Nkene tu na okudhimbulula mo elongelokalunga lyashili
OMAITAALO ogendji ohaga ti kutya shoka haga longo aantu osha za kuKalunga. Onkee ano, tse otwa pumbwa okupulakena oohapu dhomuyapostoli gwaJesus, Johannes, ngoka a nyola a ti: “Ookuume kandje aaholike, inamu itaala ayehe mboka taa ti kutya oye na Ombepo yaKalunga, ihe ya konakoneni, mu tale kutya ombepo ndjoka ye yi na ngele oyaKalunga tuu. Oshoka aahunganeki aafundja oyendji oye ya nuuyuni auhe.” (1 Johannes 4:1) Ongiini tatu vulu okukonakona oshinima opo tu mone ngele osha za kuKalunga?
Oshinima kehe sha za kuKalunga ohashi ulike uukwatya we, unene tuu uukwatya we mboka u li dhingi, ohole. Pashiholelwa, okunika ezimba lyasha kwetu, hoka haku tu kwathele okukala twa hokwa ezimba lyoshigwanga shontumba, lyoongala nenge lyomboloto opo ya telekwa, otaku ulike ohole yaKalunga. Okuvula kwetu okumona etango tali ningine, okambilimbili nenge okahanona taki imemeha otaku ulike ohole yaKalunga ndjoka e tu hole nayo. Osha faathana shi na ko nasha nokuvula kwetu okuuva omusika ombwanawa, ewi lyokadhila nenge ewi lyomuholike gwetu. Nokuli onshitwe yetu yopantu, nonando inatu gwanenena, ohayi ulike ohole yaKalunga. Omolwaashoka olundji hatu mono uushili woohapu dhaJesus ndhoka tadhi ti: “Okugandja oku na elago ku vule okutaamba.” (Iilonga 20:35) Ohatu nyanyukilwa okuulika ohole molwaashoka otwa shitwa ‘oshifetha shaKalunga.’ (Genesis 1:27) Nonando Jehova oku na omaukwatya galwe ogendji, ohole oyo uukwatya we wa tongomana noonkondo.
Omanyolo ngoka ga za kuKalunga oge na okuulika ohole ye. Omaitaalo gomuuyuni oge na iinyolomwa oyindji mbyoka ya nyolwa nale. Mbela iinyolomwa ya tya ngaaka ohayi shi pondola ngiini shi na ko nasha nokuulika ohole yaKalunga?
Oshili oyo kutya omanyolo ogendji gonale gopalongelokalunga itaga yelitha nawa ohole yaKalunga nenge nkene tu na okukala tu hole Kalunga. Onkee ano aantu omamiliyona ihaya mono eyamukulo ngele taya pula taya ti: “Omolwashike tu wete ohole yaKalunga meshito lye omanga okumona iihuna nuuwinayi tayi tsikile natango?” Mepingathano naashoka, Ombiimbeli ndjoka yi li embo lyopalongelokalunga lya nyolwa nale, oyo awike tayi fatulula sha yela ohole yaKalunga. Otayi tu longo wo nkene tu na okutula ohole miilonga.
Embo li na ko nasha nohole
Oohapu dhaKalunga, Ombiimbeli, otadhi holola kutya Jehova oye “Kalunga kohole.” (2 Aakorinto 13:11) Ombiimbeli otayi hokolola nkene ohole yi inyengitha Jehova a pe aantu yotango onkalamwenyo kaayi na omikithi neso. Ihe uunashipotha tau tsu ompinge noonkondopangelo dhaKalunga owe etele aantu okumona iihuna. (Deuteronomium 32:4, 5; Aaroma 5:12) Jehova okwa katuka onkatu okweetulula shoka sha li sha kanithwa. Oohapu dhaKalunga otadhi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Omanyolo Omayapuki otaga yelitha natango ohole yaKalunga sho taga hokolola nkene Kalunga a toto po epangelo lya gwanenena li li kohi yewiliko lyaJesus ndyoka tali ka galulila ombili kaantu aavuliki.—Daniel 7:13, 14; 2 Petrus 3:13.
Ombiimbeli otayi ngongo oshinakugwanithwa shaantu noohapu ndhika tayi ti: “ ‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’ Ompango ayihe nomahunganeko agehe oya kwatelwa miipango mbika iyali.” (Mateus 22:37-40) Ombiimbeli otayi popi kutya yo oya nyolithwa koonkondo dhombepo ondjapuki yaKalunga. Molwaashoka otayi ulike sha yela uukwatya we, otatu vulu okukala nuushili kutya oya za ‘kuKalunga kohole.’—2 Timoteus 3:16.
Ngele tatu tula miilonga omuthikampango nguka, otatu vulu okumona kutya omanyolo gonale geni ga za shili kuKalunga. Ohole ohayi ndhindhilikitha mo wo aalongelikalunga yashili, molwaashoka ohaya holele Kalunga mokuulika ohole.
Nkene tatu vulu okudhimbulula mo aantu mboka ye hole Kalunga
Mboka ye hole shili Kalunga oyi iwetikile mo, unene tuu ngashingeyi sho tu li mwaashoka Ombiimbeli tayi ithana “omasiku omahugunina.” Aantu otaya ka kala ‘nokwiihola noye na uuhalu weliko, . . . aaholiihulo komeho gaKalunga.’—2 Timoteus 3:1-4, OB-1954.
Aantu mboka ye hole Kalunga oto vulu oku ya dhimbulula mo ngiini? Ombiimbeli otayi ti: “Ohole yokuhola Kalunga oyo okuvulika kiipango ye.” (1 Johannes 5:3) Ohole yokuhola Kalunga ohayi inyengitha aantu ya simaneke omithikampango dhOmbiimbeli dhopamikalo. Pashiholelwa, Oohapu dhaKalunga odhi na oompango tadhi popi kombinga yomilalo noyondjokana. Omilalo odha pitikilwa owala mondjokana, nondjokana oyi na okukalelela. (Mateus 19:9; Aahebeli 13:4) Sho omukiintu gumwe muSpania ngoka a konakona uuteolohi a li a kala pokugongala mpoka Oonzapo dhaJehova dha li tadhi konakona nuulaadhi oompango dhaJehova dhopamikalo, okwa li a ti: “Okugongala huka okwa tunga ndje, hakomayele owala giipopiwa yopamanyolo, ihe okuukumwe mboka u li mokati kaantu mboka, omithikampango dhawo dhopamikalo dha dhenga mbanda nosho wo eihumbato lyawo ewanawa.”
Kakele kokukala ye hole Kalunga, Aakriste yashili ohaya ndhindhilikwa mo nuupu okupitila momukalo moka hayu ulikile aantu ooyakwawo ohole. Iilonga yawo ya simanenena oyo okupopya nayalwe kombinga yetegameno awike ndyoka aantu ye na, Uukwaniilwa waKalunga. (Mateus 24:14) Kapu na sha tashi vulu okweetela aantu ooyakwawo omauwanawa ogendji taga kalelele kaashi shi oku ya kwathela ya mone ontseyo yokutseya Kalunga. (Johannes 17:3) Aakriste yashili ohayu ulike wo ohole yawo momikalo dhilwe. Ohaya gandja ekwatho li na oshilonga kwaamboka taya mono iihuna. Pashiholelwa, sho ekakamo lyevi lya li lye etitha oshiponga oshinene muItalia, oshifokundaneki shamo osha li sha kundaneke kutya Oonzapo dhaJehova “odha li dha gandja ekwatho momukalo tagu longo kwaamboka taya mono iihuna, itaadhi tala kutya oyeitaalo lini.”
Kakele owala kokukala ye hole Kalunga naantu ooyakwawo, Aakriste yashili oye holathane. Jesus okwa ti: “Oshipango oshipe otandi shi mú pe, mu holathane. Ngashika naanaa [nangame] nda kala ndi mú hole, osho nane wo omu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.”—Johannes 13:34, 35.
Mbela ohole ndjoka Aakriste yashili ye ninathane oyi li ya yooloka ko kwaandjoka hayi ulikwa kaantu yalwe? Ema ngoka e li omuniilonga gwokwoopaleka momagumbo osho a li e wete. Oha longo moshilando La Paz muBolivia, moka eyooloko lyopamihoko olundji hali yoolola aayamba moohepele. Okwa ti: “Oshikando shotango nda ya kokugongala kwOonzapo dhaJehova, onda li nda mono ko omulumentu a zala nawa a kuutumba nokwa li ta kundathana nomukiintu Omuindia. Inandi shi mona nando onale. Pethimbo opo tuu mpoka, onda li nda mono kutya shika oshigwana shaKalunga.” Sha faathana, omukiintu omugundjuka Omubrasilia, gwedhina Miriam okwa ti: “Kandi shi okunyanyukwa kutya oshike, nokuli nomuukwanegumbo wandje kaku mo. Oshikando shotango nda mona ohole tayi tulwa miilonga, osha li mokati kOonzapo dhaJehova.” MIilongohangano, omuwiliki gwoonkundana dhoko-TV okwa nyola a ti: “Ando aantu oyendji oya li taya kala nokwiihumbata ngaashi aantu yeitaalo lyeni, ando oshigwana shika kashi li monkalo ombwinayi moka shi li ngashingeyi. Ngame omulumentu gumwe omukundaneki ngoka nda tseya kutya mehangano lyeni omu na ohole neitaalo lya kola mOmushiti.”
Konga elongelokalunga lyashili
Ohole oyo uukwatya hau ndhindhilikitha mo elongelokalunga lyashili. Jesus okwa yelekanitha okumona elongelokalunga lyashili nokumona ondjila yu uka nosho wo okuhogolola okweenda muyo. Oyo awike ondjila ndjoka tayi fala komwenyo gwaaluhe. Jesus okwa ti: “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taa yi mono.” (Mateus 7:13, 14) Opu na owala ongundu yimwe yAakriste yashili ndjoka hayi ende naKalunga ya hangana mondjila yelongelokalunga lyashili. Onkee ano, ito vulu okuhogolola owala eitaalo kehe. Ngele wa mono ondjila ndjoka e to hogolola okweenda muyo, oto ka kala nonkalamwenyo ombwanawa molwaashoka oyo ondjila yohole.—Aaefeso 4:1-4.
Ito ka kala tuu wa nyanyukwa ngele to kala nokweenda mondjila ndjoka yelongelokalunga lyashili! Osha fa to ende pamwe naKalunga. Oto ki ilonga kuKalunga uunongo nohole noto ka nyanyukilwa ekwatathano ewanawa nayalwe. Oto ki ilonga kuye elalakano lyonkalamwenyo noto ka vula okuuva ko omauvaneko gaKalunga e to kala u na etegameno lyonakuyiwa. Ito ki ipa nando uusama omolwokukonga elongelokalunga lyashili.
[Ethano pepandja 3]
Miinyolomwa oyindji yopalongelokalunga mbyoka ya nyolwa nale, Ombiimbeli oyo awike tayi mu holola e li Kalunga kohole
[Ethano pepandja 5]
Aakriste yashili ohaya ndhindhilikwa mo molwokutula kwawo ohole miilonga