Kala wu hole shoka shu uka nomutima gwoye aguhe

“Ou hole shoka shu uka.”—Eps. 45:7.

1. Oshike tashi ke tu kwathela tu ende “nondjila yu uka”?

JEHOVA ota wilike oshigwana she shi ‘ende nondjila yu uka’ okupitila mOohapu dhe nomombepo ye ondjapuki. (Eps. 23:3) Ihe molwaashoka inatu gwanenena, otu na egamo lyokupuguma mo mondjila ndjoka. Opo tu galukile kokulonga shoka shu uka, otashi pula oonkambadhala. Oshike tashi ke tu kwathela tu pondole? Ngaashi Jesus, otu na okukala tu hole okulonga shoka shu uka.—Lesha Episalomi 45:7.

2. ‘Ondjila yu uka’ oshike?

² ‘Ondjila yu uka’ oshike? Ondjila oyo oshinima shoka hashi endwa kaaendi yokolupadhi. “Ondjila” yu uka otayi wilikwa komithikampango dhaJehova dhuuyuuki. MOshihebeli nomOshigreka oshitya “uuyuuki” otashi popi kombinga yoshinima shoka “shu uka,” shoka tashi ti okudhiginina omithikampango dhopamikalo. Molwaashoka Jehova oye “ehala lyuuyuuki,” aalongeli ye oya nyanyukwa okukonga ekwatho kuye ya mone ondjila yu uka yopamikalo ndjoka ye na okweenda nayo.—Jer. 50:7, KB.

3. Ongiini tatu vulu okwiilonga oshindji kombinga yuuyuuki waKalunga?

³ Otatu ka kala owala twa hokiwa kuKalunga ngele otwa ningi oonkambadhala nomutima gwetu aguhe tu tse kumwe nomithikampango dhe dhuuyuuki. (Deut. 32:4) Shoka ohashi tameke nokwiilonga ashihe shoka tatu vulu kombinga ye mOohapu dhe, Ombiimbeli. Shi thike ngaa mpoka tatu ilongo kombinga ye, opo ngaa pu thike tatu hedha popielela naye, nopo wo tapu ka kala pu thike okukala tu hole uuyuuki we. (Jak. 4:8) Otu na wo okutaamba ko ewiliko lyOohapu dhe dha nwethwa mo uuna tatu ningi omatokolo ga simana monkalamwenyo yetu.

Natu kongeni uuyuuki waKalunga

4. Oshike sha kwatelwa mokukonga uuyuuki waKalunga?

⁴ Lesha Mateus 6:33. Okukonga uuyuuki waKalunga inaku kwatela mo owala okulongitha ethimbo lyetu mokuuvitha onkundana ombwanawa yUukwaniilwa. Opo iilonga yetu iiyapuki yi taambiwe ko kuJehova, eihumbato lyetu lyesiku kehe oli na okukala tali tsu kumwe nomithikampango dhe dha dhenga mbanda. Oshike mbela shi na okuningwa kwaayehe mboka taya kongo uuyuuki waJehova? Oye na ‘okuzala omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.’—Ef. 4:24.

5. Oshike tashi ke tu kwathela tu sinde etekomukumo?

⁵ Sho tatu kambadhala okukala pamithikampango dhaKalunga dhuuyuuki, otashi vulika omathimbo gamwe tu teke omukumo molwomapuko getu. Oshike tashi vulu oku tu kwathela tu sinde uunkundi wokuteka omukumo notu ilonge okukala tu hole uuyuuki nohatu wu longo? (Omayel. 24:10) Otu na aluhe okukala hatu popi naJehova megalikano “noomwenyo dha yela neinekelo lya kola.” (Heb. 10:19-22) Kutya nduno otu li Aakriste aagwayekwa nenge otu na etegameno lyokukala kombanda yevi, otu na okukala neitaalo tali longo mekuliloyambo lyaJesus Kristus nomiilonga ye e li Omusaaseri gwetu Omukuluntu. (Rom. 5:8; Heb. 4:14-16) Moshitopolwa shotangotango shoshifo shika omwa li mwa gandjwa ethaneko kombinga yuuwanawa mboka we etwa kokutika kwombinzi yaJesus. (1 Joh. 1:6, 7) Oshitopolwa osha ti: “Oshili oyo kutya ngele oshinima oshitiligane tye tashi talelwa kuuyelele mekende etiligane, ohashi monika sha fa oshitokele; ano nonando uulunde wetu ohau kala wa tiligana tye, uuna Kalunga te wu talele mombinzi yaKristus ya tika, ohe wu tala ko uutokele.” (Juli 1879, epandja 6) Jehova ine tu ningila tuu esiloshimpwiyu ekumithi okupitila mekuliloyambo lyOmwana omuholike!—Jes. 1:18.

Konakona iikondjitho yoye yopambepo

6. Omolwashike sha simanenena tu kale tatu konakona iikondjitho yetu yopambepo?

⁶ Otwa pumbwa okukala twa zala ‘uuyuuki, u ninge ehuyanza poontulo dhetu,’ molwaashoka owu li oshikondjitho shopambepo sha simanenena sha za kuKalunga. (Ef. 6:11, 14) Kutya nduno opo twi iyapulile Jehova nenge otwe mu longela nale iilonga iiyapuki uule woomvula omilongo, osha simanenena tu konakone iikondjitho yetu yopambepo esiku kehe. Omolwashike mbela? Omolwaashoka Ondiaboli noompwidhuli dhayo oyu umbilwa kombanda yevi. (Eh. 12:7-12) Satana okwa geya noku shi shi kutya ethimbo lye oli li ko eshona. Onkee ano, ota ponokele unene oshigwana shaKalunga. Mbela otu uvite ko kutya omolwashike sha simana okukala twa zala ‘ehuyanza lyuuyuuki’?

7. Otatu ki ihumbata ngiini ngele otu uvite ko kutya otwa pumbwa ‘ehuyanza lyuuyuuki’?

⁷ Ehuyanza ohali gamene omutima gwo gwene gwene. Molwaashoka otwa valwa inaatu gwanenena, omitima dhetu dhopathaneko odhi na egamo lyokukala dhi na omakoto nodha yonuka. (Jer. 17:9) Molwaashoka omutima gwetu ogu na egamo okulonga shoka sha puka, osha simanenena tu gu dheule notu gu pe egeeloputudho. (Gen. 8:21) Ngele otu uvite ko kutya otwa pumbwa ‘ehuyanza lyuuyuuki,’ itatu ke li hula mo pakathimbo opo tu hogolole okunyanyudhwa kwaashoka Kalunga e tonde; noitatu ka pitika tu inyanyudhe nokukutha ombinga miinima ya puka. Itatu ka longitha ethimbo olindji mokutala iinima kaayi na oshilonga ko-TV. Pehala lyaashono, otatu ka tsikila okuninga shoka tashi nyanyudha Jehova. Nokuli nonando otu punduke ngaashingeyi mokwiigandja komadhiladhilo gopanyama giinima yaahe li pauyuuki, otatu ka yambuka po ishewe kekwatho lyaJehova.—Lesha Omayeletumbulo 24:16.

8. Omolwashike twa pumbwa ‘eitaalo ongehuyanza’?

⁸ ‘Eitaalo ongehuyanza’ oli li limwe lyomiikondjitho yetu yopambepo. Ohali tu ningitha tu vule “okudhima nalyo iikuti ayihe ya hwama omulilo mbyoka tayi umbwa kuMwiinayi.” (Ef. 6:16) Eitaalo nosho wo okukala tu hole Jehova nomutima aguhe ohayi tu kwathele wo tu longe uuyuuki notu kale mondjila ndjoka tayi fala komwenyo gwaaluhe. Shi thike ngaa mpoka tatu ilongo okukala tu hole Jehova, opo ngaa pu thike tatu kala twa lenga omithikampango dhe dhuuyuuki. Ihe ongiini shi na ko nasha neiyuvo lyetu? Ohali tu kwathele ngiini mokuninga oonkambadhala kwetu okukala tu hole uuyuuki?

Natu kaleni tu na eiyuvo ewanawa

9. Ongiini hatu mono uuwanawa mokukala tu na eiyuvo ewanawa?

⁹ Peninginitho lyetu otwa pula Jehova e tu pe “eiyuvo ewanawa.” (1 Pet. 3:21) Molwaashoka otu na eitaalo tali longo mekuliloyambo, ombinzi yaJesus otayi dhimi po oondjo dhetu, nokungawo, otatu nyanyukilwa okukala twa yogoka koshipala shaKalunga. Ihe opo tu kale twa yogoka koshipala shaKalunga, otwa pumbwa okukala tu na eiyuvo ewanawa. Ngele eiyuvo lyetu omathimbo gamwe ohali kala tali tu pangula noku tu londodha, otu na okukala twa nyanyukwa sho tali longo momukalo gu uka. Edheulo lya tya ngaaka otali ulike kutya eiyuvo lyetu li na ko nasha nokusimaneka omithikampango dhaJehova dhuuyuuki inali sa. (1 Tim. 4:2) Ihe eiyuvo otali vulu okudhana onkandangala ya gwedhwa po kwaamboka ya hala okukala ye hole uuyuuki.

10, 11. (a) Hokolola oshimoniwa shoka tashi ulike kutya omolwashike tu na okupulakena eiyuvo lyetu lya dheulwa kOmbiimbeli. (b) Omolwashike ohole yokuhola uuyuuki tayi vulu oku tu etela enyanyu?

¹⁰ Ngele tatu longo shoka sha puka, eiyuvo lyetu otali vulu oku tu pangula nenge oku tu hepeka. Omugundjuka gumwe okwa li a puguma mo ‘mondjila yu uka.’ Okwa li a pikwa kokutala omathano giipala nokwa li a tameke okuhila epangwe. Okwa li hi ipe uusama ngele e li pokugongala nokwa li u uvite a fa omuniihelele ngele ta kutha ombinga miilonga yomomapya, onkee ano, okwe etha po okukutha ombinga momaipyakidhilo ngoka gopaKriste. Okwa ti: “Ihe kanda li ndi shi kutya eiyuvo lyandje otali kala tali nyenyetele ndje.” Okwa gwedha ko a ti: “Onda kala monkalamwenyo ya nika uugoya uule woomvula ne lwaampono.” Opo nduno okwa li a tameke okudhiladhila kombinga yokugalukila moshili. Ihe nonando okwa li ta dhiladhila kutya Jehova ita ka pulakena egalikano lye, okwa li a galikana nokupula edhiminopo. Konima yominute omugoyi lwaampono, yina okwa li e mu talele po nokwe mu ladhipike a kale ha yi kokugongala. Okwa li a yi kOshinyanga shUukwaniilwa nokwa pula omukuluntugongalo a konakone naye. Mokweendela ko kwethimbo, okwa ninginithwa nokwa li a pandula Jehova sho a hupitha omwenyo gwe.

¹¹ Mbela inatu mona kutya okulonga shoka shu uka ohaku eta enyanyu enene? Sho tatu ilongo okukala tu hole uuyuuki noku wu tula miilonga lelalela, otatu ka mona enyanyu olindji mokulonga shoka tashi nyanyudha Tate yetu gwomegulu. Dhiladhila owala kwaashoka. Esiku otali ya uuna aantu ayehe taya ka kala ye na eiyuvo ewanawa notaye ku ulika lelalela kutya oye li oshifetha shaKalunga. Onkee ano, natu kokeke ohole yokuhola uuyuuki muule womitima dhetu nokunyanyudha Jehova.—Omayel. 23:15, 16.

12, 13. Ongiini tatu vulu okudheula eiyuvo lyetu?

¹² Oshike tu na okuninga opo tu dheule eiyuvo lyetu? Uuna tatu konakona Omanyolo niileshomwa yetu ya kankamena kOmbiimbeli, osha simana tu dhimbulukwe kutya “omwenyo gwomuyuuki ohagu ipyakidhile neyamukulo.” (Omayel. 15:28) Dhiladhila nkene shoka tashi ke tu etela uuwanawa ngele tatu ningi ehogololo li na ko nasha niilonga yokwiikongela omboloto. Ngele iilonga yontumba otayi kondjithathana thiluthilu niitegelelwa yopamanyolo, oyendji yomutse ohatu vulika nziya komayele ngoka ga gandjwa okupitila mongundu yomupiya omudhiginini nomunandunge. Ihe ngele katu na uushili kutya iilonga yontumba otayi opalele Omukriste nenge hasho, otu na okukonga uuyelele tu tale kutya omakotampango gOmbiimbeli otaga ti shike shi na ko nasha niilonga mbyoka nokuga konakona pamwe negalikano.a Otu na wo okuninga sha faathana ngele tashi ya pomakotampango ngoka tage tu kwathele tu henuke okweehameka omaiyuvo gayalwe. (1 Kor. 10:31-33) Otu na unene tuu okwiipula nomakotampango ngoka ga kwatela mo ekwatathano lyetu naKalunga. Ngele Jehova oku li gwoshili kutse, otatu ki ipula tango tatu ti: ‘Mbela ngele onda longo iilonga mbika otashi ka alula Jehova noku mu ehameka?’—Eps. 78:40, 41.

¹³ Ngele tatu ilongekidhile Ekonakono lyOshungolangelo nenge Ekonakonombiimbeli lyEgongalo, otu na okudhimbulukwa kutya otwa pumbwa okutedhatedha kombinga yuuyelele mboka wa gandjwa. Mbela ohatu tende owala mbalambala eyamukulo lyepulo ndyoka e tatu yi kokatendo okakwawo? Okukonakona komukalo gwa tya ngaaka itaku ka ninga ohole yetu yokuhola shoka shu uka yi kale yomuule nenge itaku ka ninga eiyuvo lyetu li kale li na uumbanda okulonga shoka sha puka. Opo tu kale tu hole shoka shu uka, otu na okukonakona nuulaadhi nokutedhatedha kombinga yaashoka tatu lesha mOohapu dhaKalunga. Katu na okweenda ondjila ofupi ngele tatu ilongo okukala tu hole uuyuuki nomutima gwetu aguhe.

Natu kaleni twa sa ondjala nenota lyuuyuuki

14. Jehova Kalunga naJesus Kristus oya hala tu kale tu uvite ngiini shi na ko nasha niilonga yetu iiyapuki?

¹⁴ Jehova Kalunga naJesus Kristus oya hala tu kale twa nyanyukwa sho tatu longo iilonga yetu iiyapuki. Mbela oshike tashi vulu oku tu etela enyanyu ndyoka? Ohole yokuhola okulonga shoka shu uka. MEuvitho lye lyokOndundu, Jesus okwa ti: “Aanelago oomboka ya sa ondjala noya sa enota lyuuyuuki, oshoka oyo taa ka kutithwa.” (Mat. 5:6) Oohapu ndhoka mbela otadhi ti shike kwaamboka ya hala okukala ye hole shoka shu uka?

15, 16. Omomikalo dhini mboka ya sa enota nondjala yuuyuuki taya ka kutithwa?

¹⁵ Uuyuni mbuka tu li muwo otawu pangelwa komuhindadhi. (1 Joh. 5:19) Ngele tatu lesha oshifokundaneki moshilongo kehe, ohatu lesha mo oonkundana kombinga yiilonga yonyanya noyelongithonkondo ya ningwa momukalo inaagu monika nale. Aantu aayuuki oya nyengwa okudhiladhila kombinga yonyanya ndjoka tayi ningilwa aantu mpoka yi thike. (Omuuv. 8:9) Tu li aantu mboka ye hole Jehova, otu shi kutya oha nyanyukilwa owala mboka ya sa ondjala nenota lyopambepo lyokwiilonga uuyuuki. Masiku aakolokoshi otaya ka hanagulwa po naamboka ye hole uuyuuki itaya ka kala we yu uvite oothina ndhoka hadhi etithwa kwaamboka ihaaya longo ehalo lyaKalunga. (2 Pet. 2:7, 8) Itatu ka kala tuu twa pepelelwa!

¹⁶ Tu li aapiya yaJehova naalanduli yaJesus Kristus, otu shi shi kutya mboka ya sa ondjala noya sa enota lyuuyuuki “otaa ka kutithwa.” Otaya ka kutithwa lela okupitila melongekidho lyaKalunga lyegulu epe nevi epe moka “tamu ka kala uuyuuki.” (2 Pet. 3:13) Ano inatu teka omukumo nenge tu kumithwe kethiminiko nokomiyonena ndhoka tadhi imbi aantu ya longe uuyuuki muuyuni mbuka waSatana. (Omuuv. 5:8) Jehova, Omukombandambanda oku shi shi shoka tashi ningwa nota ka hupitha masiku mboka ye hole uuyuuki.

Mona uuwanawa mokukala wu hole shoka shu uka

17. Omauwanawa gamwe geni haga zi mokulonga uuyuuki?

¹⁷ Episalomi 146:8 otali tsu omuthindo uuwanawa wa dhenga mbanda wu na ko nasha nokweenda mondjila yuuyuuki. Omupisalomi okwi imbi ta ti: ‘Omuwa okwa hokwa aayuuki.’ (KB) Dhiladhila owala kwaashoka. Omunamapangelo gweshito alihe oku tu hole molwaashoka tu hole uuyuuki. Molwaashoka Jehova oku tu hole, otu na einekelo kutya ote ke tu pa shoka twa pumbwa ngele tatu tsikile okukonga tango Uukwaniilwa we monkalamwenyo yetu. (Lesha Episalomi 37:25; Omayeletumbulo 10:3.) Hugunina, muuyuni auhe otamu ka kala aantu mboka ye hole uuyuuki. (Omayel. 13:22) Oyendji yomoshigwana shaKalunga, mboka haya longo uuyuuki otaya ka nyanyukilwa noonkondo onkalamwenyo kaayi na ehulilo moparadisa ombwanawa kombanda yevi. Nokuli nongashingeyi mboka ye hole uuyuuki waKalunga otaya nyanyukilwa ombili yokomutima ndjoka tayi humitha komeho uukumwe momaukwanegumbo gawo nomomagongalo gawo.—Fil. 4:6, 7.

18. Iinima iiwanawa yini tatu vulu okuninga manga twa tegelela esiku lyaJehova?

¹⁸ Manga twa tegelela esiku enene lyaJehova li thike, otu na okutsikila okukonga uuyuuki we. (Sef. 2:2, 3) Onkee ano, natu kale tu na ohole yashili yokuhola omithikampango dhaJehova Kalunga dhuuyuuki. Shika osha kwatela mo okukala twa zala ‘ehuyanza lyuuyuuki’ lya kola opo li gamene omutima gwetu gwopathaneko. Otwa pumbwa wo okukala tu na eiyuvo ewanawa ndyoka tali ke tu etela enyanyu notali ka nyanyudha omutima gwaKalunga.—Omayel. 27:11.

19. Otu na okukala twa tokola toko okuninga shike, noshike tatu ka kundathana moshitopolwa tashi landula?

¹⁹ Jehova “ota tonatele uuyuni auhe, a nkondopaleke mboka ye na omitima dhe mu inekela.” (2 Ondjal. 16:9) Oohapu ndhoka itadhi tu hekeleke tuu sho tatu longo shoka shi li mondjila muuyuni mbuka wu udha omakuyunguto, elongithonkondo, nosho wo uukolokoshi! Dhoshili, omithikampango dhuuyuuki otashi vulika tadhi limbilike oyendji mboka inaayi itaala muKalunga. Ihe otatu imonene uuwanawa ngele tatu kakatele komithikampango dhaJehova dhuuyuuki. (Jes. 48:17; 1 Pet. 4:4) Onkee ano, natu kaleni twa tokola toko tu tsikileni okumona enyanyu mokukala tu hole uuyuuki noku wu tula miilonga nomutima aguhe. Ihe oku shi ninga nomutima aguhe okwa kwatela mo wo okutonda shoka inaashu uka. Oshitopolwa tashi landula otashi ke tu ulukila kutya shika otashi ti ngiini.

[Enyolo lyopevi]

Oto yamukula ngiini?

• Omolwashike okuulika olupandu omolwekuliloyambo kwa pumbiwa opo tu kale tu hole uuyuuki?

• Omolwashike sha simanenena tu kale twa zala ‘ehuyanza lyuuyuuki’?

• Ongiini tatu vulu okudheula eiyuvo lyetu?

[Ethano pepandja 26]

Eiyuvo lya dheulwa ohali tu kwathele tu kandule po omaupyakadhi ge na ko nasha nomapulo kombinga yiilonga