‘Indeni, ka ningeni ovanhu ovahongwa noku va ninginifa’

‘Indeni hano ka ningeni ovanhu aveshe ovalongwa vange, noku va ninginifa, noku va longa okudiinina aishe ei nde i mu lombwela.’ — MATEUS 28:19, 20, yelekanifa NW.

1. Oshiwana shaIsrael osha li sha tokola okuninga shike eshi sha li sha ongala pomhunda yaSinai?

OMIDO 3 500 lwaapo da pita, oshiwana ashishe shaIsrael osha li sha ninga eano kuKalunga, eshi sha li sha ongala pomhunda yaSinai. Osha li sha tya: “Ashishe osho Omwene e shi tonga fye ohatu shi ningi.” Okudja opo, osha li sha ninga ‘oshiwana shaye mwene’ she mu liyapulila. (Exodus 19:5, 8; 24:3) Osha li tashi ka amenwa nosha li tashi ka kala medu “li yadi omashini nomaadi eenyiki.” — Leviticus 20:24.

2. Ovanhu otava dulu okukala ve na ekwatafano la tya ngahelipi naKalunga kunena?

² Omupsalme Asaf okwa ti kutya Ovaisrael “inava kwatelelela mehangano laKalunga nova anya okweenda pamhango yaye.” (Epsalme 78:10) Ova li va dopa okukala metwokumwe neano olo ooxekulululwa va li va anena Jehova. Hauxuuninwa, Kalunga okwa li a xulifa po ekwatafano le likalekelwa olo a li e na navo. (Omuudifi 5:3; Mateus 23:37, 38) Okudja opo, Kalunga okwa li “a hovela okulikolela edina laye mwene oshiwana movapaani.” (Oilonga 15:14) Momafiku aa axuuninwa, ota ongele ‘ongudu inene ya nyengana okuvalwa yomoiwana aishe nomomaludi aeshe nomovanhu aveshe nomomalaka aeshe,’ oyo tai ingida nehafo tai ti: “Exupifo olaKalunga ketu nolOdjona, ou e li omutumba kolukalwapangelo.” — Ehololo 7:9, 10.

3. Omunhu oku na okuninga shike opo a kale e na ekwatafano lopofingo naKalunga?

³ Opo omunhu a kale mokati kaavo ve na ekwatafano naKalunga le likalekelwa, oku na oku mu liyapulila noku shi ulika moipafi mokuninginifwa momeva. Mokuninga ngaho, omunhu ota dulika kelombwelo laJesus la yela olo a lombwela ovahongwa vaye a ti: “Indeni hano ka ningeni ovanhu aveshe ovalongwa vange, noku va [ninginifa, NW] medina laXe nolOmona nolOmhepo Iyapuki, noku va longa okudiinina aishe ei nde i mu lombwela.” (Mateus 28:19, 20) Ovaisrael ova li hava pwilikine ngeenge va li tava leshelwa “oramata yehangano.” (Exodus 24:3, 7, 8) Onghee hano, ova li ve shii osho Jehova a teelela va ninge. Sha faafana, nokunena omunhu okwa pumbwa okukala e na eshiivo lashili li na sha nehalo laKalunga, olo li li mEendjovo daye Ombibeli, fimbo ina ninginifwa.

4. Omunhu oku na okuninga shike opo a kale a wana okuninginifwa? (Kwatela mo oshimhungu pepandja eli.)

⁴ Osha yela kutya Jesus okwa li a hala ovahongwa vaye va tungile eitavelo lavo kekanghameno la kola fimbo inava ninginifwa. Ka li ashike a lombwela ovashikuli vaye va ye va ka ninge ovanhu ovahongwa, ndele okwe va lombwela yo ve va honge ‘okudiinina aishe oyo e va lombwela.’ (Mateus 7:24, 25; Ovaefeso 3:17-19) Onghee hano, opo omunhu a kale a wana okuningifwa, oku na okukonakona Ombibeli oule weemwedi donhumba ile womudo umwe nokuli ile mbali, opo a ninge etokolo li na sha nokuninginifwa la diladilwa nawa. Pefimbo loshipopiwa sheninginifo, ovo tava ka ninginifwa ohava nyamukula heeno komapulo avali a fimanenena. Molwaashi Jesus okwa divilika kutya ‘oheeno yetu nai kale heeno nosho yo ahowe yetu i kale ahowe,’ oshiwa kukeshe umwe womufye okukonakona nawa eityo lomapulo avali oo haa pulwa ovo tava ka ninginifwa. — Mateus 5:37.

Elidilululo neliyapulo

5. Eenghatu mbali da fimanenena dilipi da divilikwa kepulo lotete olo hali pulwa ovo tava ka ninginifwa?

⁵ Epulo lotete olo hali pulwa ovo tava ka ninginifwa oli na sha nongeenge ove livela ombedi shi na sha nonghedi yokukalamwenyo yavo yonale nongeenge ove liyapulila Jehova va longe ehalo laye. Epulo olo otali divilike eenghatu mbali da fimanenena odo omunhu e na okukatuka fimbo ina ninginifwa: elidilululo neliyapulo.

6, 7. (a) Omolwashike aveshe ovo va hala okuninginifwa ve na okulivela ombedi? (b) Konima yokulivela ombedi, omunhu oku na okuninga omalunduluko elipi?

⁶ Omolwashike omunhu e na okulivela ombedi fimbo ina ninginifwa? Omuyapostoli Paulus okwa yelifa a ti: “Atushe twa endaaenda nale, omolwisho lombelela yetu twa shikula ouhalu wombelela.” (Ovaefeso 2:3) Fimbo twa li tuhe na eshiivo lashili lokushiiva ehalo laKalunga, otwa li metwokumwe nounyuni, sha hala kutya, twa li hatu landula omifikamhango dao. Onghalamwenyo yetu oya li tai pangelwa kukalunga kounyuni ou, Satana. (2 Ovakorinto 4:4) Ndele eshi twa shiiva ehalo laKalunga, otwa tokola toko ‘okuhakala vali pauhalu wovanhu, ndelenee opahalo laKalunga.’ — 1 Petrus 4:2.

⁷ Onghedi yetu ipe yokukalamwenyo ohai eta omauwa mahapu. Komesho yaaishe, otai ningifa omunhu a kale e na ekwatafano le likalekelwa naJehova, olo David a yelekanifa nokushivwa ‘ketwali’ laJehova nosho yo ‘komhunda yaye iyapuki,’ osho shi li oufembanghenda munenenene. (Epsalme 15:1, yelekanifa NW.) Jehova iha shivi ashike keshe umwe, ndele ovovo ashike ‘hava yukilile notava longo ouyuki, ndee tava popi oshili momitima davo.’ (Epsalme 15:2) Okuwanifa po oiteelelwa oyo otashi tu pula tu ninge omalunduluko onhumba melihumbato letu nosho yo momaukwatya etu, she likolelela kwaasho kwa li hatu ningi fimbo twa li inatu shiiva oshili. (1 Ovakorinto 6:9-11; Ovakolossi 3:5-10) Elidilululo, sha hala kutya, okulipa lela oushima shi na sha nonghalamwenyo yetu yonale nokukala twa tokola toko okuhafifa Jehova, oyo tai tu linyengifa tu ninge omalunduluko a tya ngaho. Osho ohashi ningifa omunhu a lunduluke filufilu, sha hala kutya, a efe po onghedi yokukalamwenyo yokulihola mwene nosho yo oikala younyuni noku lalakanene onghedi yokukalamwenyo oyo tai hafifa Jehova. — Oilonga 3:19.

8. Omunhu ohe liyapulile Jehova ngahelipi, naasho oshi na ekwatafano lashike neninginifo?

⁸ Oshitukulwa oshitivali shepulo lotete olo hali pulwa ovo va hala okuninginifwa oshi na sha nongeenge ove liyapulila Jehova va longe ehalo laye. Omunhu oku na okuliyapulila Jehova tete fimbo ina ninginifwa. Eliyapulo ohali ningwa okupitila meilikano, omo omunhu ha popi kutya okwa hala okuliyandjela Jehova okupitila muKristus. (Ovaroma 14:7, 8; 2 Ovakorinto 5:15) Okudja opo, Jehova oha ningi Omwene wetu, nohatu kala twa hafa okulonga ehalo laye, ngaashi Jesus. (Epsalme 40:9; Ovaefeso 6:6) Eudaneko olo la kwata moiti ohali ningwa ashike lumwe. Ndele molwaashi eliyapulo ohali ningwa paumwene, okuhepaulula eitavelo letu moipafi yavamwe mefiku leninginifo otaku shiivifile vamwe kutya otwe liyapulila Tate yetu womeulu. — 1 Timoteus 6:12.

9, 10. (a) Okulonga ehalo laKalunga okwa kwatela mo shike? (b) Ongahelipi ovanambelewa vepangelo laNazi va li va dimina kutya Eendombwedi ode liyapulila Jehova?

⁹ Okulandula oshihopaenenwa shaJesus shi na sha nokulonga ehalo laKalunga osha kwatela mo shike? Jesus okwa lombwela ovahongwa vaye a ti: “Ngenge ku na ou a hala okushikula nge, oye ne lixupule ye mwene, ne litwike [omuti waye womahepeko, ndele na kale nokushikula nge, NW].” (Mateus 16:24) Momushangwa omo, Jesus okwa popya oinima itatu oyo tu na okuninga. Shotete, otu na ‘okulixupula’ fye vene. Noitya imwe, otu na okweefa po oikala yokulihola mwene oyo hai etifwa kokuhawanenena, ndele hatu tambula ko omayele newiliko laKalunga. Oshitivali, otu na ‘okulitwika omuti wetu womahepeko.’ Pefimbo laJesus, omuti womahepeko owa li edidiliko lokufifwa ohoni nokumonifwa oixuna. Tu li Ovakriste, otwe lilongekida okumona oixuna omolwonghundana iwa. (2 Timoteus 1:8) Ngaashi Jesus, ‘ihatu kala tu na ko nasha nomasheko’ ounyuni, ndele ohatu kala twa hafa molwaashi otu shii kutya ohatu hafifa Kalunga. (Ovaheberi 12:2) Oshititatu, otu na ‘okukala’ hatu shikula Jesus. — Epsalme 73:26; 119:44; 145:2.

¹⁰ Shihokwifa, nokuli novapataneki vamwe ova dimina kutya Eendombwedi daJehova ode mu liyapulila di mu longele oye aeke. Pashihopaenenwa, Eendombwedi odo da li mokamba yeenghwate yoNazi, moBuchenwald, muNdowishi, odo da li da anya okweefa po eitavelo lado oda li da pulwa di shaine omukanda tau ti: “Ondi li natango Omukonakonimbimbeli omudiinini noitandi ka teya po eudaneko olo nda udanekela Jehova.” Osho osha li sha ulika filufilu oikala yovapiya aveshe vaKalunga ovadiinini ve mu liyapulila. — Oilonga 5:32.

Eninginifo otali ku didilikifa kutya ou li umwe womEendombwedi daJehova

11. Omunhu oo a ninginifwa oha kala e na oufembanghenda ulipi?

¹¹ Oshitukulwa shotete shepulo etivali otashi pula ovo tava ka ninginifwa ngeenge ove udite ko tuu kutya eninginifo lavo otali va didilikifa ve li vamwe vomEendombwedi daJehova. Ngeenge omunhu a ninginifwa, oha ningi omukalele waJehova a yapulwa, oo a humbata edina laYe. Osho oshi li oufembanghenda munene oo wa kwatela mo oshinakuwanifwa sha kwata moiti. Omunhu oo a ninginifwa oku na yo etimaumbwile loku ka mona omwenyo waalushe, ngeenge okwa kala omudiinini kuJehova. — Mateus 24:13.

12. Oufembanghenda wokuhumbata edina laJehova owa kwatela mo oshinakuwanifwa shilipi?

¹² Doshili, oshi li oufembanghenda we likalekelwa okuhumbata edina laKalunga omunaenghono adishe, Jehova. Omuprofeti Mika okwa ti: “Oiwana aishe tai kala nokweenda, keshe shimwe, medina laKalunga kasho, ndelenee fye ohatu ka kala nokweenda medina [laJehova, NW] Kalunga ketu alushe fiyo alushe.” (Mika 4:5) Ndele oufembanghenda oo owa kwatela mo oshinakuwanifwa. Otu na okukendabala okukala nonghedi yokukalamwenyo oyo tai fimanekifa edina laJehova. Ngaashi Paulus a li a dimbulukifa Ovakriste muRoma, ngeenge itatu tula moilonga osho hatu udifa, ohatu ka ‘shekifa’ edina laKalunga. — Ovaroma 2:21-24.

13. Omolwashike ovapiya vaJehova ve mu liyapulila ve na oshinakuwanifwa shokuyandja oundombwedi u na sha naye?

¹³ Ngeenge omunhu ta ningi umwe womEendombwedi daJehova, oha tambula ko yo oshinakuwanifwa shokuyandja oundombwedi u na sha naJehova Kalunga kaye. Jehova okwa li a pula oshiwana shaIsrael she mu liyapulila shi kale eendombwedi daye, opo shi yandje oumbangi u na sha nOukalunga waye waalushe. (Jesaja 43:10-12, 21) Ndele oshiwana osho osha li sha dopa okuwanifa po oshinakuwanifwa osho, nohauxuuninwa Jehova okwa li e shi ekelashi filufilu. Kunena, tu li Ovakriste vashili otu udite etumba eshi tu na oufembanghenda wokuyandja oundombwedi u na sha naJehova. Ohatu kala tu udite ngaho molwaashi otu mu hole notwa hala edina laye li yapulwe. Itatu dulu okukala itatu udifa kombinga yaasho tu shii shi na sha naTate yetu womeulu nosho yo omalalakano aye. Otu udite ngaashi omuyapostoli Paulus a li e udite, eshi a tile: ‘Muame ndi nefininiko, woo aame, ngenge itandi udifa evangeli.’ — 1 Ovakorinto 9:16.

14, 15. (a) Ehangano laJehova ohali tu kwafele ngahelipi tu kule pamhepo? (b) Omalongekido omeongalo nosho yo opaumwene elipi hae tu kwafele tu kule shi na sha noinima yopamhepo?

¹⁴ Epulo etivali ohali dimbulukifa yo ovo tava ka ninginifwa shi na sha noshinakuwanifwa shavo shokulongela kumwe nehangano laJehova tali wilikwa komhepo yaye. Itatu dulu okulongela Jehova ofye atuke. Otwa pumbwa ekwafo netwomukumo ‘lovamwatate.’ (1 Petrus 2:17; 1 Ovakorinto 12:12, 13) Ehangano laJehova ohali tu kwafele neenghono opo tu kule pamhepo. Ohali tu pe oishangomwa yopaMbibeli ihapu oyo hai tu kwafele tu mone eshiivo lashili lomoule, tu katuke pandunge ngeenge twa taalelwa komaupyakadi notu kale tu na ekwatafano lopofingo naJehova. Ngaashi omudalakadi oo ha fi oshisho opo ovana vaye va kale va paluka nawa nova filwa oshisho, “omupiya omudiinini nomunaendunge” ohe tu pe eendja dihapu dopamhepo pefimbo la wapala opo tu ninge exumokomesho lopamhepo. — Mateus 24:45-47; 1 Ovatessaloniki 2:7, 8.

¹⁵ Pokwoongala kwetu kwokoshivike, ohatu deulwa nokutuwa omukumo opo tu kale Eendombwedi daJehova didiinini. (Ovaheberi 10:24, 25) Ofikola yOukalele woPauteokratika ohai tu hongo nghee tu na okupopya meongalo nomoukalele, ofimbo Okwoongala kwoPailonga haku tu deula nghee tu na okuudifa nomupondo. Okupitila mokwoongala nosho yo mokukonakona kwetu paumwene oishangomwa yopaMbibeli, ohatu mono nghee omhepo yaJehova tai wilike ehangano laye. Kalunga ohe tu londwele shi na sha noiponga, ohe tu deula tu kale ovakalele hava pondola nohe tu kwafele tu kale oupafi pamhepo okupitila momafiloshisho oo hatu pewa pandjikilile. — Epsalme 19:8, 9, 12; 1 Ovatessaloniki 5:6, 11; 1 Timoteus 4:13.

Oshike hashi linyengifa omunhu a ninginifwe?

16. Oshike she tu linyengifa tu liyapulile Jehova?

¹⁶ Omapulo avali oo haa pulwa ovo tava ka ninginifwa ohae va dimbulukifa eityo lokuninginifwa momeva nosho yo oinakuwanifwa oyo ve na okukala tava wanifa po konima yokuninginifwa. Mbela oshike shi na okulinyengifa omunhu a ninge etokolo lokuninginifwa? Omunhu iha ninginifwa molwaashi a fininikwa kuumwe, ndele omolwaashi Jehova e mu ‘shilila’ kuye. (Johannes 6:44) Molwaashi “Kalunga Oye ohole,” oha pangele oishitwa yaye nohole, ndele hakefininiko. (1 Johannes 4:8) Ohatu shililwa kuJehova omolwomaukwatya aye mawa nosho yo onghedi oyo ha ungaunga nafye. Jehova okwe tu yandjela Omona waye ewifa nokwe tu pa eteelelo lonakwiiwa la denga mbada. (Johannes 3:16) Nomolwaasho otwe linyengifwa tu mu liyapulile onghalamwenyo yetu. — Omayeletumbulo 3:9; 2 Ovakorinto 5:14, 15.

17. Ngeenge hatu liyapulile Jehova, osha yela kutya inatu liyapulila shike?

¹⁷ Otwe liyapulila Jehova, ndele haifano lonhumba ile oilonga yonhumba. Oilonga oyo Jehova e tu pa otai ka lunduluka, ndele eliyapulo letu ihali lunduluka. Pashihopaenenwa, oilonga oyo a li a pa Abraham oya li ya yooloka ko kwaayo a li a pa Jeremia a longe. (Genesis 13:17, 18; Jeremia 1:6, 7) Ndele aveshe ova li va wanifa po oilonga yokondadalunde oyo Jehova a li e va pa, molwaashi ova li ve mu hole nova li va hala okulonga ehalo laye noudiinini. Pefimbo eli lexulilo, ovashikuli vaKristus aveshe va ninginifwa otava kendabala okuwanifa po elombwelo laye li na sha nokuudifa onghundana iwa yOuhamba nokuninga ovanhu ovahongwa. (Mateus 24:14; 28:19, 20) Okulonga oilonga oyo nomutima aushe oshi li onghedi ya denga mbada omo hatu dulu okuulika ohole yetu yokuhola Tate yetu womeulu nonokutya otwe mu liyapulila shili. — 1 Johannes 5:3.

18, 19. (a) Mokuninginifwa, otwa fa lelalela hatu popi moipafi eendjovo dilipi? (b) Oshike tashi ka kundafanwa moshitukulwa tashi landula?

¹⁸ Nopehe na omalimbililo, eninginifo ohali etele omunhu omanangeko noupuna mahapu, ndele oli na okutalwa ko la kwata moiti. (Lukas 14:26-33) Ohali ulike kutya otwa tokola toko okupitifa komesho ehalo laKalunga. (Lukas 9:62) Ngeenge hatu ninginifwa, otwa fa lelalela hatu popi moipafi eendjovo edi, hatu ti: “Kalunga ou, Oye tuu Kalunga ketu alushe fiyo alushe; note tu endifa fiyo omokufya.” — Epsalme 48:15.

¹⁹ Oshitukulwa tashi landula otashi ka yelifa natango omapulo oo tashi dulika a pulwe shi na sha nokuninginifwa momeva. Mbela ope na omatomheno taa ti sha oo taa imbi omunhu a ninginifwe? Mbela omido otadi ti sha ngoo ngeenge tashi ya pokuninginifwa? Ongahelipi aveshe ovo hava kala peemhito dokuninginifwa tava dulu okufimaneka omhito oyo?

Oto dulu okuyelifa?

• Omolwashike omunhu a pumbwa okulivela ombedi ofimbo ina ninginifwa?

• Okuliyapulila Kalunga okwa kwatela mo shike?

• Oufembanghenda wokuhumbata edina laJehova owa kwatela mo oinakuwanifwa ilipi?

• Oshike shi na okulinyengifa omunhu a ninge etokolo lokuninginifwa?

[Efano pepandja 20]

Omapulo avali oo haa pulwa ovo tava ka ninginifwa petimbo loku ka ninginifwa

[Oshimhungu/Efano pepandja 20]

Pakanghameno leyambo laJesus Kristus, mbela omwe livela ombedi omolwomatimba eni nomwe liyapulila Jehova mu longe ehalo laye?

Mbela omu udite ko tuu kutya eliyapulo leni neninginifo leni otai mu didilikifa mu li vamwe vomEendombwedi daJehova tamu longo metwokumwe nehangano laye tali wilikwa komhepo yaye?

[Efano pepandja 21]

Eliyapulo olo eudaneko la kwata moiti olo hali ningilwa Jehova okupitila meilikano

[Efano pepandja 23]

Oilonga yetu yokuudifa ohai ulike kutya otwe liyapulila Kalunga