafo kuvakwao. Mbela Jehova okwa lunduluka shi na sha nekwafo olo? Hasho nande. Nope he na omalimbililo, keshe umwe womufye ota dimbuluka eemhito odo a mona ekwafo okudja kovaitaveli vakwao, olo kwa li naanaa a pumbwa nokwe li mona pefimbo la wapala. Pashihopaenenwa, oto dimbuluka mbela oitukulwa yonhumba yomOshungonangelo ile yomoAwake! oyo ye ku hekeleka eshi wa li wa pumbwa ehekeleko ile ye ku kwafela u kandule po oupyakadi wonhumba ile opo u taalele eshongo leitavelo? Jehova okwe ku pa ekwafo olo okupitila ‘momupiya omudiinini nomunaendunge’ oo a tulwa po a kale ta yandje “oikulya pefimbo [la wapala, NW].”—Mateus 24:45-47.

20. Omeenghedi dilipi ovakulunhuongalo Ovakriste hava ulike kutya ove li “eeshali odo di li ovanhu”?

²⁰ Ndele luhapu ekwafo olo hatu mono okudja kovaitaveli vakwetu ohali kala la yukilila lela. Omukulunhuongalo Omukriste otashi dulika a yandje oshipopiwa osho tashi kumu omitima detu ile a ninge etalelepo loufita olo tali tu kwafele momafimbo madjuu ile e tu pe omayele palune oo tae tu kwafele tu mone kutya otu na ounghundi wonhumba notu u kondjife. Omukriste umwe oo e na olupandu okwa shanga shi na sha nekwafo olo a pewa komukulunhuongalo umwe a ti: “Moilonga yomomapya, okwa ladipika nge ndi popye osho handi diladila. Oufiku opo ashike wa di ko, onda li handi ilikana kuJehova, handi mu pula opo ndi mone umwe oo handi dulu okupopya naye. Efiku la landula ko, omumwatate oo okwa popya naame palukeno. Okwa kwafela nge ndi mone nghee Jehova a kala nokukwafela nge oule womido. Ohandi pandula Jehova molwokutumina nge omukulunhuongalo oo.” Meenghedi adishe odo, ovakulunhuongalo Ovakriste otava ulike kutya ove li “eeshali odo di li ovanhu,” odo da yandjwa kuJehova okupitila muJesus Kristus opo ve tu kwafele tu lididimike eshi hatu ende mondjila oyo tai twala komwenyo.—Ovaefeso 4:8, NW.

21, 22. (a) Oidjemo ilipi hai holoka po ngeenge ovo ve li meongalo tava tula moilonga omayele oo e li mOvafilippi 2:4? (b) Omolwashike nokuli noilonga inini yolune tai ti sha?

²¹ Kakele kovakulunhuongalo, Omukriste keshe omudiinini okwa hala okutula moilonga elombwelo olo la nwefwa mo olo tali tu lombwele tu “ha tale keshe tuu osho shaye ashike, ndelenee shamukwao yo.” (Ovafilippi 2:4) Ngeenge ovo ve li meongalo lopaKriste tava tula moilonga omayele oo, oha pa kala oidjemo iwa yoilonga yolune. Pashihopaenenwa, oukwaneumbo umwe owa li wa hangwa koiponga yombadilila ya landulafana. Omushamane okwa li a ya nokamonakadona kofitola. Mokwaalukila keumbo kwavo, ova ya moshiponga shohauto. Okamonakadona oka fya; omushamane okwa li a yahamekwa neenghono. Eshi a dja mo moshipangelo, potete oulema waye kawa li tau mu pitike a dule okulonga sha kuye mwene. Omukainhu waye okwa li a wililwa po unene pamaliudo, nomolwaasho ka li ta dulu oku mu fila oshisho oye aeke. Onghee ovalihomboli vamwe meongalo ova tambula ko meumbo lavo ovalihomboli ovo va li va nyika oluhodi noku va fila oshisho oule woivike.

²² Doshili, hailonga aishe yolune hai longwa omolwoiponga ya tya ngaho nosho yo haaishe hai pula eliyambo la tya ngaho. Ekwafo limwe olo hatu mono ohali kala linini neenghono. Ndele kashi na nee mbudi kutya olune olinini shi fike peni, ohatu li pandula, hasho mbela? Oto dimbuluka mbela efimbo lonhumba olo omumwatate ile omumwameme a popya naave nombili ile e ku pa ekwafo olo kwa li wa pumbwa lela pefimbo olo? Jehova ohe tu file oshisho luhapu meenghedi da tya ngaho.—Omayeletumbulo 17:17; 18:24.

23. Jehova ohe shi tale ko ngahelipi ngeenge hatu ningi eenghendabala okukwafela vamwe?

²³ Mbela owa hala Jehova e ku longife u kale ekwafo kuvamwe? Oufembanghenda oo owe ku yeulukila. Doshili, Jehova oha pandula eenghendabala detu da tya ngaho. Eendjovo daye otadi ti: “Ou ta filonghenda eehepele, ota tulike kOmwene. Ndele Ye ote ke mu alulila oshilonga shaye shiwa.” (Omayeletumbulo 19:17) Ehafo linene ohali di mokuliyamba okukwafela ovamwatate novamwameme. (Oilonga 20:35) Ovo have litongola ko vo vene ihava mono ehafo olo hali di mokuyandja ekwafo la tya ngaho ile etwomukumo olo hali di mokumona ekwafo la tya ngaho. (Omayeletumbulo 18:1) Onghee hano, natu kale ovadiinini mokukala hatu i kokwoongala kwopaKriste opo tu dule okutwaafana omukumo.—Ovaheberi 10:24, 25.

24. Omolwashike tu he na okukala tu udite twa fa tu he na ekwafo lasha molwokuhamona oikumwifilonga yaJehova inene yomonakudiwa?

²⁴ Kashi hafifa mbela okudiladila shi na sha neenghedi omo Jehova he tu kwafele? Nonande katu li pefimbo olo Jehova ta longo oikumwifilonga inene opo a wanife po omalalakano aye, katu na okukala tu udite twa fa tu he na ekwafo lasha. Osho shi na oshilonga unene osho kutya Jehova ohe tu pe ekwafo keshe twa pumbwa opo tu kale ovadiinini. Nongeenge otwe lididimikeni atusheni meitavelo, ohatu ka mona oilonga yaJehova oyo ikumwifi noinene mondjokonona aishe ku he na vali! Natu kale twa tokola toko okutambula ko nokulongifa omafiloshisho aeshe aJehova opahole, opo tu dule okupopya eendjovo domushangwa wetu womudo 2005, odo tadi ti: “Ekwafo lange otali di [kuJehova, NW].”—Epsalme 121:2.

Oto ti ngahelipi?

Ongahelipi Jehova ha yandje ekwafo olo twa pumbwa kunena—

• okupitila movaengeli?

• okupitila momhepo iyapuki?

• okupitila mEendjovo daye da nwefwa mo?

• okupitila movaitaveli vakwetu?

[Efano pepandja 15]

Otashi tu omukumo okushiiva kutya ovaengeli otava yambidida oilonga yokuudifa

[Efano pepandja 17]

Jehova otashi dulika a longife umwe womovaitaveli vakwetu oku tu hekeleka nehekeleko olo twa pumbwa