Longeni aanona yeni okukala aanambili

Okakadhona koomvula hetatu kedhina Nicole oka li ka nyanyukwa sho uukwanegumbo waandjawo wa li wu na okutembukila kombinga yimwe yoshilongo. Oka li aluhe haka lombwele kahewa kako kopothingo Gabrielle uuyelele auhe wu na ko nasha netembu ndyoka. Esiku limwe inaashi tegelelwa, Gabrielle oku ula Nicole kutya ke na ko nasha nokutembuka kwawo. Nicole okwa li a yemata noonkondo nokwa geya e ta lombwele yina ta ti: “Inandi hala we nando okumona Gabrielle!”

OLUNDJI aavali oya pumbwa okukwathela mokukandula po uupyakadhi pokati kaanona ngaashi mboka wa li pokati kaNicole naGabrielle, haku ya hekeleka owala, ihe oku yu ulukila wo nkene ye na okuungaunga nuupyakadhi. Aanona aashona oye na omaukwatya ‘gopakanona,’ nolundji inaya tseya kutya oohapu dhawo niilonga yawo otayi vulu okweehameka yalwe. (1 Aakorinto 13:11) Oya pumbwa ekwatho opo ya kale ye na omaukwatya ngoka taga vulu okuhumitha komeho ekwatathano lyombili nayalwe muukwanegumbo nakehe pamwe.

Aavali Aakriste oye na ehalo enene okulonga aanona yawo “ya konge ombili e taye yi lalakanene.” (1 Petrus 3:11) Nonando ohashi pula oonkambadhala dha mana mo opo tu sinde omaiyuvo gokukala nomalimbililo, okuuva nayi nuutondwe, ohashi eta enyanyu ngele otu li aanambili. Ngele owu li omuvali, ongiini to vulu okulonga aanona yoye ya kale aanambili?

Ya kwathela ya kale nehalo okunyanyudha “Kalunga kombili”

Jehova ohi ithanwa “Kalunga kombili” noku li “oluthithiya lwombili.” (Aafilippi 4:9, OB-1954; Aaroma 15:33) Onkee ano, aavali aanandunge ohaya longitha nuukeka Oohapu dhaKalunga, Ombiimbeli, okuthindila maanona yawo ehalo lyokunyanyudha Kalunga nokuholela omaukwatya ge. Pashiholelwa, kwathela aanona yoye ya dhiladhile kwaashoka omuyapostoli Johannes a li a mono memoniko ekumithi lyoshipangelapundi oshinene shaJehova sha dhingolokwa kuutamvula wolwaala lwa fa emanya lyasmaragdi.a (Ehololo 4:2, 3) Ya yelithila kutya uutamvula mboka otawu thaneke ombili nengungumano mbyoka ya kundukidha Jehova nonokutya omalaleko nuuyamba ngoka otaga ka pewa ayehe mboka taya vulika kuye.

Jehova oha gandja wo ewiliko okupitila mOmwana, Jesus, ngoka ti ithanwa “Omukwaniilwa gwombili.” (Jesaja 9:6, 7) Onkee ano, lesha nokukundathana naanona yoye omahokololo gomOmbiimbeli mono Jesus a longa aalongwa ye iiyilongomwa ya simana kombinga yokukeelela oontamanana noompata. (Mateus 26:51-56; Markus 9:33-35) Ya yelithila kutya omolwashike Paulus ngoka a li nale “omukolokoshi” a lundulula oondjila dhe nokwa nyola a ti kutya “omumati gwOmuwa ita pumbwa okutamanana. Oye oku na okukala . . . omwiidhidhimiki, e na olukeno naayehe.” (1 Timoteus 1:13; 2 Timoteus 2:24) Otashi vulika aamwoye yi inyenge momukalo ngoka tagu ku kumitha.

Evan ota dhimbulukwa kutya sho a li e na oomvula heyali okwa li a shekwa kokamati mombesa yawo yosikola. Ota ti: “Onda li nde ka geyela unene nonda li nda hala oku ka ula wo nayi. Ihe onda li nda dhimbulukwa oshiilongomwa shono nda li ndi ilongo kegumbo kombinga yaambono ye hole oontamanana. Onda li ndi shi kutya Jehova ina hala ndi ‘shunithile omuntu uuwinayi,’ ihe okwa hala ndi kale ‘nombili naantu ayehe.’” (Aaroma 12:17, 18) Opo nduno Evan okwa li a mono oonkondo nomukumo okukandula po onkalo ndjika ombwiinayi mokuyamukula momukalo omwaanawa. Okwa li a hala okunyanyudha Kalunga kombili.

Kala omuvali omunambili

Mbela megumbo lyoye omu na ombepo yombili? Ngele osho, aanona yoye otaya vulu okwiilonga oshindji kombinga yombili nonando ino popya sha. Oku shi pondola kwoye mokulonga aanona yoye ya kale aanambili okwi ikolelela unene tuu kunkene ho holele oondjila dhombili dhaKalunga naKristus.—Aaroma 2:21.

Russ naCindy oya longo nuudhiginini okuputudha oyanamati yawo yaali, oku ya kumagidha ya katuke momukalo gwombili uuna yalwe taye ya hindi. Cindy ota ti: “Iikala mbyono Russ nangame hatu ulukile oyanamati yetu nayalwe uuna pwa holoka omaupyakadhi ohayi dhana onkandangala onene munkene oyanamati yetu hayu ungaunga noonkalo dha faathana.”

Nonando aavali ohaya ningi omapuko (nosha yela kutya kapu na omuvali ngoka ihaa ningi epuko), otaya vulu natango okulongitha ompito ndjoka okulonga oyana omikalo omiwanawa. Stephen ota ti: “Opwa li pu na omathimbo gamwe sho ngame nomukulukadhi gwandje Terry twa li hatu katukile neendelelo aanona yetu yatatu oonkatu noku ya geela omanga kaatu na uuyelele auhe wi ihwa po. Ngele shika sha ningwa, otwa li hatu ya pe ombili.” Terry okwa gwedha ko a ti: “Otwa li hatu lombwele aanona yetu kutya natse inatu gwanenena nando nohatu ningi omapuko. Shika otu wete kutya inashi kaleka owala ombili megumbo lyetu, ihe osha kwathele wo aanona yetu yi ilonge nkene ye na okulalakanena ombili.”

Mbela aanona yoye otayi ilongo okukala aanambili mokutala komukalo ngoka hu ungaunga nayo? Jesus okwa kumagidha a ti: “Onkee ano shaa shoka mwa hala aantu ye mú ningile, osho ya ningileni wo.” (Mateus 7:12) Nonando oho ningi omapuko, kala wu na uushili kutya ohole ndjoka hu ulukile aanona yoye otayi ke eta iizemo iiwanawa. Aanona yoye otaye ki inyenga nawa uuna to ya pukulula momukalo gwohole.

Kala wu na ontalanteni

Omayeletumbulo 19:11, OB-1954 otaga ti: “Oondunge dhomuntu tadhi mu talanteneke, nesimano lye olyo okudhima po eyonagulo.” Ongiini to vulu okukwathela aanona yoye ya kale noondunge dha tya ngaaka? David nomukulukadhi gwe Mariann otaya hokolola shoka hashi ya kwathele mokuputudha aanona yawo, okamati nokakadhona. David ota ti: “Uuna yu uvithwa nayi kugumwe ngoka a popya sha nenge a ninga sha tashi ya ehameke, ohatu ya kwathele opo ya kale ye na uukwawo wanankali. Ohatu ya pula omapulo ngaashi: ‘Mbela omuntu ngoka okwa li ngaa u uhala po? Mbela okwa li e ku tsila ondumbo? Nenge mbela opu na gumwe e mu uvitha nayi?’” Mariann ota gwedha ko ta ti: “Shika ohashi ngungumaneke aanona pehala lyoku ye etha ya kale taya dhiladhila kombinga yuuwinayi mboka nenge okutsa oompata kutya olye e li mondjila nolye a puka.”

Edheulo ndyoka otali vulu okweeta iizemo iiwanawa noonkondo. Tala nkene Nicole ngoka a tumbulwa petameko lyoshitopolwa shika, a li a kwathelwa kuyina Michelle, momukalo ngoka gwa li gwe mu etele uuwanawa owundji kaawu shi owala okuninga ishewe uukuume naGabrielle. Michelle ota ti: “Ngame naNicole otwa li twa lesha ontopolwa 14 membo Learn From the Great Teacher.b Onda li nda yelitha shoka Jesus a li a hala okutya sho a ti kutya otu na okudhimina po yamwe ‘lwomilongo heyali luheyali.’ Konima sho nda li nda pulakene nawa kuNicole sho ta popi omaiyuvo ge, onda li nde mu kwathele u uve ko kutya Gabrielle okwa li u uvite nayi nokwa yemata molwaashoka kahewa ke kopothingo okwa li ta yi kokule naye.”—Mateus 18:21, 22.

Sho Nicole u uvu ko kutya omolwashike Gabrielle a li a geya, osha li she mu kwathele okukala nuukwawo wanankali noshe mu inyengitha a dhengele Gabrielle ongodhi e te mu pe ombili. Michelle ota ti: “Okuza ethimbo ndyoka Nicole oha kala e shi nyanyukilwa okuyaalela yalwe noku ya ningila iinima iiwanawa mbyoka tayi yu uvitha nawa.”—Aafilippi 2:3, 4.

Kwathela aanona yoye yaaha uvithwe nayi komapuko gayalwe nosho wo kokwaahauvathana hoka haku holoka po. Ngele to shi ningi, oto ka kala wa nyanyukwa sho to mono aanona yoye ye na ombili yashili nayalwe noye ya hole wo.—Aaroma 12:10; 1 Aakorinto 12:25.

Ya ladhipikila esimano lyokudhimina po

Omayeletumbulo 19:11 otaga ti: ‘Osho esimano okudhima po eyono.’ Sho Jesus a li muuwehame uunene, okwa li a holele He nokwa li a dhimine po yalwe. (Lukas 23:34) Aanona yoye otaya vulu okwiilonga esimano lyokudhimina po ngele taya mono nkene hashi ya hekeleke uuna ngoye to ya dhimine po.

Pashiholelwa, Willy, okamati koomvula ntano, oke hole okumbapeka omathano pamwe nayinakulu. Esiku limwe, yinakulu ohaluka okwe etha okumbapeka, okwa ganda Willy e ta zi po. Willy okwa li e uvite nayi. He Sam ota ti: “Yinakulu yaWilly oku na omukithi gwoAlzheimer [ngoka hagu piyaganeke omadhiladhilo gaakulupe]. Onkee ano otwe shi yelithile Willy noohapu ndhoka e uvite ko.” Konima sho ya dhimbulukitha Willy kutya naye okwa dhiminwa po olundji nonokutya oku na okuningila yalwe sha faathana, Sam okwa li a kumwa keinyengo lyaWilly. Sam ota ti: “Owu shi mbela kutya ngame nomukulukadhi gwandje otwa li tu uvite ngiini sho twa mono okamwanamati ketu taka yi kuyinakulu gwoomvula 80, taka popi naye pamukalo gwombili, take mu kwata moshikaha e take mu galulile koshitaafula?”

Oshi li lela sha simana opo aanona yi ilonge ‘okudhima po’ omayono nomapuko gayalwe. (Aakolossa 3:13) Nokuli nuuna aantu taya ningi sha owina shoka tashi geyitha okanona, omuvali ne ka shilipaleke kutya okwiinyenga nombili oshinima sha simanenena, molwaashoka “OMUWA ngele okwa hokwa oondjila dhomuntu, nena ote mu hangukununa wo naatondi ye.”—Omayeletumbulo 16:7.

Kala ho kwathele okanona koye ka kale okanambili

Uuna aavali taya longitha Oohapu dhaKalunga okulonga aanona yawo “nombili” ye li ‘mboka haya dhiginine ombili,’ otaye ye etele omalaleko nuuyamba gashili. (Jakob 3:18, OB-1954) Aavali ya tya ngawo ohaya kwathele oyana opo ya kale yi ilongekidha okukala taya vulu okukandula po omaipumomumwe nokukala ye li aanambili. Shoka otashi ye etele enyanyu enene monkalamwenyo yawo ayihe.

Dan naKathy oye na aanona yatatu ye na oomvula omulongo nasha mboka ayehe taya ningi nawa pambepo. Dan ota ti: “Nonando opwa li omashongo moku ya putudha manga ya li aashona lela, otwa nyanyukwa noonkondo sho aanona yetu ngashingeyi taya ningi nawa. Ngashingeyi oye na ekwatathano ewanawa nayalwe nohaya dhimine po yalwe ngele pwa ningwa sha tashi yono po ombili.” Kathy ota ti: “Shika ohashi tu ladhipike unene, molwaashoka ombili oyi li oshiimati shombepo yaKalunga.”—Aagalati 5:22, 23.

Mu li aavali Aakriste omu na etompelo ewanawa lyokukala ihaamu ‘si uunye’ nenge ihaamu ‘vulwa’ okulonga aanona yeni ya kale aanambili, nonando petameko ehumokomeho ohali kala lya fa tali ende kashona. Ngele tamu shi ningi, kaleni mu shi kutya “Kalunga kohole nokombili ota ka kala pamwe nane.”—Aagalati 6:9; 2 Aakorinto 13:11.

[Omanyolo gopevi]

[oshimpungu/Ethano pepandja 14]

MBELA OSHI LI ENWETHOMO EWANAWA?

Etotwahokololo lya nyanyangidhwa kongundu yaantu mboka haya tonatele iikundaneki li na oshipalanyolo “Elongitho lyoonkondo momainyanyudho gomiikundaneki” otali ti: “Edhiladhilo kutya elongitho lyoonkondo olyo omukalo gwokukandula po omaupyakadhi otali tsuwa omuthindo momainyanyudho [ngaashi mookino] moka iidhukudhuku nosho wo oofule haya longitha olundji oonkondo.” Etotwahokololo ndika otali ti kutya moopolohalama odhindji dhoko-TV, mookino nomoomusika dhokovideo elongithonkondo ohali longithwa ongomukalo omwaanawa gwokukandula po omaupyakadhi. Oopelesenda owala 10 lwaampono dhomudho hadhi ulike kutya elongithonkondo oli na iizemo iiwinayi.

Mbela owu wete sha pumbiwa okuninga omalunduluko shi na ko nasha nokutala o-TV maandjeni? Ino pitika omainyanyudho gomiikundaneki ga ye moshipala oonkambadhala dhoye dhokulonga aanona yoye ya kale aanambili.

[Ethano pepandja 12]

Thindila maanona yoye ehalo lyokunyanyudha “Kalunga kombili”

[Ethano pepandja 13]

Longitha ethimbo oku ya pukulula ngele taya longitha elaka ewinayi nongele taya ningi sha sha puka

[Ethano pepandja 15]

Aanona yoye oye na okwiilonga okugandja ombili nokudhimina po