Armagedon—oshike naanaa pataloko lyaantu yamwe?

“Nena oombepo odha gongele aakwaniilwa pehala ndyoka hali ithanwa mOshihebeli Armagedon.”—EHOLOLO 16:16.

OSHIKE hashi ya momadhiladhilo goye ngele wu uvu oshitya “Armagedon”? Otashi vulika momadhiladhilo goye mu holoke ethano lyoshiponga oshinene. Nonando oshitya shoka osha popiwa mo owala lumwe mOmbiimbeli, ohashi popiwa olundji moonkundana nokaawiliki yomalongelokalunga.

Mbela shoka aantu haya dhiladhila kombinga yaArmagedon otashi tsu ngaa kumwe naashoka Ombiimbeli tayi ti? Osha simana okutseya eyamukulo. Omolwashike mbela? Omolwaashoka okutseya oshili kombinga yaArmagedon otaku vulu oku ku mangulula ko kuumbanda owindji, oku ku kwathela wu kale wu na etegameno lyonakuyiwa itaali tengauka, notaku vulu okuguma etaloko lyoye nkene wa tala ko Kalunga.

Tala komapulo gatatu ngaka taga landula mpaka e to yelekanitha shoka aantu haya ti kombinga yaArmagedon naashoka Ombiimbeli tayi ti shili.

1. MBELA ARMAGEDON OSHIPONGA TASHI KE ETITHWA KAANTU?

Aatoolinkundana naakonakoni olundji ohaya longitha oshitya “Armagedon” uuna taya popi kombinga yiiponga iinene mbyoka ye etithwa po kaantu. Pashiholelwa, Iita yotango yUuyuni nosho wo iitiyali ohaku tiwa kutya oArmagedon. Konima yiita mbyoka, aantu oya kala ye na uumbanda kutya pamwe Amerika naSoviet Union otaye ki iyumba niilwitho yopalute. Iikundaneki oya li yi ithana iita mbyoka tashi vulika yi holoke pokati kawo ‘oArmagedon te etithwa kiita yopalute.’ Kunena, aakonakoni oye na uumbanda kutya pamwe enyateko lyomudhingoloko otali ke etitha omalunduluko omanene monkalo yombepo nohaya londodha aantu kutya otaku zi “Armagedon te etwa konkalo yombepo.”

Shoka taya ti osha hala okutya: Aantu oyo taya ka tokola kutya onakuyiwa yevi otayi ka kala ngiini nosho wo ashihe shoka shi li ko. Ngele omapangelo inaga katuka pandunge, evi otali ka yonagulwa po.

Shoka Ombiimbeli tayi ti: Kalunga i ta etha aantu ya yonagule po evi thiluthilu. Ombiimbeli otayi tu shilipaleke kutya Jehovaa evi “ine li shita li mbugale.” Ihe pehala lyaashono, okwe li shiti li kale “ehala lyokukala aantu.” (Jesaja 45:18) Pehala lyokweetha evi li yonagulwe po thiluthilu kaantu, Kalunga ota ka ‘hanagula po mboka taya yonagula evi!’—Ehololo 11:18.

2. MBELA ARMAGEDON OSHIPONGA SHOPAUNSHITWE?

Aatoolinkundana ethimbo limwe ohaya longitha oshitya “Armagedon” sho taya popi kombinga yiiponga yopaunshitwe iinenenene. Pashiholelwa, momumvo 2010, olopota yimwe oya popi kombinga ‘yaArmagedon moHaiti.’ Oya li tayi popi kombinga yemono lyiihuna, eyonagulo nosho wo kombinga yoomwenyo ndhoka dha kanena mekakamo lyevi enene ndyoka lya li lya dhenge oshilongo shoka. Aakundaneki naamboka haya ningi oofilima ihaya longitha owala oshitya shoka ngele taya popi kombinga yiiningwanima mbyoka ya ningwa nale, ihe naambyoka taya ti kutya otashi vulika yi ka ningwe. Pashiholelwa oya li ya longitha oshitya “Armagedon” ya popye kombinga yiilanduliko mbyoka taya dhiladhila kutya otayi ke etithwa kemanya tali gu mewangandjo e tali dhenge evi.

Shoka taya ti osha hala okutya: Armagedon osho oshiponga shoka hashi dhipaga aantu, kashi na nduno mbudhi kutya oye na shoka ya ninga nenge hasho. Ku na sha lela shono to vulu okuninga po opo wi igamene.

Shoka Ombiimbeli tayi ti: Armagedon ke shi oshiponga shoka hashi hanagula po aantu ayehe. Pehala lyaashono, aakolokoshi oyo owala taya ka hanagulwa po puArmagedon. Ombiimbeli otayi uvaneke kutya masiku “aadhudhu otaa ka kana po mbala; nando u ya konge, ito ya mono.”—Episalomi 37:10.

3. MBELA KALUNGA OTA KA HANAGULA PO EVI PUARMAGEDON?

Aantu oyendji mboka haya yi koongeleka oyi itaala kutya uuwanawa nuuwinayi otawu ka palamenathana, naashoka otashi ka ningitha opulanete yetu yi hule po. Omapulapulo ngoka ga li ga ningwa moAmerika ko-Princeton Survey Research Associates oga li ga holola kutya oopelesenda 40 dhaakuluntu odhi itaala kutya uuyuni otawu ka hula po “miita mbyoka tayi ka lwilwa puArmagedon.”

Shoka taya ti osha hala okutya: Aantu inaya shitwa nelalakano lyokukala kombanda yevi sigo aluhe, lyo evi nalyo inali shitwa li kalelele. Sho Kalunga a shiti aantu okwa li e na elalakano momadhiladhilo kutya esiku limwe ayehe onaya ka se ko.

Shoka Ombiimbeli tayi ti: Ombiimbeli oya popya sha yela kutya Kalunga ‘evi okwe li tula komakankameno ga kola, noitali tenguka sigo aluhe.’ (Episalomi 104:5, yelekanitha NW.) Ombiimbeli oya popi kombinga yaantu, ya ti: “Aayuuki otaa ka thigulula evi e taa kala mo sigo aluhe.”—Episalomi 37:29.

Osha yela kutya, Ombiimbeli oyi li ompinge nomadhiladhilo ogendji ngoka aantu ye na kombinga yaArmagedon. Oshili oyini nduno?

[Enyolo lyopevi]