Natu kale hatu file vamwe onghenda
“Tu ningileni aveshe ouwa, ndelenee unene tuu ovo oovakwetu vomeitavelo.” — OVAGALATI 6:10.
1, 2. Oshike hatu lihongo shi na sha nonghenda mefaneko lOmusamaria omunamutimanghenda?
ESHI omunongo wOmhango umwe a li ta popi naJesus, okwa li a pula Jesus a ti: “Omukwetu olyelye?” Jesus okwa li e mu nyamukula a longifa efaneko a ti: “Omulumenhu wonhumba a dja muJerusalem ta i kuJeriko nokwa hangika kovanyeki, ve mu dula aishe, ndele ve mu denga oipute, ndele ova ya ve mu fiya po e na okamwenyo kanini. Nomupristeri wonhumba a hangika ta ende nondjila ei, okwe mu mona, ndele okwe mu pitilila po. Nomuleviti osho yo; eshi e uya poima opo, okwe mu mona ndele okwe mu pitilila po. [Ndelenee] Omusamaria umwe a enda nondjila ei, eshi e uya po, okwe mu mona, ndele okwe mu fila onghenda. Ndele okwa ya kuye, a manga oipute yaye, a tila mo omaadi nomaviinyu, okwe mu londeka koshilondwa shaye, ndele okwe mu twala kongulu yovaenda ndele te mu xungu. Ndele mefiku la shikula mokufikama kwaye, okwa kufa eendenari mbali, okwe di pa mwene weumbo lovaenda ndele okwa tya: Mu xunga, ndele ngenge itadi wana, ohandi ku pe mokwaaluka.” Jesus okwa weda ko vali ta pula omulumenhu oo a ti: “Hano pandunge doye elipi po muava vatatu a li mukwao womunhu ou a hangikile kovanyeki?” Omulumenhu oo okwe mu nyamukula a ti: “Ou e mu fila onghenda.” — Lukas 10:25, 29-37a.
2 Omusamaria okwa li a ulika kutya oku na onghenda yashili monghedi omo a li a ungaunga nomulumenhu oo a li a yahamekwa. Omusamaria oo okwa li e linyengifwa konghenda ile kolukeno opo a kwafele omulumenhu oo kwa li a yahamekwa. Omusamaria oo ka li e shii omulumenhu oo. Osho otashi ulike kutya omunhu ke na ashike okufila onghenda ovanhu vomoshiwana shavo, velongelokalunga lavo ile veputuko lavo. Konima eshi Jesus a yandja efaneko li na sha nOmusamaria omunamutimanghenda, okwa li a ladipika omulumenhu oo a ti: “Naave yo inda u ka ninge ngaha.” (Lukas 10:37b) Nafye ohatu dulu okutula moilonga ekumaido olo nokukendabala okukala hatu file vamwe onghenda. Ndele mbela ongahelipi hatu dulu oku shi ninga? Omeenghedi dilipi hatu dulu okukala hatu file vamwe onghenda monghalamwenyo yetu yakeshe efiku?
‘Ngeenge omumwatate e na onghai’
3, 4. Omolwashike tu na okukala hatu file vamwe onghenda unene tuu ovaitaveli vakwetu?
3 Omuyapostoli Paulus okwa ti: “Fimbo tu nomhito, tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:10) Tete natu konakoneni nghee hatu dulu okulongela ovaitaveli vakwetu oilonga iwa hatu linyengifwa konghenda.
4 Omuhongwa Jakob okwa kumaida Ovakriste vashili va kale hava filafana onghenda a ti: “Etokolo kali nonghenda naau e he nonghenda.” (Jakob 2:13) Jakob okwa tumbula eenghedi donhumba omo hatu dulu okukala hatu file vamwe onghenda. Pashihopaenenwa, Jakob 1:27 ota ti: “Elongelokalunga la yela noli he nedilo lasha koshipala shaKalunga naTate oleli: okutalela po eefiye novafiyekadi momaudjuu avo, nokuliamena a ha nyatekwe kounyuni.” Jakob 2:15, 16 ota ti: “Ngenge pe nomumwatate omulumenhu ile omumwatate omukainhu [e na onghai OB-1986], nokwa hepa oipalwifa yakeshe efiku, ndele umwe womunye ta ti kuvo: Indeni nombili mu ka xuxumukwe nye mu likutife, ndele nye inamu va pa osho sha pumbuwa kolutu, otashi kwafa shike?”
5, 6. Omeenghedi dilipi hatu dulu okuningila vamwe ouwa meongalo letu hatu linyengifwa konghenda?
5 Okufila oshisho vamwe nokukwafela ovo ve na omhumbwe oo oukwatya oo hau didilikifa mo elongelokalunga lashili. Tu li ovalongelikalunga vashili, itatu ka lombwela ashike vamwe kutya otu va uditile onghenda nonokutya aishe otai ke va endela nawa nopehe na oku va kwafela. Ponhele yaasho, olukeno otali ke tu linyengifa tu kwafele ovo ve na omhumbwe inene. (1 Johannes 3:17, 18) Eenghedi dimwe omo hatu dulu okuningila vamwe ouwa hatu linyengifwa konghenda ongaashi okutelekela ovo tava ehama, okukwafela ovanamido momaumbo avo nosho yo okutwaalela vamwe kokwoongala noyeendifo yetu. — Deuteronomion 15:7-10.
6 Nonande osha fimana okukwafela oilyo yeongalo lopaKriste painiwe, osha fimanenena unene oku i kwafela pamhepo. Otwa kumaidwa tu kale hatu ‘popi nehekeleko neemwenyo da polimana notu yambidide ovanghundi.’ (1 Ovatessaloniki 5:14, NW) “Ovakainhu ovanamido” otava kumaidwa va kale “ovalongi vomuashi shiwa.” (Titus 2:3, yelekanifa OB-1986.) Ombibeli oya popya shi na sha novapashukili Ovakriste ya ti: “Keshe umwe [womuvo] ta ka kala ngaashi oshikelelifo shokukelela omhepo nongaashi ehondameno lokuyaama oshikungulu.” — Jesaja 32:2.
7. Oshike hatu lihongo moshihopaenenwa shovahongwa vokuAntiokia shomuSiria shi na sha nokufila vamwe onghenda?
7 Kakele kokufila oshisho ovafiyekadi, eefiye nosho yo ovo va li va pumbwa ekwafo netwomukumo momaongalo avo, omaongalo omefelemudo lotete omafimbo amwe okwa li haa tumine oikwafa kOvakriste vakwao ovo va li koitukulwa imwe i lili. Pashihopaenenwa, eshi omuprofeti Agabus a li a xunganeka kutya “ondjala idjuu tai ke uya kombada yedu alishe,” ovahongwa vokuAntiokia shomuSiria ova li “va pangela omhangela okuyandja oikwafa, keshe ou shi fike peenghono daye, i tuminwe ovamwatate venya ve li muJudea.” Oikwafa oyo ova li ve i tumina ovakulunhuongalo “momake a Barnabas naSaulus.” (Oilonga 11:28-30) Ongahelipi kunena? “Omupiya omudiinini nomunaendunge” okwa unganeka eekomitiye odo hadi ungaunga noikwafa opo di file oshisho ovamwatate ovo tashi dulika va kumwa koiponga yopaushitwe, ngaashi oikungulu nosho yo omakakamo edu. (Mateus 24:45) Okulongifa efimbo letu, eenghono detu nosho yo oiniwe yetu nehalo liwa, hatu longele kumwe nelongekido olo, oyo onghedi imwe ya denga mbada omo hatu dulu okufila vamwe onghenda.
Inamu ‘tala olupe lomunhu’
8. Ongahelipi okutala olupe lomunhu haku imbi omunhu a file vamwe onghenda?
8 Jakob okwa li a londwela shi na sha noukwatya oo tau dulu okwiimba omunhu a file vamwe onghenda noku wanife “omhango onghwahamba” yopahole eshi a ti: “Ngenge otamu tale olupe lomunhu, otamu tula etimba, omhango notai mu tokola onye ovanyoni.” (Jakob 2:8, 9) Ngeenge otwa kala hatu likumbu oipuna ile ovo va tumbala, otashi dulu oku tu ningifa tu kale ihatu udu “onghuwo yohepele.” (Omayeletumbulo 21:13) Okutala olupe lomunhu ohaku imbi omunhu a file vamwe onghenda, ndele ngeenge okwa kala ha ungaunga navamwe nopehe na onhondo ota ka ulika kutya oku na onghenda shili.
9. Omolwashike inashi puka okukala twa lenga vamwe omolwoilonga ya fimana oyo tava longo ile omaukwatya avo mawa?
9 Mbela okuhakala nonhondo otashi ti katu na okukala twa lenga vamwe omolwoilonga ya fimana oyo tava longo ile omaukwatya avo mawa? Hasho nandenande. Omuyapostoli Paulus okwa li a shangela Ovakriste vomuFilippi shi na sha nomulongi pamwe naye Epafroditus a ti: ‘Ovanhu ngaashi ye, va fimanekeni.’ Omolwashike mbela? “Osheshi [omolwoshilonga] shaKristus oye hanga a fya, eshi a yandjela nge omwenyo waye a yakule nge ponhele yeni.” (Ovafilippi 2:25, 29, 30) Epafroditus okwa li a wana okufimanekwa omolwoilonga youdiinini oyo a li a longa. Timoteus wotete 5:17 ota ti: “Ovakulunhu ava hava lele nawa, ove lilongela okufimanekwa shili, unene ava ve li moshilonga shondjovo ndee tava longo.” Omunhu oo e na omaukwatya mawa opamhepo naye okwa wana yo okufimanekwa. Okufimaneka umwe monghedi ya tya ngaho itashi ti kutya otu na onhondo.
‘Ounongo oo hau di kombada ou yadi onghenda’
10. Omolwashike tu na okupangela elaka letu?
10 Jakob okwa popya shi na sha nelaka a ti: “Olo owii u he na nande etulumuko, li yadi oudiyo tau dipaa. Nelaka ohatu hambelele Omwene Tate, ndee hatu tuku nalo ovanhu va shitwa oshifefa shaKalunga. Mokanya tuu aka kamwe otamu piti enangeko noupuna nefingo.” Jakob okwa popya yo metukulwa olo a ti: “Momutima weni ngenge omu nefupa lilula neenhamanana, inamu litanga, ndee inamu fufya nokukondjifa oshili. Ounongo wa tya ngaha [hayoo] hau di kombada, ndelenee owopaunyuni nowopanhu nowopandemoni. Osheshi apa pe nefupa neenhamanana, opo pe na yo edongakano noilonga aishe yowii. Ndelenee ounongo ou hau di kombada, tete [owa] yela nopo nee u nombili nou nolukeno nowiitaveleli nou yadi onghenda noiimati iwa; kau nomalimbililo ile oihelele.” — Jakob 3:8-10a, 14-17.
11. Ongahelipi hatu dulu okukala ovananghenda mokupopya kwetu?
11 Onghedi omo hatu popi navamwe otai ka ulika kutya otu na ounongo ‘u yadi onghenda.’ Mbela ohatu ka ulika ngoo kutya otu na onghenda ngeenge ohatu litade, hatu popi oipupulu ile hatu tandavelifa omalwaambo molwaashi twa twila vamwe ondubo ile molwaashi twe linyamukula nai navo? Epsalme 94:4 ola ti: “Ovalongi vowii vo aveshe otave litumbile pombada.” Olwaambo otali dulu okunyona po edina liwa laumwe. (Epsalme 64:3-5) Kakele kaasho, diladila yo oupyakadi oo tau dulu okuholoka po ngeenge “ondombwedi yoipupulu tai kunu oipupulu.” (Omayeletumbulo 14:5; 1 Eehamba 21:7-13) Konima eshi Jakob a popya shi na sha nokulongifa nai elaka, okwa ti: “[Ovamwatate], itashi dulika shi kale ngaha.” (Jakob 3:10b) Onghenda yashili otai pula tu kale hatu longifa elaka letu monghedi ya koshoka, yombili noi li pandjele. Jesus okwa ti: “Ohandi mu lombwele: Okeshe tuu ondjovo yongaho, ovanhu tava tumbula, ovo ve na oku i pulwa efiku letokolo.” (Mateus 12:36) Inashi fimana tuu okukala hatu popi nonghenda!
‘Kufile i po ovanhu omanyono avo’
12, 13. (a) Oshike hatu lihongo shi na sha nonghenda mefaneko lomupiya oo kwa li a lya eendjo komwene waye doimaliwa ihapu? (b) Otashi ti shike okudimina po omumwatate “lwo-77”?
12 Efaneko laJesus lomupiya oo kwa li a lya eendjo komwene waye, ohamba, eendenari 60 000 000 (oitalenti 10 000) otali ulike onghedi imwe vali omo hatu dulu okukala ovananghenda. Molwaashi omupiya oo kali e na oiniwe opo a fute oikolo yaye, okwa li a indila ohamba i mu file onghenda. Omwene waye okwa li ‘e mu fila onghenda’ ndele te mu dimine po oikolo yaye. Eshi omupiya oo a ya pondje, okwe litwa omupiya mukwao oo e mu lya eendjo deendenari efele limwe ndele te mu idililifa modolongo nopehe na oku mu fila onghenda. Eshi omwene womupiya oo a uda eshi a ningila omupiya mukwao, okwe mu ifana ndele ta ti kuye: “Omupiya [ove] mwii, oikolo yoye aishe onde i ku kufila po, eshi wa ilikana nge; naave yo ngeno wa li u nokufila onghenda omupiya mukweni, ngaashi ame nde ku fila onghenda.” Ndele omwene waye okwe mu yandja kovahepeki. Jesus okwa li a xulifa efaneko olo a ti: “Osho yo Tate meulu te mu ningile, ngenge itamu dimine po okomitima deni keshe tuu omumwaina.” — Mateus 18:23-35.
13 Efaneko olo la tumbulwa mokatendo ka tetekela otali ulike filufilu kutya onghenda oya kwatela mo okukala nehalo lokudimina po vamwe. Jehova okwe tu dimina po omatimba mahapu. Mbela nafye katu na ‘okukufila po ovanhu omanyono avo’? (Mateus 6:14, 15) Fimbo Jesus ina popya efaneko li na sha nomupiya ehe na onghenda, Petrus okwa li e mu pula a ti: “Omwene, olungapi ndi nokudimina po omumwatate ta nyono kuame: olu-7 la wana?” Jesus okwe mu nyamukula a ti: “Ame ihandi ku lombwele lu-7, ndelenee lwo-77.” (Mateus 18:21, 22) Omunanghenda oha dimine po vamwe nehalo liwa “lwo-77,” sha hala okutya, oha dimine po alushe vakwao.
14. PaMateus 7:1-4, ongahelipi hatu dulu okufila vamwe onghenda efiku keshe?
14 Jesus okwa popya vali onghedi imwe omo hatu dulu okufila vamwe onghenda mEudifo laye lokOmhunda a ti: “Inamu tokola, opo mu ha tokolwe; osheshi etokolo eli tamu li tokolifa, nanye yo otamu li tokolifwa. . . . Ndele ongahelipi hano wa tala okambodi ke li meisho lomukweni, ndele endangalati li li meisho loye mwene, ku li wete? Ile to shiiva ngahelipi okulombwela omumwanyoko: Handi uya, ndi kufe mo okambodi meisho loye, ndele tala, ove u nendangalati meisho loye mwene?” (Mateus 7:1-4) Onghee hano, ohatu ka kala ovananghenda efiku keshe ngeenge otwa kala hatu lididimikile omaunghundi avamwe nopehe na oku va tokola.
“Tu ningileni aveshe ouwa”
15. Omolwashike tu na okufila onghenda ovanhu aveshe?
15 Nonande embo lOmbibeli laJakob ola divilika okufila onghenda ovaitaveli vakwetu, osho inashi hala okutya otu na ashike okufila onghenda Ovakriste vakwetu. Epsalme 145:9 otali ti: “Kalunga omuwa kuaveshe, nohole [“onghenda,” OB-1986] yaye ya nyananana kovashitwa vaye aveshe.” Otwa kumaidwa tu ‘ningeni ovahopaeneni vaKalunga’ notu “ningileni aveshe ouwa.” (Ovaefeso 5:1; Ovagalati 6:10) Nonande katu hole “ounyuni nakeshe eshi shi li mo,” itashi ti kutya katu na ko nasha neemhumbwe daavo ve li mounyuni. — 1 Johannes 2:15.
16. Oinima ilipi tai ka kuma onghedi omo hatu ka fila vamwe onghenda?
16 Tu li Ovakriste, otwa hala alushe okukwafela ovo va hangwa keenghalo ‘dombadilila’ ile ovo ve li meenghalo didjuu. (Omuudifi 9:11, NW ) Ndele nande ongaho, eenghalo detu odo tadi ka ufa kutya oshike hatu ka ninga po opo tu kwafele vamwe. (Omayeletumbulo 3:27) Ngeenge hatu kwafele vamwe painiwe, otu na okukala twa lungama opo tuhe va ninge ovakwandede. (Omayeletumbulo 20:1, 4; 2 Ovatessaloniki 3:10-12) Onghee hano, onghenda yashili oya kwatela mo olukeno nosho yo okutomhafana ku li pandunge.
17. Omonghedi ya denga mbada ilipi hatu dulu okufila onghenda ovo vehe fi ovaitaveli vakwetu?
17 Onghedi ya denga mbada omo hatu dulu okufila onghenda ovo vehe fi ovaitaveli vakwetu oyo oku va udifila oshili yOmbibeli. Omolwashike mbela? Omolwaashi ovanhu vahapu kunena ove li momilaulu dopamhepo. Molwaashi ovanhu vahapu kave shii nghee ve na okuungaunga nomaupyakadi oo e va taalela nokave na eteelelo lasha li na sha nonakwiiwa, ova ‘hepekwa nova loloka va fa eedi dihe na omufita.’ (Mateus 9:36) Etumwalaka lEendjovo daKalunga otali dulu okukala ‘olamba yeemhadi davo’ oyo tai va kwafele va ungaunge nomaupyakadi omonghalamwenyo. Etumwalaka olo otali dulu yo okukala ‘ouyelele mondjila yavo,’ molwaashi Ombibeli oya xunganeka elalakano laKalunga li na sha nonakwiiwa olo tali va kwafele va kale ve na eteelelo la twa. (Epsalme 119:105) Oufembanghenda ou fike peni wokukala hatu lombwele ovo ve na omhumbwe etumwalaka loshili likumwifi! Molwaashi ‘oudjuu munene’ otau ehene popepi, paife olo efimbo lokukufa ombinga nouladi moilonga yokuudifa Ouhamba noyokuninga ovanhu ovahongwa. (Mateus 24:3-8, 21, 22, 36-41; 28:19, 20) Kape na onghedi imwe ya fimana omo hatu dulu okufila vamwe onghenda i dule oyo.
“Eshi shomeni shi yandjeni”
18, 19. Omolwashike tu na okukendabala alushe tu kale hatu file vamwe onghenda monghalamwenyo yetu?
18 Jesus okwa ti: “Eshi shomeni shi yandjeni oikwafa yeehepele.” (Lukas 11:41) Opo u file vamwe onghenda yashili ou na okuyandja oshali tashi di meni, sha hala okutya, tashi di komutima u na ohole nonehalo liwa. (2 Ovakorinto 9:7) Onghenda ya tya ngaho itai tulumukifa tuu eshi tu li mounyuni omu mu yadi ovakwanyanya, ovanhu ve lihole vovene novehe na ko nasha nokumona oixuna nosho yo omaupyakadi avamwe!
19 Onghee hano, natu kendabaleni alushe okukala hatu file vamwe onghenda mokukalamwenyo kwetu. Apa ngoo pe fike okukala hatu file vamwe onghenda, opo ngoo ta pa ka kala pe fike okuhopaenena kwetu oukwatya oo waKalunga. Naasho otashi ke tu kwafela tu kale nonghalamwenyo tai ti sha noihafifa. — Mateus 5:7.
Owe li honga shike?
• Omolwashike sha fimana unene okufila onghenda ovaitaveli vakwetu?
• Ongahelipi hatu dulu okufila onghenda ovaitaveli vakwetu meongalo?
• Ongahelipi hatu dulu okuningila ouwa ovo vehe fi ovaitaveli vakwetu?
[Efano pepandja 9]
Omusamaria okwa li a kwafela umwe omolwonghenda
[Omafano pepandja 10]
Ovakriste ohava ningile vamwe ouwa omolwonghenda
[Efano pepandja 13]
Onghedi ya denga mbada omo hatu dulu okufila onghenda ovo vehe fi ovaitaveli vakwetu omoku va udifila oshili yOmbibeli