Jehova oha file oshisho pahole ovapiya vaye ovanamido

“Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye.” — HEB. 6:10.

1, 2. (a) Ngeenge wa mono omunhu e na eenghwakutoka otashi dulika shi ku dimbulukife kombinga yashike? (b) Jehova oha tale ko ngahelipi Ovakriste ovanamido?

NGEENGE to tale ovanamido meongalo ovo ve na eexwiki ditoka ile tu tye eenghwakutoka, mbela ihashi ku dimbulukifa ehokololo olo li li membo lOmbibeli laDaniel? Jehova Kalunga okwa li a pa Daniel emoniko, omo e liholola ye mwene e na eexwiki ditoka. Daniel okwa ti: “Fimbo handi shi tale, okwa dikwa omalukalwapangelo, ndele Omuxungu ta kala omutumba. Oikutu yaye itoka i li ngaashi eemhawe, neexwiki dokomutwe waye di toka ngaashi olududi leedi liyela.” — Dan. 7:9.

² Olududi leedi lo venevene luhapu ohali kala litoka tootoo. Onghee hano, eexwiki ditoka nosho yo edinafimaneko “Omuxungu” otai ulike kutya Kalunga okwa kala ko okudja nalenale noku na ounongo muhapu, nomolwaasho otwa pumbwa oku mu fimaneka nefimaneko lomoule. Ndele mbela Omuxungu, Jehova, oha tale ko ngahelipi ovalumenhu novakainhu ovanamido ovadiinini? Eendjovo daKalunga otadi ti: “Eenghwakutoka odo oshikoroni shefimano. [Ngeenge, NW] otashi monika mondjila youyuki.” (Omayel. 16:31) Ngeenge eexwiki dOmukriste omudiinini oda ninga ditoka ile da ninga eenghwakutoka, eholokepo loukulunhu la tya ngaho ola wapala koshipala shaKalunga. Mbela naave oho tale ko ngoo ovamwaxo novamwanyoko ovanamido ngaashi Jehova he va tale ko?

Omolwashike ovanamido ve holike neenghono?

3. Omolwashike tu hole neenghono ovaitaveli vakwetu ovanamido?

³ Vamwe vomovapiya vaKalunga ovanamido ovaholike ongaashi oilyo yOlutuwiliki lEendombwedi daJehova, ovo va li nale ovapashukili ovaendi nosho yo ovo ve li ovapashukili ovaendi paife, ovakokolindjila ovaladi nosho yo ovaudifi vOuhamba ve na owino, sha hala okutya, ovamwatate novamwameme ovo tava longo noudiinini momaongalo etu. Otashi dulika u shii ovanamido vamwe ovo va kala tava udifa onghundana iwa nouladi oule womido omilongo, ovo oihopaenenwa yavo iwa ya kwafela ovanyasha va katuke eenghatu nova lundulule okukalamwenyo kwavo. Ovaitaveli vakwetu vamwe ovanamido ova kala ve na oinakuwanifwa idjuu nove lididimikila omahepeko omolwonghundana iwa. Jehova nosho yo “omupiya omudiinini nomunaendunge” ova pandula neenghono ovanamido omolwoilonga aishe oyo va longa mokuyambidida oilonga yOuhamba mefimbo lonale nosho yo kunena. — Mat. 24:45.

4. Omolwashike tu na okufimaneka Ovakriste ovanamido noku va kwatela mo momailikano etu?

⁴ Ovapiya vaJehova Kalunga aveshe ove na okupandula nokufimaneka ovanamido ovadiinini. Omhango yaKalunga oyo ya li ya yandjwa okupitila muMoses oya popya kutya okuyavelela nokufimaneka ovanamido okwa pambafana netilokalunga. (Lev. 19:32) Otu na okukala hatu kwatele mo ovanamido ovadiinini momailikano etu nokupandula Kalunga omolwoilonga yavo yohole. Omuyapostoli Paulus okwa li a kwatela mo ovalongi pamwe naye ovaholike momailikano aye, kutya nee ovanyasha ile ovakulunhu. — Lesha 1 Ovatessaloniki 1:2, 3.

5. Ongahelipi hatu dulu okumona ouwa mokukala hatu endafana novalongeli vaJehova ovanamido?

⁵ Ovakriste aveshe meongalo otava dulu yo okumona ouwa mokukala tava endafana nOvakriste ovanamido. Ovalongelikalunga ovanamido ovadiinini ova mona eshiivo lihapu okupitila mokukonakona nosho yo moimoniwa. Ove lihonga okukala ve na elidiiniko nosho yo okuulika oukwao wananghali, nohava kala va hafa neenghono nova mbilipalelwa ngeenge tava hongo omapupi amwe osho ve lihonga. (Eps. 71:18) Ovanyasha, kaleni ovanaendunge nokuteka ounongo movanamido va tya ngaho, ngaashi ashike omunhu ha mono ouwa mokuteka omeva momufima mule. — Omayel. 20:5.

6. Ongahelipi to dulu okuulikila ovanamido kutya owe va lenga shili?

⁶ Mbela oho ulike ngoo kutya owa lenga ovanamido, ngaashi Jehova? Onghedi imwe omo to dulu oku shi ninga omoku va lombwela kutya ou va hole neenghono omolwoudiinini wavo nowa valula omaetepo avo. Kakele kaasho, ngeenge owa kala ho tula moilonga omayele avo, oto ulike kutya owe va fimaneka shili. Ovanamido vahapu Ovakriste ohava dimbuluka omayele opandunge oo va li va pewa kovanamido ovadiinini nosho yo nghee va li va mona ouwa monghalamwenyo yavo aishe omolwokutula moilonga omayele oo va li va pewa.a

Ulikila ovanamido ohole meenghedi tadi longo

7. Jehova okwa pa unene tuu oolyelye oshinakuwanifwa shokufila oshisho ovanamido?

⁷ Kalunga okwa popya kutya omaukwaneumbo oo e na ovapambele ovanamido oo unene e na oshinakuwanifwa shoku va fila oshisho. (Lesha 1 Timoteus 5:4, 8.) Jehova oha kala a hafa ngeenge oilyo yomaukwaneumbo tai wanifa po oshinakuwanifwa shayo shi na sha nokufila oshisho ovapambele vayo ovanamido, nokungaho, otai ulike kutya oi na ko nasha novanamido ngaashi Jehova e na ko nasha navo. Jehova oha yambidida omaukwaneumbo a tya ngaho nohe a nangeke noupuna omolweenghendabala dao nomolwomaliyambo aeshe oo haa ningi.b

8. Omolwashike omaongalo opaKriste e na okufila oshisho Ovakriste ovanamido?

⁸ Jehova oha kala yo a hafa ngeenge omaongalo opaKriste taa kwafele ovanamido ovadiinini ovo ve na omhumbwe ndele ovapambele vavo inava hala oku va fila oshisho ile vehe na ovapambele Ovakriste. (1 Tim. 5:3, 5, 9, 10) Kungaho, oilyo yeongalo otai ulike kutya oi na ‘onghenda novanamido, oi va hole nohai va kenukile.’ (1 Pet. 3:8) Paulus okwa li a longifa efaneko olo tali ulike kutya eongalo oli na okufila oshisho ovanamido eshi a ti kutya ngeenge oshilyo shimwe sholutu lomunhu tashi ehama, “oinhimbu ikwao otai yahama pamwe nasho.” (1 Kor. 12:26) Okuulikila ovanamido olukeno meenghedi tadi longo otashi ulike kutya ohatu tula moilonga efinamhango olo li li momayele aPaulus oo taa ti: “Yakulafaneni omitengi, osho ngaha tamu wanifa omhango yaKristus.” — Gal. 6:2.

9. Oukulupe ohau etele ovanhu omashongo elipi?

⁹ Ovanamido ohava shakeneke omashongo elipi? Vahapu ohava loloka diva. Otashi dulika va kale ve udite kutya itava dulu okuninga oinima ya fimana, ngaashi okuya kundokotola, okuungaunga noikwambapila, okuwapaleka eumbo nosho yo okuteleka. Molwaashi ovanamido luhapu ihava kala ve na ehalo lokulya ile lokunwa, otashi dulika va kale tava diladila kutya inava pumbwa okulya ile okunwa nonande paulelalela ova pumbwa okulya nokunwa. Otashi dulika yo va kale ve udite ngaho shi na sha nokukonakona Ombibeli kwavo pandjikilile nosho yo okuya kokwoongala nopehe na okufaula. Molwaashi ovanamido otashi dulika va kale ihava mono ko nawa ile ihava udu ko nawa, okulesha nosho yo okupwilikina pokwoongala kwopaKriste otaku dulu okukala kudjuu notashi dulu yo okukala omutengi mudjuu okulilongekidila okuya kokwoongala kwopaKriste. Mbela ongahelipi vamwe tava dulu okukwafela ovanamido va tya ngaho?

Nghee hatu dulu okukwafela ovanamido

10. Ovakulunhuongalo otava dulu okuninga po shike opo ku kwafelwe ovanamido meongalo?

¹⁰ Momaongalo mahapu, ovanamido ohava filwa oshisho monghedi i shii okuhopaenenwa. Ovamwatate novamwameme ovanahole ohava kwafele ovanamido moinima ngaashi oku ka landa oipumbiwa yavo, okuteleka nosho yo okuwapaleka. Ohave va kwafele yo va konakone Ombibeli, ve lilongekidile okwoongala nova kale hava i moukalele pandjikilile. Eendombwedi dinyasha ohadi i pamwe navo kokwoongala nomoukalele nohadi va twaalele neehauto dado. Ngeenge ovanamido ihava dulu okudja mo momaumbo, ohava pwilikine okwoongala okupitila mongodi ile va kwatelwe oungalo. Ngeenge tashi shiiva, ovakulunhuongalo ohava ningi omalongekido opo ku wanifwe po eemhumbwe dovanamido meongalo.c

11. Hokolola nghee oukwaneumbo umwe wa li wa kwafela omumwatate umwe omunamido.

¹¹ Ovakriste pauhandimwe navo otava dulu okuulikila ovanamido oikala yokuyakula ovaenda nosho yo yokuyandja. Eshi omukulukadi womumwatate umwe omunamido a fya, omumwatate oo ka li vali ta dulu okufuta onhele yokukala nopehe na ekwafo lopendjela yomukulukadi waye. Omumwatate oo nomukulukadi waye ova li va kwafela oukwaneumbo umwe u na eumbo la kula u konakone Ombibeli. Oukwaneumbo oo owa li u na ovadali novanakadona vavali vomido omulongo nasha, nowa li wa pa omumwatate oo eenduda mbali a kale mo. Oukwaneumbo oo owa li wa hafela okukala pamwe nomumwatate oo oule womido 15, va li hava li pamwe, hava hafele omafimbo mawa mahapu pamwe nokuulikilafana ohole youmwainafana. Ovanyasha ova li ve lihonga shihapu meitavelo nomoimoniwa ihapu yomumwatate oo, nova li va mona ouwa mokweendafana naye. Omumwatate oo omunamido okwa li a kala pamwe noukwaneumbo oo fiyo osheshi a fya eshi a li e na omido 89. Oukwaneumbo oo otau pandula natango Kalunga omolwomanangeko noupuna mahapu oo wa mona omolwokukala pamwe nomumwatate oo. Oukwaneumbo oo inau “kanifa ondjabi” yao omolwokukwafela omuhongwa mukwao waJesus Kristus. — Mat. 10:42.d

12. Oshike to dulu okuninga po opo u ulikile ovamwatate novamwameme ovanamido ohole?

¹² Otashi dulika ito dulu okukwafela omumwatate ile omumwameme omunamido wonhumba monghedi omo oukwaneumbo oo wa popiwa metetekelo wa li wa ninga, ndele oto dulu okukwafela ovanamido va kale hava i kokwoongala nosho yo moukalele womomapya. Oto dulu yo oku va shiva keumbo leni nokuya pamwe navo ngeenge tamu i konhele yonhumba mu ka hafele pamwe oule wokafimbo. Natango, oto dulu oku ke va talela po, unene tuu ngeenge tava ehama ile ihava dulu vali okudja mo momaumbo. Kakele kaasho, ou na alushe okuungaunga navo ngaashi ovakulunhu. Ngeenge Ovakriste ovanamido ohava dulu okudiladila nawa natango, ove na okukwatelwa mo ngeenge taku ningwa omatokolo aeshe oo e va kuma. Nokuli novanamido ovo ihava dulu vali okudiladila nawa otava dulu oku shi mona mo kutya otava ungaungwa navo nefimaneko ile hasho.

Jehova ita ka dimbwa oilonga yovanamido

13. Omolwashike sha fimana okuyavelela omaliudo Ovakriste ovanamido?

¹³ Osha fimanenena okuyavelela omaliudo ovanamido. Luhapu ovanamido ohava kala va nyemata neenghono ngeenge itava dulu vali okulonga shihapu ngaashi va li hava longo eshi va li ovanyasha nove na oukolele. Pashihopaenenwa, omumwameme umwe oo a li a longela Jehova oule womido 50 lwaapo nokwa kala omukokolindjila wondjikilile, okwa li a kwatwa komukifi woshinamenena nosha li shidjuu kuye okuya kokwoongala. Eshi a li a yelekanifa oukalele waye wonale naao wopaife eshi e na omangabeko, okwa li a hovela okukwena. Okwa li a nyongama, ndele ta popi ta kwena ta ti: “Ihandi dulu sha vali.”

14. Ovapiya vaJehova ovanamido otava dulu okumona etwomukumo lilipi momapsalme?

¹⁴ Ngeenge ou li omunamido, mbela opa li efimbo limwe olo naave wa li wa nyika oluhodi? Ile ope na omafimbo amwe oo ho kala u udite kutya Jehova okwa fa e ku efa? Omupsalme umwe otashi dulika a li e udite ngaho eshi a li omunamido, nomolwaasho a li a ilikana kuJehova a ti: ‘Ino ekela nge shi mefimbo loukulupe wange. Ove ino efa nge, ngeenge eenghono tadi fii nge po. Nomokufika moukulupe wange, ngeenge nda ninga eenghwakutoka, Kalunga, Ove ino efa nge!’ (Eps. 71:9, 18) Osha yela kutya Jehova ka li ta ka efa po omushangi wepsalme olo, noite ke ku efa nandenande. Mepsalme limwe vali, David okwa popya kombinga yanghee a li e lineekela ekwafo laKalunga. (Lesha Epsalme 68:20.) Ngeenge ou li Omukriste omunamido, kala wa shilipalekwa kutya Jehova oku li pamwe naave nota ka twikila oku ku kwafela efiku keshe.

15. Oshike tashi dulu okukwafela ovanamido va kale ve na etaleko liwa?

¹⁵ Oilonga aishe oyo Ovakriste ovanamido va longa monakudiwa nosho yo oyo tava longo kunena okufimanekifa Kalunga, Kalunga ite ke i dimbwa nandenande. Ombibeli oya ti: “Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye.” (Heb. 6:10) Onghee hano, ino kala nandenande u na etaleko lii, to diladila papuko kutya molwaashi owa kulupa ku na vali oshilonga sha sha kuJehova. Kendabala okweefa po omadiladilo taa teya omukumo nokukala ho diladila oinima oyo tai tungu. Kala to hafele omanangeko noupuna oo wa mona nosho yo eteelelo loye li na sha nonakwiiwa. Otu na ‘efimbo lokomesho neteelelo’ la denga mbada nola shilipalekwa kOmushiti wetu. (Jer. 29:11, 12; Oil. 17:31; 1 Tim. 6:19) Kala ho dilonga kombinga yeteelelo loye, kendabala okukala wa nyashuka momutima nomomadiladilo, noino kala nande u wete uhe na ongushu ya sha meongalo.e

16. Omolwashike omumwatate umwe omunamido a li ta diladila kutya oku na okweefa po okulonga e li omukulunhuongalo, ndele olutu lovakulunhuongalo meongalo lavo ola li le mu ladipika ngahelipi?

¹⁶ Tala koshihopaenenwa shaJohan womido 80, oo ha file oshisho efimbo keshe omukulukadi waye omudiinini, Sannie, oo ehe na oukolele.f Ovamwameme ohava ningi omalufo okukala naSannie opo Johan a dule okukala ha i kokwoongala nosho yo moukalele. Ndele efimbo opo la di ko, Johan okwa li e udite a loloka pamaliudo nokwa li a hovela okudiladila kutya oku na okweefa po oshinakuwanifwa shokukala e li omukulunhuongalo. Okwa li a pula a kengela omahodi a ti: ‘Otashi kwafa shike okukala omukulunhuongalo? Ihandi longo vali oilonga tai ti sha meongalo.’ Ovakulunhuongalo vakwao ova li ve mu shilipaleka kutya owino waye nosho yo eendunge daye dokuyoolola otai ti sha neenghono. Ova li ve mu ladipika a twikile okukala e li omukulunhuongalo, nonande oku na omangabeko. Molwaashi Johan okwa li a tuwa omukumo neenghono, okwa twikila okukala e li omukulunhuongalo, osho shi li enangeko noupuna keongalo lavo.

Jehova oku na ko nasha shili novanamido

17. Ombibeli otai yandje eshilipaleko lilipi kOvakriste ovanamido?

¹⁷ Omishangwa otadi yelifa nawa kutya ovanamido otava dulu okutwikila okwiimika oiimati moilonga yaJehova nonande ope na omaupyakadi oo haa etifwa koukulupe. Omupsalme umwe okwa ti: ‘Ovo va twikwa meumbo lOmwene, otava tutuma, vo nande nava kulupe, otava imike natango oiimati, omiti ditalala da twiyuka omafo.’ (Eps. 92:14, 15) Omuyapostoli Paulus oo tashi dulika a li ta ungaunga nouyahame wopalutu, ka li a ‘kanifa ouladi, nande omunhu waye wokombada okwa li ta nyonauka po.’ — Lesha 2 Ovakorinto 4:16-18.

18. Omolwashike twa pumbwa okukwafela ovaitaveli vakwetu ovanamido nosho yo ovo have va file oshisho?

¹⁸ Oihopaenenwa ihapu yovanamido yokunena otai ulike kutya ovanamido otava dulu ‘natango okwiimika oiimati.’ Ndele omashongo oo haa etifwa kouyahame nokoukulupe otaa dulu okuteya omukumo ovanamido, nokuli naavo ve na ovapambele have va file oshisho nohave va kwafele alushe. Ovo hava file oshisho ovanamido navo otava dulu okuloloka. Ndele oilyo yeongalo oi na oufembanghenda noshinakuwanifwa shokuulikila ovanamido ohole nosho yo ovo tave va file oshisho. (Gal. 6:10) Oku va kwafela monghedi ya tya ngaho, otashi ulike kutya itatu lombwele ovanhu va tya ngaho va ye va ka ‘xuxumukwe nove likutife’ nopehe na oku va kwafela. — Jak. 2:15-17.

19. Omolwashike Ovakriste ovanamido ovadiinini tava dulu okutaalela onakwiiwa nelineekelo?

¹⁹ Oukulupe otau dulu okuninipika efimbo olo ovanamido Ovakriste hava kufa ombinga momalipyakidilo opamhepo, ndele efimbo ihali ningifa Jehova a kale ehe hole vali ovapiya vaye ovanamido ovadiinini. Ovakriste aveshe ovanamido ovadiinini ove na ongushu koshipala shaye noite ke va efa nandenande. (Eps. 37:28; Jes. 46:4) Jehova ota ka kwafela ovanamido noku va endifa moukulupe wavo. — Eps. 48:15.

[Omashangelo opedu]

Oto nyamukula ngahelipi?

• Omolwashike wa lenga Ovakriste ovanamido ovadiinini?

• Ongahelipi hatu dulu okuulikila ovalongelikalunga vakwetu ovanamido ohole?

• Oshike tashi dulu okukwafela ovapiya vaJehova ovanamido va kale ve na etaleko liwa?

[Omafano pepandja 23]

Oilyo yeongalo oya lenga neenghono ovanamido