Eendjovo daKalunga nadi kale ouyelele mondjila yoye
‘Ondjovo yoye oyo ouyelele mondjila yange.’—EPSALME 119:105.
1, 2. Ongahelipi eendjovo daJehova tadi dulu okukala ouyelele mondjila yetu?
EENDJOVO daJehova otadi ka kala ouyelele mondjila yetu ngeenge otwa efa di tu minikile. Opo tu mone ouwa mouyelele wopamhepo wa tya ngaho, otu na okukala ovakonakoni ovaladi vEendjovo daKalunga da shangwa nokutula moilonga omayele ado. Kungaha, opo ashike hatu dulu okukala tu udite ngaashi omupsalme oo a ti: “Ondjovo yoye oyo olamba yeemhadi dange, nouyelele mondjila yange.”—Epsalme 119:105.
2 Paife natu konakoneni Epsalme 119:89-176. Eevelishe odo da unganekwa moutendo 11, kadi na tuu ouyelele muhapu! Otadi dulu oku tu kwafela tu kale mondjila oyo tai twala komwenyo waalushe.—Mateus 7:13, 14.
Omolwashike tu na okukala twa hokwa eendjovo daKalunga?
3. Ongahelipi Epsalme 119:89, 90 tali ulike kutya ohatu dulu okulineekela meendjovo daKalunga?
3 Okuhokwa eendjovo daJehova ohaku pameke pamhepo. (Epsalme 119:89-96) Omupsalme okwa imba a ti: “Fiyo alushe, Omwene, ondjovo yoye tai kala ya pama momaulu. . . . Ove wa dika edu, ndele olo li li po la dikika.” (Epsalme 119:89, 90) Paendjovo daKalunga—‘eemhango daye deulu’—omaminikilo okeulu ohaa ende meendjila dao nope he na okuyapuka mo, nedu ola dikikika fiyo alushe. (Job 38:31-33; Epsalme 104:5) Ohatu dulu okulineekela keshe ondjovo oyo tai di mokanya kaJehova; kutya osho a tonga otashi ka ‘wanifwa’ metwokumwe nelalakano laye.—Jesaja 55:8-11.
4. Okuhokwa eendjovo daKalunga ohaku kwafele ngahelipi ovapiya vaye ovo tava hepekwa?
4 Omupsalme ngeno ‘okwa fya komahepeko ngeno ka li a hokwa omhango yaKalunga.’ (Epsalme 119:92, OB-1986) Ka li ta hepekwa kovanailongo, ndele okovanyoni vomhango Ovaisrael ovo va li ve mu tonde. (Leviticus 19:17) Ndele osho kasha li she mu wilila po, molwaashi okwa li e hole omhango yaKalunga oyo hai pameke. MuKorinto, omuyapostoli Paulus okwa li ‘moudjuu mokati kovamwaxe ovanaihelele,’ tashi dulika mwa li mwa kwatelwa ‘ovayapostoli venya vanene,’ ovo va li va hala oku mu lundila. (2 Ovakorinto 11:5, 12-14, 26) Ndele nande ongaho, Paulus okwa xupa pamhepo molwaashi okwa li a hokwa eendjovo daKalunga. Molwaashi otwa hokwa Eendjovo daJehova da shangwa nohatu tula moilonga osho tadi ti, otu hole ovamwatate. (1 Johannes 3:15) Nokuli noutondwe wounyuni itau tu dimbwifa omahongo aKalunga. Ohatu twikile okulonga ehalo laye moukumwe wopahole pamwe novamwatate, ofimbo twa teelela oku mu longela nehafo fiyo alushe.—Epsalme 119:93.
5. Ohamba Asa oya konga Jehova ngahelipi?
5 Mokuulika kutya otwe liyandjela Jehova, ohatu dulu okwiilikana ngaashi omupsalme a ilikana a ti: “Aame owoye, xupife nge! Osheshi ohandi kongo omalombwelo oye.” (Epsalme 119:94) Ohamba Asa oya konga Kalunga noya xulifa po oushunimonima muJuda. Poshoongalele shinene osho sha li sha ningwa momudo omuti-15 wokupangela kwaAsa (963 K.O.P.), ovakalimo vomuJuda ova “ninga ehangano nokutya, va konge Omwene.” Kalunga “okwe ve lihololela,” nokwe “va pa etulumuko keembinga adishe.” (2 Omafimbo 15:10-15) Oshihopaenenwa osho oshi na okuladipika keshe oo a twalwatwalwa kokule neongalo lopaKriste a konge vali Kalunga. Kalunga ota ka nangeka noupuna nokwaamena ovo tava hovele okweendafana vali noshiwana shaye.
6. Okukatuka onghatu ilipi taku tu amene koiponga yopamhepo?
6 Eendjovo daJehova ohadi yandje ounongo oo tau dulu oku tu amena koiponga yopamhepo. (Epsalme 119:97-104) Oipango yaye ohai tu nongopaleke tu dule ovatondi vetu ounongo. Okupwilikina komahepaululo aye otaku tu pe eendunge, ‘nokudiinina omalombwelo aye otaku tu dulifa tu kale nomayele tu dule ovaxungu.’ (Epsalme 119:98-100) Ngeenge omaudaneko aJehova okwa kala ‘manyenye moshihokohoko shokanya ketu e dule omaadi eenyiki,’ ohatu ka tonda nokuhenuka “keshe ondjila yoipupulu.” (Epsalme 119:103, 104, yelekanifa OB-1954.) Osho otashi ke tu amena koiponga yopamhepo eshi hatu shakeneke ovahenakalunga ovalinenepeki novakwanyanya momafiku aa axuuninwa.—2 Timoteus 3:1-5.
Olamba yeemhadi detu
7, 8. Opo tu kale metwokumwe nEpsalme 119:105, otwa pumbwa okuninga shike?
7 Eendjovo daKalunga odo odjo youyelele wopamhepo oo u shii alushe okulineekelwa. (Epsalme 119:105-112) Kutya nee otu li Ovakriste ovavaekwa ile otu li oovakwao ‘veedi dimwe,’ ohatu popi hatu ti: “Ondjovo yoye oyo olamba yeemhadi dange, nouyelele mondjila yange.” (Johannes 10:16, OB-1954; Epsalme 119:105) Eendjovo daKalunga oda fa olamba oyo tai minikile ondjila yetu, opo tu ha punduke pamhepo. (Omayeletumbulo 6:23) Ndele otu na okweefa pauhandimwe eendjovo daJehova di kale olamba yeemhadi detu.
8 Otu na okukala twa tokola toko ngaashi omushangi wEpsalme 119. Okwa li a tokola toko a ha efe po omalombwelo aKalunga. Okwa ti: “Onda ana, ndee ohandi limangele mo, nokutya momayukifo oye [aJehova] mayuki ohandi anyene mo.” (Epsalme 119:106) Inatu dina nandenande ouwa wokukonakona Ombibeli ondjikilile nokukufa ombinga pokwoongala kwOpakriste.
9, 10. Otu shi shii ngahelipi kutya oohandimwe ovo ve liyapulila Jehova otava dulu ‘okupuka momalombwelo aye,’ ndelenee ongahelipi eshi tashi dulu okuhenukwa?
9 Omupsalme ina ‘puka mo momalombwelo aKalunga,’ ndele osho otashi dulu okuningilwa omunhu oo e liyapulila Jehova. (Epsalme 119:110) Ohamba Salomo oya li ya puka, nonande oya li oshilyo shoshiwana osho sha yapulilwa Jehova noya li ya katuka paunongo oo wa dja kuKalunga pehovelo lokupangela kwayo. “Ovalikadi ovanailongo ve mu nyonifa” moku mu nwefa mo a longele oikalunga.—Nehemia 13:26; 1 Eehamba 11:1-6.
10 ‘Omuteli womwiyo,’ Satana, ota tele eemwiyo dihapu. (Epsalme 91:3) Pashihopaenenwa, umwe oo a li omulongelikalunga nale otashi dulika a kendabale oku tu heka tu puke mo mondjila youyelele wopamhepo tu ye momilaulu doushunimonima. Mokati kOvakriste vokuTiatira, omwa li ‘omukainhu Isabel,’ tashi dulika ongudu yovakainhu oyo ya li tai hongo vamwe okulongela oikalunga nokuya moluhaelo. Jesus ka li e lipwililikila owii wa tya ngaho; nafye katu na yo oku u lipwililikila. (Ehololo 2:18-22; Judas 3, 4) Onghee hano, natu ilikaneni hatu pula ekwafo laJehova opo tu ha puke mo momalombwelo aye ndele tu kale mouyelele oo tau di mEendjovo daKalunga.—Epsalme 119:111, 112.
Ohatu pamekwa keendjovo daKalunga
11. PaPsalme 119:119, Kalunga oha tale ko ngahelipi ovakolokoshi?
11 Ngeenge itatu yapuka mo meenghedimhango daKalunga, ote ke tu pameka. (Epsalme 119:113-120) Ihatu pande ‘ava ve na omitima mbali,’ ngaashi ashike Jesus ina panda ovo tave liti Ovakriste kunena, ndele ova lomoka. (Epsalme 119:113; Ehololo 3:16) Molwaashi ohatu longele Jehova nomutima aushe, oku li ‘eameno letu’ note ke tu pameka. Ota ka ‘ekelashi aveshe ava tava tekuka meenghedimhango daye’ mokuliefela moukengeleledi nomoipupulu. (Epsalme 119:114, 117, 118; Omayeletumbulo 3:32) Oha tale ko ovakolokoshi va tya ngaho ve li ngaashi “omange”—oyeekelwashi oyo hai kufwa moivela i na ondilo ngaashi oshisiliveli noshingoldo. (Epsalme 119:119, OB-1986; Omayeletumbulo 17:3) Natu kale alushe hatu ulike ohole yokuhola omahepaululo aKalunga, molwaashi inatu hala tu ka hanaunwe po pamwe novakolokoshi.
12. Omolwashike sha fimana okutila Jehova?
12 Omupsalme okwa ti: “Olutu lange otali kakama molwoutile [wokutila Jehova].” (Epsalme 119:120) Okukala kwetu tu na etilokalunga lashili tali ulikwa mokuhenuka osho ina hokwa, okwa fimanenena opo e tu pameke tu li ovapiya vaye. Etilofimaneko lokutila Jehova ola ningifa Job a kale omuyuki monghalamwenyo yaye. (Job 1:1; 23:15) Etilokalunga otali tu dulifa tu diinine onghatu ya hokiwa kuKalunga kashi na nee mbudi kutya otu na okulididimikila shike. Elididimiko otali pula okwiilikana neitavelo twa mana mo.—Jakob 5:15.
Natu ilikane neitavelo
13-15. (a) Omolwashike hatu dulu okukala neitavelo kutya omailikano etu otaa ka nyamukulwa? (b) Oshike tashi dulu okuningwa po ngeenge katu shii eshi tu na okutya meilikano? (c) Yelifa nghee Epsalme 119:121-128 tali dulu okukala la pambafana ‘nomikemo detu di he fi kutumbulwa’ meilikano.
13 Ohatu dulu okwiilikana tu na eitavelo kutya Kalunga ota ka katuka onghatu molwetu. (Epsalme 119:121-128) Ngaashi omupsalme, nafye otu na elineekelo kutya omailikano etu otaa ka nyamukulwa. Omolwashike mbela? Omolwaashi otu hole oipango yaKalunga “komesho yoingoldo noingoldoelela.” Kakele kaasho, ‘ohatu tale ko omalombwelo aeshe aKalunga e na sha noinima aishe a yuka.’—Epsalme 119:127, 128.
14 Jehova oha udu omailikano etu molwaashi ohatu ilikana meitavelo nohatu dulika yo filufilu komalombwelo aye. (Epsalme 65:3) Ndele ongahelipi ngeenge omafimbo amwe otu na omaupyakadi oo taa limbililike ndele katu shii osho tu na okutya meilikano? Ngeenge osho osha ningwa, ‘omhepo oyo vene tai tu ilikanene nomikemo di he fi kutumbulwa.’ (Ovaroma 8:26, 27) Pomafimbo a tya ngaho, Kalunga oha tambula ko omapopyo oo e li mEendjovo daye e li omailikano e na sha neemhumbwe detu.
15 Omishangwa odi yadi omailikano nosho yo omadiladilo oo a pambafana ‘nomikemo detu di he fi kutumbulwa.’ Pashihopaenenwa, konakona Epsalme 119:121-128. Onghedi omo oinima ya hokololwa apa otashi dulika i kale ya fa eenghalo detu. Pashihopaenenwa, ngeenge otu na outile wokufininikwa, ohatu dulu okupula ekwafo laKalunga monghedi omo omupsalme a li a pula. (Ovelishe 121-123) Natu tye nee ngeno otwa pumbwa okuninga etokolo lidjuu. Ohatu dulu okwiilikana opo omhepo yaJehova i tu kwafele tu dimbuluke notu tule moilonga omahepaululo aye. (Ovelishe 124, 125) Nonande otu ‘tonde omufango keshe woipupulu,’ otashi dulika twa pumbwa okupula Kalunga e tu kwafele opo tu he liyandje komayeleko oo tae tu yeleke tu nyone omhango yaye. (Ovelishe 126-128) Ngeenge ohatu lesha Ombibeli efiku keshe, otashi dulika tu dimbuluke omishangwa tadi kwafele ngaashi odo da tumbulwa metetekelo ngeenge hatu ilikana kuJehova.
Ohatu kwafelwa komahepaululo aJehova
16, 17. (a) Omolwashike twa pumbwa omahepaululo aKalunga, notu na oku a tala ko ngahelipi? (b) Vamwe otashi dulika ve tu tale ko ngahelipi, ndele etaleko lalyelye la fimanenena?
16 Ngeenge otwa hala Kalunga a ude omailikano etu nokukala twa hokiwa kuye, otu na okudulika komahepaululo aye. (Epsalme 119:129-136) Molwaashi otu li ovadimbwanhu, otwa pumbwa omahepaululo aJehova makumwifi oo hae tu dimbulukifa omahongo noipango yaye. Doshili, ohatu hafele ouyelele wopamhepo oo hau yandjwa omolweudeko keshe lipe leendjovo daKalunga. (Epsalme 119:129, 130) Otwa hafa yo eshi Jehova omolwoku tu hokwa e tu ‘minikilifa oshipala shaye,’ nonande ‘omahodi otaa kunguluka momesho etu,’ molwaashi vamwe tava nyono omhango yaye.—Epsalme 119:135, 136; Numeri 6:25.
17 Ngeenge ohatu dulika komahepaululo aKalunga a yuka, ohatu ka kala nelineekelo kutya ota ka twikila okukala e tu hokwa. (Epsalme 119:137-144) Tu li ovapiya vaJehova, otwa dimina kutya oku na oufemba woku tu pa omahepaululo aye a yuka, nokuteelela tu dulike kuo e li oipango. (Epsalme 119:138) Molwaashi omupsalme okwa li a dulika koipango yaKalunga, omolwashike a ti: “Aame ondi munini nda dinika”? (Epsalme 119:141) Osha yela kutya okwa li ta ulike konghedi omo ovatondi vaye va li have mu tale ko. Ngeenge ohatu diinine ouyuki, vamwe otave ke tu dina. Ndele osho sha fimanenena oshosho kutya, Jehova okwe tu hokwa molwaashi ohatu dulika komahepaululo aye a yuka.
Otu li meameno nomombili
18, 19. Oshidjemo shashike hashi di mokudulika kwetu komahepaululo aKalunga?
18 Okudiinina omahepaululo aKalunga ohaku tu kaleke popepi naye. (Epsalme 119:145-152) Molwaashi ohatu yandje elitulemo komahepaululo aJehova, otu shi shii kutya ohatu dulu oku mu ilikana nomutima wetu aushe, nohatu dulu okuteelela omailikano etu a udike. Otashi dulika tu penduke “fimbo inaku sha” nokupula ekwafo. Kali fi tuu efimbo liwa nokwiilikana! (Epsalme 119:145-147) Kalunga oku li yo popepi nafye molwaashi ohatu henuka elihumbato lii nohatu tale ko eendjovo daye di li oshili, ngaashi ashike Jesus a li a ninga. (Epsalme 119:150, 151; Johannes 17:17) Ekwatafano letu naJehova ohali tu pameke mounyuni ou u yadi omaupyakadi notali ke tu kwafela tu xupifwe moita yaye inene yaHarmagedon.—Ehololo 7:9, 14; 16:13-16.
19 Omolwefimaneko letu lomoule olo tu na shi na sha neendjovo daKalunga, ohatu hafele eameno lashili. (Epsalme 119:153-160) Mepingafano novakolokoshi, fye ‘inatu tekuka mo momahepaululo aJehova.’ Otu hole omalombwelo aKalunga nokungaha otwa amenwa molwouwanghenda waye. (Epsalme 119:157-159) Omahepaululo aJehova ohae tu kwafele tu dimbuluke osho ta pula kufye meenghalo donhumba. Kakele kaasho, omalombwelo aKalunga oku li ewiliko notwa dimina nehalo liwa kutya Omushiti wetu oku na oufemba woku tu wilika. Molwaashi otu shi shii kutya ‘etindi londjovo yaKalunga olo oshili’ nonokutya itatu dulu okuyukifa eenghatu detu kufye vene, ohatu tambula ko nehalo liwa ewiliko laKalunga.—Epsalme 119:160; Jeremia 10:23.
20. Omolwashike tu na “ombili inene”?
20 Ohole yetu yokuhola omhango yaJehova ohai tu etele ombili inene. (Epsalme 119:161-168) Omahepeko ihae tu kanififa ‘ombili yaKalunga’ i he fi okuyelekwa. (Ovafilippi 4:6, 7) Otu hole neenghono eemhangela daJehova da yuka nomolwaasho ohatu mu tange luhapu molwado—‘omapa a-7 keshe efiku.’ (Epsalme 119:161-164) Omupsalme okwa imba a ti: “Ava ve hole omhango yoye, ove kwete ombili inene, osheshi kave na eshi tashi va tengula [“pundukifa,” OB-1954].” (Epsalme 119:165) Ngeenge otu hole nohatu diinine omhango yaJehova tu li oohandimwe, itatu ka pundukifwa pamhepo kwaasho umwe ta ningi ile koshinima shonhumba.
21. Oihopaenenwa yopamishangwa ilipi tai ulike kutya katu na okupundukifwa ngeenge omaupyakadi a holoka po meongalo?
21 Oohandimwe vahapu ovo va tumbulwa mOmbibeli inava efa nande osha shi va pundukife filufilu. Pashihopaenenwa, omulumenhu Omukriste Gaius ka li a pundukifwa, ndele okwa kala ‘ta ende moshili’ nonande opa li elihumbato li he fi lopakalunga laDiotrefes. (3 Johannes 1-3, 9, 10) Paulus okwa li a kumaida ovakainhu Ovakriste Euodia naSintike “va kale va twa omhango imwe mOmwene,” molwaashi otashi dulika pa li pa holoka omaupyakadi pokati kavo. Osha yela kutya ova li va kwafelwa va kandule po oupyakadi wavo nova twikila okulongela Jehova noudiinini. (Ovafilippi 4:2, 3) Hano inatu pumbwa okupundukifwa ngeenge pa holoka omaupyakadi onhumba meongalo. Natu twikile nokudiinina omalombwelo aJehova, hatu dimbuluka kutya ‘eendjila detu adishe odi li koshipala shaye.’ (Epsalme 119:168; Omayeletumbulo 15:3) Opo nee kape na osho tashi ke tu kanififa filufilu ‘ombili yetu inene.’
22. (a) Ngeenge otwa dulika kuKalunga, oufembanghenda ulipi hatu dulu okuhafela? (b) Otu na okutala ko ngahelipi vamwe ovo va fiya po eongalo lopaKriste?
22 Ngeenge ohatu dulika alushe kuJehova, ohatu ka kala tu na oufembanghenda wokutwikila oku mu tanga. (Epsalme 119:169-176) Mokukala metwokumwe neenghedimhango daKalunga, ihatu hafele ashike eameno lopamhepo ndele ‘omilungu detu otadi twikile okuxunga omahambelelo’ okuhambelela Jehova. (Epsalme 119:169-171, 174) Eli olo enangeko noupuna linene hatu dulu okukala tu na momafiku aa axuuninwa. Omupsalme okwa li a hala a kale nomwenyo nokutanga Jehova, ndelenee monghedi yonhumba inai hololwa, okwa ‘kala mepuko ngaashi odi ya kana.’ (Epsalme 119:175, 176) Vamwe ovo va fiya po eongalo lopaKriste otashi dulika natango ve hole Kalunga nova hala oku mu tanga. Onghee hano, natu ninge keshe osho hatu dulu tu va kwafele opo va dule vali okumona eameno lopamhepo nova mone ehafo lokutanga Jehova pamwe noshiwana shaye.—Ovaheberi 13:15; 1 Petrus 5:6, 7.
Ouyelele waalushe mondjila yetu
23, 24. Omauwa elipi wa mona mEpsalme 119?
23 Epsalme 119 otali dulu oku tu etela omauwa meenghedi di lili noku lili. Pashihopaenenwa, otali dulu oku tu ninga tu kale twe lineekela Kalunga filufilu, molwaashi otali ulike kutya ehafo lashili ohali di ‘mokweenda pamhango yOmwene.’ (Epsalme 119:1) Omupsalme ote tu dimbulukifa kutya ‘etindi leendjovo daKalunga olo oshili.’ (Epsalme 119:160) Osho oshi na shili okuhapupalifa olupandu letu li na sha nEendjovo daKalunga adishe da shangwa. Okudilonga kEpsalme 119 oku na oku tu linyengifa tu konakone Omishangwa nouladi. Omupsalme okwa indila Kalunga luhapu a ti: ‘Honge nge eenghedimhango doye.’ (Epsalme 119:12, 68, 135) Okwa indila yo a ti: ‘Honge nge omayele neendunge, osheshi ohandi lineekele oipango yoye.’ (Epsalme 119:66) Nafye yo otu na okwiilikana monghedi ya faafana.
24 Omahongo aKalunga ohae shi ningi tashi shiiva opo u kale u na ekwatafano lopofingo naye. Omupsalme okwe liifana luhapu omupiya waKalunga. Doshili, okwa popya naJehova neendjovo tadi kumu omutima, a ti: “Ame owoye.” (Epsalme 119:17, 65, 94, 122, 125; Ovaroma 14:8) Kau fi tuu oufembanghenda okulongela nokutanga Jehova tu li umwe womEendombwedi daye! (Epsalme 119:7) Mbela oto longele Kalunga nehafo u li omuudifi wOuhamba? Ngeenge osho ngaho, oto dulu okukala noushili kutya Jehova ota ka twikila oku ku yambidida noku ku nangeka noupuna moilonga oyo ye likalekelwa ngeenge oho lineekele alushe eendjovo daye noku di efa di kale ouyelele mondjila yoye.
Oto nyamukula ngahelipi?
• Omolwashike tu na okukala twa hokwa eendjovo daKalunga?
• Ohatu pamekwa ngahelipi keendjovo daKalunga?
• Omeenghedi dilipi hatu kwafelwa komahepaululo aJehova?
• Omolwashike oshiwana shaJehova sha amenwa noshi na ombili?
[Efano pepandja 9]
Eendjovo daKalunga odi li odjo youyelele wopamhepo
[Efano pepandja 10]
Ngeenge otu hole omalombwelo aJehova, ite ke tu tala ko nande ngaashi “omange”
[Efano pepandja 11]
Ngeenge ohatu lesha Ombibeli efiku keshe, otashi dulika tu ka dimbuluke omishangwa tadi kwafele ngeenge hatu ilikana