Shoka tatu ilongo kuJesus

Kombinga yankene tu na okuungaunga nayalwe

Omolwashike tu na okukala aanahenda?

Mbela owu na ohenda naantu nonando kaye na ohenda nangoye? Ngele otwa hala okuholela Jesus, otu na okukala tu na ohenda nokuli nonaamboka ye tu tonde. Jesus okwa ti: “Ngele ne omu hole owala aantu mboka ye mú hole, otamu tegelele tuu epandulo lyasha? Oshoka naalunde wo oye hole aantu mboka ye ya hole. . . . Holeni aatondi yeni . . . , notamu ningi aana yaKalunga gwokombandambanda. Oshoka Kalunga oye omwaanawa kumboka ihaa pandula naamboka aakolokoshi.”—Lukas 6:32-36; 10:25-37.

Omolwashike tu na okukala hatu dhimine po yalwe?

Uuna twa ninga epuko, ohatu kala twa hala Kalunga e tu dhimine po. Jesus okwe tu longo kutya oshi li mondjila tu kale hatu galikana kuKalunga e tu dhimine po. (Mateus 6:12) Ihe Jesus okwa ti wo kutya Kalunga ote tu dhimine po owala uuna hatu dhimine po yalwe. Okwa ti: “Ngele hamu dhimine po aantu omayono gawo, nena Ho yeni yomegulu ote mú dhimine po wo omayono geni. Ihe ngele ihamu dhimine po aantu omayono gawo, nena Ho yeni yomegulu ite mú dhimine po omayono geni.”—Mateus 6:14, 15.

Ongiini omaukwanegumbo taga vulu okukala ga nyanyukwa?

Nonando Jesus ka li a hokana, otatu vulu okwiilonga oshindji kuye shi na ko nasha nankene tatu vulu okukala nuukwanegumbo wa nyanyukwa. Okwe tu tulila po oshiholelwa okupitila moohapu dhe nosho wo miilonga ye. Natu tale iitsa itatu tayi landula:

1. Omusamane oku na okukala e hole omukulukadhi gwe ngaashi e hole olutu lwe. Jesus okwa tulila po aasamane oshiholelwa. Okwa lombwele aalongwa ye a ti: “Oshipango oshipe otandi shi mú pe, mu holathane.” Ongiini ya li ye na okukala ye holathane? Okwa ti: “Ngashika naanaa [nangame] nda kala ndi mú hole.” (Johannes 13:34) Ombiimbeli otayi longitha ekotampango ndika shi na ko nasha naasamane tayi ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo. . . . Ano aalumentu oye na okuhola aakiintu yawo, naanaa ngashika ye hole omalutu gawo yene. Oshoka kaku na nando oongoka e tonde olutu lwe mwene, ihe kehe gumwe ohe lu palutha nohe lu sile oshimpwiyu, naanaa ngashika Kristus ha sile egongalo lye oshimpwiyu.”—Aaefeso 5:25, 28, 29.

2. Aaihokani kaye na okuyona ondjokana. Okuya momilalo pondje yondjokana oku li ondjo kuKalunga nohaku yono po omaukwanegumbo. Jesus okwa ti: ‘Inamu lesha nani kutya “omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe”? Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu. . . . Ihe ngame otandi mú lombwele: Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele.’—Mateus 19:4-9.

3. Aanona oye na okuvulika kaavali yawo. Nonando Jesus okwa li a gwanenena, manga a li omunona okwa li a vulika kaavali ye mboka ya li inaaya gwanenena. Ombiimbeli otayi popi kombinga yaJesus sho a li e na oomvula 12 tayi ti: “Jesus okwa zi mo pamwe [naavali ye] e taa shuna kuNasareti nokwa kala ha vulika kuyo.”—Lukas 2:51; Aaefeso 6:1-3.

Omolwashike tu na okutula miilonga omakotampango ngoka?

Jesus okwa popi shi na ko nasha niiyilongomwa mbyoka a longo aalongwa ye a ti: “Ngashingeyi omu shi uvite ko. One aanelago, ngele tamu shi ningi.” (Johannes 13:17) Opo tu kale Aakriste yashili, otu na okutula miilonga omayele ngoka Jesus e tu pa kombinga yankene tu na okuungaunga nayalwe. Okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.”—Johannes 13:35.

[Enyolo lyopevi]

Lya nyanyangidhwa kOonzapo dhaJehova.

Opo wu mone uuyelele owundji, tala ontopolwa 14 yembo Omalongo gashili gOmbiimbeli ogeni naanaa?

[Ethano pepandj 16, 17]

Eyele lyaJesus kombinga yomumati ngoka a hanagula po eliko lye otali tu longo esimano lyokukala nohenda nosho wo okudhimina po yalwe.—Lukas 15:11-32

[Ethano pepandja 19]

Aaihokani kaye na okuyona ondjokana