Onghandangala oyo ovaengeli tava dana mokukalamwenyo kwovanhu

“Konima yaashi onda mona omwengeli umwe a kuluka meulu, e nepangelonghono linene . . . Ndele ye okwa ingida nondaka inene ta ti: Sha teka po, sha teka po, Babilon, Oshilando shinene.” — EHOLOLO 18:1, 2.

1, 2. Oshike tashi ulike kutya Jehova oha longifa ovaengeli mokuwanifa po ehalo laye?

OFIMBO omuyapostoli omunamido Johannes a li moupongekwa konhunhu yaPatmos, okwa li a pewa emoniko lopaxunganeko. Okwa li a twalwa “mefiku lOmwene” okupitila “mOmhepo” ndele ta ulikilwa oiningwanima itunhula. Efiku olo ola hovela mo 1914, eshi Jesus Kristus a nangekwa po e li ohamba meulu, notali ka xula po pexulilo lepangelo laye lomido eyovi. — Ehololo 1:10.

² Jehova Kalunga ka li a yandja ehololo olo odikilila kuJohannes. Ehololo 1:1 ola ti: “Ehololo laJesus Kristus, eli Kalunga e li mu pa okuulikila ovapiya vaye ei i nokuningwa diva. Jesus okwe i shiivifila Johannes, omupiya waye nokutuma omwengeli waye kuye.” Jehova okwa li a longifa omweengeli okupitila muJesus, opo a shiivifile Johannes oiningwanima ikumwifi oyo ya li tai ka ningwa “mefiku lOmwene.” Pomhito imwe, Johannes okwa li a “mona omwengeli umwe a kuluka meulu, e nepangelonghono linene.” Mbela omweengeli oo okwa li a pewa oshinakuwanifwa shashike? Omweengeli oo okwa li a “ingida nondaka inene ta ti: Sha teka po, sha teka po, Babilon, Oshilando shinene.” (Ehololo 18:1, 2) Omweengeli oo omunaenghono okwa li a pewa oufembanghenda wokushiivifa etekepo laBabilon Shinene, ouhamba womounyuni womalongelokalunga oipupulu. Nopehe na omalimbililo, Jehova oha longifa ovaengeli mokuwanifa po ehalo laye. Fimbo inatu konakona moule onghandangala ya fimana oyo ovaengeli hava dana mokuwanifwa kwelalakano laKalunga nosho yo nghee osho she tu kuma, natu ka konakoneni tete kutya ovaengeli ova dja peni.

Ovaengeli ova dja peni?

3. Eudeko la puka lilipi ovanhu vahapu ve na shi na sha novaengeli?

³ Kunena, ovanhu omamiliyona ova itavela kutya ovaengeli oko ve li. Ndele ovanhu vahapu kave shii lela kutya ovaengeli ova dja peni nonokutya ohava dana onghandangala ilipi. Pashihopaenenwa, ovanhu vamwe vomomalongelokalunga ohava diladila kutya ngeenge omuholike wavo a fya oha i meulu, omo ha ka ninga omweengeli. Mbela Eendjovo daKalunga osho tadi hongo ngaho shi na sha nokushitwa kwovaengeli, okukala po kwavo nosho yo elalakano lavo?

4. Ombibeli oya ti ovaengeli ova dja peni?

⁴ Omweengeli omukulunhu, oo e na eenghonopangelo dinene e dule vakwao, oha ifanwa Mikael. (Judas 9) Omweengeli oo Mikael oJesus Kristus. (1 Ovatessaloniki 4:16) Omido dihapuhapu da pita, eshi Jehova a li a lalakanena okukala Omushiti, okwa li a shita tetetete Omona waye e li omweengeli. (Ehololo 3:14) Konima yefimbo, Jehova okwa li a shita oishitwa aishe ikwao yopamhepo okupitila mOmona waye, omudalwa wotete. (Ovakolossi 1:15-17) Jehova okwa li ta popi shi na sha noishitwa oyo yopamhepo eshi a li a pula tatekulululwa Job, a ti: “Ove wa li peni, eshi nda shita edu? Lombwele nge, ngenge u neshiivo. . . . Olyelye a dika emanya lokolonela yalo? Eenyofi dongula eshi da hafa mumwe novana aveshe ovamati vaKalunga va nyakukwa?” (Job 38:4, 6, 7) Hano, osha yela kutya ovaengeli ove li oishitwa yaKalunga nova kala ko okudja nalenale, ofimbo ovanhu va li inava shitwa.

5. Ovaengeli ova unganekwa ngahelipi?

⁵ Ovakorinto votete 14:33 otava ti: “Kalunga Ye ke fi Kalunga kedongakano, ndelenee okombili.” Nomolwaasho, Jehova okwa unganeka ovanamati vaye vopamhepo meengudu nhatu: (1) ovaserafi, ovo hava yakula komesho yolukalwapangelo laye, hava hepaulula ouyapuki waye nohava kaleke oshiwana shaye sha koshoka pamhepo; (2) ovakerubi, ovo hava popile ounamapangelo waJehova; nosho yo (3) ovaengeli vakwao ovo hava wanifa po ehalo laye. (Epsalme 103:20; Jesaja 6:1-3; Hesekiel 10:3-5; Daniel 7:10) Eenghedi dimwe dilipi omo oishitwa oyo yopamhepo hai dana onghandangala mokukalamwenyo kwovanhu? — Ehololo 5:11.

Ovaengeli ohava dana onghandangala ilipi?

6. Jehova okwa li a longifa ngahelipi ovakerubi shi na sha naasho sha li sha holoka po moshikunino shaEden?

⁶ Ovaengeli ova tumbulwa oshikando shotete mOmbibeli muGenesis 3:24, omo hatu lesha taku ti: “[Jehova okwa] taata omunhu ndele okwa tula ovakerubi koushilo woshikunino shaEden, ve nomaongamukonda a xwama omundilo taa taima, vo va kelele omhito yokuya komuti womwenyo.” Ovakerubi ovo ova li va kelela Adam naEva vaha ye vali moshikunino shaEden, omo va li hava kala potete. Osho osha li sha ningwa pehovelo londjokonona yovanhu. Mbela okudja opo ovaengeli ova kala tava dana onghandangala ilipi?

7. Eityo loshitya “omweengeli” otali holola ngahelipi onghandangala oyo hai danwa kovaengeli?

⁷ Ovaengeli ova tumbulwa mOmbibeli lwoikando 400 lwaapo. Oshitya shOshiheberi noshOshigreka osho tashi ti “omweengeli” otashi dulu yo okutolokwa “omutumwa.” Kalunga okwa kala ha popi novanhu okupitila movaengeli, ovo ve li ovatumwa vaye. Ngaashi sha tumbulwa nale moutendo vavali vopehovelo, Jehova okwa li a longifa omweengeli waye okushiivifila omuyapostoli Johannes etumwalaka laYe.

8, 9. (a) Omatalelepo omweengeli okwa li a kuma ngahelipi Manoah nomwalikadi waye? (b) Ovadali otave lihongo shike meenghundafana odo da li pokati kaManoah nomweengeli waKalunga?

⁸ Kalunga okwa li yo a longifa ovaengeli vaye va kwafele nokutwa omukumo ovapiya vaye vokombada yedu. Pashihopaenenwa, diladila koshiningwanima shimwe osho sha li sha ningwa pefimbo lOvatokolipangeli muIsrael. Manoah nomwalikadi waye, oo a li ongadji, ova li va halelela okumona okaana. Jehova okwa li a tuma omweengeli waye opo a shiivifile omwalikadi waManoah kutya ota ka dala okaana okamati. Omushangwa otau tu lombwele tau ti: “Tala, ove oto ka ninga oufimba nokudala okaana okamati, noshimbi shi ha kume omutwe waye. Osheshi omona omumati ta ka kala omunasiri waKalunga nge e li medimo laina, ndele ye ota ka hovela okuxupifa Israel momake ovafilisti.” — Ovatokolipangeli 13:1-5.

⁹ Konima yefimbo, omwalikadi waManoah okwa ka dala okaana okamati nokwe ka luka Simson, oo a ka kala a tumbala mondjokonona yOmbibeli. (Ovatokolipangeli 13:24) Ofimbo okaana inaka dalwa, Manoah okwa li a ilikana kuJehova, opo omweengeli a aluke vali e va lombwele nhumbi okaana ke na okutekulwa. Eshi omweengeli a aluka, Manoah okwe mu pula a ti: “Omona ota ka kalwa ngahelipi naye, ta tekulwa ngahelipi?” Omweengeli okwa li a endulula omalombwelo oo kwa li a lombwela omwalikadi waManoah. (Ovatokolipangeli 13:6-14) Osho kasha li tuu sha twa Manoah omukumo! Kunena ovaengeli ihava talele po ovanhu odikilila ngaashi va li have shi ningi nale, ndele ngaashi Manoah, ovadali otava dulu okutula moilonga omayele aJehova e na sha nokutekula ovana vavo. — Ovaefeso 6:4.

10, 11. (a) Eshi Elisa nomupiya waye va li va kondekelwa muDotan ketangakwaita lOvaarami, ova li ve linyenga ngahelipi? (b) Ouwa ulipi hatu ka mona mokudilonga koshiningwanima osho?

¹⁰ Pefimbo lomuprofeti Elisa opa li pa ningwa oshiningwanima shikumwifi shi na sha nanghee ovaengeli hava kwafele ovapiya vaKalunga. Elisa okwa li ha di moshilando shedina Dotan, muIsrael. Efiku limwe eshi omupiya waElisa a penduka ongula inene ndele ta tale pondje, okwa mona kutya oshilando omo va li osha li sha dingililwa kovakwaita va londa keenghambe nomatemba oita. Etangakwaita olo enaenghono ola li la tumwa kohamba yOvaarami (Ovasiria) li ka kwate po Elisa. Omupiya waElisa okwa li e linyenga ngahelipi? Okwa li a tila neenghono, tashi dulika a li a lyalyakana nokuli, ndele ta ingida mokule a ti: “Akutu omwene wange, ohatu ningi ngahelipi?” Okwa li ta diladila kutya kave na apa tava xupile. Ndele Elisa okwe mu lombwela a ti: “Ino tila. Osheshi ava ve li pufye ovahapu, ve dule venya ve li puvo.” Elisa okwa li a hala okutya shike eshi a popya eendjovo odo? — 2 Eehamba 6:11-16.

¹¹ Elisa okwa li e wete ongudu yovaengeli ovo va li ve uya oku mu kwafela, ndele omupiya waye ka li e wete sha. Onghee hano, “Elisa okwa indila ndee ta ti: Omwene, pashukifa omesho aye, opo a mone ko. NOmwene okwa pashukifa omesho omupiya waye, ndee ta mono ko, ndele divadiva, omhunda aishe [oya li] i yadi eenghambe nomatemba omundilo, a dingilila Elisa.” (2 Eehamba 6:17) Kungaho, omupiya waElisa okwa li a mona ongudu yovaengeli oyo ya li ye uya oku va amena. Nafye ohatu dulu okumona nomesho etu eitavelo nghee ovaengeli tave tu yambidida noku tu amena koshi yewiliko laJehova nolaJesus.

Nghee ovaengeli va li va kwafela ovapiya vaKalunga pefimbo laJesus

12. Maria okwa li a pamekwa ngahelipi komweengeli Gabriel?

¹² Diladila kunghee okakadona Okajuda Maria ka li ka kumwa eshi ka li ka lombwelwa taku ti: “Ove to ningi omufimba ndee to dala okamati, ndee to ka luku edina lako Jesus.” Ofimbo omweengeli Gabriel, oo a li a tumwa kuKalunga, ina lombwela Maria eendjovo odo ditunhula, okwa li e mu lombwela tete a ti: “Maria, ino tila, osheshi ove wa mona onghenda kuKalunga.” (Lukas 1:26, 27, 30, 31) Maria ka li tuu a tuwa omukumo nokupamekwa keshilipaleko olo kutya okwa li a hokiwa kuKalunga!

13. Ovaengeli ova li va kwafela ngahelipi Jesus?

¹³ Jesus naye okwa li a kwafelwa kovaengeli konima eshi a li a yelekwa kuSatana lwoikando itatu mombuwa. Konima yokuyelekwa kwaJesus, “Satana okwe mu efa ndele tala, ovaengeli ve uya kuye, ve mu yakula.” (Mateus 4:1-11) Jesus okwa li natango a kwafelwa komweengeli moufiku oo wa tetekela okufya kwaye. Molwaashi Jesus okwa li a nyika oluhodi, okwa twa eengolo ndele ta ilikana ta ti: “Tate, ngenge wa hala kufe nge eholo eli, ndele hahalo lange, ndelenee oloye. Nomwengeli womeulu e mu holokela ndele te mu dike eenghono.” (Lukas 22:42, 43) Mbela ovaengeli ohave tu kwafele ngahelipi kunena?

Nghee ovaengeli hava kwafele ovapiya vaJehova vokunena

14. Eendombwedi daJehova oda li da pita momahepeko a tya ngahelipi, noshidjemo osha li shike?

¹⁴ Ngeenge hatu tale kondjokonona yoilonga yokuudifa yokunena yEendombwedi daJehova, mbela katu wete oumbangi oo tau ulike kutya otai yambididwa kovaengeli? Pashihopaenenwa, oshiwana shaJehova osha li she lididimikila omaponokelo epangelo laNazi muNdowishi nosho yo moilongo ikwao yokouninginino waEuropa, oo a ningwa komesho nosho yo pefimbo lOita itivali yOunyuni (oyo ya li ya luwa 1939-1945). Oshiwana shaJehova osha li yo she lididimikila omahepeko efimbo lile koItalia, koSpania nosho yo koPortugal, pefimbo lomapangelo okakombo noludi noukanyamukulwa oo a li taa wilikwa kongeleka yaKatolika. Oshiwana shaJehova osha li yo she lididimikila omahepeko oule womido omilongo moSoviet Union shonale nosho yo moitukulwalongo oyo ya li koshi yepangelo lasho. Eendombwedi oda li yo de lididimikila omahepeko moilongo imwe yomuAfrika.a Omido opo da di ko, ovapiya vaJehova muGeorgia ova li va hepekwa nonyanya. Satana okwa kala ta kendabala neenghono okuxulifa po oilonga yEendombwedi daJehova, ndele ina dula oku i xulifa po. Oshiwana shaJehova osha xupa momahepeko a tya ngaho notashi twikile okuxuma komesho. Nopehe na omalimbililo, ovaengeli ova dana onghandangala mokwaamena oshiwana shaJehova. — Epsalme 34:8; Daniel 3:28; 6:23.

15, 16. Eendombwedi daJehova ohadi kwafelwa ngahelipi kovaengeli moilonga yado yokuudifa yomounyuni aushe?

¹⁵ Eendombwedi daJehova mounyuni aushe oda diinina oilonga yado yokuudifa onghundana iwa yOuhamba waKalunga noyokuninga ovanhu ovahongwa keshe pamwe mokuhonga ovo ve na ohokwe oshili yOmbibeli. (Mateus 28:19, 20) Ndele nande ongaho, odi shi shii kutya itadi dulu okulonga oshilonga osho nopehe na ekwafo lovaengeli. Onghee hano, osho sha popiwa komuyapostoli Johannes mEhololo 14:6, 7 oshi li odjo inene yetwomukumo kudo. Omuyapostoli oo okwa ti: “Nda mona omwengeli umwe a tuka pokati keulu ou e kwete evangeli laalushe li nokuudifilwa kombada yedu novapaani aveshe nomapata aeshe nomalaka aeshe noiwana aishe. Nokwa popya nondaka yomokule: Tileni Kalunga, nye mu mu fimaneke, osheshi efimbo letokolo laye ole uya; linyongameneni ou a shita eulu nedu nefuta needjo domeva.”

¹⁶ Eendjovo odo otadi ulike shili kutya oilonga inene yokuudifa yEendombwedi daJehova yomounyuni aushe otai yambididwa nokuwilikwa kovaengeli. Jehova oha longifa ovaengeli mokuyukifa ovanamitimadiwa koshiwana shaye. Ovaengeli ohava yukifa yo Eendombwedi di ye kwaavo va halelela okushiiva oshili. Eendombwedi daJehova ohadi shakeneke luhapu ovanhu ovo ve li meenghalo didjuu notava kongo ekwafo lopamhepo. Oushili oo kutya oimoniwa ya tya ngaho ohai holoka luhapu otau ulike kutya ihai ningwa ashike ombadilila, ndele osha yela kutya ohadi wilikwa kovaengeli.

Onghandangala ikumwifi oyo ovaengeli tava ka dana monakwiiwa i li popepi

17. Oshike sha li sha ningwa po shi na sha nOvaassiria eshi va li va katukilwa onghatu komweengeli umwe aeke?

¹⁷ Kakele kokulonga ve li ovatumwa nosho yo ekwafo tali pameke kovapiya vaJehova, ovaengeli ohava dana yo onghandangala vali imwe i lili melalakano laJehova. Mefimbo la pita, ova li hava wanifa po omatokolo aKalunga. Pashihopaenenwa, nale mefelemudo etihetatu K.O.P., Jerusalem osha li sha kondekwa ketangakwaita linene laAssiria. Jehova okwa li a ninga po shike? Okwa ti: “Ame ohandi ka amena oshilando eshi, ndi shi xupife omolwange mwene nomolwomupiya wange David.” Ombibeli oya weda ko ya ti: “Oufiku tuu winya omwengeli wOmwene e uya nokwa dipaa monhanda yOvaassiria ovalumenhu 185, 000. Nongula eshi kwa sha ndele va penduka, aveshe va li oimhu i he nomwenyo.” (2 Eehamba 19:34, 35) Omatangakwaita opanhu oku dulike eenghono filufilu komweengeli umwe aeke.

18, 19. Onghandangala ikumwifi ilipi ovaengeli tava ka dana monakwiiwa i li popepi, naasho otashi ka kuma ngahelipi ovanhu?

¹⁸ Monakwiiwa i li popepi, ovaengeli otava ka longifwa kuJehova okuwanifa po etokolo laye. Ovatessaloniki ovativali 1:7, 8 ova ti kutya Jesus ote ke uya “pamwe novaengeli vaye ovanaenghono, omomalaka omundilo” opo va “handukile ava inava shiiva Kalunga noitava dulika kevangeli lOmwene wetu Jesus.” Heeno, ovo inava hala okudulika konghundana iwa yOuhamba waKalunga oyo tai udifwa kunena mounyuni aushe, otava ka hanaunwa po. Ndele ovo hava kongo Jehova nohava kongo ouyuki nosho yo elininipiko otava ka “amenwa mefiku lehandu lOmwene.” — Sefanja 2:3.

¹⁹ Otwa hafa eshi Jehova ha longifa ovaengeli vaye ovanaenghono opo ve tu yambidide noku tu pameka tu li oshiwana shaye. Okukala tu shii onghandangala oyo ovaengeli tava dana melalakano laKalunga otashi tu hekeleke, molwaashi ope na ovaengeli vamwe ovo va tukululila Jehova oshibofa, ovo tava wilikwa kuSatana. Oshitukulwa tashi landula otashi ka kundafana eenghatu odo Ovakriste vashili ve na okukatuka opo ve liamene kenwefemo li na eenghono laSatana Ondiaboli neendemoni daye.

[Eshangelo lopedu]

Owe li honga shike?

• Ovaengeli ova dja peni?

• Ovaengeli ova li va longifwa ngahelipi pefimbo lOmbibeli?

• Ehololo 14:6, 7 otali holola shike shi na sha naasho ovaengeli tava longo kunena?

• Onghandangala ikumwifi ilipi ovaengeli tava ka dana monakwiiwa i li popepi?

[Efano pepandja 13]

Manoah nomwalikadi waye ova li va tuwa omukumo komweengeli

[Efano pepandja 15]

“Ava ve li pufye ovahapu, ve dule venya ve li puvo”