Tala kouwa wehangano laJehova
‘Ohatu ka palulwa kouwa weumbo loye.’ — EPSALME 65:5.
1, 2. (a) Okutungwa kwotembeli nosho yo oilonga oyo ya li tai ka longwa mo oya li tai ka etela shike oshiwana shaKalunga? (b) David okwa li a yambidida ngahelipi oilonga yokutunga otembeli?
DAVID womuIsrael shonale oku li umwe womovanhu ovo va li va tongomana neenghono, ovo va hokololwa mOmishangwa dOshiheberi. Okwa kala e lineekela filufilu Jehova Kalunga ofimbo a li omufita woimuna, omushiki wokahumbafeta, naashi a ka ninga omuprofeti nohamba. Ohole yaye inene yokuhola Jehova oya li ye mu linyengifa a kale a hala oku mu tungila ongulu. Ongulu ile otembeli oyo oya li tai ka ninga ondingandinga yelongelokalunga lashili muIsrael. Okwa li yo e shii kutya otembeli nosho yo oilonga oyo ya li tai ka longwa mo oya li tai ka etela oshiwana shaKalunga ehafo nosho yo omanangeko noupuna. Nomolwaasho okwa imbila Jehova a ti: “Omunelao ou, we mu hoolola, ndee oto [itavele] a ehene kuove, ye a kale momikala doye, opo fye tu palulwe kouwa weumbo loye, mouyapuki wotembeli yoye.” — Epsalme 65:5.
2 David ka li a pewa oufembanghenda wokutungila Jehova ongulu, ndele ponhele yaasho owa li wa pewa omona Salomo. David ka li a ngongota molwaashi ina pewa oufembanghenda oo kwa li a halelela. Osho sha li sha fimana kuye okutungwa kwotembeli. Okwa li a yambidida nomutima aushe oilonga yokutunga mokupa Salomo omudutilo oo a li a pewa kuJehova u na sha nanghee otembeli ya li i na okutungwa. Kakele kaasho, David okwa li a unganeka Ovalevi omayovi meengudu di lili noku lili va kale tava ka longa kotembeli nokwa li a yandja omayambidido mahapu oshingoli noshisiliveli omolwoilonga yokutunga otembeli. — 1 Omafimbo 17:1, 4, 11, 12; 23:3-6; 28:11, 12; 29:1-5.
3. Ovapiya vaKalunga vokunena ohava tale ko ngahelipi omalongekido e na sha nelongelokalunga lashili?
3 Ovaisrael ovadiinini ova li hava yambidida omalongekido e na sha nelongelokalunga lashili kotembeli yaKalunga. Tu li ovapiya vaJehova vokunena, nafye ohatu yambidida omalongekido e na sha nelongelokalunga oo haa ningwa koshitukulwa shehangano laJehova shokombada yedu, nokungaha, ohatu ulike kutya otu na oikala ya fa yaDavid. Ponhele yokukala noikala yokungongota, ohatu tale kouwa wehangano laKalunga. Mbela oho diladila ngoo moule nonolupandu komauwa mahapu oo hatu mono mehangano laKalunga? Natu ka kundafaneni amwe omuo.
Natu kale nolupandu li na sha naavo tava kwatele komesho
4, 5. (a) “Omupiya omudiinini nomunaendunge” ota wanifa po ngahelipi oshilonga shaye? (b) Eendombwedi dimwe oda ti ngahelipi shi na sha neendja dopamhepo odo hadi mono?
4 Otu na omatomheno mawa okupandula “omupiya omudiinini nomunaendunge,” oo a nangekwa po kuJesus Kristus a pashukile oinima yaye yokombada yedu. Ongudu yomupiya, oyo ya fikama po mOvakriste ovavaekwa nomhepo, ohai kwatele komesho oilonga yokuudifa onghundana iwa, ohai unganeke okwoongala ku na sha nelongelokalunga nohai nyanyangida oileshomwa ye likolelela kOmbibeli momalaka e dule po 400. Ovanhu omamiliyona mounyuni aushe ohava li nolupandu ‘oikulya oyo yopamhepo pefimbo layo.’ (Mateus 24:45-47) Doshili, inatu pumbwa okungongota kombinga yefiloshisho la tya ngaho.
5 Omunamido wedina Elfi, oo e li Ondombwedi yaJehova oule womido dihapu, okwa popya kutya oha hekelekwa nokukwafelwa kokutula moilonga omayele opamishangwa oo e li moishangomwa yongudu yomupiya omudiinini. Omolwolupandu laye linene, okwa shanga a ti: “Ngeno kapa li ehangano laJehova, mbela ngeno ondi li monghalo ya tya ngahelipi?” Peter naIrmgard ova kala yo ovapiya vaKalunga oule womido dihapu. Irmgard okwa popya kutya okwa pandula omafiloshisho aeshe oo haa yandjwa “kehangano laJehova linahole noli na ko nasha.” Omafiloshisho amwe omuo okwa nuninwa ovanhu ovo ve na eemhumbwe de likalekelwa, ngaashi ovo ve na ounghundi womesho ile wokuuda ko.
6, 7. (a) Oilonga yEendombwedi daJehova momaongalo mounyuni aushe ohai pashukilwa ngahelipi? (b) Eendombwedi dimwe oda ti shike shi na sha noshitukulwa shehangano laJehova shokombada yedu?
6 “Omupiya omudiinini” oku lilwe po kOlutuwiliki lEendombwedi daJehova, okangudu kanini kovalumenhu ovavaekwa nomhepo, olo tali longo kombelewa ya kula yEendombwedi daJehova koBrooklyn, moNew York. Olutuwiliki ohali nangeke po ovalumenhu va pyokoka va longe moitaimbelewa oyo tai pashukile oilonga momaongalo e dule po 98 000 mounyuni aushe. Ovalumenhu momaongalo oo, ovo hava wanifa po oiteelelwa yopamishangwa, ohava nangekwa po va kale ovakulunhuongalo novayakuliongalo. (1 Timoteus 3:1-9, 12, 13) Ovakulunhuongalo ohava kwatele komesho nokulifa oufita waKalunga pahole, oo ve lineekelelwa. Kali fi tuu enangeko noupuna okukala mokati koufita ile ‘kovamwatate’ ve holafane nove li moukumwe! — 1 Petrus 2:17; 5:2, 3.
7 Ponhele yokungongota, oohandimwe momaongalo ohava pandula luhapu ewiliko lopamhepo olo hava pewa pahole kovakulunhuongalo. Tala koshihopaenenwa shaBirgit, Omukriste a hombolwa womido 30 nasha. E shi a li omunyasha womido omulongo nasha, okwa li e na eendafano lii, naasho osha li hanga she mu twala menyono la kwata moiti. Ndele omayele a yela opaMbibeli oo kwa li a pewa kovakulunhuongalo nosho yo ekwafo lovaitaveli vakwao oya li ye mu kwafela aha ye monghalo oyo ya nyika oshiponga. Mbela paife Birgit oku udite ngahelipi kekwafo olo a li a pewa? Okwa ti: “Onda pandula neenghono eshi ndi li natango mehangano laJehova likumwifi.” Andreas womido 17 okwa ti: “Eli olo shili ehangano laJehova, ehangano dingi mounyuni.” Mbela atushe katu na okukala tu na olupandu omolwouwa oo hatu mono moshitukulwa shehangano laJehova shokombada yedu?
Ovo tava kwatele komesho inava wanenena
8, 9. Ovanhu vamwe vopefimbo laDavid ova li va katuka ngahelipi, naDavid okwa li e linyenga ngahelipi kelihumbato olo?
8 Oshoshili kutya ovo va nangekwa po va kwatele komesho melongelokalunga lashili inava wanenena. Aveshe ohava ningi omapuko, navamwe vomuvo ove na nokuli omaunghundi oo tava kendabala alushe okufinda. Mbela otwa pumbwa okuhanduka omolwomaunghundi a tya ngaho? Hasho nandenande. Oohandimwe ovo va li ve lineekelelwa oinakuwanifwa muIsrael shonale navo ova li va ninga omapuko a kwata moiti. Pashihopaenenwa, ofimbo David a li omunyasha, okwa li a pulwa a ka kale ta shikile ohamba Saul okahumbafeta opo a kale ta ngungumaneke omadiladilo ayo. Konima yefimbo, Saul okwa li ta kendabala okudipaa David, nohauxuuninwa David okwa ka faduka po opo a xupife omwenyo waye. — 1 Samuel 16:14-23; 18:10-12; 19:18; 20:32, 33; 22:1-5.
9 Ovaisrael vamwe ova li va ninga ovakengeleledi. Pashihopaenenwa, ondjai yomatanga ovakwaita aDavid, Joab, oya li ya dipaa Abner, omupambele waSaul. Absalom okwa li a pangela omhangela yokukufa xe, David, ouhamba. Omuyandjimayele omulineekelwa waDavid, Ahitofel, okwa li a kengelela David. (2 Samuel 3:22-30; 15:1-17, 31; 16:15, 21) Ndele nande David okwa li a ningilwa oinima aishe oyo, ka li a handuka ndele ta kala ta ngongota noka li a efa po elongelokalunga lashili. Ponhele yaasho, omaupyakadi oo okwa li e mu ningifa a kale a kanyatela oudiinini waye kuJehova noku kale noikala iwa, ngaashi oyo a li e na eshi a li a ya onhapo Saul. Pefimbo opo, David okwa li a imba a ti: “Kalunga, file nge onghenda, file nge onghenda. Osheshi kuove omwenyo wange otau kongo ekwafo, ndele momudidimbe womavava oye onda hala okukonga eameno fiyo ehanauno la pita po.” — Epsalme 57:2.
10, 11. Omukriste wedina Gertrud okwa li a shakeneka eshongo lilipi fimbo a li omunyasha, nokwa ti ngahelipi shi na sha nokuhawanenena kwovaitaveli vakwao?
10 Inatu pumbwa okungongota ngeenge vamwe ovo ve li mehangano laJehova kunena ova ningi ovakengeleledi. Jehova novaengeli vaye nosho yo ovafita vopamhepo itave ke lipwililikila nande ovo ve li ovakengeleledi novakolokoshi meongalo lopaKriste. Ndele nande ongaho, atusheni otu na okulididimikila okuhawanenena kwopanhu — kwetu vene nosho yo kwovapiya vaKalunga vakwetu.
11 Gertrud, oo a longela Jehova oule wefimbo lile, okwa li a lundilwa fimbo a li omunyasha kutya oku li omukengeleledi nonokutya ka li shili omuudifi wOuhamba wefimbo li yadi. Mbela okwa li e linyenga ngahelipi kwaasho? Mbela okwa li a ngongota shi na sha nonghedi oyo a li a ungaungwa naye? Ahowe. Fimbo ina fya mo 2003, eshi a li e na omido 91, okwa popya shi na sha nonakudiwa yaye, a ti: “Oimoniwa yomonghalamwenyo yange aishe oya honga nge kutya nonande oohandimwe ova ninge omapuko, Jehova ota wilike oilonga yaye inene, ta longifa ovanhu inava wanenena.” Ngeenge pa li pa holoka oupyakadi wa etifwa kokuhawanenena kwovapiya vaKalunga vakwao, okwa li ha ilikana kuKalunga tashi di komutima.
12. (a) Oikala ii yOvakriste vamwe vomefelemudo lotete ilipi tuhe na okuhopaenena? (b) Oshike tu na okukala twa lenga?
12 Molwaashi nOvakriste ovo va kala ovadiinini oule wefimbo inava wanenena, ngeenge umwe womwaavo ve na oshinakuwanifwa okwa nyono, natu twikileni ‘okulonga aishe nopehe na okungongota.’ (Ovafilippi 2:14, yelekanifa OB-1986.) Kashi nyikifa tuu oluhodi ngeenge otwa landula oshihopaenenwa shii shOvakriste vonhumba vomeongalo lomefelemudo lotete! Omuhongwa Judas okwa popya kutya ovahongi ovanaipupulu vopefimbo opo ova li va ‘dina ouhamba nova li va sheka ovo vomoshinge.’ Natango, ovanyoni ovo ‘ova li ve na eenyamukudi alushe novali hava ngongotele oipewa yavo oyo va li ve na.’ (Judas 8, 16) Inatu hopaeneneni nandenande oikala yokungongota ya tya ngaho, ndele ponhele yaasho, natu tale komauwa oo hatu mono okupitila ‘momupiya omudiinini.’ Natu kale twa lenga ouwa wehangano laJehova ‘nokulonga aishe nopehe na okungongota.’
‘Eendjovo edi odikukutu’
13. Ovahongwa vamwe ova li ve linyenga ngahelipi komahongo onhumba aJesus Kristus?
13 Mefelemudo lotete, vamwe ova li va ngongotela ovalumenhu ovo va li ve na oinakuwanifwa, ofimbo vamwe va li va ngongota shi na sha nomahongo aJesus. Eshi Jesus a li a popya eendjovo odo di li muJohannes 6:48-69, a ti: “Ou ta li ombelela yange ye ta nu ohonde yange, oye e nomwenyo waalushe,” “vahapu vomovalongwa vaye eshi ve shi uda, ova tya: Eendjovo edi dikukutu, olyelye ta dulu oku di pwilikina?” Jesus okwa li a didilika kutya ‘ovahongwa vaye ova li va ngongota’ shi na sha neendjovo odo. Kakele kaasho, “vahapu vomovalongwa vaye [ova] shuna monima, vo inava enda vali naye.” Ndelenee havahongwa aveshe va li va ngongota. Didilika osho sha li sha ningwa po eshi Jesus a li a pula ovahongwa vaye 12 a ti: “Nanye yo mwa hala okuya?” Omuyapostoli Petrus okwa li a nyamukula a ti: “Omwene, otu ye kulyelye ngeno? Ove u neendjovo domwenyo waalushe; ndele fye twa itavela ndele tu shi shii, Oove Omuyapuki waKalunga.”
14, 15. (a) Omolwashike Eendombwedi dimwe hadi ngongota shi na sha nomahongo onhumba opaKriste? (b) Oshike hatu lihongo moshimoniwa shaEmanuel?
14 Kunena, ope na omuvalu munini elela mokati koshiwana shaJehova oo hau ngongota shi na sha nomahongo onhumba opaKriste nosho yo shi na sha noshitukulwa shehangano laJehova shokombada yedu. Okungongota kwa tya ngaho ohaku etifwa kushike? Luhapu, ohaku etifwa kokuheneudeko li na sha nanghee Kalunga ha ungaunga noinima. Molwaashi Omushiti oha hololele oshiwana shaye oshili kanini nakanini, eudeko letu lOmishangwa ohali ende tali xwepopala mokweendela ko kwefimbo. Ovapiya vaJehova vahapu ohava hafele exumokomesho la tya ngaho. Ndele vamwe ohava kala ve lishii ‘unene ouyuki,’ nomolwaasho ihava kala va hafela omalunduluko a tya ngaho. (Omuudifi 7:16) Oikala oyo otashi dulika i etifwe yo kounhwa, ile komhepo yemanguluko. Kashi na nee mbudi kutya oshike hashi etifa oikala oyo, okungongota kwa tya ngaho okwa nyika oshiponga, molwaashi otaku dulu oku tu ningifa tu shune mounyuni nokushikula eendjila dao.
15 Pashihopaenenwa, Emanuel, oo a li nale Ondombwedi, okwa li ha kembaula omauyelele onhumba oo kwa li ha lesha moishangomwa ‘yomupiya omudiinini nomunaendunge.’ (Mateus 24:45) Okwa li a efa po filufilu okulesha oileshomwa yopaKriste, nohauxuuninwa okwa ka lombwela ovakulunhuongalo vomeongalo lavo kutya ka li vali a hala okukala Ondombwedi yaJehova. Ndele konima yefimbo lixupi, Emanuel okwa ka mona kutya omahongo ehangano laJehova oku li mondjila filufilu. Okwa ka kundafana nEendombwedi, ta dimine kutya okwa li a ninga epuko, nokwa li a alulilwa meongalo e li Ondombwedi yaJehova. Konima yaasho, okwa ka kala vali a hafa.
16. Oshike tashi dulu oku tu kwafela tuha kale momalimbililo shi na sha nomahongo onhumba opaKriste?
16 Ongahelipi ngeenge otu na eamo lokungongota molwaashi twa limbililwa omahongo onhumba oshiwana shaJehova? Natu kale tu na elidiiniko. “Omupiya omudiinini” otashi dulika a nyanyangide ouyelele wonhumba oo tau ka nyamukula omapulo etu noku tu kufa momalimbililo. Oshiwa yo okukonga ekwafo kovakulunhuongalo Ovakriste. (Judas 22, 23) Okwiilikana, ekonakono lopaumwene nosho yo okweendafana novaitaveli vakwetu ovo ve na oupamhepo muwa otai dulu yo oku tu kwafela tu mone ouyelele oo tau tu kufa momalimbililo notu kulike olupandu letu li na sha neeshili dOmbibeli odo tadi pameke eitavelo letu, odo hatu lihongo okupitila moupitilo oo Jehova ta longifa.
Ino teka omukumo
17, 18. Ponhele yokungongota, otu na okukala tu na oikala ya tya ngahelipi nomolwashike?
17 Odoshili kutya ovanhu inava wanenena ove na eamo lopaudalelwamo lokunyona, navamwe otashi dulika va kale ve na eamo linene lokungongota shi na sha noinima yongaho. (Genesis 8:21; Ovaroma 5:12) Ndelenee ngeenge otwa kala hatu ngongota alushe, ohatu ka tula ekwatafano letu naJehova Kalunga moshiponga. Onghee hano, otwa pumbwa okupangela eamo keshe lokungongota.
18 Ponhele yokukala hatu ngongota shi na sha noinima momaongalo, natu kale tu na omukumo nokukala twe lipyakidila noinima oyo tai tu kaleke twa hafa, tai tu kwafele tu kale tu na etilokalunga notu na ondjele notai tungu eitavelo. (1 Ovakorinto 15:58; Titus 2:1-5) Jehova ota wilike ehangano laye, na Jesus, oo e li Omutwe weongalo, oku wete oinima aishe oyo tai ningwa momaongalo, ngaashi ashike a li e i wete mefelemudo lotete. (Ehololo 1:10, 11) Natu kale hatu teelele nelidiiniko Kalunga naKristus va yukife oinima. Otashi dulika va longife ovafita ovo ve na oinakuwanifwa va yukife oinima oyo ya pumbwa okuyukifwa. — Epsalme 43:5; Ovakolossi 1:18; Titus 1:5.
19. Oshike tu na okuninga paife, fimbo Ouhamba inau hovela okupangela ovanhu kombada yedu alishe?
19 Mafiku onghalelo ei yoinima youkolokoshi otai ka xulifwa po, opo nee Ouhamba wopaMessias otau ka pangela ovanhu kombada yedu alishe. Ofimbo twa teelela Ouhamba oo u uye, otwa pumbwa okukala tu na omukumo. Osho otashi ke tu kwafela tu kale hatu tale komaukwatya mawa ovaitaveli vakwetu, ponhele yokukala hatu konenene omapuko avo. Otashi tu etele ehafo okutala komaukwatya mawa avamwe, notashi ke tu kwafela tu kale twa pama pamhepo, ponhele yokukala twa loloka pamaliudo omolwokungongota.
20. Omanangeko noupuna elipi hatu ka hafela, ngeenge otwa kala tu na omukumo?
20 Okukala tu na omukumo otaku ke tu kwafela yo tu kaleke momadiladilo omanangeko noupuna mahapu oo hatu hafele omolwokukala hatu endafana noshitukulwa shehangano laJehova shokombada yedu. Olo olo ashike ehangano mounyuni aushe lidiinini kOmunamapangelo aeshe. Mbela ou udite ngahelipi kombinga youshili oo nosho yo oufembanghenda wokulongela Kalunga aeke kashili, Jehova? Kala noikala ngaashi yaDavid, oo a imba a ti: “Oove, Omuudi womailikano, ombelela aishe i nokuuya kuove. Omunelao ou, we mu hoolola, ndee oto [itavele] a ehene kuove, ye a kale momikala doye, opo fye tu palulwe kouwa weumbo loye, mouyapuki wotembeli yoye.” — Epsalme 65:3, 5.
Oto dimbuluka?
• Omolwashike tu na okukala tu na olupandu shi na sha naavo tava kwatele komesho momaongalo?
• Otu na okulinyenga ngahelipi ngeenge ovamwatate ovo ve na oinakuwanifwa tava ningi omapuko?
• Otu na okutala ko ngahelipi omalunduluko oo haa ningwa e na sha neudeko lOmishangwa?
• Oshike tashi dulu okukwafela Omukriste aha kale e na omalimbililo?
[Efano pepandja 14]
David okwa li a pa Salomo omudutilo u na sha nanghee otembeli ya li i na okutungwa nokwa li a yambidida nomutima aushe elongelokalunga lashili
[Efano pepandja 17]
Ovakulunhuongalo Ovakriste ohava yandje nehafo ekwafo lopamhepo kuvamwe