Ovanamido otava imike natango oiimati pamhepo nonande ova kulupa
‘Ovo va twikwa meumbo lOmwene, nande nava kulupe otava imike natango oiimati.’ — EPSALME 92:14, 15.
1, 2. (a) Luhapu ovanhu ohava diladila kushike shi na sha noukulupe? (b) Omishangwa oda udaneka shike shi na sha noilanduliko oyo ya etifwa kokunyona kwaAdam?
OHO diladila kushike ngeenge to udu outumbulilo oukulupe? Okoshipa shi na eengadji? Okokuhauda ko nawa? Okoilyo yolutu ya nghundipala? Ile okeenghalo vali dimwe odo hadi etifwa ‘komafiku mai,’ odo da hokololwa monghedi ya twa mOmuudifi 12:1-7? Ngeenge osho ngaho, osha fimana okukaleka momadiladilo kutya Omushiti Jehova Kalunga ka li a shita ovanhu nelalakano va kale tava kulupa. Omaukwatya omoukulupe oo a hokololwa pafaneko mOmuudifi etukulwa 12 okwa etifwa kokunyona kwaAdam. — Ovaroma 5:12.
2 Okukula to ningi omukulunhu kaku fi efingo, molwaashi opo omunhu a twikile okukala nomwenyo omido daye odi na okweenda tadi hapupala. Oinima aishe i na omwenyo oya shitwa i kale hai kulu. Mafiku oilanduliko oyo ya kala po oule womido omayovi ahamano, oyo ya etifwa koulunde nokokuhawanenena itai ka kala po vali, novanhu aveshe ovaduliki otava ka hafela onghalamwenyo ngaashi ashike Kalunga a li a lalakanena, sha hala okutya, itava ka mona oixuna koukulupe noitava ka fya vali. (Genesis 1:28; Ehololo 21:4, 5) Pefimbo opo, kape na oo ta ka tya: “Aame oshingone.” (Jesaja 33:24) Ovanamido otava ka shuna komafiku “ounyasha” wavo, nomalutu avo otaa ka “fuluka vali eenghono dounyasha.” (Job 33:25) Ndele kunena atusheni otu na okukondja nokuhawanenena oko twa fyuulula kuAdam. Ndele nande ongaho, ovapiya vaJehova ohava mono ouwa meenghedi de likalekelwa eshi tava ende tava kulupa.
3. Omonghedi ilipi Ovakriste tava dulu ‘okwiimika oiimati nande nava kulupe’?
3 Eendjovo daKalunga otadi tu shilipaleke kutya, ‘ovo va twikwa meumbo lOmwene, nande nava kulupe, otava imike natango oiimati.’ (Epsalme 92:14, 15) Omupsalme okwa popya neendjovo dopafaneko oshili ya fimanenena kutya ovapiya vaKalunga ovadiinini otava dulu okutwikila okwiimika oiimati yopamhepo nonande ova kulupa. Oihopaenenwa ihapu yopaMbibeli nosho yo yokunena otai koleke oushili weendjovo domupsalme.
Hanna ka li ha “faula nandenande okukala motembeli”
4. Omuprofeti omukainhu omunamido Hanna okwa li a ulika ngahelipi eliyandjo laye lometilokalunga, nokwa li a nangekwa noupuna ngahelipi?
4 Eshi omuprofeti omukainhu Hanna, a li e na omido 84, ka li ha ‘faula nandenande okukala motembeli ta longele Kalunga oshilonga shiyapuki oufiku nomutenya nokulidilika nokwiilikana.’ Molwaashi Hanna okwa li okamonakadona komulumenhu ehe fi Omulevi ‘womepata laAsser,’ ka li ta dulu okukala ha di potembeli. Diladila ashike keenghendabala odo a li ha ningi opo a kale ha i kotembeli efiku keshe opo a ka kale pexwikiloyambo longula nosho yo lokonguloshi! Ndele omolweliyandjo laye lometilokalunga, Hanna okwa li a nangekwa noupuna munene. Okwa li e na oufembanghenda wokumona okahanana Jesus eshi Josef naMaria va li ve ka eta kotembeli koshipala shaJehova, ngaashi sha li sha ufwa kOmhango. Eshi Hanna a mona okahanana Jesus, “okwa hambelela Kalunga nokwe ka hepaulula kuaveshe ovo va teelela ekulilo laJerusalem.” — Lukas 2:22-24, 36-38, yelekanifa NW; Numeri 18:6, 7.
5, 6. Omeenghedi dilipi ovanamido vahapu kunena tava ulike oikala ya fa yaHanna?
5 Kunena mokati ketu omu na ovanamido vahapu ovo ve na oikala ya fa yaHanna, hava kala pokwoongala nopehe na okufaula, hava ilikana va mana mo opo elongelokalunga lashili li xume komesho, nove na ouladi wokuudifa onghundana iwa. Omumwatate umwe womido 80 nasha, oo ha kala pokwoongala kwopaKriste pamwe nomukulukadi waye nopehe na okufaula, okwa ti: “Okuya kokwoongala oku li onghedindjikilile yetu. Kape na vali pamwe apa hatu kala twa hala okuya. Otwa hala okukala apa pe na oshiwana shaKalunga. Ohatu kala tu udite twa pepelelwa mokati koshiwana shaKalunga.” Ovalihomboli ovo inave tu tulila po tuu oshihopaenenwa shiwa! — Ovaheberi 10:24, 25.
6 Jean, omufiyekadi Omukriste oo e na omido 80 nasha, okwa ti: “Onda tokola toko okukufa ombinga momalipyakidilo keshe e na sha noinima yopamhepo ngeenge ohandi dulu. Ndele nande ongaho, ope na omafimbo amwe oo handi kala nda nyemata, ndele omolwashike ovanhu vakwetu ve na okukala va nyemata ngeenge efiku olo inandi hafa?” Jean okwa popya kutya oha hafele okuya koyoongalele koilongo imwe nonokutya oha di ko a tungwa pamhepo. Molweendo opo la di ko okwa li a lombwela ovo a li a ka talela po pamwe navo a ti: “Inandi hala vali okutalela po eenhele odo hadi talelwa po kovatalelipo; onda hala okuya moukalele!” Nonande Jean ka li e shii elaka olo hali popiwa moshitukulwa osho, okwa li a dula okukwafela ovanhu va kale ve na ohokwe metumwalaka lOmbibeli. Kakele kaasho, okwa longa oule womido dihapu pamwe neongalo olo la li la pumbwa ekwafo, nonande osha li she mu pula e lihonge elaka lipe nokukala ha ende oule wovili okuya kokwoongala.
Nghee ovanamido tava dulu okulipyakidilifa omadiladilo avo
7. Moses okwa li a holola ngahelipi ehalo laye lokukulika ekwatafano laye naJehova eshi a li omunamido?
7 Omunhu oha mono owino monghalamwenyo eshi ta ende ta kulu. (Job 12:12) Mepingafano naasho, omunhu iha kulu pamhepo molwaashi ashike ta ende ta kulupa. Nomolwaasho ovapiya vaKalunga ovadiinini ihava kala ashike va wanenwa keshiivo olo va mona monakudiwa, ndele ohava kendabala ‘okuhapupalifa omayele’ eshi tava ende tava kulupa. (Omayeletumbulo 9:9) Moses okwa li e na omido 80 eshi Jehova a li e mu pa oshilonga. (Exodus 7:7) Osha yela kutya pefimbo laMoses okukala nomwenyo fiyo opomido 80 osha li oshinima sha pumba, molwaashi okwa shanga a ti: ‘Okukala po kwetu kombada yedu oku fike pomido 70, ngenge kuhapu, 80.’ (Epsalme 90:10) Ndele nande ongaho, Moses ka li e udite kutya okwa kulupa unene nokulihonga. Konima eshi a longela Jehova oule womido dihapu nokwa wanifa po oinakuwanifwa ya kwata moiti, okwa li a ilikana kuye a ti: “Shiivifile nge eendjila doye, opo ndi shiive oku ku shiiva.” (Exodus 33:13) Moses okwa li alushe e na ehalo lokukulika ekwatafano laye naJehova.
8. Daniel okwa li e lipyakidilifa ngahelipi omadiladilo aye okupitila mokukonakona omishangwa eshi a li e na omido 90 nasha, naasho osha li sha eta oidjemo ilipi?
8 Omuprofeti Daniel oo tashi dulika a li e na omido 90 nasha, okwa li ha konakona noukeka omishangwa diyapuki. Osho a mona mokukonakona ‘omishangwa,’ tashi dulika mwa kwatelwa embo laLeviticus, Jesaja, Jeremia, Hosea nosho yo laAmos, osha li she mu linyengifa a konge Jehova moku mu ilikana nomutima aushe. (Daniel 9:1, 2) Eilikano laye ola li la nyamukulwa eshi a li a pewa ouyelele wa nwefwa mo u na sha nokuuya kwaMessias nosho yo onakwiiwa i na sha nelongelokalunga la koshoka. — Daniel 9:20-27.
9, 10. Ovakriste vamwe ova ninga po shike opo ve lipyakidilife omadiladilo avo?
9 Ngaashi Moses naDaniel, nafye ohatu dulu okulipyakidilifa omadiladilo etu mokuyandja elitulemo koinima yopamhepo ngaashi hatu dulu. Ovanamido vahapu osho naanaa tava ningi ngaho. Worth, omukulunhuongalo Omukriste womido 80 nasha, oha kendabala alushe okulesha oileshomwa ‘yomupiya omudiinini nomunaendunge’ shimha ashike ya piti. (Mateus 24:45) Worth okwa ti: “Oshili ondi i hole neenghono, nonda hafa neenghono okumona nghee ouyelele woshili tau ende tau hapupala.” (Omayeletumbulo 4:18) Sha faafana, Fred, oo a kala moilonga yefimbo liyadi oule womido di dule po 60, okwa didilika kutya okukundafana novaitaveli vakwetu kombinga yOmbibeli ohaku kulike oupamhepo womunhu. Okwa ti: “Ohandi dilonga alushe kombinga yOmbibeli. Ngeenge owa kala ho dilonga kombinga yOmbibeli, nokukwatakanifa osho to lihongo ‘noshihopaenenwa sheendjovo odo diwa,’ ito ka kala ashike u na omauyelele mahapu ndele oto ka mona nghee omauyelele oo a pambafana.” — 2 Timoteus 1:13.
10 Itashi ti kutya ngeenge omunhu a kulupa ita dulu okulihonga oinima ipe noidjuu. Ovanhu ovo ve na omido 60 nasha, 70 nasha, nokuli naavo ve na 80 nasha ova dula okulihonga okulesha nokushanga, navamwe ove lihonga omalaka mape. Eendombwedi daJehova dimwe ode shi ninga nelalakano lokuudifila ovanhu vomoiwana aishe onghundana iwa. (Markus 13:10) Pashihopaenenwa, Harry nomukainhu waye ova li ve na omido tadi likokele po 70 eshi va li va tokola oku ka kwafela moshitukulwa omo hamu popiwa elaka lOshiputu. Harry okwa ti: “Doshili, oshilonga keshe osho to longo moukulupe ohashi kala shidjuu shi dulife ngeenge u li omunyasha.” Ndele nande ongaho, omolweenghendabala davo noudiinini wavo, ova li va dula okuninga omakonakonombibeli mOshiputu. Harry okwa kala yo ha yandje oipopiwa mOshiputu poyoongalele yoshitukulwa oule womido.
11. Omolwashike tu na okukonakona oilonga oyo ya longwa kovanamido ovadiinini?
11 Heeno, havanamido aveshe ve na oukolele nosho yo eenghalo tadi va pitike ve lihonge elaka lipe ile va ka longe koitukulwa imwe. Ndele omolwashike nee tu na okukonakona shi na sha naasho ovanamido vamwe va ninga? Osho inashi hala okutya ovanamido aveshe ove na okukendabala okuninga sha faafana. Ponhele yaasho, otu na okukala noikala oyo omuyapostoli Paulus a shanga monhumwafo oyo a li a shangela Ovakriste Ovaheberi shi na sha novakulunhuongalo ovadiinini a ti: “Taleni exulilo leengeda davo na shikuleni eitavelo lavo.” (Ovaheberi 13:7) Ngeenge hatu dilonga koihopaenenwa youladi yovanamido, otashi dulu oku tu twa omukumo tu hopaenene eitavelo lavo la kola olo hali ve linyengifa va longele Kalunga. Harry oo e na omido 87 okwa hokolola osho hashi mu linyengifa a ti: “Onda hala okulongifa nawa omido dange odo da xupa ko nokulonga ngaashi handi dulu moilonga yaJehova.” Fred, oo a tumbulwa nale metetekelo oha hafele oilonga yaye yaBetel. Okwa popya a ti: “Owa pumbwa okushiiva nghee to dulu okulongela Jehova monghedi ya denga mbada nokutwikila oku shi ninga.”
Ovanamido vamwe ovo va li ve liyandjela Jehova nonande eenghalo davo oda li da lunduluka
12, 13. Barsillai okwa li a ulika ngahelipi kutya oku na eliyandjo lometilokalunga nonande eenghalo daye oda li da lunduluka?
12 Okutambula ko oukulupe nokuungaunga nao otaku dulu okukala oshinima shidjuu. Ndele nande ongaho, omunhu ota dulu okukala e na eliyandjo lometilokalunga nonande ope na omalunduluko a tya ngaho. Omugilead Barsillai oku li oshihopaenenwa shiwa moshinima osho. Eshi a li e na omido 80, okwa li a yakula nawa David novakwaita vaye, e va pa eendja nosho yo onhele yokunangala pefimbo lounashibofa waAbsalom. Eshi David a li ta shuna kuJerusalem, Barsillai okwa li a findikila David novakwaita vaye komulonga waJordan. David okwa li a pula Barsillai a ninge oshilyo shomombala yaye. Mbela Barsillai okwa li e mu nyamukula ngahelipi? Okwa ti: ‘Paife onda wanifa omido 80. Aame omupiya woye, ohandi dulu mbela okumakela osho handi shi li ile handi shi nu? Ile ndi ude ko vali ondaka yovaimbi ovalumenhu novakainhu? Kimham, omupiya woye, ou. Ye na ye pamwe nomwene wange ohamba, ndele mu ningila eshi tashi ku wapalele.’ — 2 Samuel 17:27-29; 19:31-40.
13 Nonande eenghalo daBarsillai oda li da lunduluka, okwa li a ninga keshe osho ta dulu opo a yambidide ohamba yaJehova ya nangekwa po. Barsillai ka li a nyemata nonande okwa li e shii kutya ka li vali ta dulu okumakela ile okuuda ko. Ponhele yaasho, okwa li a holola oukwatya waye womeni, eshi a popya nopehe na okulihola mwene kutya Kimham oye na ka mone omauwa oo David a li te ke mu pa. Ngaashi Barsillai, ovanamido vahapu kunena ohava ulike oikala yokuhelihola mwene nohava yandje nehalo liwa. Ohava ningi keshe osho tava dulu mokuyambidida elongelokalunga lashili, ve na oushili kutya ‘omayambo a tya ngaha Kalunga okwe a hokwa.’ Kashi fi tuu enangeko noupuna okukala novanamido ovadiinini mokati ketu! — Ovaheberi 13:16.
14. Ongahelipi eendjovo daDavid odo a popya moukulupe da ningifa Epsalme 37:23-25 li kale tali kumu omutima?
14 Nonande eenghalo daDavid oda enda tadi lunduluka luhapu momukokomoko womido, okwa li e na oushili kutya Jehova iha lunduluka nande monghedi omo ha file oshisho ovapiya vaye ovadiinini. Lwopexulilo longhalamwenyo yaye, David okwa li a tota eimbilo, olo li li Epsalme 37 kunena. Diladila ashike David ta diladila moule, ta imbi pamwe nokahumbafeta eendjovo edi ofimbo a li moukulupe, ta ti: “Omanha omulumenhu muwa taa yukifwa kOmwene, ndee ta hafele mondjila yaye. Ngenge ta punduka, ita wililile po, osheshi Omwene ote mu yakele. Nghee nda li omumati fiyo [nda] kulupa, omuyuki inandi mu mona nande a efuwa, ile oludalo laye tali ehela oshifima.” (Epsalme 37:23-25) Jehova okwa li a nwefa mo David a shange eendjovo odo mepsalme olo. Eendjovo odo David a popya da dja komutima ka di na tuu eityo!
15. Ongahelipi omuyapostoli Johannes a tula po oshihopaenenwa shiwa shoudiinini nonande eenghalo daye okwa li tadi lunduluka nokwa li a kulupa?
15 Omuyapostoli Johannes naye oku li oshihopaenenwa shiwa shokukala omudiinini nonande eenghalo daye oda enda tadi lunduluka nokwa li a kulupa. Konima eshi a li a longela Kalunga konyala oule womido 70, okwa li a twalwa moukwatwa konhunhu yaPatmos “omolwondjovo yaKalunga nomolwehepaululo laJesus Kristus.” (Ehololo 1:9) Ndele nande ongaho, oilonga yaye kaya li ya pwa okulongwa natango. Omambo Ombibeli aeshe oo a shangwa kuJohannes, okwe a shanga momido daxuuninwa dokukalamwenyo kwaye. Ofimbo a li konhunhu yaPatmos, okwa li a mona omamoniko makumwifi oo a shanga membo lEhololo. (Ehololo 1:1, 2) Vahapu otava diladila kutya okwa li a mangululwa moukwatwa pefimbo lomukesari waRoma Nerva. Konima yaasho, lwomo 98 O.P., tashi dulika eshi a li e na omido 90 ile 100, okwa li a shanga Evangeli nosho yo omapistoli atatu oo a lukilwa edina laye.
Ovanamido ove na ondjokonona youdiinini itai xulu po
16. Ongahelipi ovo ihava dulu okupopya nawa omolwoukulupe tava dulu okuulika kutya ove na eliyandjo lometilokalunga?
16 Omangabeko oo haa etifwa koukulupe ohae uya momaludi e lili noku lili. Pashihopaenenwa, oohandimwe vamwe ihava dulu vali okupopya nawa omolwoukulupe. Ndele nande ongaho, ohava dimbuluka natango nehafo ohole yaKalunga nosho yo olune laye inali longelwa. Nonande ova ngabekwa mwaasho tava dulu okutya, momitima davo otava ti kuJehova: “Omhango yoye ondi i hole shi fike peni! Efiku alishe ohandi i dilonga.” (Epsalme 119:97) Jehova oku shii ovo hava “fimaneke edina laye,” noha pandula eshi ovanamido va tya ngaho va yooloka ko kovanhu vahapu ovo vehe na ko nasha neemhango daye. (Malakia 3:16; Epsalme 10:4) Itashi hekeleke tuu okushiiva kutya Jehova oha hokwa omadilongo omitima detu! — 1 Omafimbo 28:9; Epsalme 19:15.
17. Ovapiya vaJehova ovo ve mu longela efimbo lile ove na ondjokonona yelikalekelwa ilipi?
17 Inatu dimbwa oushili oo kutya ovo va longela Jehova noudiinini oule womido omilongo ove na ondjokonona yokukala ovalididimiki itai xulu po, oyo i li oshinima she likalekelwa notai dulu ashike okumonika mokulongela Jehova. Jesus okwa ti: “Okelidimiko leni otamu lixupifile eemwenyo deni.” (Lukas 21:19) Otwa pumbwa filufilu elididimiko opo tu ka mone omwenyo waalushe. Amushe ovo tamu ‘wanifa ehalo laKalunga’ nomwa ulika kutya omu li ovadiinini kuye mokukalamwenyo kweni, otamu dulu okuteelela nodjuulufi oku ka pewa “eshi mwe shi udanekelwa.” — Ovaheberi 10:36.
18. (a) Ovanamido ohava ningi shike osho hashi hafifa Jehova? (b) Oshike hatu ka kundafana moshitukulwa tashi landula?
18 Jehova okwa lenga oilonga oyo we mu longela nomutima aushe, kashi na nee mbudi kutya oi fike peni. Kashi na nee mbudi kutya oshike tashi ningilwa “omunhu wetu wokombada” eshi hatu ende hatu kulupa, “ou womeni” ota shituka mupe efiku nefiku. (2 Ovakorinto 4:16) Osha yela kutya Jehova okwa pandula oilonga oyo we mu longela mefimbo la pita nosho yo oyo to longo paife omolwedina laye. (Ovaheberi 6:10) Moshitukulwa tashi landula ohatu ka kundafana shi na sha nanghee oudiinini wa tya ngaho tau dulu okweetela vamwe ouwa.
Oto nyamukula ngahelipi?
• Hanna okwa tulila po Ovakriste ovanamido vokunena oshihopaenenwa shiwa shilipi?
• Omolwashike oukulupe itau dulu lela okungabeka omunhu a longe oilonga yonhumba? Shi yelifa.
• Ongahelipi ovanamido tava dulu okuulika kutya ove na eliyandjo lometilokalunga?
• Jehova okwa tala ko ngahelipi oilonga oyo ovanamido tave mu longele?
[Omafano pepandja 25]
Ovanamido vahapu ove li oshihopaenenwa shiwa shi na sha nokukala pokwoongala nopehe na okufaula, okuudifa nouladi nosho yo okukala nehalo lokulihonga