Inamu kufa kumwe osho sha tulwa kumwe kuKalunga

“Kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu.” — MATEUS 19:6.

1, 2. Omolwashike ovalihomboli ve na okuteelela okushakeneka omaupyakadi mohombo efimbo nefimbo, ngaashi Omishangwa tadi ti?

NATU tye nee ngeno oto lilongekida okuya molweendo lile nohauto. Mbela oto diladila kutya ito ka shakeneka omashongo momukokomoko wolweendo? Itashi ka kala pandunge okudiladila kutya ito ka shakeneka omashongo nandenande. Pashihopaenenwa, otashi dulika onghalo yomhepo i ka kale ii, oyo tashi dulika i ku ningife u shinge to ende kanini nonelungi. Peemhito dimwe, otashi dulika mohauto mu nyonauke sha sha pamba oikwamashina osho tashi dulika ito dulu oku shi pangela, noto ka pumbwa okukanghama komunghulo wopate opo u konge ekwafo. Mbela eenghalo da tya ngaho odi na oku ku ningifa u diladile kutya owa ninga epuko eshi wa ya molweendo olo nonokutya ou na okufiya po ohauto yoye? Hasho nandenande! Ngeenge oto ende olweendo lile, ou na okuteelela okushakeneka omaupyakadi nou na okukendabala okuungaunga nao pandunge.

² Ohombo nayo oya fa omunhu e li molweendo. Mohombo namo ohamu holoka omaupyakadi, nomolwaasho otashi ka kala sha nyika oulai kovalikongi ovo va hala okuhombola okudiladila kutya itava ka shakeneka nande oupyakadi washa mohombo yavo. Ombibeli oya popya sha yela mOvakorinto votete 7:28 kutya ovalihomboli otava ka hangwa ‘koudjuu wopalutu.’ Omolwashike mbela? Omolwaashi ovalihomboli inava wanenena nomolwaashi otu li ‘momafimbo madjuu.’ (2 Timoteus 3:1; Ovaroma 3:23) Onghee hano, novalihomboli ovo ve na oupamhepo muwa nohava longele kumwe navo ohava shakeneke omaupyakadi omafimbo amwe.

3. (a) Ovanhu vahapu mounyuni ohava tale ko ngahelipi ohombo? (b) Omolwashike Ovakriste hava kendabala okukaleka po eehombo davo?

³ Kunena, ovalihomboli vamwe ngeenge va hangwa komaupyakadi, ohava tokola ashike okuhengafana. Moilongo ihapu, eteyohombo otali hapupala neenghono. Ndele Ovakriste vashili ohava ungaunga nomaupyakadi avo ponhele yokweendelela okuninga etokolo lokuhengafana. Omolwashike mbela? Omolwaashi ohava tale ko ohombo i li oshali iyapuki oyo ya dja kuJehova. Jesus okwa popya shi na sha nohombo a ti: “Osho Kalunga e shi tula kumwe, inashi kufwa kumwe komunhu.” (Mateus 19:6) Ndele okukala metwokumwe nefinamhango olo haalushe shipu. Pashihopaenenwa, ovapambele nosho yo ovanhu vamwe ovo ihava dulika komafinamhango Ombibeli, mwa kwatelwa ovayandjimayele shi na sha neehombo, luhapu ohava ladipike ovalihomboli va topoke ile va hengafane nopehe na etomheno lopamishangwa.a Ndele Ovakriste ove shii kutya oshixwepo okukandula po oupyakadi mohombo ponhele yokweendelela okutokola okuhengafana. Osha fimanenena yo okukala twa tokola toko okuninga oinima metwokumwe naasho Jehova a hala, ndele hakulandula omayele ovanhu. — Omayeletumbulo 14:12.

Nghee omaupyakadi mohombo taa dulu okukandulwa po

4, 5. (a) Omashongo elipi haa shakenekwa meehombo? (b) Omolwashike omafinamhango oo e li mEendjovo daKalunga taa longo, nokuli nongeenge pa holoka omaupyakadi mohombo?

⁴ Doshili, ohombo oya pumbwa okupashukilwa. Pashihopaenenwa, omafimbo amwe ovalihomboli ova pumbwa okukandula po okuhaudafana pokati kavo nonande inaku kwata moiti. Ndele meehombo dimwe, otashi dulika mu kale omaupyakadi a kwata moiti oo taa dulu okunyona po ekwatafano lovalihomboli. Omafimbo amwe, otashi dulika ovalihomboli va pumbwa okupula omukulunhuongalo Omukriste a hombola noku na owino, e va kwafele. Ngeenge mohombo mwa holoka omaupyakadi a kwata moiti, inashi hala okutya ohombo ya tya ngaho itai ka pondola. Osho otashi ulike ashike kutya ovalihomboli ova pumbwa filufilu okukandula po omaupyakadi omohombo tava longifa omafinamhango Ombibeli.

⁵ Jehova oku shii nawa osho twa pumbwa opo tu kale tu na eehombo tadi pondola e dule keshe umwe, molwaashi oye Omushiti wetu nOmutoti wohombo. Epulo la fimana olo tu na okulipula ololo kutya: Mbela ohatu ka pwilikina ngoo komayele oo taa hangwa mEendjovo daye nokudulika kuo? Ngeenge otwa ningi ngaho, ohatu ka pondola filufilu. Jehova okwa li a lombwela oshiwana shaye shonale a ti: “Akutu, ngeno ove wa li wa diinina oipango yange, ngeno ombili yoye oya kala ngaashi omulonga tau tondoka, nouyuki woye ngaashi omakufikufi omefuta.” (Jesaja 48:18) Doshili, okudulika kewiliko olo li li mOmbibeli otaku dulu okukwafela eehombo detu di pondole. Tete natu konakoneni omayele oo Ombibeli ya yandja kovashamane.

“Kaleni nokuhola ovakainhu veni”

6. Omishangwa otadi yandje omayele elipi kovashamane?

⁶ Omuyapostoli Paulus okwa yandja omayele a yela kovashamane monhumwafo oyo a li a shangela Ovaefeso. Paulus okwa ti: “Ovalumenhu, [kaleni nokuhola, NW] ovakainhu veni ngaashi Kristus e hole eongalo, nokwe liyandja molwalo. Osho ngaha novalumenhu ve nokuhola ovakainhu vavo ngaashi omalutu avo vene; oye ou e hole omukainhu waye, oye oku lihole ye mwene. Osheshi kape na ou ha tondo [olutu laye, ndele ohe li palula noha ungaunga nalo pahole, ngaashi Kristus ha palula nokuungaunga pahole neongalo laye, NW]. Ndelenee keshe womunye na kale yo e hole omukainhu waye mwene ngaashi e lihole ye mwene.” — Ovaefeso 5:25, 28, 29, 33.

7. (a) Oukwatya ulipi u na okukala tau dana onghandangala meehombo dOvakriste? (b) Ongahelipi ovashamane tava dulu okutula moilonga omayele oo taa ti: “Kaleni nokuhola ovakainhu veni”?

⁷ Paulus ina kundafana kombinga youpyakadi keshe oo tau dulu okuholoka po pokati kovalihomboli. Ndele ponhele yaasho, okwa yukifa elitulemo koukwatya wa fimanenena wohole oo u na okukala tau dana onghandangala meehombo dOvakriste. Didilika kutya ohole oya tumbulwa lwoikando iheyali meevelishe odo da tofwa mokatendo ka tetekela. Didilika yo kutya Paulus okwa lombwela ovashamane a ti: “Kaleni nokuhola ovakainhu veni.” Osha yela kutya Paulus okwa li a didilika kutya oshipu okukala mwa hokwafana ngeenge opo mwe likongo, ndele kashipu okutwikila okukala mu holafane mohombo. Osho osho shi li ngaho unene tuu ‘momafiku aa axuuninwa,’ eshi ovanhu vahapu ‘ve lihole vo vene, novehe na ombili.’ (2 Timoteus 3:1-3) Omaukwatya oo mai otaa nyono po eehombo dihapu kunena, nomolwaasho ovashamane ovanahole itava ka efa oikala younyuni yokulihola mwene i nwefwe mo omadiladilo avo neenghatu davo. — Ovaroma 12:2.

Ongahelipi ovashamane tamu dulu okufila oshisho eemhumbwe dovakulukadi veni?

8, 9. Omeenghedi dilipi omushamane Omukriste e na okufila oshisho omukulukadi waye?

⁸ Ngeenge ou li omushamane Omukriste, ongahelipi to dulu okuhenuka oikala yokulihola mwene ndele to ulikile omukulukadi woye ohole yashili? Paulus okwa tumbula oinima ivali mOvaefeso 5:29 oyo ovashamane mu na okuninga, okupalula ovakulukadi veni nokuungaunga navo pahole. Ndele ongahelipi to dulu okupalula, sha hala okutya, okufila oshisho kaume koye kopahombo? Onghedi imwe omokufila oshisho eemhumbwe daye dopalutu. Paulus okwa li a shangela Timoteus a ti: “Ou iha file ovakwao oshisho naunene ava vambulaye, ye okwe lidimbika eitavelo noku dulike kuou e he fi omwiitaveli.” — 1 Timoteus 5:8.

⁹ Efiloshisho ola kwatela mo shihapu shihe fi ashike okuyandja oikulya, oikutu nosho yo onhele yokukala. Ola kwatela mo yo okuwanifila ovakulukadi eemhumbwe davo dopamaliudo nodopamhepo. Ovashamane vamwe ohava file oshisho ovakulukadi vavo palutu, ndele ova dopa oku va fila oshisho pamaliudo nopamhepo. Ndelenee osha fimanenena okufila oshisho eemhumbwe dopamaliudo nodopamhepo domukulukadi. Oshoshili kutya ovalumenhu vahapu Ovakriste ove lipyakidila neenghono noinakuwanifwa yeongalo. Ndele nande ongaho, osho itashi ti kutya omushamane oo e na oinakuwanifwa ihapu meongalo ke na okuwanifa po oinakuwanifwa yaye oyo a pewa kuKalunga e li omutwe woukwaneumbo. (1 Timoteus 3:5, 12) Omido da pita, Oshungonangelo imwe oya tile: “Metwokumwe noiteelelwa yOmbibeli, otaku dulu okutiwa kutya ‘oilonga youfita ohai hovele meumbo.’ Ngeenge omukulunhuongalo okwa kala iha file oshisho oukwaneumbo waye, ota dulu okukanifa oshinakuwanifwa shaye shoukulunhuongalo.”b Onghee hano, osha yela kutya osha fimana okufila oshisho omukulukadi woye palutu nopamaliudo. Ndele komesho yaaishe, osha fimanenena oku mu fila oshisho pamhepo.

Okuungaunga pahole nomukulukadi woye otashi ti ngahelipi?

10. Ongahelipi omushamane ta dulu okuulika kutya oha ungaunga pahole nomukulukadi waye?

¹⁰ Okuungaunga pahole nomukulukadi woye otashi ti okukala naye monghedi oyo tai ulike kutya ou mu hole nonokutya ou na ko nasha naye. Ope na eenghedi dihapu omo to dulu oku shi ninga. Yotete, kala ho kala nomukulukadi woye efimbo la wana. Ngeenge iho kala naye efimbo la wana, ohole yaye yoku ku hola otai dulu okutalala. Ino diladila ashike ile u tye kutya oho kala pamwe nomukulukadi woye efimbo la wana nonokutya oho mu pe elitulemo la wana. Omukulukadi woye oku na okukala e udite kutya okuniwe ko nasha naye shili. Paulus okwa shanga a ti: “Inapa kala ou ta kongo ouwa waye mwene, ndelenee keshe na konge ouwa wamukwao.” (1 Ovakorinto 10:24) U li omushamane omunahole, kala u shii nawa eemhumbwe dashili domukulukadi woye. — Ovafilippi 2:4.

11. Ongahelipi onghedi omo omushamane ta ungaunga nomukulukadi waye hai kumu ekwatafano laye naKalunga nosho yo neongalo?

¹¹ Onghedi imwe omo omushamane ta dulu okuulika kutya oha ungaunga pahole nomukulukadi waye oyo okukala ha popi naye nolukeno nokukala naye nombili. (Omayeletumbulo 12:18) Paulus okwa li a shangela Ovakolossi a ti: “Ovalumenhu nye, holeni ovakainhu veni, nye inamu va [ninga] onyanya.” (Ovakolossi 3:19) Embo limwe lomauyelele ola ti kutya oshitukulwa shaxuuninwa sheendjovo odo daPaulus otashi dulu okutolokwa panghedi yoshipopiwamayele kutya “ino ungaunga naye a fa omupika” ile “ino mu ninga omupika.” Omushamane oo ha ningi omukulukadi waye onyanya kutya nee ongeenge ve li ovo aveke ile omoipafi yavamwe, ita ungaunga nande nomukulukadi waye pahole. Ngeenge omushamane oha ningi omukulukadi waye onyanya, oshi na oupu a nyone po ekwatafano laye mwene naKalunga. Omuyapostoli Petrus okwa kumaida ovashamane a ti: “Kaleni novakainhu veni neendunge ngaashi noiyuma inai pama, nye mu va fimaneke yo, osheshi ovo ovafyuululi vonghenda yomwenyo pamwe nanye, omaindilo eni a ha pyakidilwe.”c — 1 Petrus 3:7.

12. Ovashamane Ovakriste otave lihongo shike monghedi omo Jesus a li ha ungaunga neongalo lopaKriste?

¹² Ino diladila nande kutya ohole yomukulukadi woye yoku ku hola otai ke uya ashike ngahenya. Kala alushe ho mu shilipaleke kutya ou mu hole. Jesus okwa tulila po ovashamane Ovakriste oshihopaenenwa monghedi omo a li ha ungaunga neongalo lopaKriste. Okwa li omunambili, e na olune nokwa li ha dimine po ovashikuli vaye, nonande ova li hava ningi omapuko luhapu. Nomolwaasho okwa li a lombwela ovanhu a ti: “Ileni kuame, . . . osheshi Aame omunambili momutima onde lininipika; ndee tamu limonene eemwenyo deni etulumuko.” (Mateus 11:28, 29) Omushamane Omukriste oku na okuungaunga nomukulukadi waye monghedi ya fa oyo Jesus a li a ungaunga neongalo. Omushamane oo ha ungaunga shili nomukulukadi waye pahole, te shi ulike meendjovo nomoilonga, ota ka kala odjo yetulumuko lashili kuye.

Ovakulukadi ovo hava tula moilonga omafinamhango Ombibeli

13. Omafinamhango Ombibeli elipi taa dulu okukwafela ovakulukadi?

¹³ Ombibeli oi na yo omafinamhango oo taa dulu okukwafela ovakulukadi. Ovaefeso 5:22-24, 33 otava ti: “Ovakainhu, dulikeni kovalumenhu veni ongaashi kOmwene. Osheshi omulumenhu oye omutwe womukainhu, ngaashi Kristus yo Oye omutwe weongalo, Ye omuxupifi wolutu. Ndelenee ngaashi [eongalo] hali dulika kuKristus, osho tuu ngaha ovakainhu nava dulike kovalumenhu vavo moinima aishe. . . . Omukainhu na fimaneke omulumenhu waye.”

14. Omolwashike efinamhango lopamishangwa li na sha nokudulika itali dinifa ovakulukadi?

¹⁴ Didilika nghee Paulus a divilika eduliko nefimaneko. Ovakulukadi ova lombwelwa va kale hava dulika kovashamane vavo. Osho oshi li metwokumwe nelongekido laKalunga. Oshishitwa keshe shi na omwenyo meulu nosho yo kombada yedu oshi na okudulika kwaao e li omutwe washo. Jesus naye oku na okudulika komutwe waye, Jehova Kalunga. (1 Ovakorinto 11:3) Omushamane oo ha longifa oukwamutwe waye monghedi ya yuka ote ke shi ninga shipu komukulukadi waye a kale ta dulika kuye.

15. Ombibeli otai yandje omayele elipi kovakulukadi?

¹⁵ Paulus okwa popya yo kutya omukulukadi “na fimaneke omulumenhu waye.” Omukulukadi Omukriste oku na okukala e na ‘omhepo yombili noyelimweneneno,’ ndele ke na okukala ta kondjifa nounhwa omushamane waye ile okukala nomhepo yemanguluko. (1 Petrus 3:4) Omukulukadi omutilikalunga oha longo noudiinini omolwouwa woukwaneumbo waye noha fimaneke omutwe waye. (Titus 2:4, 5) Ota ka kendabala okupopila mouwa omushamane waye, nokungaha ita ka ningifa vamwe va dine omushamane waye. Ota ka yambidida omushamane waye momatokolo oo a ninga opo a pondole. — Omayeletumbulo 14:1.

16. Ovakulukadi Ovakriste otava dulu okulihonga shike moshihopaenenwa shaSara naRebekka?

¹⁶ Okukala nomhepo yombili noyelimweneneno itashi ti kutya omukainhu Omukriste ke na okuninga omaetepo ile kutya omadiladilo aye inaa fimana. Ovakainhu ovatilikalunga vonale, ngaashi Sara naRebekka, ova li va popya omaliudo avo shi na sha neenghalo donhumba, nOmbibeli otai ulike kutya Jehova okwa li a hokwa eenghatu odo va li va katuka. (Genesis 21:8-12; 27:46–28:4) Ovakulukadi Ovakriste kunena navo otava dulu okupopya omaliudo avo. Ndele nande ongaho, ove na oku shi ninga nefimaneko, ndele hanodino. Kungaho, otava ka hafela eenghundafana davo novashamane vavo notapa ka kala elongelokumwe.

Osha fimana okukala omudiinini kohombo

17, 18. Omeenghedi dilipi ovashamane novakulukadi tava dulu okukondjifa eenghendabala daSatana di na sha nokunyona po eehombo?

¹⁷ Ohombo oi li elongekido tali kalelele. Onghee hano, omushamane nomukulukadi ove na okukala va halelela okulonga noudiinini opo ohombo yavo i pondole. Okuhakundafana va manguluka otaku dulu okuningifa omaupyakadi manini mohombo a kale tae va kenyananeke fiyo a ninga omaupyakadi a kwata moiti. Luhapu ovalihomboli ohava xulifa po okupopya ngeenge pa holoka omaupyakadi, naasho ohashi va ningifa va kale ve ninafane onghone. Ovalihomboli vamwe ohava kendabala nokuli okunyona po eehombo davo, pashihopaenenwa, mokuhovela okukala noihole nomunhu kondje yohombo. Ndele Jesus okwa londwela a ti: “Okeshe tuu ou ta tale omukainhu nokahalu, oye okwe mu haela momutima waye.” — Mateus 5:28.

¹⁸ Omuyapostoli Paulus okwa kumaida Ovakriste aveshe, mwa kwatelwa ovalihomboli Ovakriste, a ti: “Handukeni, ndelenee inamu nyona. Inamu efa etango li ningine mu nehandu. Ndele inamu pa Satana onhele.” (Ovaefeso 4:26, 27) Omutondi wetu munenenene, Satana, oha kendabala okulongifa okuhaudafana oko tashi dulika ku holoke pokati kOvakriste. Ndele inamu efa nandenande a pondole. Ngeenge pa holoka oupyakadi mohombo yeni, kongeni omauyelele mOmbibeli mu tale kutya Jehova ota ti ngahelipi shi na sha noupyakadi oo, tamu longifa oishangomwa ye likolelela kOmbibeli. Pongololei po okuhaudafana pokati keni, tamu popi mwa ngungumana notamu popi oshili. Tuleni moilonga omifikamhango daJehova odo mwe lihonga. (Jakob 1:22-25) Kaleni mwa tokola toko okweenda pamwe naKalunga mu li ovalihomboli, noina mu efa nande omunhu ile oshinima shonhumba shi kufe kumwe osho Kalunga a tula kumwe. — Mika 6:8.

[Omashangelo opedu]

Oto dimbuluka?

• Omolwashike ovalihomboli Ovakriste navo hava shakeneke omaupyakadi meehombo davo?

• Ongahelipi omushamane ta dulu okufila oshisho omukulukadi waye nokuungaunga naye pahole?

• Ongahelipi omukulukadi ta dulu okuulika kutya oha fimaneke omushamane waye?

• Oshike tashi ka kwafela ovalihomboli va kale ovadiinini kohombo yavo?

[Efano pepandja 24]

Omushamane ke na ashike okufila oshisho eemhumbwe dopalutu domukulukadi waye, ndele oku na yo oku mu fila oshisho pamhepo

[Efano pepandja 25]

Omushamane oo ha ungaunga pahole nomukulukadi waye oku li odjo yetulumuko kuye

[Efano pepandja 26]

Ovakulukadi Ovakriste ohava popi omaliudo avo nefimaneko