Armagedon mbela ehulilo tali tilitha?

ARMAGEDON! Mbela oshitya shika otashi ku dhiladhilitha ehanagulo enenenene nenge okupya po kwewangandjo alihe? Kapu na uutumbulilo mOmbiimbeli hau popiwa olundji kaantu miitopolwa oyindji muuyuni ngaashi “Armagedon” ha popiwa. Uutumbulilo mboka owa kala nokulongithwa apuhe okuhokolola omategameno ga yemateka ngoka aantu ye na. Ookino, oo-TV nosho wo oovidio odhu ulikile aantu omathano omatilithi ge na ko nasha ‘naArmagedon’ ngoka te ke ya. Oshitya shika oshi li oshiholekwa koyendji nopu na omauvoko ogendji ga puka ge na ko nasha nasho. Nonando opu na omadhiladhilo ogendji kombinga yeityo lyasho, ogendji gomugo itaga tsu kumwe naashoka tashi longwa konzo yuutumbulilo mboka, Ombiimbeli, shi na ko nasha naArmagedon.

Molwaashoka Ombiimbeli otayi kwatakanitha Armagedon “nehulilo lyuuyuni,” mbela ito tsu kumwe kutya osha simanenena okuuva ko nawa shoka oshitya shoka tashi ti naanaa? (Mateus 24:3) Noitashi ka kala mbela shi li pandunge opo u ye konzo yashili, Oohapu dhaKalunga opo u mone omayamukulo kutya Armagedon oshike naashoka ta ti kungoye nokuukwanegumbo woye?

Ekonakono ndyoka otali ku ulika kutya pehala lyokweeta ehulilo tali tilitha, Armagedon ota ka eta etameko linyanyudha kaantu mboka ye na ehalo okukala muuyuni uupe wuuyuuki noku u nyanyukilwa. Oto ka uva ko nawa sha yela oshili ndjoka yopamanyolo sho to konakona eityo lyolela lyaArmagedon moshitopolwa tashi landula ko.

[oshimpungu/Ethano pepandja 3]

MBELA OTO DHILADHILA KUTYA ARMAGEDON OSHIKE?

• Edhipago enenenene niilwitho yopalute

• Oshiponga oshinene shopaunshitwe

• Eipumomumwe lyiinima yokegulu nevi

• Ehanagulopo lyaKalunga okuhanagula po aakolokoshi