Okukala nohenda muuyuni mbuka wu udha onyanya

OMULUMENTU gumwe muBurundi okwa li a kwatwa sha kwata miiti kuuvu wamalaria. Okwa li a pumbwa okufalwa koshipangelo meendelelo. Ihe kapwa li pu na oshihauto shoku mu fala ko. Ongiini ano a li ta vulu okuthika ko? Ookuume ke yaali yopothingo oya li ye mu kwathele. Oya li ye mu londeke kombasikela noye mu undula uule woowili ntano moshitopolwa shoka shi na oondundu. Oye mu tula mombesa ndjoka ya li ye mu fala koshipangelo shopopepi. Konima yomasiku omashona, okwa li a ti po hwepo.

Handiyaka yevi, konima yoshikungulu shaKatrina shoka sha li sha dhenge oshitopolwa shimwe shi li komunkulofuta mIilongo yaHangana muAuguste 2005, ongundu yaaiyambi oya li yi itsu megumbo lya mbonyoka po li li kohi yomiti. Aaiyambi mboka ya li kaaye shiwike kumwene gwegumbo oya li ya kala uule wesiku alihe taya saaha omiti niitayi mbyoka ya tekauka noku yi kutha po. Mwene gwegumbo okwa li a ti: ‘Kandi na iitya nomatumbulo okupandula aantu mbaka.’

Iikundaneki ohayi kundaneke unene kombinga yomadhipago niilonga yonyanya. Olundji iilonga ya tya ngaaka oyo unene hayi popiwa shi vulithe iilonga yohenda noyolukeno mbyoka hayi longwa kehe esiku. Ihe shika itashi lundulula uushili kutya aantu apuhe oya pumbwa unene ohole nohenda. Natse inatu yi pumbwa tuu! Omadhiladhilo ga tya ngaaka ohaga kala maantu unene tuu pethimbo lyOkrismesa, sho oyendji haya popi nokwiimba kombinga ‘yombili kombanda yevi maantu.’—Lukas 2:14.

Kashi shi oshipu okukala nohenda muuyuni mbuka kaawu na ombili. Iikala mbyoka yi li apuhe oyo kutya ngele owu na onyanya nowaahe na ko nasha otayi ku kwathele wu shi pondole nowu sindane. Oyendji oye na etaloko kutya oshi li pandunge okukala wu na onyanya pehala lyokukala nohenda. Olwiho nokwiihola mwene ohayi ningitha aantu nuupu ya kale kaaye na ohenda.

Oshizemo, oyendji oyi iholele komeho, kutya nduno otashi gumu yalwe ngiini. Aalumentu oonkulungu momaudhano nomomainyanyudho olundji ohaya popiwa kutya oye li “aalumentweelela” mboka kaaye na nando ohenda. Aaleli yamwe yopapolotika nayo ohayi ihumbata momukalo gwa faathana.

Onkee ano oshi li pandunge okwiipula kutya: Mbela omolwashike tu na okukala aanahenda? Mbela ohenda oyi li oshinima shoka tashi vulu okweetela aantu uuwanawa? Oshike tashi ke tu kwathela tu kale tu na ohenda? Oshitopolwa tashi landula ko otashi ka kundathana omapulo ngaka.

[Oshimpungu pepandja 3]

•Mbela oshi li uunkundi ngele tatu sile yalwe ohenda?

•Mbela okukala nohenda oshi na enwethomo ewanawa?

•Omomikalo dhini tadhi longo to vulu okuulika ohenda?