Lineekela eendjovo daJehova

“Ohandi lineekele ondjovo yoye.”—EPSALME 119:42.

1. Olyelye tashi dulika a li omushangi wEpsalme 119, nokwa li e na oikala ya tya ngahelipi?

OMUSHANGI wEpsalme 119 okwa li a lenga eendjovo daJehova. Otashi dulika a li Hiskia fimbo ina ninga ohamba yaJuda. Omaliudo oo a popiwa meimbilo olo la nwefwa mo, otaa tu kumwe noikala yaHiskia, oo a li a “kanyatela mOmwene” manga a li e li ohamba yaJuda. (2 Eehamba 18:3-7) Oshinima shimwe sha yela oshosho kutya: Omushangi oo okwa li e shii omhumbwe yaye yopamhepo.—Mateus 5:3, NW.

2. Enenediladilo lEpsalme 119 olilipi, neimbilo eli ola unganekwa ngahelipi?

² Enenediladilo lEpsalme 119 olo ongushu yeendjovo ile yetumwalaka laKalunga.a Omushangi okwa shanga eimbilo olo palandulafano loalfabeta, tashi dulika opo shi kale shipu oku li dimbuluka. Eevelishe dalo 176 ode likolelela keendada da landulafana doalfabeta yOshiheberi. MOshiheberi shopetameko, okatendo keshe komoutendo 22 vepsalme olo, oka li ke na omikweyo di li 8 odo da hovela nondada ya faafana. Epsalme olo otali popi shi na sha neendjovo daKalunga, omhango, omalongo, eendjila, omalombwelo, eenghedimhango, oipango, omayukifo nosho yo omaudaneko aye. Moshitukulwa eshi naasho tashi landula, Epsalme 119 otali ka kundafanwa she likolelela ketoloko lOmbibeli yOshikwanyama. Okudilonga koimoniwa ya kwatela mo ovapiya vaJehova vonale naavo vokunena oku na okuhapupalifa eudeko letu li na sha neimbilo olo la nwefwa mo kuKalunga nokuweda ko kolupandu letu li na sha nEendjovo daKalunga da shangwa, Ombibeli.

Dulika keendjovo daKalunga ndele to kala omunelao

3. Yelifa nokuyandja oshihopaenenwa kutya otashi ti ngahelipi okukala omuhenoshipo.

³ Elao lashili ole likolelela mokweenda kwetu pamhango yaKalunga. (Epsalme 119:1-8) Ngeenge otwa dulika komhango yaye, ote ke tu tala ko tu li ‘ovayuki [“tu he na oshipo,” NW].’ (Epsalme 119:1) Okukala tu he na oshipo itashi ti otwa wanenena, ndele otashi ulike kutya ohatu kendabala okulonga ehalo laJehova Kalunga. Noa okwa “li e he noshipo mokati kovanhu vomounyuni waye,” nokwa “enda pamwe naKalunga.” Tatekulululwa oo omudiinini nosho yo oukwaneumbo waye ova xupa mEyelu, molwaashi okwa landula onghedi yokukalamwenyo oyo ya tulwa po kuJehova. (Genesis 6:9; 1 Petrus 3:20) Sha faafana, okuxupa kwetu pexulilo lounyuni ou okwe likolelela ‘kokudiinina shili eemhango’ daKalunga, sha hala okutya, okulonga ehalo laye.—Epsalme 119:4.

4. Elao letu nokupondola kwetu okwe likolelela kushike?

⁴ Jehova ke na fiku e ke tu efe ngeenge ohatu mu ‘pandula nomutima wa yuka nokudiinina eenghedimhango daye.’ (Epsalme 119:7, 8) Kalunga ka li a ekelashi Josua omuwiliki wOvaisrael, oo a li a tula moilonga omayele ‘okukonakona embo lomhango omutenya noufiku opo a wanife naanaa ashishe osho sha shangelwa mo.’ Osho oshe mu kwafela a pondole nokukatuka pandunge. (Josua 1:8) Eshi a li e li pokufya, Josua okwa kala nokutanga Kalunga nokwa dula okudimbulukifa Ovaisrael a ti: “Nye mu nokushiiva nomutima weni aushe nomwenyo weni aushe nokutya, kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa.” (Josua 23:14) Ngaashi Josua nomushangi wEpsalme 119, ohatu dulu okukala nelao nohatu dulu okupondola ngeenge hatu tange Jehova nokulineekela eendjovo daye.

Eendjovo daJehova otadi tu kaleke twa koshoka

5. (a) Yelifa nghee to dulu okukala wa koshoka pamhepo. (b) Ekwafo lilipi li li po okukwafela omunyasha oo a nyona sha kwata moiti?

⁵ Ohatu dulu okukala twa koshoka pamhepo ngeenge ohatu liufa keendjovo daKalunga. (Epsalme 119:9-16, OB-1954) Osho osho shi li ngaho nokuli nonande ovadali vetu inava tula po oshihopaenenwa shiwa. Nonande xe yaHiskia okwa li omulongeli woikalunga, Hiskia okwa ‘wapaleka ondjila yaye,’ tashi dulika a ekelashi enwefemo loshipaani. Natu tye nee ngeno omunyasha oo ta longele Kalunga kunena okwa nyona sha kwata moiti. Elivelombedi, eilikano, ekwafo lovadali nosho yo ekwafo lopahole lovakulunhuongalo Ovakriste, otai dulu oku mu kwafela a kale a fa Hiskia ‘nokuwapaleka ondjila yaye nokukala te liufa’ keendjovo daKalunga.—Jakob 5:13-15.

6. Ovakainhu velipi va ‘wapaleka eendjila davo nokuliufa keendjovo daKalunga’?

⁶ Rahab naRut ova li va ‘wapaleka eendjila davo,’ nonande ova li ko nale ofimbo Epsalme 119 inali shangwa. Rahab okwa li ombwada Omukanaan, ndele okwa ka shiivika nawa omolweitavelo laye e li omulongeli waJehova. (Ovaheberi 11:30, 31) Omumoab Rut okwa li a fiya po oikalunga yaye, nokwa longela Jehova nokudulika kOmhango yaye oyo a li a pa Israel. (Rut 1:14-17; 4:9-13) Ovakainhu ovo vavali va li ve he fi Ovaisrael ova li ve ‘liufa keendjovo daKalunga’ nova li ve na oufembanghenda mukumwifi wokukala ooinakulululwa vaJesus Kristus.—Mateus 1:1, 4-6.

7. Ongahelipi Daniel novanyasha vakwao vatatu Ovaheberi va tula po oshihopaenenwa sha denga mbada mokukala va koshoka pamhepo?

⁷ “Omadiladilo omutima womunhu [omai okudja] kounona waye,” ndele ovanyasha otava dulu okulandula ondjila oyo ya koshoka, nokuli nomounyuni ou wa nyonauka, oo tau pangelwa kuSatana. (Genesis 8:21; 1 Johannes 5:19) Eshi va li eenghwate muBabilon, Daniel novanyasha vakwao vatatu Ovaheberi ova li ve ‘liufa keendjovo daKalunga.’ Pashihopaenenwa, kava li ve “linyateka neendya dohamba.” (Daniel 1:6-10) Ovababilon ova li hava li oinamwenyo inai koshoka, oyo ya li ya dilikwa kOmhango yaMoses. (Leviticus 11:1-31; 20:24-26) Kava li hava kufa oinamwenyo ya dipawa ohonde, nokulya kwavo ombelela inai kufwa ohonde okwa li kwa nyona omhango yaKalunga i na sha nohonde. (Genesis 9:3, 4) Hano itashi kumwifa eshi Ovaheberi vane inava lya eendya dohamba. Ovanyasha ovatilikalunga ovo ova kala va koshoka pamhepo nokungaha ova tula po oshihopaenenwa shiwa.

Eendjovo daKalunga otadi tu kwafele tu kale ovadiinini

8. Opo tu ude ko nokutula moilonga omhango yaKalunga, otwa pumbwa okukala tu na oikala neshiivo lilipi?

⁸ Okuhafela eendjovo daKalunga oshinima sha fimana mokukala ovadiinini kuye. (Epsalme 119:17-24) Ngeenge otu na oikala ya fa yomushangi weimbilo oo a nwefwa mo, ohatu ka kala twa halelela okuuda ko “oikumwifa” yomhango yaKalunga. Ohatu ka kala alushe tu na ‘odjuulufi yomayukifo’ aJehova ‘nokunyakukilwa omahepaululo aye.’ (Epsalme 119:18, 20, 24) Ngeenge opo twe liyapulile Jehova, mbela otu na ‘odjuulufi yomashini omeendjovo inamu ya sha’? (1 Petrus 2:1, 2, yelekanifa NW.) Otwa pumbwa okukala tu shii omahongo Ombibeli opehovelo opo tu dule okuuda ko nokutula moilonga omhango yaKalunga.

9. Ohatu ke linyenga ngahelipi ngeenge pe na elipumomumwe pokati kaasho ovanhu tava pula naasho tashi pulwa komhango yaKalunga?

⁹ Otashi dulika hatu hafele omahepaululo aKalunga, ndele ongahelipi ngeenge “oidale” tai likundu molwetu omolwetomheno lonhumba? (Epsalme 119:23, 24) Kunena, luhapu ovanhu ovo ve na eenghonopangelo ohave tu fininike tu tale ko eemhango dopanhu da fimana di dule daKalunga. Ngeenge pe na elipumomumwe pokati kaasho ovanhu tava pula naasho Kalunga ta pula, ohatu ka ninga po shike? Okukala tu hole eendjovo daKalunga otaku tu kwafele tu kale ovadiinini kuye. Ohatu ka popya ngaashi ovayapostoli vaJesus Kristus va popile eshi va li tava hepekwa, hatu ti: “Okudulika kuKalunga ku dule okudulika kovanhu.”—Oilonga 5:29.

10, 11. Yandja oshihopaenenwa shanghee hatu dulu okukanyatela oudiinini kuJehova meenghalo didjuu unene.

¹⁰ Ohatu dulu okukala ovadiinini kuJehova nokuli nomeenghalo didjuu unene. (Epsalme 119:25-32) Opo tu pondole mokukanyatela oudiinini wetu kuKalunga, otu na okukala twa hala okuhongwa nokwiilikana twa mana mo opo e tu pe ehongo laye. Otu na yo okuhoolola “ondjila [youdiinini, NW].”—Epsalme 119:26, 30.

¹¹ Hiskia, oo tashi dulika a shanga Epsalme 119, okwa hoolola “ondjila youdiinini.” Okwe shi ninga nonande okwa li e li mokati kovalongelikalunga ovanaipupulu notashi dulika a li a shekwa koilyo yomombala. Otashi dulika ‘omwenyo waye owa li tau lili oufiye,’ omolweenghalo da tya ngaho. (Epsalme 119:28, OB-1954) Ndele okwa li e lineekela muKalunga, okwa li ohamba iwa, nokwa ninga “osho sha yuka momesho Omwene.” (2 Eehamba 18:1-5) Mokulineekela Kalunga, nafye ohatu dulu okulididimikila omayeleko tu li ovakanyateli voudiinini.—Jakob 1:5-8.

Eendjovo daJehova ohadi tu ladipike

12. Ongahelipi hatu dulu okutula moilonga pauhandimwe Epsalme 119:36, 37?

¹² Okushikula omayele eendjovo daKalunga ohaku tu tu omukumo oo twa pumbwa opo tu ungaunge nomayeleko onghalamwenyo. (Epsalme 119:33-40) Ohatu kongo nelininipiko ehongo laJehova opo tu dule okuwanifa po omhango yaye “nomutima aushe.” (Epsalme 119:33, 34) Ngaashi omupsalme, ohatu ilikana Kalunga hatu ti: “Omutima wange u ehenifa komahepaululo oye, [wo] u ha ehene kolwisho lemona loulunde.” (Epsalme 119:36) Ngaashi omuyapostoli Paulus, ohatu ‘ende mouyuki moinima aishe.’ (Ovaheberi 13:18, OB-1954) Ngeenge omuyandji woilonga okwa hala tu ninge sha osho shi he li pauyuki, otwa pumbwa okukala nouladi tu dulike komalombwelo aKalunga—noha nangeke noupuna alushe ovo tava katuka onghatu ya tya ngaho. Doshili, ohe tu kwafele tu finde eamo keshe lii. Onghee hano, natu ilikaneni hatu ti: “Omesho ange a alula ko, a ha tale koinima yongaho.” (Epsalme 119:37) Katu na fiku tu ka kale twa hala okutala ko oshinima keshe shongaho shi tondike kuKalunga shi li shihokwifa. (Epsalme 97:10) Oinima ivali oyo eilikano olo tali tu kwafele tu i henuke, oyo omafano oipala nosho yo oumhulile.—1 Ovakorinto 6:9, 10; Ehololo 21:8.

13. Ongahelipi ovahongwa vaJesus ovo va li tava hepekwa va tuwa omukumo opo va yandje oundombwedi nouladi?

¹³ Eshiivo lashili leendjovo daKalunga ohali tu pe elineekelo lokuudifa nouladi. (Epsalme 119:41-48) Notwa pumbwa ouladi opo tu ‘nyamukule ovo tave tu sheke.’ (Epsalme 119:42, OB-1986) Omafimbo amwe otashi dulika tu kale twa fa ovahongwa vaJesus ovo va li tava hepekwa, ndele tava ilikana va ti: ‘Omwene, pa ovapiya voye va popye nouladi aushe eendjovo doye.’ Oshike sha li oshidjemo sheilikano lavo? “Aveshe ova yadifwa Omhepo Iyapuki, ndele va popya nouladi eendjovo daKalunga.” Sha faafana, Omwene Omunamapangelo aeshe ohe tu tu omukumo tu popye nouladi eendjovo daye.—Oilonga 4:24-31.

14. Oshike hashi tu kwafele tu yandje oundombwedi nouladi ngaashi Paulus?

¹⁴ Ohatu ka kala nouladi oo wa pumbiwa opo tu yandje oundombwedi tu he na oumbada wokufya ohoni, ngeenge otu hole “eendjovo doshili” nohatu ‘shakenifa omhango yaKalunga noudiinini alushelushe.’ (Epsalme 119:43, 44, yelekanifa OB-1954.) Okukonakona nouladi Eendjovo daKalunga da shangwa ohaku tu dulifa tu ‘vilikile eehamba omahepaululo aye.’ (Epsalme 119:46) Eilikano nomhepo yaJehova otai ke tu kwafela yo tu popye oinima oyo ya yuka monghedi ya yuka. (Mateus 10:16-20; Ovakolossi 4:6) Paulus okwa li a popya nouladi novapangeli vomefelemudo lotete kombinga yomalombwelo aKalunga. Pashihopaenenwa, okwa li a hepaululila omupangeli waRoma Feliks, oo a li ta “pwilikine eendjovo daye deitavelo lokwiitavela Kristus Jesus.” (Oilonga 24:24, 25) Paulus okwa yandja yo oundombwedi komupangeli Festus nohamba Agrippa. (Oilonga 25:22–26:32) Nekwafo laJehova, nafye yo ohatu dulu okukala eendombwedi diladi, ‘ihadi fi nande evangeli ohoni.’—Ovaroma 1:16.

Eendjovo daKalunga ohadi tu hekeleke

15. Eendjovo daKalunga otadi dulu oku tu hekeleka ngahelipi ngeenge vamwe tave tu sheke?

¹⁵ Eendjovo daJehova ohadi yandje alushe ehekeleko. (Epsalme 119:49-56) Ope na omafimbo amwe oo hatu kala unene twa pumbwa okuhekelekwa. Nonande ohatu popi nouladi tu li Eendombwedi daJehova, ‘ovalinenepeki’—ovo tave linenepekele Kalunga—omafimbo amwe ‘ohave tu sheke oixuna yongaho.’ (Epsalme 119:51, yelekanifa OB-1986.) Ndele ofimbo hatu ilikana, otashi dulika tu dimbuluke oinima tai tungu oyo ya popiwa mEendjovo daKalunga, nokungaha ohatu kala tu “udite ehekeleko.” (Epsalme 119:52) Eshi hatu ilikana, otashi dulika tu dimbuluke omhango ile efinamhango lopamishangwa olo tali tu hekeleke noku tu twa omukumo oo twa pumbwa meenghalo didjuu.

16. Nonande opa kale omahepeko, oshike osho ovapiya vaKalunga itava ka ninga?

¹⁶ Ovalinenepiki ovo va li va sheka omupsalme ova li Ovaisrael—oilyo yoshiwana osho sha li she liyapulila Kalunga. Kasha li tuu shififa ohoni! Ndelenee mepingafano navo, natu kale twa tokola toko tu ha efe po nande omhango yaKalunga. (Epsalme 119:51) Eshi ovapiya vaKalunga omayovi va li tava hepekwa kepangelo laNazi nosho yo eshi va li tava hepekwa koilongo imwe i lili, momukokomoko womido, ova anya okweefa po eemhango nomafinamhango oo taa hangika mEendjovo daKalunga. (Johannes 15:18-21) Kashi fi omutengi okudulika kuJehova, molwaashi eenghedimhango daye oda fa omaimbilohambelelo taa hekeleke kufye.—Epsalme 119:54; 1 Johannes 5:3.

Kala u na olupandu omolweendjovo daJehova

17. Olupandu lokupandula eendjovo daKalunga ohali tu linyengifa tu ninge shike?

¹⁷ Ohatu ulike olupandu letu molweendjovo daKalunga mokukala metwokumwe nado. (Epsalme 119:57-64) Omupsalme okwa ‘tile ota diinine eendjovo dOmwene,’ nokuli ‘nokeenghundumene doufiku okwa li ha penduka a pandule Kalunga omolweemhangela daye diyuki.’ Ngeenge otwa penduka mokati koufiku, itashi ka kala tuu omhito iwa kufye tu ulike olupandu letu kuKalunga mokwiilikana! (Epsalme 119:57, 62) Olupandu letu lokupandula eendjovo daKalunga ohali tu linyengifa tu lihonge omahongo aye noku tu ninga ‘oovakwao vaavo have mu tila’ nehafo—oohandimwe ovo ve na etilofimaneko loku mu tila. (Epsalme 119:63, 64) Openi vali hatu dulu okumona eendafano liwa kombada yedu?

18. Jehova oha nyamukula ngahelipi omailikano etu ngeenge ‘omalulo ovakolokoshi e tu dingilila’?

¹⁸ Ngeenge hatu ilikana Jehova nomutima aushe noku mu pula nelininipiko e tu honge, ohatu ‘mu ilikana’ nelalakano lokukala twa hokiwa kuye. Otwa pumbwa okwiilikana unene tuu ngeenge ‘omalulo ovakolokoshi okwe tu dingilila.’ (Epsalme 119:58, 61) Jehova ota dulu okuteta omalulo ovatondi oo e tu ngabeka noku tu mangulula opo tu dule okutwikila noilonga yokuudifa Ouhamba nokuninga ovanhu ovahongwa. (Mateus 24:14; 28:19, 20) Eshi osha kala hashi ningwa lwoikando moilongo omo oilonga yetu ya li ya shilikwa.

Kala u na eitavelo meendjovo daKalunga

19, 20. Oshi na ouwa washike ngeenge hatu hepekwa?

¹⁹ Okukala neitavelo muKalunga nomeendjovo daye ohaku tu kwafele tu lididimikile omaudjuu nosho yo okulonga ehalo laye. (Epsalme 119:65-72) Nonande ovalinenepeki ‘ove mu totela oipupulu,’ omupsalme okwa imba a ti: ‘Onawa kuame, eshi nda hepekwa.’ (Epsalme 119:66, 69, 71, yelekanifa NW.) Ongahelipi tashi dulu okukala shi na ouwa komupiya keshe waJehova okuhepekwa?

²⁰ Nope he na omalimbililo, ohatu ilikana kuJehova twa mana mo ngeenge hatu hepekwa, naasho ohashi tu ehenifa popepi elela naye. Otashi dulika tu longife efimbo lihapu mokukonakona Eendjovo daKalunga da shangwa notashi dulika tu ninge eenghendabala dinene oku di tula moilonga. Naasho ohashi ningifa onghalamwenyo i kale i na elao. Ndele ongahelipi ngeenge hatu holola oikala i he fi ihokwifa ngaashi okuhenelididimiko nosho yo ounhwa, ngeenge hatu hepekwa? Mokwiilikana nomutima aushe nokekwafo lEendjovo daKalunga nomhepo yaye, ohatu dulu okufinda omaunghundi a tya ngaho ‘nokudjala omunhu mupe.’ (Ovakolossi 3:9-14) Kakele kaasho, eitavelo letu ohali pamekwa ngeenge hatu lididimikile omaudjuu. (1 Petrus 1:6, 7) Paulus okwa li a mona ouwa momaudjuu aye, molwaashi okwe mu ningifa a kale e lineekela muJehova neenghono. (2 Ovakorinto 1:8-10) Mbela ohatu efa okumona oixuna ku tu etele oidjemo iwa?

Lineekela alushe Jehova

21. Oshike tashi ka ningwa po eshi Kalunga ta ka fifa ovalinenepeki ohoni?

²¹ Eendjovo daKalunga otadi tu pe etomheno lopandunge lokulineekela muye. (Epsalme 119:73-80) Ngeenge otwe lineekela shili Omushiti wetu, itatu ka kala netomheno lokufya ohoni. Ndele omolwoinima oyo vamwe hava ningi, otwa pumbwa ehekeleko notashi dulika tu kale tu udite twa hala okwiilikana hatu ti: ‘Ovalinenepeki nava fifwe ohoni.’ (Epsalme 119:76-78) Eshi Jehova ta ka fifa ohoni ovo va tya ngaho, otashi ka nyaneka pomutenya eendjila davo doukolokoshi nosho yo okuyapulifa edina laye liyapuki. Ohatu dulu okukala noushili kutya ovahepeki voshiwana shaKalunga itava ka pondola nandenande. Pashihopaenenwa, inava dula nandenande—noitava ka dula nandenande—okuhanauna po Eendombwedi daJehova, odo de lineekela Kalunga nomutima aushe.—Omayeletumbulo 3:5, 6.

22. Omeityo lilipi omupsalme a li ‘ngaashi ekutu longaho momwifi’?

²² Eendjovo daKalunga ohadi pameke elineekelo letu muye ngeenge hatu hepekwa. (Epsalme 119:81-88) Molwaashi ovalinenepeki ova li tava hepeke omupsalme, okwa li e udite a fa ‘ekutu longaho momwifi.’ (Epsalme 119:83, 86) Momafimbo Ombibeli, omakutu oo a ningwa moshipa shoshinamwenyo okwa li haa longifwa okukwatela omeva, omaviinyu nosho yo oikunguluki ikwao. Ngeenge omakutu oo a li itaa longifwa, otashi dulika kwa li e lixwine ngeenge okwa lekwa popepi nomundilo monduda iyadi omwifi. Mbela omaudjuu nomahepeko ohae ku ningifa u kale u udite wa fa ‘ekutu longaho momwifi’? Ngeenge osho shi li ngaho, lineekela muJehova ndele to ilikana to ti: “Molwouwanghenda woye [amena omwenyo wange], ame opo ndi shikule elongo lokanya koye.”—Epsalme 119:88.

23. Oshike osho twa kundafana mokukonakona Epsalme 119:1-88, noshike hatu dulu okulipula ofimbo twa teelela okukonakona Epsalme 119:89-176?

²³ Etata leevelishe dEpsalme 119 odo twa konakona, otali ulike kutya Jehova oha ulikile ovapiya vaye ouwanghenda molwaashi ove lineekela eendjovo daye nova hokwa eenghedimhango daye, elongo laye, oipango yaye nosho yo eemhango daye. (Epsalme 119:16, 47, 64, 70, 77, 88) Okwa hafa eshi ovo ve mu liyandjela have liufa keendjovo daye. (Epsalme 119:9, 17, 41, 42, OB-1954) Ofimbo wa teelela okukonakona oshixupe shEpsalme olo tali tu omukumo, oto ningi nawa ngeenge to lipula kutya: ‘Mbela ohandi efa ngoo shili eendjovo daJehova di minikile ondjila yange?’

[Omashangelo opedu]

Oto nyamukula ngahelipi?

• Elao lashili ole likolelela kushike?

• Ongahelipi eendjovo daJehova hadi tu kaleke twa koshoka pamhepo?

• Omeenghedi dilipi eendjovo daKalunga hadi tu tu omukumo nohadi tu hekeleke?

• Omolwashike tu na okukala neitavelo muJehova nosho yo meendjovo daye?

[Efano pepandja 4]

Rut, Rahab nosho yo ovanyasha Ovaheberi ovo va li moukwatwa muBabilon ova li ve ‘liufa keendjovo daKalunga’

[Efano pepandja 5]

Paulus okwa ‘vilikila eehamba nouladi omahepaululo aKalunga’