Omapulo ga za kaaleshi

Oshike tashi ningitha opo ‘omaliko giigwana ayihe’ ge etwe ‘kongulu’ yelongelokalunga lyashili?—Haggai 2:7.

Okupitila momupolofeti Haggai, Jehova okwa hunganeke a ti: “Otandi ka tukulutha iigwana ayihe, nomaliko gayo otage ke etwa nkuka, [nongulu ndjika otandi yi udha esimano, OB-1954].” (Haggai 2:7) Mbela okutukuluthwa ‘kwiigwana ayihe’ oko taku ka ningitha ‘omaliko,’ sha hala okutya, aantu mboka ye na omitima dhu uka, ya taambe ko elongelokalunga lyashili? Hasho.

Tala kwaashoka tashi tukulutha nenge tashi kakamitha iigwana nonkene oshizemo tashi ka kala shi li. Ombiimbeli otayi ti kutya ‘aapagani otaya tuwalala niigwana otayi dhiladhila iinima yowala.’ (Episalomi 2:1, KB) “Iinima yowala” mbyoka iigwana tayi ‘dhiladhila’ kuyo oyo okutsikila kuunamapangelo wayo. Kapu na sha shilwe shoka hashi yi tukulutha kaashi shi owala uumbanda wokutila yi kuthwe omapangelo gayo.

Okuuvitha kwOonzapo dhaJehova onkundana ombwanawa yUukwaniilwa waKalunga mboka wa dhikwa po, oku li lela etilitho kiigwana. Odhoshili kutya Uukwaniilwa waKalunga wopaMesiasa u na Jesus Kristus oye omupangeli otau ka “teyagula po omaukwaniilwa agehe [ga totwa po kaantu] noku ga hulitha po.” (Daniel 2:44, KB) Etumwalaka lyepangulo ndyoka lya kwatelwa miilonga yetu yeuvitho oli li tali kakamitha iigwana. (Jesaja 61:2) Sho iilonga yeuvitho tayi indjipala miitopolwa oyindji neendelelo, osho wo nokukakamitha huka taku ende taku indjipala noonkondo. Okutukulutha nenge okukakamitha hoka kwa hunganekwa muHaggai 2:7 otaku thaneke shike?

MuHaggai 2:6 (OB-1954) otatu lesha mo taku tiwa: “Omuwa Sebaot osho ta ti: Oku na okathimbo okafupi, ongame notandi tukulutha egulu nevi, efuta nuukukutu.” Omuyapostoli Paulus okwa totha movelise ndjika e ta nyola ta ti: “Pethimbo ndiyaka oohapu dhe odha kakamithile evi, ihe ngashingeyi oku uvaneke ta ti: ‘Ongame itandi ka kakamitha owala evi lumwe ishewe, ihe negulu wo.’ Iitya mbika ‘[lumwe] ishewe’ otayi holola nawa kutya iishitwa ayihe otayi ka kakamithwa e tayi shitululwa, naambyoka itaayi ka kakamithwa, otayi ka kala yi li ngaashi yi li.” (Aahebeli 12:26, 27) Eeno, onkalelo ndjika ayihe yiinima otayi ka kakamithwa nokuhulithwa po opo pu ye uuyuni uupe waKalunga.

Aantu mboka ye na omitima dhu uka otaya hililwa kelongelokalunga lyashili ihe hamolwaashoka iigwana ya tukuluthwa nenge ya kakamithwa. Shoka tashi ya hilile kuJehova nokelongelokalunga lye, osho wo tashi tukulutha iigwana, sha hala okutya euvitho lyomuuyuni auhe lyUukwaniilwa waKalunga wa dhikwa po. Euvitho ‘lyoohapu dhelaka etoye lyaaluhe’ ohali hili ayehe mboka ye na iikala iiwanawa ya longele Kalunga kashili.—Ehololo 14:6, 7.

Etumwalaka lyUukwaniilwa oli li etumwalaka lyepangulo nolyehupitho. (Jesaja 61:1, 2) Oshizemo shoku li uvitha muuyuni auhe, oshi na oombinga mbali: okutukuluthwa kwiigwana nosho wo okweetwa kwomaliko giigwana ayihe kongulu yaJehova omolwesimano lye.