Elelo li na sha nokuwanifwa kwelalakano laKalunga

“[Kalunga] ou ta longo aishe payukifo lehalo laye mwene.” — OVAEFESO 1:11.

1. Omolwashike omaongalo aeshe Eendombwedi daJehova taa ka ongala mo 12 Aprili 2006?

METITATU konguloshi, mo 12 Aprili 2006, ovanhu omamiliyona 16 lwaapo otava ka ongala opo va dane Edimbuluko lOuvalelo wOmwene. Meenhele davo dokwoongalela otamu ka kala oitaafula oko taku ka kala omungome inau ya onhafi, oo tau faneke olutu laKristus, nosho yo omaviinyu matilyana, oo taa faneke ohonde yaye ya tika. Pexulilo loshipopiwa osho tashi ka yandjwa nelalakano lokuyelifa eityo lEdimbuluko lefyo laJesus, omadidiliko oo otae ke litambekidwa kwaaveshe ovo tava ka kala po; tete otaku ka yandjwa omungome, opo nee omaviinyu taa xuuninwa. Ndelenee momaongalo amwe Eendombwedi daJehova otamu ka kala omuvalu munininini waavo tava ka kufa ombinga mokulya nokunwa omadidiliko oo. Ndele momaongalo mahapu kamu na ovo hava kufa ombinga mokulya nokunwa omadidiliko oo. Mbela omolwashike Ovakriste vanini ovo ve na eteelelo lomeulu ovo ashike hava kufa ombinga mokulya nokunwa omadidiliko, ofimbo Ovakriste vakwao vahapu, ovo ve na eteelelo loku ka kala nomwenyo fiyo alushe kombada yedu, ihava kufa ombinga?

2, 3. (a) Ongahelipi Jehova a li a hovela okushita oinima metwokumwe nelalakano laye? (b) Onelalakano lashike Jehova a li a shita edu nosho yo ovanhu?

² Jehova oKalunga komalalakano. Ndele opo a wanife po omalalakano aye, oha “longo aishe payukifo lehalo laye mwene.” (Ovaefeso 1:11) Tete okwa shita Omona waye ewifa. (Johannes 1:1, 14; Ehololo 3:14) Opo nee okupitila mOmona waye oo, okwa shita ovanamati vaye vopamhepo, nohauxuuninwa okwa shita ounyuni aushe, mwa kwatelwa edu nosho yo ovanhu ovo ve li kulo. — Job 38:4, 7; Epsalme 103:19-21; Johannes 1:2, 3; Ovakolossi 1:15, 16.

³ Jehova ina shita edu li kale onhele yokuyeleka ovanhu opo a tale ovo va wana oku ka ninga ovanamati vaye vopamhepo meulu, ngaashi hashi hongwa keengeleka dihapu dOukwakriste. Okwe li shita e na elalakano lokondadalunde momadiladilo, “li kalwe” kovanhu. (Jesaja 45:18; Epsalme 115:16) Edu alishe okwa li li na okuninga oparadisa nokuyadifwa ovanhu ovayuki, ovo va li tave ke li longa noku li fila oshisho. Ovalihomboli votete kava li va timaumbwilifwa nandenande shi na sha noku ka ya meulu konahiya. — Genesis 1:26-28; 2:7, 8, 15.

Satana okwa ya olunyala mokuwanifwa kwelalakano laJehova

4. Ongahelipi onghedi yaJehova yokupangela ya tulwa momalimbililo pehovelo londjokonona yovanhu?

⁴ Omonamati umwe wopamhepo waKalunga okwa li e mu tukululila oshibofa nokwa li a tokola okuya moshipala elalakano laKalunga, mokulongifa nai emanguluko laye lokuninga omatokolo olo a li a pewa kuKalunga. Okwa nyona po ombili oyo ya li i na okukala i niwe kwaaveshe ovo hava dulika nehalo liwa kounamapangelo waJehova. Satana okwa li a heka ovalihomboli votete va kale va manguluka ko kuKalunga. (Genesis 3:1-6) Satana ka li a patana kutya Jehova omunaenghono, ndele okwa tula momalimbililo onghedi yaYe yokupangela nosho yo oufemba waYe wokukala omupangeli. Kungaha, omhata ya fimanenena i na sha nounamapangelo waJehova oya li ya pendulwa kombada yedu, pehovelo londjokonona yovanhu.

5. Omhata onhivali ilipi ya li ya pendulwa, noudiinini woolyelye wa li wa tulwa momalimbililo?

⁵ Satana okwa li yo a pendula omhata onhivali ya pambafana naayo younamapangelo waJehova pefimbo laJob. Okwa li a tula momalimbililo omalinyengotomheno oishitwa yaJehova e na sha nokudulika kuYe nosho yo oku mu longela. Satana okwa ti kutya oishitwa yaJehova otai mu longele ashike omolwomatomheno okulihola mwene, nosho yo kutya ngeenge oya yelekwa, otai ke liteeka po Jehova. (Job 1:7-11; 2:4, 5) Nonande omhata oyo oya li ya pendulwa shi na sha novapiya vaJehova vopanhu, oya kwatela mo yo ovanamati vaye vopamhepo nosho yo Omona waye ewifa.

6. Ongahelipi Jehova a ulika kutya oku li omudiinini shi na sha nomalalakano aye nonokutya oha kala metwokumwe neityo ledina laye?

⁶ Molwaashi Jehova omudiinini shi na sha nelalakano laye noha kala metwokumwe neityo ledina laye, okwa ninga Omuprofeti nOmuxupifi.a Okwa li a lombwela Satana a ti: “Ame ohandi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove to ke mu twa moshififinwa.” (Genesis 3:15) Okupitila mOludalo ‘lomwalikadi’ waye ile oshitukulwa shehangano laye shomeulu, Jehova okwa li ta ka kandula po omhata oyo ya etifwa po kuSatana nokwa li ta ka yandja eteelelo lokumangululwa nosho yo lomwenyo waalushe koludalo laAdam. — Ovaroma 5:21; Ovagalati 4:26, 31.

“Oshiholekwa shiyapuki shehalo laye”

7. Elalakano lilipi Jehova a holola okupitila momuyapostoli Paulus?

⁷ Monhumwafo yomuyapostoli Paulus oyo a li a shangela Ovakriste vomuEfeso, okwa li a yelifa nawa shi na sha nanghee Jehova ha unganeke oinima opo a wanife po elalakano laye. Paulus okwa shanga a ti: “[Okwe] tu shiivifila oshiholekwa [shiyapuki, NW] shehalo laye opahokwe yaye iwa ei, e i pangela muye mwene — omolwelelo leumbo, te ke li wanifa pakufika [kwomafimbo] — nokutya ta ka kwatakanifa muKristus aishe oyo yomeulu naai yokombada yedu.” (Ovaefeso 1:9, 10) Elalakano laJehova likumwifi olo okuhanganifa oishitwa aishe oyo hai dulika nehalo liwa kounamapangelo waye. (Ehololo 4:11) Kungaha, edina laye otali ka yapulwa, nehalo laye otali ka wanifwa “kombada yedu yo ngaashi meulu,” na Satana ota ka ulikwa kutya omunaipupulu. — Mateus 6:10.

8. Oshitya osho sha tolokwa ‘elelo leumbo’ otashi ti shike?

⁸ ‘Ohokwe yaJehova iwa,’ sha hala kutya, elalakano laye, otali ka wanifwa po okupitila ‘melelo’ laye. Paulus okwa longifa oshitya osho tashi ti lelalela “ewiliko leumbo.” Itashi ulike kepangelo, ngaashi Ouhamba wopaMessias, ndele otashi ulike konghedi yokuunganeka oinima.b Onghedi ikumwifi oyo Jehova a li ta ka unganeka oinima opo a wanife po elalakano laye oya li ya kwatela mo “oshiholekwa shiyapuki,” osho sha li tashi ka hololwa mokweendela ko kwefimbo. — Ovaefeso 1:10; 3:9, omashangelo opedu mo-NW.

9. Jehova okwa enda ngahelipi ta holola kanini nakanini oshiholekwa shiyapuki shi na sha nehalo laye?

⁹ Okupitila momahangano a shikulafana, Jehova okwa holola kanini nakanini nghee elalakano laye li na sha nOludalo olo la udanekwa muEden la li tali ka wanifwa. Ehangano laye olo a li a ninga naAbraham ola li la holola kutya Oludalo olo ola li tali ke uya kombada yedu okupitila mepata laAbraham, nomokupitila mulo ‘oiwana aishe kombada yedu’ tai ka nangekwa noupuna. Ehangano olo ola li yo la holola kutya otapa ka kala vamwe ovo tava ka pangela pamwe nOludalo olo la fimanenena. (Genesis 22:17, 18) Ehangano lOmhango olo la li la ningwa naIsrael shopambelela ola li la holola elalakano laJehova li na sha nokukala e na “ouhamba wovapristeri.” (Exodus 19:5, 6) Ehangano olo la li la ningwa naDavid ola li la ulika kutya Oludalo ola li tali ka ninga Omupangeli wOuhamba fiyo alushe. (2 Samuel 7:12, 13; Epsalme 89:4, 5) Konima eshi ehangano lOmhango la twala Ovajuda kuMessias, Jehova okwa ka holola oinima imwe vali i na sha nokuwanifwa kwomalalakano aye. (Ovagalati 3:19, 24) Ovanhu ovo va li tava ka pangela pamwe nOludalo olo la fimanenena ova li tava ka kala “ouhamba wovapristeri” oo wa xunganekwa, nova li tava ka ninga oilyo ‘yehangano lipe’ ve li ‘Israel’ shipe, Israel shopamhepo. — Jeremia 31:31-34; Ovaheberi 8:7-9.c

10, 11. (a) Jehova okwa li a holola ngahelipi Oludalo olo la li la xunganekwa? (b) Omolwashike Omona ewifa laKalunga e uyile kombada yedu?

¹⁰ Metwokumwe nelelo laKalunga li na sha nokuwanifa po elalakano laye, efimbo ola li la fika opo Oludalo olo la xunganekwa li uye kombada yedu. Jehova okwa li a tuma omweengeli Gabriel opo a lombwele Maria kutya ota ka dala okaana okamati oko taka ka ifanwa Jesus. Omweengeli oo okwa lombwela Maria a ti: “Ye ota ningi omunene, ndele Ye e nokwiifanwa Omona [waau] wOkombadambada. Kalunga Omwene ote mu pe olukalwa louhamba waxe David; ndele Ye ota ningi ohamba yeumbo laJakob fiyo alushe, nouhamba waye kau na apa tau xulu po.” (Lukas 1:32, 33) Kungaha, osha li sha yela mo kutya olyelye a li ta ka kala Oludalo olo la li xunganekwa. — Ovagalati 3:16; 4:4.

¹¹ Omona ewifa laJehova okwa li e na okuuya kombada yedu opo oudiinini waye u yelekwe filufilu. Oudiinini waJesus owa li tau ka yandja enyamukulo la wanenena komhata oyo ya etwa po kuSatana. Mbela Jesus okwa li ngoo ta ka kala omudiinini kuXe? Enyamukulo kepulo olo ola li oshiholekwa shiyapuki. Konima yefimbo, omuyapostoli Paulus okwa ka yelifa onghandangala oyo Jesus a dana, a ti: “[Osha] shiivika nawa shili nokutya, oshiholekwa [shiyapuki sheliyandjo lometilokalunga, NW] osho oshinene: [Jesus] a holoka mombelela, okwa yukipalifwa mOmhepo, okwa monika kovaengeli, okwa udifilwa mokati koiwana, okwa itavelwa mounyuni, okwa tambulwa mefimano.” (1 Timoteus 3:16) Doshili, mokukanyatela oudiinini waye fiyo okefyo, Jesus okwa yandja enyamukulo la yela komhata oyo ya etwa po kuSatana. Ndele nande ongaho, oitukulwa ikwao i na sha noshiholekwa shiyapuki kaya li natango ya hololwa.

“Oshiholekwa shouhamba waKalunga”

12, 13. (a) Oshitukulwa shimwe ‘shoshiholekwa shouhamba waKalunga’ oshilipi? (b) Oshike sha li sha kwatelwa mokuhoolola kwaJehova omuvalu wa ngabekwa wovanhu ovo tava i meulu?

¹² Pomhito imwe eshi Jesus a li momalweendo aye okuudifa muGalilea, okwa li a ulika kutya oshiholekwa shiyapuki osha kwatela mo filufilu epangelo laye lOuhamba wopaMessias. Okwa lombwela ovahongwa vaye a ti: “Omwa pewa okushiiva oiholekwa youhamba weulu [“ouhamba waKalunga,” Markus 4:11].” (Mateus 13:11) Oshitukulwa shimwe shoshiholekwa osho osha kwatela mo okuhoolola kwaJehova “okangudu” kovanhu 144 000 ovo tava ka pangela pamwe nOmona waye meulu, ve li oshitukulwa sholudalo. — Lukas 12:32; Ehololo 14:1, 4.

¹³ Molwaashi ovanhu ova li va shitwa va kale kombada yedu, ovanhu ovo va hoololwa va ye meulu ova li ve na okushitululwa kuJehova va ninge ‘ovashitwa vape.’ (2 Ovakorinto 5:17) E li umwe womwaavo va hoololwa va ye meulu, omuyapostoli Petrus okwa shanga a ti: “Kalunga naXe yOmwene wetu Jesus Kristus na [hambelelwe], Oye ou, e tu dalululila pafilonghenda laye linene eteelelo li nomwenyo okokunyumuka [kwaJesus] Kristus movafi, opo tu mone efyuululo itali nyonauka ndele inali nyata ndee itali xulu po, twe li tuvikililwa meulu.” — 1 Petrus 1:3, 4.

14. (a) Ongahelipi ovanhu ovo vehe fi Ovajuda va li va kwatelwa ‘moshiholekwa shouhamba waKalunga’? (b) Omolwashike hatu dulu okuuda ko ‘oinima yomoule yaKalunga’ ya tya ngaho?

¹⁴ Oshitukulwa vali shimwe shoshiholekwa shiyapuki shi na sha nepangelo lOuhamba lomonakwiiwa osha li ehalo laKalunga okukwatela mo yo ovanhu ovo vehe fi Ovajuda momuvalu munini waavo tava ka pangela pamwe naKristus meulu. Paulus okwa yelifa ombinga oyo ‘yelelo’ laJehova ile onghedi yaYe yokuunganeka oinima opo a wanife po elalakano laYe, a ti: “Osho inashi [shiivifilwa] ovana vovanhu mefimbo lomapupi onale, ngaashi sha hololelwa paife ovayapostoli vaye ovayapuki novaprofeti mOmhepo, nokutya, [ovanhu vomoiwana, NW] ovo oonakufyuulula pamwe naavo omolutu limwe ndele ve noshipewa meudaneko muKristus Jesus omevangeli tuu olo.” (Ovaefeso 3:5, 6) ‘Ovayapostoli ovayapuki’ ovo va li va yelifilwa oshitukulwa osho shoshiholekwa shiyapuki. Sha faafana nokunena, ngeno kapa li ekwafo lomhepo iyapuki, ngeno nafye inatu dula okuuda ko ‘oinima yomoule yaKalunga’ ya tya ngaho. — 1 Ovakorinto 2:10, NW; 4:1; Ovakolossi 1:26, 27.

15, 16. Omolwashike Jehova a hoolola ovanhu vonhumba va ka pangele pamwe naKristus?

¹⁵ Ovanhu ‘omayovi efele nomilongo nhe naanhe’ ovo va monika ve li ofika pamwe ‘nOdjona’ komhunda yaSion shomeulu ova popiwa kutya ova “kulilwa medu,” sha hala kutya, “va kulilwa movanhu, va ninga votete vaKalunga novOdjona,” Kristus Jesus. (Ehololo 14:1-4) Jehova okwa li a hoolola omushitwa wotete womovana vaye vomeulu a ninge oshitukulwa sha fimanenena sholudalo olo la udanekwa muEden, ndele omolwashike a hoolola ovanhu vonhumba va ka pangele pamwe noshitukulwa osho sha fimanenena sholudalo, Kristus? Omuyapostoli Paulus okwa yelifa kutya omuvalu oo wa ngabekwa owa hoololwa “pamhangela [yaJehova],” “pahokwe yehalo laye.” — Ovaroma 8:17, 28-30; Ovaefeso 1:5, 11; 2 Timoteus 1:9.

¹⁶ Jehova okwa lalakanena okuyapulifa edina laye linene noliyapuki nosho yo okuyukipalifa ounamapangelo waye weshito alishe. Okupitila ‘melelo’ laye lopandunge ile onghedi yaye yokuunganeka oinima, Jehova okwa li a tuma Omona waye ewifa kombada yedu opo oudiinini waye u yelekwe filufilu. Kakele kaasho, okwa li a lalakanena epangelo lOmona waye, Ouhamba wopaMessias, li kwatele mo ovanhu ovo va ulika yo oudiinini wavo kounamapangelo waYe fiyo okefyo. — Ovaefeso 1:8-12; Ehololo 2:10, 11.

17. Omolwashike hatu dulu okukala twa hafa omolwokushiiva kutya Kristus novapangeli pamwe naye ova li yo ovanhu kombada yedu?

¹⁷ Jehova okwa ulikila oludalo laAdam ohole inene mokutuma Omona waye kombada yedu nosho yo mokuhoolola ovanhu vonhumba va ka kale ovapangeli pamwe nOmona waye mepangelo lOuhamba. Ongahelipi osho tashi ka etela ouwa ovanhu vakwao ovo va kala ovadiinini kuJehova, okudja pefimbo laAbel fiyo okunena? Molwaashi ovanhu inava wanenena ova dalwa ve li moupika woulunde nefyo, ova pumbwa okuvelulwa pamhepo nosho yo palutu nova pumbwa yo okutwalwa mewaneneno, ngaashi Jehova a li a lalakanena va kale okudja pehovelo lokushitwa kwavo. (Ovaroma 5:12) Itashi hekeleke tuu kwaaveshe ovo ve na etimaumbwile loku ka kala nomwenyo waalushe kombada yedu okushiiva kutya Ohamba yavo otai ke va ulikila ohole noku va kenukila ngaashi ashike ya li ye shi ningila ovahongwa vayo pefimbo loukalele wayo wokombada yedu! (Mateus 11:28, 29; Ovaheberi 2:17, 18; 4:15; 7:25, 26) Noitashi hekeleke yo okushiiva kutya ovo tava ka kala eehamba novapristeri pamwe naKristus meulu ova li ovalumenhu novakainhu ovadiinini meitavelo ovo navo va li hava kondjifa omaunghundi opaumwene nosho yo omashongo omonghalamwenyo ngaashi ashike fye! — Ovaroma 7:21-25.

Elalakano laJehova itali kala inali wanifwa

18, 19. Omolwashike tu udite ko nawa eendjovo daPaulus odo di li mOvaefeso 1:8-11, noshike tashi ka konakonwa moshitukulwa tashi landula?

¹⁸ Paife otu udite ko nawa eityo leendjovo odo Paulus a li a shangela Ovakriste ovavaekwa, odo di li mOvaefeso 1:8-11. Okwa ti kutya Jehova okwa li e va shiivifila “oshiholekwa [shiyapuki, NW] shehalo laye,” kutya ova li tava ka “pewa oshipewa shefyuululo” pamwe naKristus nosho yo kutya ova li va “nuninwa nale [oshipewa osho] opamhangela yaye, Oye ou ta longo aishe payukifo lehalo laye mwene.” Otwe lihonga nghee Jehova a unganeka oshinima osho okupitila ‘melelo’ laye likumwifi li na sha nokuwanifa po elalakano laye. Osho otashi tu kwafele yo tu ude ko kutya omolwashike ovanhu vanini ovo ashike hava kufa ombinga mokulya nokunwa omadidiliko pEdimbuluko lOuvalelo wOmwene.

¹⁹ Moshitukulwa tashi landula, ohatu ka konakona kutya Edimbuluko lefyo laKristus otali ti shike kOvakriste ovo ve na eteelelo lokuya meulu. Nohatu ka konakona yo kutya omolwashike ovanhu omamiliyona ovo ve na eteelelo loku ka kala nomwenyo waalushe kombada yedu ve na okukala nohokwe inene meityo lEdimbuluko.

[Omashangelo opedu]

Omapulo eendululo

• Omolwashike Jehova a shita edu nokutula ko ovanhu va kale ko?

• Omolwashike Jehova a li a pumbwa okutuma Omona waye ewifa kombada yedu opo oudiinini waye u yelekwe?

• Omolwashike Jehova a hoolola ovanhu vonhumba va ka pangele pamwe naKristus?