Okuuva ko Ombiimbeli oshinima shoka to vulu okunyanyukilwa
OMBIIMBELI oyi na oshili yi na ongushu ya za kuKalunga. Otayi tu lombwele shi na ko nasha nelalakano lyonkalamwenyo, kutya omolwashike aantu haya mono iihuna nosho wo kutya otaya ka kala ye na onakuyiwa ya tya ngiini. Otayi tu longo nkene tatu vulu okumona enyanyu, nkene tatu vulu okupanga uukuume nayalwe nonkene tatu vulu okupongolola po omaupyakadhi. Shoka sha simana noonkondo, otayi tu longo shi na ko nasha nOmushiti gwetu ngoka e li Tate yetu gwomegulu, Jehova. Ontseyo ndjoka otayi tu etele enyanyu notayi tu pe elalakano monkalamwenyo yetu.
Okumona ontseyo yokutseya Kalunga, mOmbiimbeli otaku faathanithwa nokulya. Jesus okwa ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mateus 4:4; Aahebeli 5:12-14) Ngaashi naanaa twa pumbwa okulya iikulya esiku kehe opo tu kale nomwenyo, osho wo twa pumbwa okulesha Oohapu dhaKalunga aluhe opo tu ka mone uuwanawa meuvaneko lyaKalunga lyomwenyo gwaaluhe.
Ohatu nyanyukilwa okulya molwaashoka otwa shitwa tu ku nyanyukilwe nomolwaashoka oku li kwa pumbiwa. Ihe otwa pumbwa okugwanitha po ompumbwe yimwe natango ngele otwa hala okukala tu uvite elago. Jesus okwa ti: “Aanelago oomboka yu uvite oyo oohepele koomwenyo [“ya tseya ompumbwe yawo yopambepo,” NW].” (Mateus 5:3) Okukala tu uvite elago otaku wapa molwaashoka ompumbwe ndjoka otayi vulu okugwanithwa po ngele tu uvite ko Oohapu dhaKalunga.
Oshoshili kutya yamwe oye wete shi li eshongo okuuva ko Ombiimbeli. Pashiholelwa, otashi vulika wa pumbwa ekwatho shi na ko nasha nomanyolo ngoka taga popi kombinga yomikalondjigilile kaadhi shiwike nenge ngoka taga longitha omautumbulilo gopathaneko. Natango, opu na omahunganeko ngoka ga nyolwa melaka lyopathaneko taga vulu okuuviwa ko owala ngele to tala komanyolo galwe mOmbiimbeli ngoka taga popi oshinima osho tuu shoka. (Daniel 7:1-7; Ehololo 13:1, 2) Nonando ongaaka, oto vulu lela okuuva ko Ombiimbeli. Mbela ongiini to vulu okukala nuushili kutya oto shi vulu?
Oshinima shoka tashi vulu okunyanyukilwa kwaayehe
Ombiimbeli Oohapu dhaKalunga. Muyo Kalunga ote tu lombwele kutya ehalo lye olini. Mbela Kalunga ota gandja ngaa embo ndyoka itaali vulu okuuviwa ko nenge ndyoka tali uviwa ko owala kaantu mboka ye na elongo lyopombanda? Aawe, Jehova ke shi omukeenahenda opo a ninge oshinima sha tya ngawo. Kristus Jesus okwa ti: “Omuvali olye gwomokati keni, omwana ngele te mu indile ohi, te mu pe eyoka? Nenge te mu indile eyi, ye te mu pe ondje? Ano ne mboka aawinayi ngele omu shi okupa aana yeni omagano omawanawa, unene tuu Ho yeni yomegulu ota gandja Ombepo Ondjapuki kumboka taye mu indile.” (Lukas 11:11-13) Onkee ano, oto vulu okukala nuushili kutya otashi wapa u uve ko Ombiimbeli nonokutya ngele to pula Kalunga nomutima aguhe, ote ku pe ekwatho ndyoka wa pumbwa okuuva ko Oohapu dhe. Odhoshili kutya omalongo gOmbiimbeli gopetameko ohaga vulu okuuviwa ko nokuli nokaanona.—2 Timoteus 3:15.
Nonando ohashi pula oonkambadhala okuuva ko Ombiimbeli, oku shi ninga otaku vulu oku tu nkondopaleka. Jesus konima yokuyumuka kwe, okwa holokelele yaali yomaalongwa ye nokwa li a popi nayo kombinga yomahunganeko gOmbiimbeli. Ehokololo lyaLukas otali ti: “Jesus okwe ya fatululile shoka sha tiwa kombinga ye mOmanyolo agehe okutameka momambo gaMoses sigo omambo agehe gaahunganeki.” Oshizemo osha li shike? Ongulohi ndjoka manga aalongwa mboka ya li taya dhiladhila kombinga yaashono yi ilonga, oya li ya lombwelathana ya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo?” (Lukas 24:13-32) Okuuva ko Oohapu dhaKalunga okwa li kwe ya nyanyudha molwaashoka okwa koleke eitaalo lyawo momauvaneko gaKalunga nokwa li kwe ya pe etaloko li li nawa li na ko nasha nonakuyiwa.
Pehala lyokukala ku li omutengi, okuuva ko Oohapu dhaKalunga okuhokitha noku na oshilonga, ngaashi okulya iikulya iitoye nako kunyanyudha. Mbela oshike u na okuninga opo u mone euvoko ndyoka? Oshitopolwa tashi landula otashi ku ulikile nkene to vulu okunyanyukilwa “ontseyo okutseya Kalunga.”—Omayeletumbulo 2:1-5.
[Ethano pepandja 4]
Ngaashi he omunahole, Jehova ohe tu pe ombepo ondjapuki opo tu vule okuuva ko Ombiimbeli