‘Xo yeni omunanghenda’

“Kaleni mu nonghenda, ngaashi Xo yeni e nonghenda.” — LUKAS 6:36.

1, 2. Ongahelipi eendjovo daJesus odo a li a lombwela Ovafarisai, ovanongo vomishangwa nosho yo ovashikuli vaye tadi ulike kutya onghenda oukwatya wa fimana?

OMHANGO oyo Jehova a li a yandja kOvaisrael okupitila muMoses oya li i na oiteelelwa nomaufomhango 600 lwaapo. Nonande Ovaisrael ova li ve na okudulika koiteelelwa yOmhango oyo, ova li yo ve na okukala ovananghenda, oukwatya oo wa fimanenena. Natu tale kwaasho Jesus a li a popya shi na sha nOvafarisai ovo va li vehe na onghenda. Okwa li e va hanyena lwoikando ivali, a popya kutya Kalunga okwa ti: “Efilonghenda nda hala, haeyambo.” (Mateus 9:10-13; 12:1-7; Hosea 6:6) Jesus okwa popya pexulilo loukalele waye wokombada yedu, a ti: “Woo nye, ovanongo vomishangwa novafarisai, ovanaihelele nye, eshi hamu yandje oshitimulongo shoumbidi ou unini womomapya, ndee hamu efa oinenenima yomomhango ouyuki nefilonghenda noudiinini!” — Mateus 23:23.

² Nopehe na omalimbililo, Jesus okwa li a lenga oukwatya wonghenda. Okwa li a lombwela ovashikuli vaye a ti: “Kaleni mu nonghenda, ngaashi Xo yeni e nonghenda.” (Lukas 6:36) Ndele opo tu ‘hopaenene Kalunga’ mokukala hatu file vamwe onghenda, otwa pumbwa okushiiva eityo lolela loukwatya oo. (Ovaefeso 5:1) Okukala tu shii omauwa oo haa etifwa kokukala ovananghenda otashi ke tu linyengifa tu kale hatu file vamwe onghenda.

Jehova oha file onghenda ovo ve na omhumbwe

3. Omolwashike Jehova oye a wana oku tu honga eityo lolela longhenda?

³ Omupsalme umwe okwa imba a ti: “Omwene oku nonghenda nolukeno, oha tale onheni noku yadi ouwanghenda. Kalunga omuwa kuaveshe, nohole [“onghenda,” OB-1986] yaye ya nyananana kovashitwa vaye aveshe.” (Epsalme 145:8, 9) Jehova “oXe yefilonghenda naKalunga kehekeleko alishe.” (2 Ovakorinto 1:3) Ovo ve li ovananghenda ohava ulikile vamwe olukeno. Onghenda oi li oukwatya waKalunga wa fimana. Oshihopaenenwa shaye nosho yo omahongo aye otai dulu oku tu honga eityo lolela longhenda.

4. Eendjovo odo di li muJesaja 49:15 otadi tu hongo shike shi na sha nonghenda?

⁴ Jehova okwa popya eendjovo odo di li muJesaja 49:15, a ti: “Ope na tuu omwalikadi ta dulu okudimbwa okahanana kaye, ye ita file ngeno okaana komolutu laye onghenda?” Omaliudo oo hae linyengifa Jehova a file vamwe onghenda okwa faafanifwa nomaliudo ohole oo omudalakadi ha kala e nine okahanana kaye. Ngeenge okahanana ka fya ondjala ile ka pumbwa sha, ina ohe linyengifwa kolukeno ile konghenda ndele te ka kwafa. Jehova naye oku hole ovo ha file onghenda.

5. Ongahelipi Jehova a li a ulika kutya ‘okuyadi efilonghenda’ monghedi omo a li a ungaunga nOvaisrael?

⁵ Inashi wana ashike okukala hatu udile vamwe onghenda, ndele osha fimana yo okukatuka eenghatu opo tu va kwafele. Natu tale kunghee Jehova a li e linyenga eshi oshiwana shaye sha li moupika muEgipti omido 3 500 lwaapo da pita. Okwa li a lombwela Moses a ti: “Ame nda mona okuhepekwa [kwoshiwana] shange, eshi shi li muEgipti. Naame nda uda ekemo lavo molwovafininiki, heeno, ndi wete oudjuu wavo. Onghee nde uya poshi, ndi va kulile mo meke lOvaegipti, nondi va twale medu linya, medu liwa nola mbwalangadja, medu li yadi omashini nomaadi eenyiki.” (Exodus 3:7, 8) Omido 500 lwaapo konima eshi Ovaisrael va mangululwa muEgipti, Jehova okwa li e va dimbulukifa a ti: “Ame nda pitifa Israel muEgipti nde va xupifa momake Ovaegipti nomomake oilongo aishe oyo ye va fininika.” (1 Samuel 10:18) Luhapu Ovaisrael ova li hava hangwa keenghalo didjuu omolwokuhadulika komifikamhango douyuki daKalunga. Ndele nande ongaho, Jehova okwa li e va udila olukeno nokwe va xupifa lwoikando. (Ovatokolipangeli 2:11-16; 2 Omafimbo 36:15) Osho osha ulika nghee Kalunga omunahole ha kwafele ovo ve na omhumbwe nosho yo ovo ve li meenghalo da nyika oshiponga ile didjuu. Jehova ‘okuyadi efilonghenda.’ — Ovaefeso 2:4.

6. Ongahelipi Jesus Kristus a li a hopaenena Xe mokufila vamwe onghenda?

⁶ Jesus okwa li a hopaenena Xe filufilu mokufila vamwe onghenda. Jesus okwa li e linyenga ngahelipi eshi ovapofi vavali va li ve mu indila va ti: “Omwene, omona waDavid, tu fila onghenda”? Ovapofi ovo ova li va indila Jesus a twikulule omesho avo pashikumwifilonga. Jesus okwa li a twikulula omesho avo pashikumwifilonga molwaashi okwa li e va udila olukeno. Ombibeli oya ti: ‘Okwe va fila onghenda, okwa kuma omesho avo, nopo tuu opo va pashuka.’ (Mateus 20:30-34, yelekanifa OB-1986.) Onghenda oya li ye linyengifa Jesus a longe oikumwifilonga ihapu oyo ya li ya etela epepelelwo ovapofi, ovo va li tava hepekwa keendemoni, ovanashilundu nosho yo ovadali ovo va li ve na ovana tava ehama. — Mateus 9:27; 15:22; 17:15; Markus 5:18, 19; Lukas 17:12, 13.

7. Oshihopaenenwa shaJehova Kalunga nosho yo shOmona waye otai tu hongo shike shi na sha nonghenda?

⁷ Oshihopaenenwa shaJehova Kalunga nosho yo shaJesus Kristus otai ulike kutya onghenda oi na omaukwatya avali: okuudila ovo ve na omhumbwe olukeno nosho yo okukatuka eenghatu tu va kwafele. Opo omunhu a kale omunanghenda oku na okukala e na omaukwatya oo. Onghenda oya longifwa luhapu mOmishangwa okuulika keenghatu di na sha nokukwafela ovo va li ve na omhumbwe. Ndele onghenda oya li ya ulikwa ngahelipi moinima i na sha neemhangu? Mbela omunhu oo a nyona oku na okutalwa ko a fa ina nyona ndele ta kala ina handukilwa?

Jehova oha file onghenda ovo va nyona

8, 9. Eshi Jehova a li a fila onghenda David, eshi David a li a nyona naBatseba, onghenda oya li ya kwatela mo shike?

⁸ Konakona osho sha li sha ningwa po eshi omuprofeti Natan a li a ka popya naDavid, ohamba yaIsrael shonale, eshi ya li ya nyona ohombo naBatseba. David okwa li e livela ombedi nokwa li a ilikana a ti: “Akutu, Kalunga, file nge onghenda molwouwanghenda woye. Molwefilonghenda loye linene dima po omatimba ange. Koshe nge owii wange, ndi koshoke, Ove u fetele nge po etimba lange. Osheshi enyono lange, ame mwene ondi li shii nawa, nomatimba ange alushe e li momesho ange. Kuove akuke nda nyona, nonda ninga eshi shii momesho oye.” — Epsalme 51:3-6.

⁹ David okwa li e livela ombedi shili. Jehova okwa li e mu dimina po omatimba aye ndele ta pupike ehandukilo lavo naBatseba. PaMhango yaMoses, David naBatseba ova li ve na okudipawa. (Deuteronomion 22:22) Nonande kava li tava ka henuka oilanduliko aishe yenyono lavo, ova li va efuwa va kale nomwenyo. (2 Samuel 12:13) Kalunga oha dimine po ovanhu omolwonghenda yaye. Ndele nande ongaho, ita kala ina handukila ovo va wana okuhandukilwa.

10. Nonande Jehova ohe tu file onghenda ngeenge twa nyona, omolwashike tuhe na okuninga keshe osho twa hala hatu diladila kutya ote ke tu fila onghenda?

¹⁰ Molwaashi ‘oulunde owa etwa mounyuni komunhu umwe’ Adam, ‘nondjabi youlunde oyo efyo,’ ovanhu aveshe ohava fi. (Ovaroma 5:12; 6:23) Otu na okukala tu na olupandu linene molwaashi Jehova ohe tu file onghenda ngeenge te tu tokola. Ndele otu na okulungama tuha ninge keshe osho twa hala hatu diladila kutya Kalunga ote ke tu fila onghenda. Ombibeli otai ti: ‘Eendjila daJehova oda yuka.’ (Deuteronomion 32:4, yelekanifa OB-1986.) Ngeenge Kalunga ta file ovanhu onghenda ihe lipwililikile omifikamhango daye douyuki da wanenena.

11. Jehova okwa li a ungaunga ngahelipi nenyono laDavid naBatseba metwokumwe nouyuki?

¹¹ Ofimbo ehandukilo laDavid naBatseba inali pupalekwa, tete ova li ve na okudiminwa po enyono lavo. Ovatokoli vomuIsrael kava li va pewa oufemba wokudimina po ovahaeli. Ngeno ovo va li va efiwa va ungaunge noshinima shaDavid naBatseba, ngeno ove va tokolela ashike efyo, ngaashi Omhango tai ti. Ndele omolwehangano olo Jehova a li a ninga naDavid, okwa li a tala ngeenge ota dulu oku mu dimina po enyono laye. (2 Samuel 7:12-16) Molwaashi Jehova Kalunga oye “Omutokoli wedu alishe” noha “panaapana omutima,” okwa li a hoolola okuungaunga noshinima shaDavid. (Genesis 18:25; 1 Omafimbo 29:17) Kalunga okwa li a konakona nawa omutima waDavid nokwa tala yo kelivelombedi laye lashili ndele te mu dimine po.

12. Ongahelipi ovanhu inava wanenena tava dulu okufilwa onghenda kuKalunga?

¹² Jehova okwe tu fila onghenda opo tu dule okumangululwa moufyuululwalunde, naasho oshi li metwokumwe nouyuki waye. Opo Jehova e tu dimine po omatimba etu nopehe na okuteya omifikamhango daye douyuki, okwa yandja Omona waye, Jesus Kristus e li ekuliloyambo. Ekuliloyambo olo oli li efiloshisho linenenene olo Jehova a yandja omolwonghenda yaye. (Mateus 20:28; Ovaroma 6:22, 23) Opo tu filwe onghenda kuKalunga notu xupifwe mefyo olo la etifwa koufyuululwalunde, otu na ‘okwiitavela Omona’ waye. — Johannes 3:16, 36.

Kalunga omunanghenda nomuyuki

13, 14. Mbela onghenda yaKalunga ohai hekula ouyuki waye? Shi yelifa.

¹³ Eshi Jehova ha file ovanhu onghenda, mbela iha hekula omifikamhango daye douyuki? Hasho nandenande!

¹⁴ Jehova okwa li a lombwela Ovaisrael okupitila momuprofeti Hosea a ti: “Ame handi ke ku valeka fiyo alushe, ndele ohandi ku valeke nouyuki nonetokolo nononghenda nonolukeno.” (Hosea 2:19) Eendjovo odo otadi ulike filufilu kutya onghenda yaJehova ohai kala alushe metwokumwe nomaukwatya aye makwao, mwa kwatelwa ouyuki. Jehova ‘oKalunga omunanghenda oo ta dimi po omanyonauno nomatauluko nomatimba, ndelenee Ye ita efa okuhandukila nokukongolola omanyonauno.’ (Exodus 34:6, 7) Jehova oKalunga omunanghenda nomuyuki, nomolwaasho Ombibeli ya popya shi na sha naye ya ti: “Ye emanya; oilonga yaye oya wana ya pwa. Osheshi eendjila daye adishe [oda yuka, OB-1986].” (Deuteronomion 32:4) Ouyuki nonghenda yaye oya wanenena. Omaukwatya aye aeshe okwa fimana shi fike pamwe, nokape na oo tau dulu okupupika oilanduliko yomaukwatya makwao. Ponhele yaasho, omaukwatya aeshe ohe a longifa nawa metwokumwe namakwao.

15, 16. (a) Oshike tashi ulike kutya Jehova oha longifa ouyuki waye panghenda? (b) Ovalongeli vaJehova otava dulu okukala nelineekelo lashike eshi Jehova ta ka tokola onghalelo ei yoinima youkolokoshi?

¹⁵ Jehova oha longifa ouyuki waye panghenda. Oshitya ouyuki ohashi yukifwa luhapu koinima yopaveta, nouyuki ohau pula omunyoni a pewe ehandukilo olo le mu yeleka. Ndele nande ongaho, ouyuki waKalunga owa kwatela mo yo okuxupifa ovo va wana. Pashihopaenenwa, eshi ovakolokoshi vomuSodom naGomorra va li va hanaunwa po, tatekulululwa Lot novanakadona vaye vavali ova li va xupifwa. — Genesis 19:12-26.

¹⁶ Ohatu dulu okukala nelineekelo kutya eshi Jehova ta ka tokola onghalelo ei yoinima youkolokoshi ota ka xupifa “ongudu inene” yovailikani vashili ovo “va kosha oikutu yavo, ndele ve i yelifa mohonde yOdjona.” Kungaho, otava ka xupa “moudjuu munene.” — Ehololo 7:9-14, yelekanifa NW.

Omolwashike tu na okukala ovananghenda?

17. Etomheno la fimanenena lilipi li na oku tu linyengifa tu kale ovananghenda?

¹⁷ Oshihopaenenwa shaJehova nosho yo shaJesus Kristus otashi tu hongo eityo lolela longhenda. Omayeletumbulo 19:17 otae tu pe etomheno la fimanenena olo li na oku tu linyengifa tu kale ovananghenda, eshi a ti: “Ou ta filonghenda eehepele, ota tulike kOmwene. Ndele Ye ote ke mu alulila oshilonga shaye shiwa.” Jehova oha kala a hafa ngeenge hatu mu hopaenene nosho yo Omona waye mokukala hatu filafana onghenda. (1 Ovakorinto 11:1) Ngeenge otwa kala hatu file vamwe onghenda otashi ke ve linyengifa ve tu file yo onghenda. — Lukas 6:38.

18. Omolwashike tu na okukendabala tu kale ovananghenda?

¹⁸ Onghenda oya kwatela mo omaukwatya mahapu mawa, ngaashi olukeno, ohole, olune nosho yo ouwa. Olukeno ohali linyengifa omunhu a ningile vamwe ouwa omolwonghenda. Molwaashi onghenda yaJehova ihai hekula ouyuki waye, oku na onheni noha pe ovanyoni efimbo la wana opo ve livele ombedi. (2 Petrus 3:9, 10) Okukala omunanghenda okwa kwatela mo okukala omulididimiki nokutala vamwe onheni. Molwaashi onghenda oya kwatela mo omaukwatya e lili noku lili oshiimati shomhepo yaKalunga, okufila vamwe onghenda otashi ke tu kwafela tu kulike omaukwatya oo. (Ovagalati 5:22) Inashi fimanenena tuu okukendabala okukala ovananghenda!

“Ovanelao ovananghenda”

19, 20. Omeityo lilipi onghenda tai litange kombada yetokolo?

¹⁹ Omuhongwa Jakob okwe tu pa etomheno kutya omolwashike tu na okukala alushe ovananghenda. Okwa shanga a ti: “[Onghenda] otai litange kombada yetokolo.” (Jakob 2:13b) Jakob okwa li ta popi shi na sha nonghenda oyo Omukriste e na okufila vamwe. Onghenda otai litange kombada yetokolo meityo olo kutya ngeenge efimbo ola fiki opo omunhu ‘e lihokolole ye mwene kuKalunga,’ Kalunga ota ka tala kunghee omunhu oo a kala ha file vamwe onghenda ndele te mu dimine po pakanghameno lekuliloyambo lOmona waYe. (Ovaroma 14:12) Nopehe na omalimbililo, etomheno limwe kutya omolwashike David a li a filwa onghenda shi na sha nenyono lavo naBatseba ololo kutya David okwa li omunanghenda. (1 Samuel 24:4-7) Mepingafano naasho, “etokolo kali nonghenda naau e he nonghenda.” (Jakob 2:13a) Onghee hano, itashi kumwifa eshi ovo ‘vehe na onghenda’ va kwatelwa momusholondodo waavo Kalunga a tala ko kutya “ove lilongela efyo.” — Ovaroma 1:31, 32.

²⁰ Jesus okwa popya mEudifo laye lokOmhunda a ti: “Ovanelao ovananghenda, osheshi ovo tava ka filwa onghenda.” (Mateus 5:7) Eendjovo odo otadi ulike kutya ovo va hala okufilwa onghenda kuKalunga ove na yo okukala ovananghenda. Oshitukulwa tashi landula otashi ka kundafana shi na sha nanghee hatu dulu okukala hatu file vamwe onghenda monghalamwenyo yetu yakeshe efiku.

Owe lihonga shike?

• Onghenda oshike?

• Oukwatya wonghenda ohau ulikwa ngahelipi?

• Omolwashike taku dulu okutiwa kutya Jehova Kalunga omunanghenda nomuyuki?

• Omolwashike tu na okukala ovananghenda?

[Efano pepandja 4]

Jehova oha udile olukeno ovo ve na omhumbwe, ngaashi naanaa omudalakadi ha udile okahanana kaye olukeno

[Efano pepandja 6]

Oshike hatu lihongo shi na sha nonghenda moikumwifilonga yaJesus?

[Efano pepandja 7]

Mbela Jehova okwa li ngoo a katuka metwokumwe nouyuki waye eshi a li a fila David onghenda?

[Efano pepandja 8]

Kalunga oha file onghenda ovanhu inava wanenena, nohe shi ningi metwokumwe nouyuki waye