Okukonga ouyuki otaku tu amene

‘Kongeni tete ouyuki waKalunga.’ — MATEUS 6:33.

1, 2. Etokolo lilipi omunyasha umwe Omukriste a li a ninga, nomolwashike a li e li ningila?

OMUKAINHU umwe omunyasha Omukriste muAsia okwa li ha longo e li hamushanga mombelewa yepangelo. Okwa li ha fiki pefimbo koilonga nokwa li ha longo noudiinini. Ndelenee molwaashi pondodo opo a li oya li ashike yopakafimbo, okwa li kwa talwa ngeenge okwa wana ngoo okukala pondodo oyo. Omukulunhu woilonga okwa li a lombwela omukainhu oo omunyasha kutya oilonga yaye okwa li tai ka kalelela nokwa li nokuli ta dulu oku mu yela a kale pondodo yopombada, ngeenge ova kala hava haele naye. Omukainhu oo omunyasha okwa li e shi anya filufilu, nonande okwa li tashi dulu oku mu kanififa oilonga.

² Mbela omukainhu oo omunyasha Omukriste okwa li a katuka onghatu ihe li pandunge? Ahowe, okwa li a dulika filufilu keendjovo daJesus odo tadi ti: ‘Kongeni tete ouyuki waKalunga.’ (Mateus 6:33) Okudulika komafinamhango ouyuki okwa li kwa fimanenena kuye shi dulife omauwa oo kwa li ta dulu okumona ngeenge okwa i moluhaelo. — 1 Ovakorinto 6:18.

Ouyuki owa fimana

3. Oshitya ouyuki otashi ti shike?

³ “Ouyuki” otashi ti okudiinina omafinamhango e na sha noukoshoki wopaenghedi nosho yo okukala omunashili. MOmbibeli, oshitya shOshigreka nosho yo shOshiheberi osho sha tolokwa “ouyuki” otashi yandje ediladilo loshinima sha “yukilila ile shi li mondjila.” Ouyuki itashi ti okukala u lishii ouyuki, sha hala kutya, to litokola she likolelela komifikamhango doye mwene. (Lukas 16:15) Ndele ouyuki washili owe likolelela komifikamhango daJehova. — Ovaroma 1:17; 3:21.

4. Omolwashike ouyuki wa fimana kOmukriste?

⁴ Omolwashike ouyuki wa fimana? Omolwaashi Jehova, ‘Kalunga kouyuki,’ oha hokwa oshiwana shaye ngeenge otashi longo osho sha yuka. (Epsalme 4:2; Omayeletumbulo 2:20-22; Habakuk 1:13) Omunhu keshe oo iha longo ouyuki ita dulu okukala nekwatafano lopofingo naJehova. (Omayeletumbulo 15:8) Nomolwaasho omuyapostoli Paulus a li a ladipika Timoteus a ti: “Inda onhapo yokahalu kounyasha, ndele shikula ouyuki” nosho yo omaukwatya makwao a fimanenena. (2 Timoteus 2:22) Okwa li yo a tumbula “oipapa yoivela youyuki” momusholondodo woilwifo yetu yopamhepo. — Ovaefeso 6:14.

5. Ongahelipi ovanhu inava wanenena tava dulu okukonga ouyuki?

⁵ Doshili, kaku na omunhu omuyuki filufilu, molwaashi ovanhu aveshe ova fyuulula okuhawanenena kuAdam nohava nyono. Ndele nande ongaho, Jesus okwa ti kutya otu na okukonga ouyuki. Ndele mbela otashi shiiva ngoo okukonga ouyuki? Otashi shiiva molwaashi Jesus okwe tu yandjela omwenyo waye wa wanenena u li ekuliloyambo, nongeenge otwa kala tu na eitavelo tali longo mekuliloyambo olo, Jehova ote ke tu dimina po omatimba etu. (Mateus 20:28; Johannes 3:16; Ovaroma 5:8, 9, 12, 18) Eshi hatu lihongo shi na sha nomifikamhango daJehova douyuki nokukendabala okudulika kudo nokwiilikana tu finde omaunghundi etu, Jehova ota ka tambula ko elongelokalunga letu pakanghameno lekuliloyambo olo. (Epsalme 1:6; Ovaroma 7:19-25; Ehololo 7:9, 14) Osho itashi tu hekeleke tuu!

Okukala ovayuki mounyuni uhe na ouyuki

6. Omolwashike ounyuni wa li wa nyika oshiponga kOvakriste vonale?

⁶ Eshi ovahongwa vaJesus va li va pewa oshilonga shokukala eendombwedi daye ‘fiyo okominghulo dounyuni,’ ova li va shakeneka eshongo linene. (Oilonga 1:8) Oshitukulwa osho va li ve na okulonga osha li “mepangelo lomunawii,” Satana. (1 Johannes 5:19) Ovakriste ovo ova li tava ka kala va dingililwa kenwefemo lii lomhepo oyo Satana a li ta xumifa komesho mounyuni wopefimbo olo. (Ovaefeso 2:2) Ounyuni owa li wa nyika oshiponga kuvo. Ndele okwa li tava dulu okulididimika nokukala ovadiinini mokukonga tete ouyuki waKalunga. Ndele nonande Ovakriste vonale vahapu ova li ve lididimika, opa li vamwe ovo va li va yapuka mo “melila louyuki.” — Omayeletumbulo 12:28; 2 Timoteus 4:10.

7. Oshinakuwanifwa shilipi tashi pula Ovakriste va kondjife enwefemo lii?

⁷ Mbela ounyuni kunena inau nyika oshiponga kOvakriste? Owa nyika oshiponga filufilu. Owa nyonauka nokuli shi dulife eshi wa li mefelemudo lotete. Kakele kaasho, Satana okwa umbilwa kombada yedu nota lwifa nonyanya Ovakriste ovavaekwa, “ovakwao vomepata [lomukainhu], ava hava diinine oipango yaKalunga ndee ve na ehepaululo laJesus.”(Ehololo 12:12, 17) Ota lwifa yo keshe oo ta yambidida “ovakwao vomepata” lomukainhu oo. Ndele nande ongaho, Ovakriste itava dulu okudja mo mounyuni. Nonande kave fi oshitukulwa shounyuni, ove na okukala muo. (Johannes 17:15, 16) Ove na yo okuudifila ovanhu mounyuni nosho yo okukonga mo ovo ve na omitima da yuka noku va honga va ninge ovahongwa vaKristus. (Mateus 24:14; 28:19, 20) Onghee hano, Ovakriste itava dulu okuhenuka filufilu enwefemo lii lounyuni ou, nomolwaasho ove na oku li kondjifa. Natu ka kundafaneni oinima inhe oyo okupitila muyo Satana ha nwefa mo nayo ovanhu.

Omwiyo woluhaelo

8. Oshike sha li sha ningifa Ovaisrael va longele oikalunga yOvamoab?

⁸ Ovaisrael vahapu ova li va yapuka mo melila louyuki eshi va li lwopexulilo letembu lavo lomombuwa lomido 40. Ova li va mona nghee Jehova e va xupifa peemhito dihapu, nova li ve li pokuya mEdu lEudaneko. Ndele nande ongaho, pefimbo olo la tongomana, ova li va hovela okulongela oikalunga yOvamoab. Omolwashike mbela? Omolwaashi ova li ve liyandja ‘kokahalu kombelela.’ (1 Johannes 2:16) Ehokololo lOmbibeli otali ti: “Ovanhu va hovela okuhaela novana oukadona Ovamoab.” — Numeri 25:1.

9, 10. Eenghalo dilipi kunena tadi tu ningifa tu kale alushe twa lungama shi na sha nenwefemo lii louhalu wopambelela?

⁹ Oshiningwanima osho otashi ulike nghee omahalo opambelela a puka taa dulu okunwefa mo ovanhu ovo inava lungama va katuke monghedi ihe li pandunge. Oshiningwanima osho oshi na okukala oshilihongomwa kufye, unene tuu molwaashi kunena oluhaelo ola tambulwa ko apeshe li li oshinima inashi puka. (1 Ovakorinto 10:6, 8) Olopota imwe yokOilongo yaHangana oya hokolola ya ti: “Fiyo omo 1970 lwaapo, okukala pamwe kwovanhu inava hombola kakwa li kwa pitikwa paveta moilongo aishe yomOilongo yaHangana. Ndele paife osha tambulwa ko apeshe mOilongo yaHangana. Etata lovanhu ovo tava hombola oshikando shotete ova li hava kala pamwe fimbo inava hombola.” Okukala pamwe kwovanhu inava hombola nosho yo oikala ikwao yokuheneenghedi oi li apeshe mounyuni. Shi nyikifa oluhodi, Ovakriste vamwe ohava hopaenene oikala ya tya ngaho nohava kondwa mo nokuli meongalo lopaKriste. — 1 Ovakorinto 5:11.

¹⁰ Kakele kaasho, oluhaelo otali xumifwa komesho keshe pamwe. Eekino neeprograma doko-TV ohadi xumifa komesho ediladilo kutya osha yuka kovanyasha okuya momilele komesho yohombo. Oushenge ohau ulikwa wa fa u li oshinima shopaushitwe. Eeprograma dihapu ohadi ulike omilele do venevene. Omafano oo taa ulike omilele do venevene ohaa monika noupu ko-Internet. Pashihopaenenwa, omushangi umwe woshifokundaneki okwa hokolola shi na sha nokamonamati kaye komido heyali oko efiku limwe eshi ka li ka dja kofikola ke mu hokololela nehafo kombinga yakaume kako oo a li a mona omafano ko-Internet ovakainhu ve li hamunghele tava i momilele. Xe yokamati oko okwa li a haluka neenghono, ndele ope na ounona vahapu ovo hava tale omafano a tya ngaho, ndele ihava lombwele ovadali vavo. Ovadali vahapu kave shii nokuli osho hashi ulikwa momaudano eevidio oo ounona vavo hava dana. Omaudano mahapu oo e holike kovanhu ohaa ulike oluhaelo, oinima i na sha neendemoni nosho yo elongifo leenghono.

11. Ongahelipi oukwaneumbo tau dulu okukala wa amenwa koinima ya nyata yomounyuni?

¹¹ Mbela ongahelipi oukwaneumbo tau dulu okuhenuka “omalihafifo” a xutuka a tya ngaho? Omokukonga tete ouyuki waKalunga, mokuhenuka okukufa ombinga moshinima keshe sha nyata. (2 Ovakorinto 6:14; Ovaefeso 5:3) Ovadali ovo hava tale kutya ovana vavo ohava kala ve lipyakidila nashike nohava findile movana vavo ohole yokuhola Jehova neemhango daye douyuki otave va amene vaha tale oinima ya nyika omilele ko-Internet, momaudano eevidio nosho yo meekino nova henuke omayeleko makwao. — Deuteronomion 6:4-9.a

Oshiponga shokunwefwa mo keenghedindjikilile dovanhu vomomidingonoko detu

12. Oupyakadi ulipi wa li wa holoka po mefelemudo lotete?

¹² Eshi Paulus a li muListra shomuAsia Linini, okwa li a velula omulumenhu wonhumba pashikumwifilonga. Ombibeli otai hokolola tai ti: “Ongudu eshi ya mona eshi sha ningwa kuPaulus, oya twala ondaka pombada, ya popya Oshilikaonia, tai ti: Ookalunga ove lifefa ovanhu nove uya kufye. Ndele vo ova luka Barnabas Jupiter naPaulus oMerkurius, osheshi ye okwa li ta popi.” (Oilonga 14:11, 12) Konima yefimbo, ongudu oyo tuu oyo oya li ya hala okudipaa Paulus naBarnabas. (Oilonga 14:19) Osha yela kutya ovanhu ovo ova li hava nwefwa mo noupu kuvakwao momudingonoko. Eshi ovanhu vamwe vomoshitukulwa osho va ninga Ovakriste, kava li va efa po oidila yavo. Monhumwafo yaPaulus oyo a li a shangela Ovakriste vomuKolossi, okwa li e va londwela vaha ‘longele ovaengeli.’ — Ovakolossi 2:18.

13. Eenghedindjikilile dimwe dilipi odo Ovakriste ve na okuhenuka, nongahelipi tava dulu okukala nouladi oku shi ninga?

¹³ Kunena, Ovakriste vashili ova pumbwa yo okuhenuka eenghedindjikilile odo da tambulwa ko apeshe, ndele ode likolelela komahongo omalongelokalunga oipupulu oo ehe li metwokumwe nomafinamhango opaKriste. Pashihopaenenwa, moilongo imwe, oivilo ihapu yopamifyuululwakalo i na sha nokudalwa kwounona nosho yo omafyo oye likolelela keitavelo loipupulu kutya otu na omhepo oyo hai xupu po konima eshi twa fya. (Omuudifi 9:5, 10) Moilongo imwe ounona voukadona ohava pitifwa etanda pamufyuululwakalo mokutetwa koilyo yoludalo. Onghedi oyo oiyahameka nokai na eityo lasha, nokai li metwokumwe nefiloshisho lopahole olo ovadali Ovakriste ve na okufila oshisho ovana vavo. (Deuteronomion 6:6, 7; Ovaefeso 6:4) Ongahelipi Ovakriste tava dulu okukondjifa omafininiko omomudingonoko nokweefa po eenghedindjikilile da tya ngaho? Omokulineekela filufilu muJehova. (Epsalme 31:7) Kalunga kouyuki ota ka pameka nokufila oshisho ovo ve mu lineekela nomutima aushe, nove udite ngaashi omupsalme oo a tile: “Eameno lange, nohotengulu yange, Kalunga kange, ou handi mu lineekele.” — Epsalme 91:2; Omayeletumbulo 29:25.

Inatu dimbweni Jehova

14. Elondwelo lilipi Jehova a li a yandja kOvaisrael eshi va li ve li pokuya mEdu lEudaneko?

¹⁴ Eshi Ovaisrael va li ve li pokuya mEdu lEudaneko, Jehova okwa li e va londwela vehe mu dimbwe. Okwa li e va lombwela a ti: “Lungama hano, u ha dimbwe Omwene Kalunga koye, ndee u ha dimbwe okudiinina oipango yaye nomalombwelo aye neenghedimhango daye odo ame [handi] ku lombwele nena eli. Ove ngenge ho li ndee to kuta, ngenge ho tungu eengulu diwa ndee ho kala mo, neengobe doye noimuna yoye ngenge tai hapupala noshisilveri noshingoldo ngenge tashi hapupala naashishe u shi na ngenge tashi hapupala, nomutima woye otau linenepeke ndee to dimbwa Omwene Kalunga koye.” — Deuteronomion 8:11-14.

15. Ongahelipi hatu dulu okushilipaleka kutya inatu dimbwa Jehova?

¹⁵ Mbela nafye otashi dulika tu dimbwe Jehova kunena? Heeno, ohatu dulu oku mu dimbwa ngeenge otu na omalalakano a puka. Ndele ngeenge otwa kongo tete ouyuki waye, elongelokalunga la koshoka olo tali ka kala oshinima sha fimanenena monghalamwenyo yetu. Ngaashi Paulus e tu ladipika, ohatu ‘longifa nawa efimbo’ nohatu udifa tu na eliudo kutya efimbo olo tu li mulo ola endelela. (Ovaefeso 5:16; 2 Timoteus 4:2, NW) Ndele ngeenge otwa lenga omalihafifo komesho yokukala pokwoongala nokukufa ombinga moilonga yomomapya, osha yela kutya otwa dimbwa Jehova molwaashi itatu pitifa oinima yopamhepo komesho monghalamwenyo yetu. Paulus okwa popya kutya momafiku axuuninwa ovanhu otava ka kala ‘ve hole omalihafifo ponhele yokuhola Kalunga.’ (2 Timoteus 3:4, NW) Ovakriste vashili ohave likonakona alushe opo va shilipaleke kutya inava nwefwa mo koikala ya tya ngaho. — 2 Ovakorinto 13:5.

Natu lungameni omhepo yemanguluko

16. Eva nosho yo vamwe vopefimbo laPaulus ova li ve na oikala inai yuka ilipi?

¹⁶ MuEden, Satana okwa li a pondola mokuxwaxwameka ehalo laEva lokukala a hala emanguluko lokutokola kuye mwene shi na sha naasho sha puka naasho shi li mondjila. (Genesis 3:1-6) Opa li yo vamwe meongalo lomuKorinto lomefelemudo lotete ovo va li ve na omhepo yemanguluko. Ova li ve wete ve na eshiivo lihapu ve dule Paulus, ndele okwe va sheka moku va ula kutya ove li ovayapostoli vanene. — 2 Ovakorinto 11:3-5; 1 Timoteus 6:3-5.

17. Ongahelipi hatu dulu okuhenuka omhepo yemanguluko?

¹⁷ Ovanhu vahapu mounyuni kunena ove li ‘ovahayavala novafulalali,’ nOvakriste vamwe ova nwefwa mo koikala ya tya ngaho. Vamwe ohava pataneke nokuli elongelokalunga lashili. (2 Timoteus 3:4; Ovafilippi 3:18) Osha fimanenena okukonga ewiliko kuJehova nokulongela kumwe ‘nomupiya omudiinini nomunaendunge’ nosho yo ovakulunhuongalo, ngeenge tashi uya poinima i na sha nelongelokalunga la koshoka. Oyo oyo onghedi imwe omo hatu dulu okukonga ouyuki, notashi tu kwafele tuha kale nomhepo yemanguluko. (Mateus 24:45-47; Epsalme 25:9, 10; Jesaja 30:21) Eongalo lovavaekwa, sha hala kutya, ongudu yovavaekwa, oli li “ongudi nekanghameno loshili.” Jehova okwa tota po ongudu oyo nelalakano loku tu wilika noku tu amena. (1 Timoteus 3:15) Okudimina onghandangala ya fimanenena oyo tai danwa kongudu oyo otaku tu kwafele tuhe ‘likongele efimano longaho,’ ndele otu liyandje nelininipiko mokulonga ouyuki metwokumwe nehalo laJehova. — Ovafilippi 2:2-4; Omayeletumbulo 3:4-6.

Natu ningeni ovahopaeneni vaJesus

18. Ohatu ladipikwa tu hopaenene Jesus meenghedi dilipi?

¹⁸ Ombibeli oya xunganeka shi na sha naJesus ya ti: “Ove u hole ouyuki ndele to tondo oumbudi [“okuhenouyuki,” NW].” (Epsalme 45:8; Ovaheberi 1:9) Kai fi tuu oikala iwa nokuhopaenena! (1 Ovakorinto 11:1) Jesus ka li ashike e shii omifikamhango daJehova douyuki, ndele okwa li yo e di hole. Onghee hano, eshi Satana a li e mu yeleka mombuwa, Jesus okwa li a anya filufilu okuyapuka mo ‘mondjila youyuki.’ — Omayeletumbulo 8:20; Mateus 4:3-11.

19, 20. Okukonga ouyuki ohaku eta omauwa elipi?

¹⁹ Doshili, omahalo opambelela a puka otaa dulu okukala e na eenghono. (Ovaroma 7:19, 20) Ndele ngeenge otwa lenga ouyuki, otau ke tu amena kowii. (Epsalme 119:165) Ohole yomoule yokuhola ouyuki otai ke tu amena ngeenge hatu yelekwa tu ninge osho sha puka. (Omayeletumbulo 4:4-6) Natu dimbulukweni kutya, efimbo keshe hatu liyandje momayeleko, Satana oye ta kala omufindani. Itashi ka kala tuu shiwa oku mu kondjifa, opo Jehova a kale omufindani! — Omayeletumbulo 27:11; Jakob 4:7, 8.

²⁰ Molwaashi Ovakriste vashili ohava kongo ouyuki, ova “yadifwa noiimati youyuki, [oyo] i li po molwaJesus Kristus okufimanekifa nokuhambelelifa Kalunga.” (Ovafilippi 1:10, 11) Ohava djala ‘omunhu mupe a shitwa a fa Kalunga omouyuki nomouyapuki woshili.’ (Ovaefeso 4:24) Ova ninga vaJehova nohave mu longele, ndele ihava kala pahalo lavo vene. (Ovaroma 14:8; 1 Petrus 4:2) Eliyandjo lavo kuKalunga olo hali wilike okudiladila kwavo neenghatu davo. Itava hafifa tuu Xe yavo womeulu! — Omayeletumbulo 23:24.

[Eshangelo lopedu]

Oto dulu okuyelifa?

• Omolwashike sha fimanenena okukonga ouyuki?

• Ongahelipi Ovakriste inava wanenena tava dulu okukonga ouyuki?

• Oinima imwe ilipi i li mounyuni oyo Ovakriste ve na okuhenuka?

• Okukonga ouyuki ohaku tu amene ngahelipi?

[Efano pepandja 28]

Ounyuni owa li wa nyika oshiponga kovashikuli vaJesus

[Efano pepandja 29]

Ounona ovo hava hongwa okukala ve hole Jehova otava amenwa vaha tale koinima ya nyata

[Efano pepandja 30]

Ovaisrael vamwe mEdu lEudaneko ova li va dimbwa Jehova eshi va li va punapala

[Efano pepandja 31]

Ngaashi Jesus, Ovakriste navo ove tonde okuhenouyuki