Nkene to vulu okuuva ko Ombiimbeli
1. Pula omunyoli gwayo e ku kwathele
Ninfa ngoka a kala kuItalia okwa ti: “Nale onda li handi lesha Ombiimbeli manga inaandi ka lala. Onda li handi shi ningi molwaashoka onda li nda mono kutya Ombiimbeli oyi li Oohapu dhaKalunga, nonando kanda li handi nyanyukilwa oku yi lesha, onda li nda hala okutseya shoka Kalunga a nyola muyo. Onda li ndi na edhiladhilo lyoku yi lesha ayihe. Petameko onda li handi mono oshipu oku yi lesha, ihe konima yethimbo onda ka tsakaneka iitopolwa mbyoka nda li nda mono iidhigu nonda li nde etha oku yi lesha.”
MBELA nangoye owu na oshimoniwa sha fa shaNinfa? Aantu oyendji oye na oshimoniwa sha fa shoka. Ihe ngaashi twa mono moshitopolwa sha tetekele, Omunyoli gwOmbiimbeli, Jehova Kalunga, okwa hala wu uve ko Oohapu dhe. Ihe ongiini to vulu oku dhi uva ko? Oshinima shotango shoka wu na okuninga osho okupula ekwatho kOmunyoli gwayo.
Aayapostoli yaJesus oya li ya talika ko “inaa longwa sha” molwaashoka kaya li ya hita oosikola dhoshiraabi dhokugandja edheulo lyopalongelongekalunga. (Iilonga 4:13) Kakele kaashono, Jesus okwa li e ya shilipaleke kutya otaya vulu okuuva ko Oohapu dhaKalunga. Ngiini mbela? Jesus okwe shi yelitha a ti: “Omupopili Ombepo Ondjapuki, ngoka Tate te ke mu tuma medhina lyandje, oye ote ke mu longa iinima ayihe.” (Johannes 14:26) Kalunga okwa li a longitha ombepo ondjapuki ndjika nenge oonkondo tadhi longo, okushita evi niinima ayihe mbyoka yi li ko. (Genesis 1:2) Okwa li wo e yi longitha mokunwetha mo aalumentu 40 lwaampoka okunyola omadhiladhilo ge mOmbiimbeli. (2 Petrus 1:20, 21) Ombepo oyo tuu ndjoka otayi vulu okukwathela mboka ya hala okuuva ko Ombiimbeli.
Ongiini mbela to vulu okumona ombepo ondjapuki yaKalunga? Owu na oku yi pula wu na eitaalo kutya oto yi pewa. Dhoshili, owu na okutsikila oku yi pula. Jesus okwa ti: “Indileni, e tamu pewa. . . . Ngele omu shi oku pa aana yeni omagano omawanawa, unene tuu ho yeni yomegulu ota gandja Ombepo Ondjapuki kumboka taye mu indile.” (Lukas 11:9, 13) Jehova oku na ehalo okugandja ombepo ye ondjapuki kwaamboka taye yi mu pula ya mana mo. Oonkondo ndhoka tadhi longo otadhi vulu oku ku kwathela wu uve ko kutya oohapu dha nwethwa mo ndhoka dha nyolwa mOmbiimbeli oomvula omayovi dha piti otadhi ti shike. Ombepo yaKalunga otayi vulu wo oku ku pa uunongo wa pumbiwa opo wu vule okutula miilonga etumwalaka lyOmbiimbeli li na oonkondo monkalamwenyo yoye.—Aahebeli 4:12; Jakob 1:5, 6.
Oshikando kehe to lesha Ombiimbeli, galikana Kalunga wu mu pule e ku pe ombepo ondjapuki yi ku kwathele wu uve ko Oohapu dhe.