Kala nokukonga tango ‘uuyuuki we’

“Tangotango kongeni [uukwaniilwa waKalunga, KB] nuuyuuki we, nena mbika ayihe otamu yi gwedhelwa ko.”—MAT. 6:33.

1, 2. Uuyuuki waKalunga owo oshike, nowa kankamena kushike?

“TANGOTANGO, kongeni [uukwaniilwa waKalunga, KB].” (Mat. 6:33) Ekumagidho ndika lya li lya gandjwa kuJesus Kristus mEuvitho lye lyokOndundu olyi shiwike nawa kunena kOonzapo dhaJehova. Mombinga kehe yokukalamwenyo kwetu, ohatu kambadhala okuulika kutya otu hole epangelo lyUukwaniilwa mboka notwa hala okukala aadhiginini kulyo. Ihe otu na wo okukaleka momadhiladhilo oshitopolwa oshitiyali shuutumbulilo mbuka shoka tashi ti “nuuyuuki we.” Uuyuuki waKalunga owo oshike, notashi ti shike oku wu konga tango?

² Iitya yelaka lyopetameko mbyoka tayi ti “uuyuuki” otayi vulu wo okutolokwa “uunashili.” Onkee ano, uuyuuki waKalunga owo uunashili shi ikolelela komithikampango dhe dhopaumwene. E li Omushiti, Jehova oku na uuthemba wokutula po omithikampango dhaashoka oshiwanawa naashoka oshiwinayi, shoka shi li mondjila naashoka sha puka. (Eh. 4:11) Ihe uuyuuki waKalunga kawu shi ehwata lyoompango oondhigu nenge omusholondondo gwomauthompango gaa na ehulilo. Pehala lyaashono, olya kankamena kuukwatya waJehova wa simana wuuyuuki mboka tawu endele pamwe nomaukwatya ge galwe ga simana ngaashi ohole, uunongo noonkondo. Onkee ano, uuyuuki waKalunga owa kwatathana nehalo lye nosho wo nelalakano lye. Osha kwatela mo shoka a tegelela kumboka ye na ehalo lyoku mu longela.

3. (a) Okukonga uuyuuki waKalunga tango otashi ti shike? (b) Omolwashike tu na okudhiginina omithikampango dhaJehova dhuuyuuki?

³ Okukonga tango uuyuuki waKalunga otashi ti shike? Oku shi popya paunathangwa, otashi ti okulonga ehalo lyaKalunga opo tu mu nyanyudhe. Okukonga uuyuuki we okwa kwatela mo okukambadhala okukala twi ikolelela komithikampango dhe dha gwanenena ihe hakudhetu yene. (Lesha Aaroma 12:2.) Okukalamwenyo kwa tya ngeyi okwa kwatela mo lela ekwatathano lyetu naJehova. Itashi ti otu na okuvulika koompango dhe omolwuumbanda wokugeelwa. Pehala lyaashono, ohole yetu yokuhola Kalunga ohayi tu inyengitha tu kambadhale tu mu nyanyudhe notu dhiginine omithikampango dhe, ihe hakutula po dhetu yene. Otu shi shi kutya shika osho oshinima shi li mondjila okuninga, oshinima shoka naanaa twa nuninwa okulonga. Ngaashi Jesus Kristus, Omukwaniilwa gwUukwaniilwa waKalunga, otu na okukala tu hole uuyuuki.—Heb. 1:8, 9.

4. Omolwashike shi li sha simana okukonga uuyuuki waKalunga?

⁴ Mbela osha simana shi thike peni okukonga uuyuuki waJehova? Dhiladhila koshinima shika: Emakelo lyopetameko moshikunino shaEden olya li lya kankamena kungele Adam naEva oya li taya ka taamba ko uuthemba waJehova wokutula po omithikampango nenge itaye ke wu taamba ko. (Gen. 2:17; 3:5) Sho ya ndopa okuninga ngawo, oye tu etele okumona iihuna nosho wo eso tu li oluvalo lwawo. (Rom. 5:12) Kombinga onkwawo, Oohapu dhaKalunga otadhi popi tadhi ti: ‘Omulalakaneni gwuuyuuki niilonga iiwanawa ota kala e na omwenyo, uuyuuki nesimano.’ (Omayel. 21:21) Eeno, okukonga tango uuyuuki waKalunga ohashi eta ekwatathano lyuukumwe naJehova ndyoka tali fala kehupitho lyetu.—Rom. 3:23, 24.

Oshiponga shokukala wi ishi uuyuuki

5. Otwa pumbwa okuhenuka oshiponga shini?

⁵ Mokunyolela Aakriste yokuRoma, omuyapostoli Paulus okwa li a tsu omuthindo oshiponga shoka atuheni twa pumbwa okuhenuka ngele otwa hala tu pondole mokukonga tango uuyuuki waKalunga. Mokupopya Aajuda ooyakwawo, Paulus okwa ti: ‘Ngame mwene otandi vulu oku ya hokolola kutya oye na ehwamo lyokulongela Kalunga, nonando kaye na uunongo oku shi ninga lela. [Oshoka sho inaa tseya uuyuuki waKalunga, ihe ya hala okudhika uuyuuki wawo yene, inayi igandja kohi yuuyuuki waKalunga, KB].’ (Rom. 10:2, 3) Paohapu dhaPaulus, aalongelikalunga mboka inayu uva ko uuyuuki waKalunga, molwaashoka oya li yi ipyakidhila nokukambadhala okudhika uuyuuki wawo yene.a

6. Otu na okuhenuka okukala niikala ya tya ngiini, nomolwashike?

⁶ Okutala ko iilonga yetu yokulongela Kalunga yi li ethigathano moka tatu iyelekanitha nayalwe ogwo omukalo gumwe tagu vulu oku tu fala momwigo nguka. Iikala yi li ngawo otashi vulika yi tu ningithe nuupu tu kale twi inekela unene moonkondo dhetu yene. Ihe dhoshili, ngele otwa katuka onkatu ya tya ngawo, otatu ka kala twa dhimbwa uuyuuki waJehova. (Gal. 6:3, 4) Einyengotompelo lyu uka lyokuninga oshinima shi li mondjila olyo ohole yetu yokuhola Jehova. Oonkambadhala kehe okuulika uuyuuki wetu yene otashi vulika dhi ka ningithe okupopya kwetu kutya otu mu hole ku kale kaaku na eityo.—Lesha Lukas 16:15.

7. Ongiini Jesus a li u ungaunga nuupyakadhi wokukala omuntu i ishi uuyuuki?

⁷ Jesus okwa li ti ipula naamboka “yi idhiladhilile yo yene kutya oyo aayuuki e taa dhini aantu yalwe.” Okwa li u ungaunga nuupyakadhi mbuka wokukala yi ishi uuyuuki moku ya hokololela eyele ndika a ti: “Aalumentu yaali oya yi motempeli, ya ka galikane, gumwe omufarisayi nomukwawo omufendelithi. Omufarisayi okwa thikama i ikalela nokwa galikana puye mwene e ta ti: ‘Kalunga, otandi ku hambelele, oshoka ngame inandi fa aantu yalwe: aayugi, aakolokoshi naahondeli; otandi ku hambelele wo, sho inaandi fa omufendelithi ngono. Iikulya ohandi idhilike omasiku gaali moshiwike kehe nohandi ku pe oshitimulongo shomwaayihe mbyoka nde yi likola.’ Ihe omufendelithi okwa thikama kokule ye ina vula okutala kegulu, oshoka okwa sa oluhodhi e ta ti: ‘Kalunga sila ndje ohenda, ongame omulunde!’” Opo nduno Jesus okwa ti: “Otandi mú lombwele: nguka okwa shuna kegumbo omuyuuki koshipala shaKalunga e vule mukwawo. Oshoka ngoka ti inenepeke, ota shonopekwa, naangoka ti ishonopeke, ota nenepekwa.”—Luk. 18:9-14.

Oshiponga oshikwawo osho okuninga ‘omuyuuki unene’

8, 9. Okukala “omuyuuki unene” otashi ti ngiini, notashi vulu oku tu ningitha shike?

⁸ Oshiponga oshikwawo shoka twa pumbwa okuhenuka osho shoka sha hokololwa mOmuuvithi 7:16 ngoka ta ti: ‘Ino ninga omuyuuki unene ngoye ino imonitha omunawino wa tsa pombanda, omolwashike wa hala okuhula po?’ Ngaashi sha nyolwa movelise 20, omunyoli gwOmbiimbeli a nwethwa mo okwa li a tsikile oku tu pa etompelo lyokuhenuka iikala ya tya ngawo a ti: “Oshoka kombanda yevi kaku na omuyuuki ngoka ta longo uuwanawa auke ye ita yono.” Omuntu ngoka a ningi “omuyuuki unene” oha tula po omithikampango dhuuyuuki dhe mwene nokupangula yalwe shi ikolelela kudho. Ihe nonando ongawo, okwa ndopa okundhindhilika mo kutya mokuninga ngawo, ota yeluthile omithikampango dhe kombanda yaandhoka dhaKalunga noti iyulike ye mwene omukeenuuyuuki momeho gaKalunga.

⁹ Okukala “omuyuuki unene,” nenge ngaashi Oombiimbeli dhimwe tadhi shi toloka, okukala “omuyuuki sha pitilila,” otashi vulika nokuli shi tu ningithe tu tule momalimbililo omukalo gwaJehova gwokuungaunga niinima. Nonando ongawo, otwa pumbwa okudhimbulukwa kutya, ngele otwa tula momalimbililo uuyuuki womatokolo gaJehova, otashi ti kutya otatu tameke okutula omithikampango dhetu dhuuyuuki pombanda yaandhoka dhaJehova. Shika osha fa twa tula Jehova mompangu noku mu pangula pamithikampango dhetu dhaashoka shi li mondjila naashoka sha puka. Ihe Jehova oye ngoka e na uuthemba wokutula po omithikampango dhuuyuuki, ihe hatse!—Rom. 14:10.

10. Ngaashi moshiningwanima shaJob, oshike tashi vulu oku tu ningitha tu pangule Kalunga?

¹⁰ Nonando kapu na gumwe gwomutse ta ka kala a hala okupangula Kalunga owina, okwaahagwanenena kwetu otaku vulu oku shi tu ningitha. Shika otashi vulika shi ningwe nuupu ngele tatu mono oshinima shontumba shoka twa tala ko kaashi li pauyuuki nenge twa mona iihuna paumwene. Nokuli nomulumentu omudhiginini Job okwa li a ningi epuko ndika. Tango Job okwa li a hokololwa e li “omukeenashipo nomuyuuki. Okwa li ha tila Kalunga noha tondo uuwinayi.” (Job 1:1) Ihe konima yaashoka Job okwa li a tsakanekwa komaudhigu ga landulathana ngoka a li e wete kaage li pauyuuki. Shika osha ningitha Job ‘i ininge ye mwene omuyuuki nokupa Kalunga uusama.’ (Job 32:1, 2) Etaloko lyaJob olya li li na okupukululwa. Onkee ano, katu na okulimbililwa ngele omathimbo gamwe tashi vulika twi iyadha monkalo ya fa ndjoka. Ngele shoka osha ningwa, oshike tashi ke tu kwathela tu lundulule okudhiladhila kwetu?

Katu shi aluhe uushili wi ihwa po

11, 12. (a) Ngele otu uvite kutya oshinima shontumba kashi li pauyuuki, otu na okudhimbulukwa shike? (b) Omolwashike tashi vulika gumwe a kale u uvite kutya ethaneko lyaJesus lyaalongi yomeyana lyomiviinu otali thaneke oshinima shaa he li pauyuuki?

¹¹ Oshinima shotango tu na okudhimbulukwa osho kutya katu shi aluhe uushili wi ihwa po. Shoka osha li shoshili moshinima shaJob. Ka li e shi sha kombinga yiigongi yaayengeli yaKalunga mbyoka ya ningwa megulu moka Satana a li e mu lundile. (Job 1:7-12; 2:1-6) Job ka li e shi ndhindhilika kutya uupyakadhi we owa li tawu etwa lelalela kuSatana. Dhoshili, katu shi naanaa ngele Job okwa li e shi nokuli kutya Satana oye lye naanaa. Onkee ano, okwa li a dhiladhila papuko kutya omaupyakadhi ge oga li tage etwa kuKalunga. Eeno, oshipu okuya pehulithodhiladhilo lya puka ngele katu shi naanaa uushili wi ihwa po.

¹² Pashiholelwa, dhiladhila keyele lyaJesus lyaaniilonga yomeyana lyomiviinu. (Lesha Mateus 20:8-16.) Mpaka Jesus okwa hokolola omunegumbo ngoka a futu aaniilonga ayehe omwaalu gwiimaliwa gu thike pamwe, kutya nduno oya longa uule wesiku alihe nenge owili yimwe owala. Owu uvite ngiini kombinga yaashoka? Mbela otashi monika shi li pauyuuki? Otashi vulika potango wu uvitile aalongi ohenda mboka ya longa esiku alihe momutenya mokudhiladhila kutya oya li yi ilongela okufutwa oshindji. Shi ikwatelela kehulithodhiladhilo ndyoka, omunegumbo otashi vulika a talike ko kee na ohole nokee na uuyuuki. Nokuli neyamukulo lye kaalongi mboka ya li taya nyenyeta otali mu monikitha a fa ta longitha nayi oonkondopangelo dhe. Mbela otu na ngaa uushili wi ihwa po?

13. Etaloko lilwe lini tatu vulu okulongitha shi na ko nasha neyele lyaJesus lyaaniilonga yomeyana lyomiviinu?

¹³ Natu konakone eyele ndika pataloko lilwe. Nopwaahe na omalimbililo, omunegumbo gwomeyele okwa li e shi shi kutya aantu ayehe mbaka oya pumbwa okupalutha omaukwanegumbo gawo. Pethimbo lyaJesus, aaniilonga yomepya oya li haya futwa esiku kehe. Omaukwanegumbo gawo oga li gi ikolelela mondjambi ndjoka haya futwa esiku kehe. Tu na shika momadhiladhilo, dhiladhila kombinga yonkalo yaamboka omunegumbo a li a pe iilonga kwa toka nomolwaashoka ya longo owala uule wowili yimwe. Otashi vulika kaya li taya ka vula okupalutha uukwanegumbo wawo nondjambi ndjoka yowili yimwe, ihe oya li ye na ehalo lyokulonga noya kala ya tegelela esiku alihe opo ya mone iilonga. (Mat. 20:1-7) Kasha li epuko lyawo sho inaaye ethelwa ya longe esiku alihe. Kapu na sha shoka tashi ulike kutya oya henuka iilonga owina. Dhiladhila ando wa li wu na okutegelela esiku alihe, wu shi shi kutya yalwe oyi ikolelela mwaashoka to ka mona esiku ndyoka. Ando inoo kala tuu wu na olupandu okumona iilonga esiku ndyoka, noitashi ka kala tuu oshikumithi oku ka mona ofuto ya gwana okupalutha uukwanegumbo woye!

14. Oshiilongomwa shini sha simana tatu ilongo meyele lyeyana lyomiviinu?

¹⁴ Ngashingeyi natu talulule oonkatu ndhoka dha katukwa komunegumbo. Ka li a futu nando ogumwe ondjambi yi li pevi. Pehala lyaashono, okwa li a yakula aalongi ayehe ongaashi ya li ye na uuthemba wokuhupa. Molwaashoka opwa li aantu oyendji ya hala iilonga, omusamane ngoka okwa li ta vulu okufuta aaniilonga mboka iimaliwa iishona. Ihe nando ongawo, hasho a li a ningi ngaaka. Aalongi ye ayehe oya li ya shuna komagumbo gawo ye na sha gwana oku ka palutha omaukwanegumbo gawo. Mokukaleka momadhiladhilo uuyelele mbuka wa gwedhwa po, otashi vulika wu lundulule etaloko lyetu shi na ko nasha noonkatu dhe. Etokolo lye olya li lyopahole, ihe kali shi lyokulongitha nayi oonkondopangelo dhe. Oshiilongomwa shini tatu vulu okwiilonga mwaashika? Otatu vulu okwiilonga kutya okutala owala kuushili wumwe otashi vulu oku tu ningitha tu ye pehulithodhiladhilo lya puka. Dhoshili, eyele ndika otali tsu omuthindo kutya uuyuuki waKalunga owa dhenga mbanda noinawu kankamena owala koompango dhopaveta nosho wo kokukala wi ilongelwa kaantu.

Etaloko lyetu otashi vulika li kale lya goyoka nenge lya ngambekwa

15. Omolwashike tashi vulika etaloko lyetu lyaashoka shi li pauyuuki li kale lya goyoka nenge lya ngambekwa?

¹⁵ Oshinima oshitiyali tu na okudhimbulukwa uuna twa taalelwa konkalo tayi monika ya fa kaayi li pauyuuki ooshoka kutya etaloko lyetu otashi vulika li kale lya goyoka nenge lya ngambekwa. Otashi vulika li goyokithwe kokwaahagwanenena, kokatongotongo nenge konkalo yeputuko. Osha ngambekwa wo kokwaahavula kwetu okuyoolola omainyengotompelo gaantu nokutseya kutya oshike shi li naanaa momitima dhaantu. Mepingathano naashoka, Jehova naJesus ayehe kaye na omangambeko ga tya ngawo.—Omayel. 24:12; Mat. 9:4; Luk. 5:22.

16, 17. Omolwashike mbela Jehova inaa tula miilonga ompango ye yi na ko nasha noluhondelo sho David a yono naBatseba?

¹⁶ Natu konakoneni ehokololo kombinga yaasho David a li a hondele naBatseba. (2 Sam. 11:2-5) Shi ikolelela kompango yaMoses, oya li yi ilongela okudhipagwa. (Lev. 20:10; Deut. 22:22) Nonando Jehova okwa li e ya geele, ka li a tula miilonga ompango ye mwene. Mbela shoka osha li kaashi li pauyuuki kombinga yaJehova? Mbela Jehova okwa li u ulike egamombinga kuDavid nokuyona po oompango dhuuyuuki dhe mwene? Aaleshi yamwe yOmbiimbeli osho ya li ya dhiladhila ngaaka.

¹⁷ Nonando ongaaka, Jehova oye a li a gandja ompango ndjika yi na ko nasha noluhondelo kaapanguli inaaya gwanenena, mboka ya li ihaaya vulu okutala momitima. Nonando oya li ya ngambekwa, ompango ndjika oye shi ningi tashi vulika kuyo okutokola aantu aluhe pamithikampango dha faathana. Kombinga onkwawo, Jehova oha vulu okutala momitima dhaantu. (Gen. 18:25; 1 Ondjal. 29:17) Onkee ano, katu na okukala twa tegelela kutya Jehova okwa li ta ka kala a ngambekwa kompango ndjoka a totele po aapanguli inaaya gwanenena. Ngele osho a li ngaaka, ando mbela shoka itashi ka kala sha fa okuthiminika omuntu ngoka e wete ko nawa a zale omakende gokomeho ngoka ga nuninwa aantu mboka kaye wete ko nawa? Jehova okwa li ta vulu okutala momutima gwaDavid nosho wo gwaBatseba nokumona eitedhululo lyawo lyolela. Omolwaashoka okwa li e ya pangula pamukalo gwohenda nogwohole.

Tsikila nokukonga uuyuuki waJehova

18, 19. Oshike tashi ke tu kwathela twaaha pangule nando Jehova pamithikampango dhuuyuuki wetu yene?

¹⁸ Onkee ano, ngele pomathimbo gamwe tatu mono oshinima shoka tu uvite kutya kashi li pauyuuki kombinga yaJehova, kutya nduno otwe shi lesha momahokololo gOmbiimbeli nenge otwe shi mona monkalamwenyo yetu, inatu mu pangula nando pamithikampango dhetu yene dhuuyuuki. Dhimbulukwa kutya katu na aluhe uushili wi ihwa po nosho wo kutya etaloko lyetu otashi vulika li kale lya goyoka nenge olya ngambekwa. Ino dhimbwa nando kutya “ondjahi yomuntu ihayi longo shoka shu uka koshipala shaKalunga.” (Jak. 1:19, 20) Momukalo nguka, omitima dhetu itadhi ka “tsa ondumbo nOMUWA” nandonando.—Omayel. 19:3.

¹⁹ Ngaashi Jesus, natu kaleni aluhe twa zimina kutya Jehova oye awike e na uuthemba wokutula po omithikampango dhaashoka shi li pauyuuki noshiwanawa. (Mark. 10:17, 18) Kambadhala okumona “ontseyo yashili” yomithikampango dhe. (Rom. 10:2, NW; 2 Tim. 3:7, NW) Ngele tatu dhi taamba nokukaleka onkalamwenyo yetu metsokumwe nehalo lyaJehova, otatu ulike kutya otatu kongo tango “uuyuuki we.”—Mat. 6:33.

[Enyolo lyopevi]

Oto dhimbulukwa?

• Omolwashike shi li sha simana okukonga tango uuyuuki waJehova?

• Iiponga yini iyali mbyoka twa pumbwa okuhenuka?

• Ongiini tatu vulu okukonga tango uuyuuki waKalunga?

[Ethano pepandja 17]

Oshiilongomwa shini twi ilonga meyele lyaJesus lyaalumentu yaali mboka ya li taya galikana motempeli?

[Ethano pepandja 18]

Mbela osha li kaashi li pauyuuki okufuta aaniilonga mboka ya longa owili yimwe ayike shi thike pamwe naamboka ya li ya longo esiku alihe?